১১৬. ৱস্সং অনুপগন্তব্বট্ঠানকথা

২০৪. ৰুক্খসুসীৰেযেৱাতি ৰুক্খস্স ৱিৱৰে এৱ. ৱিৱৰঞ্হি সু সং ইৰতি গচ্ছতীতি সুসীৰোতি ৱুচ্চতি. পদৰচ্ছদনন্তি ফলকেহি ছাদিতং. পৱিসনদ্ৱাৰন্তি পৱিসননিক্খমনদ্ৱাৰং. পৱিসনঞ্চ নিক্খমনঞ্চ পৱিসনন্তি ৱিৰূপেকসেসেন কাতব্বং. খাণুমত্থকেতি খাণুনো উপৰি. ৱিটভীতি ৱিটং অঞ্ঞমঞ্ঞৱেধনং অপতি গচ্ছতীতি ৱিটপো, পকাৰস্স ভকাৰং, ইত্থিলিঙ্গজোতকঈপচ্চযঞ্চ কত্ৱা ৱিটভীতি ৱুচ্চতি. তত্থাতি অট্টকে. যস্সাতি ভিক্খুনো, নত্থীতি সম্বন্ধো. পঞ্চন্নং ছদনানন্তি তিণপণ্ণইট্ঠকাসিলাসুধাসঙ্খাতানং (চূড়ৱ. ৩০৩) পঞ্চন্নং ছদনানং. ইদঞ্চ যেভুয্যৱসেন ৱুত্তং পদৰচ্ছদনাদীনম্পি গহিতত্তা. দ্ৱাৰবন্ধনন্তি দ্ৱাৰেন বন্ধিতব্বং. ছৱকুটিকাতি ছৱানং সযনট্ঠানে সুসানে কতা কুটিকা ছৱকুটিকাতি ৱুচ্চতি. টঙ্কিতমঞ্চাদীতিআদিসদ্দেন টঙ্কিতপীঠং সঙ্গণ্হাতি. তত্থাতি ছৱকুটিযং. অঞ্ঞং কুটিকন্তি ছৱকুটিতো অঞ্ঞং কুটিকং. আৱৰণন্তি ভিত্তিং. দ্ৱাৰন্তি পৱিসননিক্খমনদ্ৱাৰং. ছত্তকুটিকা নামেসাতি এসা ছত্তেন কতা কুটিকা নাম. মহন্তেন কপল্লেন কুটিকং কত্ৱাতি সম্বন্ধো.