৭. পব্বজ্জাকথা

৩১. পোৰাণানুপোৰাণানন্তি পুৰাণে চ অনুপুৰাণে চ ভৱানং. একসট্ঠীতি একো চ সট্ঠি চ, একেন ৱা অধিকা সট্ঠি একসট্ঠি.

তত্ৰাতি তেসু একসট্ঠিমনুস্সঅৰহন্তেসু. পুব্বযোগোতি পুব্বে কতো উপাযো, পুব্বূপনিস্সযোতি অত্থো. ৱগ্গবন্ধেনাতি সমূহং কত্ৱা বন্ধেন. তেতি পঞ্চপঞ্ঞাস জনা. ঝাপেস্সামাতি ডয্হিস্সাম. নীহৰিংসূতি গামতো নীহৰিংসু. তেসূতি পঞ্চপঞ্ঞাসজনেসু. পঞ্চ জনে ঠপেত্ৱাতি সম্বন্ধো. সেসাতি পঞ্চহি জনেহি অৱসেসা. সোতি যসো দাৰকো. তেপীতি চত্তাৰোপি জনা. তত্থাতি সৰীৰে. তে সব্বেপীতি যসস্স মাতাপিতুভৰিযাহি সদ্ধিং সব্বেপি তে সহাযকা. তেনাতি পুব্বযোগেন.

আমন্তেসীতি কথেসি.

৩২. দিব্বেসু ৱিসযেসু ভৱা দিব্বা লোভপাসাতি দস্সেন্তো আহ ‘‘দিব্বা নামা’’তিআদি. লোভপাসাতি লোভসঙ্খাতা বন্ধনা. অসৱনতাতি এত্থ কৰণত্থে পচ্চত্তৱচনন্তি আহ ‘‘অসৱনতাযা’’তি. পৰিহাযন্তীতি এত্থ কেন পৰিহাযন্তীতি আহ ‘‘ৱিসেসাধিগমতো’’তি. ৱিসেসাধিগমতোতি মগ্গফলসঙ্খাতস্স ৱিসেসস্স অধিগমতো.

৩৩. অন্তং লামকং কৰোতীতি অন্তকোতি ৱচনত্থং দস্সেন্তো আহ ‘‘লামকা’’তি. ‘‘হীনসত্তা’’তি ইমিনা অন্তকস্স সৰূপং দস্সেতি. আমন্তনপদমেতং. তন্তি ৰাগপাসং. হীতি সচ্চং. সোতি মাৰো পাপিমা. অন্তলিক্খে চৰন্তানং পঞ্চাভিঞ্ঞানম্পি বন্ধনত্তা অন্তলিক্খে চৰতি পৱত্ততীতি অন্তলিক্খচৰোতি ৱচনত্থেন ৰাগপাসো ‘‘অন্তলিক্খচৰো’’তি মাৰেন পাপিমতা ৱুত্তো.

৩৪. নানাজনপদতোতি একিস্সাপি দিসায নানাজনপদতো. ‘‘অনুজানামি…পে… পব্বাজেথা’’তিআদিম্হি ৱিনিচ্ছযো এৱং ৱেদিতব্বোতি যোজনা. পব্বাজেন্তেন ভিক্খুনা পব্বাজেতব্বোতি সম্বন্ধো. যে পটিক্খিত্তা পুগ্গলাতি যোজনা. পৰতোতি পৰস্মিং. ‘‘ন ভিক্খৱে…পে… পব্বাজেতব্বো’’তি পাড়িং (মহাৱ. ৮৯) আদিং কত্ৱাতি যোজনা. তেতি পটিক্খিত্তপুগ্গলে. সোপি চাতি সোপি চ পুগ্গলো. অনুঞ্ঞাতোযেৱ পব্বাজেতব্বোতি সম্বন্ধো. তস্স চাতি পুগ্গলস্স চ, অথ ৱা তেসঞ্চ মাতাপিতূনং. ৱচনৱিপল্লাসো হেস. অনুজাননলক্খণং ৱণ্ণযিস্সামাতি সম্বন্ধো.

এৱন্তি ইমিনা ৱুত্তনযেন. চসদ্দো ৱাক্যসম্পিণ্ডনত্থো. সচে অচ্ছিন্নকেসো হোতি চ, সচে একসীমায অঞ্ঞেপি ভিক্খূ অত্থি চাতি অত্থো. অঞ্ঞেপীতি অত্তনা অপৰেপি. ভণ্ডূতি মুণ্ডো, সোযেৱ কম্মং ভণ্ডুকম্মং. তস্সাতি ভণ্ডুকম্মস্স. ওকাসোতি পব্বজ্জায খণো. ‘‘ওকাসং ন লভতী’’তি ৱত্ৱা তস্স কাৰণং দস্সেতুং ৱুত্তং ‘‘সচে’’তিআদি.

অৱুত্তোপীতি এত্থ পিসদ্দো ৱুত্তো পন কা নাম কথাতি দস্সেতি. উপজ্ঝাযং উদ্দিস্স পব্বাজেতীতি এত্থ পব্বজ্জা চতুব্বিধা তাপসপব্বজ্জা পৰিব্বাজকপব্বজ্জা সামণেৰপব্বজ্জা উপসম্পদপব্বজ্জাতি. তত্থ কেসমস্সুহৰণং তাপসপব্বজ্জা নাম ৱক্কলাদিগহণতো পঠমমেৱ ৱজিতব্বত্তা. ইসিপব্বজ্জাতিপি তস্সাযেৱ নামং. কেসমস্সুহৰণমেৱ পৰিব্বাজকপব্বজ্জা নাম কাসাযাদিগহণতো পঠমমেৱ ৱজিতব্বত্তা. কেসমস্সুহৰণঞ্চ কাসাযচ্ছাদনঞ্চ সামণেৰপব্বজ্জা নাম সৰণগহণতো পঠমমেৱ ৱজিতব্বত্তা. উপসম্পদপব্বজ্জা তিৱিধা এহিভিক্খুউপসম্পদপব্বজ্জা সৰণগহণূপসম্পদপব্বজ্জা ঞত্তিচতুত্থৱাচিকূপসম্পদপব্বজ্জাতি. তত্থ এহিভিক্খূপসম্পদপব্বজ্জাযং কেসমস্সুহৰণাদি সব্বং একতোৱ সম্পজ্জতি ‘‘এহি ভিক্খূ’’তি ভগৱতো ৱচনেন অভিনিপ্ফন্নত্তা. সৰণগহণূপসম্পদপব্বজ্জা সামণেৰপব্বজ্জসদিসাযেৱ. কেসমস্সুহৰণঞ্চ কাসাযচ্ছাদনঞ্চ সৰণগহণঞ্চ ঞত্তিচতুত্থৱাচিকূপসম্পদপব্বজ্জা নাম কম্মৱাচাগহণতো পঠমমেৱ ৱজিতব্বত্তা. তত্থ সামণেৰপব্বজ্জং সন্ধায ৱুত্তং ‘‘উপজ্ঝাযং উদ্দিস্স পব্বাজেতী’’তি. উপজ্ঝাযং উদ্দিস্সাতি উপজ্ঝাযস্স ৱেয্যাৱচ্চকৰট্ঠাননিযমং কত্ৱা. পব্বজ্জাকম্মে অত্তনো ইস্সৰিযমকত্ৱাতি অত্থো. দহৰেন ভিক্খুনা কেসচ্ছেদনং কাসাযচ্ছাদনং সৰণদানন্তি তীণি কিচ্চানি কাতব্বানিযেৱ. কেচি ‘‘সৰণানি পন সযং দাতব্বানী’’তি পাঠং ইধানেত্ৱা দহৰেন ভিক্খুনা সৰণানি ন দাতব্বানীতি ৱদন্তি, তং ন গহেতব্বং দহৰস্স ভিক্খুত্তা, ভিক্খূনং পব্বাজেতুং লভনত্তা চ. উপজ্ঝাযো চে কেসচ্ছেদনঞ্চ কাসাযচ্ছাদনঞ্চ অকত্ৱা পব্বজ্জত্থং সৰণানিযেৱ দেতি, ন ৰুহতি পব্বজ্জা পব্বজ্জায অকত্তব্বত্তা. কম্মৱাচং সাৱেত্ৱা উপসম্পাদেতি, ৰুহতি উপসম্পদা অপত্তচীৱৰানং উপসম্পদসিদ্ধিতো, কম্মৱিপত্তিযা অভাৱতো চ. খণ্ডসীমন্তি উপচাৰসীমট্ঠং বদ্ধসীমং. পব্বাজেত্ৱাতি কেসচ্ছেদনং সন্ধায ৱুত্তং ‘‘কাসাযানি অচ্ছাদেত্ৱা’’তি কাসাযচ্ছাদনস্স ৱিসুং ৱুত্তত্তা. সামণেৰস্স সৰণদানস্স অৰুহত্তা ‘‘সৰণানি পন সযং দাতব্বানী’’তি ৱুত্তং. পুৰিসং পব্বাজেতুন্তি সম্বন্ধো. হীতি সচ্চং. আণত্তিযাতি ভিক্খূনং আণত্তিযা. যেন কেনচীতি গহট্ঠপব্বজিতেসু যেন কেনচি.

‘‘ভব্বৰূপো’’তি ৱত্ৱা তস্স অত্থং দস্সেতুং ৱুত্তং ‘‘সহেতুকো’’তি. সহেতুকোতি মগ্গফলানং উপনিস্সযেহি সহ পৱত্তো. যসস্সীতি পৰিৱাৰযসেন চ কিত্তিযসেন চ সমন্নাগতো. ওকাসং কত্ৱাপীতি ওকাসং কত্ৱা এৱ. সযমেৱাতি ন অঞ্ঞো আণাপেতব্বো. এত্তোযেৱাতি দস্সনট্ঠানতোযেৱ. অস্সাতি পব্বজ্জাপেক্খস্স. খজ্জু ৱাতি কণ্ডুৱনং ৱা. ‘‘কচ্ছু ৱা’’তিপি পাঠো, পামং ৱাতি অত্থো. পিড়কা ৱাতি ফোটা ৱা. এত্তকেনাতি এতপমাণেন ঘংসিত্ৱা ন্হাপনমত্তেন. অনিৱত্তিধম্মাতি গিহিভাৱং অনিৱত্তনসভাৱা. কতঞ্ঞূতি কতস্সূপকাৰস্স জাননসীলা. কতৱেদিনোতি কতঞ্ঞূপকাৰস্স ৱেদং পাকটং কৰোন্তো.

অনিয্যানিককথাতি যাৱদত্থং সুপিত্ৱা যাৱদত্থং ভুঞ্জীত্ৱা চিত্তকেড়িং কৰোন্তো অনুক্কণ্ঠিতো ৱিহৰাহীতিআদিকা কথা. নকথেতব্বং দস্সেত্ৱা কথেতব্বং দস্সেন্তো আহ ‘‘অথখ্ৱস্সা’’তি. অস্সাতি পব্বজ্জাপেক্খস্স. আচিক্খনাকাৰং দস্সেন্তো আহ ‘‘আচিক্খন্তেন চা’’তিআদি. ৱণ্ণ…পে… ৱসেনাতি ৱণ্ণো চ সণ্ঠানঞ্চ গন্ধো চ আসযো চ ওকাসো চ, তেসং ৱসেন, আচিক্খিতব্বন্তি সম্বন্ধো. হীতি ফলজোতকো, আচিক্খনস্স ফলং ৱক্খামীতি অত্থো. সোতি পব্বজ্জাপেক্খো. পুব্বেতি পুব্বভৱে, পব্বজনতো পুব্বে ৱা. কণ্টকৱেধাপেক্খো পৰিপক্কগণ্ডো ৱিয ঞাণং পৱত্ততীতি যোজনা. অস্সাতি পব্বজ্জাপেক্খস্স. ইন্দাসনীতি সক্কস্স ৱজিৰাৱুধো. সো হি ইন্দেন অসীযতি খিপীযতীতি ইন্দাসনীতি ৱুচ্চতি. ইন্দাসনি পব্বতে চুণ্ণযমানা ৱিয সব্বে কিলেসে চুণ্ণযমানংযেৱাতি যোজনা. খুৰগ্গেযেৱাতি খুৰস্স কোটিযমেৱ. খুৰকম্মপৰিযোসানেযেৱাতি অত্থো. হীতি সচ্চং. তস্মাতি যস্মা পত্তা, তস্মা. অস্সাতি পব্বজ্জাপেক্খস্স.

গিহিগন্ধন্তি গেহে ঠিতস্স জনস্স গন্ধং. অথাপীতি যদিপি অচ্ছাদেতীতি সম্বন্ধো. অস্সাতি পব্বজ্জাপেক্খস্স. আচৰিযো ৱাতি সৰণদানাচৰিযো ৱা কম্মৱাচাচৰিযো ৱা ওৱাদাচৰিযো ৱা. তংযেৱ ৱাতি পব্বজ্জাপেক্খমেৱ ৱা. তেন ভিক্খুনাৱাতি আচৰিযুপজ্ঝাযভিক্খুনা এৱ.

অনাণত্তিযাতি আচৰিযুপজ্ঝাযেহি অনাণত্তিযা. ইমিনা আচৰিযুপজ্ঝাযেহি অনাণত্তেন যেন কেনচি নিৱাসনাদীনি ন কাতব্বানীতি দস্সেতি. ভিক্খুনাতি আচৰিযুপজ্ঝাযভিক্খুনা. তস্সেৱাতি পব্বজ্জাপেক্খস্সেৱ. উপজ্ঝাযমূলকেতি উপজ্ঝাযমূলকে নিৱাসনপাৰুপনে. অযন্তি ৱিনিচ্ছযো.

তত্থাতি পব্বজ্জূপসম্পদট্ঠানে. তেসন্তি ভিক্খূনং. অথাতি ৱন্দাপনতো পচ্ছা, ৱন্দাপনস্স অনন্তৰা ৱা. ‘‘এৱং ৱদেহী’’তি পাড়িনযনিদস্সনমুখেন ‘‘যমহং ৱদামি, তং ৱদেহী’’তি অট্ঠকথানযং নিদস্সেতি. অথাতি তদনন্তৰং. অস্সাতি পব্বজ্জাপেক্খস্স, দাতব্বানীতি সম্বন্ধো. একপদম্পীতি তীসু ৱাক্যপদেসু একং ৱাক্যপদম্পি, নৱসু ৱা ৱিভত্যন্তপদেসু একপদম্পি. একক্খৰম্পীতি চতুৱীসতক্খৰেসু একক্খৰম্পি.

একতো সুদ্ধিযাতি একস্সেৱ কম্মৱাচাচৰিযস্স ঠানকৰণসম্পত্তিযা সুজ্ঝনেন. উভতো সুদ্ধিযাৱাতি উভযেসং সৰণদানাচৰিযসামণেৰানং সুজ্ঝনেন এৱ. ঠানকৰণসম্পদন্তি উৰআদিট্ঠানানঞ্চ সংৱুতাদিকৰণানঞ্চ সম্পদং. ৱত্তুন্তি ঠানকৰণসম্পদং ৱত্তুং. ন সক্কোতীতি ৱত্তুং ন সক্কোতীতি যোজনা.

ইমানীতি সৰণানি. চসদ্দো উপন্যাসো, পনসদ্দো পদালঙ্কাৰো. একসম্বন্ধানীতি একতো সম্বন্ধানি. অনুনাসিকন্তং কত্ৱা দানকালে ‘‘বুদ্ধং’’ইতি ‘‘সৰণং’’ইতি পদানঞ্চ ‘‘সৰণং’’ইতি ‘‘গচ্ছামি’’ইতি পদানঞ্চ অন্তৰা ৱিচ্ছেদমকত্ৱা একসম্বন্ধমেৱ কত্ৱা দাতব্বানীতি ৱুত্তং হোতি. কস্মা তিণ্ণং পদানমন্তৰা ব্যৱধানস্স কস্সচি অক্খৰস্স অভাৱতো. ৱিচ্ছিন্দিত্ৱাতি ৱিচ্ছেদং কত্ৱা. মকাৰন্তং কত্ৱা দানকালে তিণ্ণং পদানমন্তৰা একসম্বন্ধমকত্ৱা ৱিচ্ছিন্দিত্ৱা এৱ কত্ৱা দাতব্বানীতি ৱুত্তং হোতি. কস্মা? তিণ্ণং পদানমন্তৰা ব্যৱধানস্স নিস্সৰস্স মকাৰস্স অত্থিভাৱতো. অন্ধকট্ঠকথাযং ৱুত্তন্তি সম্বন্ধো. তন্তি ৱচনং, ‘‘নত্থী’’তিপদে কত্তা, ‘‘ন ৱুত্ত’’ন্তিপদে কম্মং. তথাতি ‘‘অহং ভন্তে বুদ্ধৰক্খিতো’’তিআদিনা আকাৰেন, অৱদন্তস্স সৰণং ন কুপ্পতি, বুকাৰদকাৰাদীনং ব্যঞ্জনানং ঠানকৰণসম্পদং হাপেন্তস্সেৱ সৰণং কুপ্পতীতি অধিপ্পাযো.

‘‘তিক্খত্তু’’ন্তি ইমিনা সকিং ৱা দ্ৱিক্খত্তুং ৱা ন ৱট্টতীতি দীপেতি. তিক্খত্তুতো অধিকং পন সহস্সক্খত্তুম্পি ৱট্টতিযেৱ. তত্থাতি তাসু পব্বজ্জাউপসম্পদাসু. পৰতোতি পৰস্মিং. সাতি উপসম্পদা. পব্বজ্জা পন অনুঞ্ঞাতা এৱাতি সম্বন্ধো. পৰতোপীতি পিসদ্দো পুব্বাপেক্খো. সাতি পব্বজ্জা. এত্তাৱতাতি এত্তকেন কেসচ্ছেদনকাসাযচ্ছাদনসৰণদানেন. হীতি ফলজোতকো.

এসাতি এসো সামণেৰোতি অত্থো. ‘‘গতিমা’’তি ৱত্ৱা তস্সত্থং দস্সেন্তো আহ ‘‘পণ্ডিতজাতিকো’’তি. অথাতি এৱং সতি. অস্সাতি সামণেৰস্স. তস্মিংযেৱ ঠানেতি সামণেৰভূমিযং ঠিতট্ঠানেযেৱ. যথা ভগৱতা উদ্দিট্ঠানি, তথা উদ্দিসিতব্বানীতি যোজনা. এতন্তি ‘‘অনুজানামি…পে… জাতৰূপ ৰজতপটিগ্গহণা ৱেৰমণী’’তি ৱচনং.

তন্তি অন্ধকট্ঠকথাযং ৱুত্তৱচনং. যথাপাড়িযাৱাতি এৱসদ্দো সন্নিট্ঠানত্থো, তেন যথাপাড়িযাৱ উদ্দিসিতব্বানি. যথাপাড়িং ৱিসজ্জেত্ৱা অঞ্ঞথা এৱ উদ্দিসিতব্বানীতি ৱাদং নিৱাৰেতি. যথাপাড়িং ৱিসজ্জেত্ৱা অঞ্ঞথা ‘‘পাণাতিপাতা ৱেৰমণিং সিক্খাপদং সমাদিযামী’’তি উদ্দিসন্তোপি নিদ্দোসোযেৱ. হীতি সচ্চং, যস্মা ৱা. তানীতি সিক্খাপদানি. যাৱাতি যত্তকং কালং ন জানাতি, ন কুসলো হোতীতি সম্বন্ধো. সন্তিকাৱচৰোযেৱাতি আচৰিযুপজ্ঝাযানং সমীপে অৱচাৰোৱ. অস্সাতি সামণেৰস্স. কপ্পিযাকপ্পিযন্তি দসসিক্খাপদৱিনিমুত্তং কপ্পিযং পৰামাসাদিঞ্চ অকপ্পিযং অপৰামাসাদিঞ্চ. তেনাপীতি সামণেৰেনাপি. নাসনঙ্গানীতি লিঙ্গনাসনঅঙ্গানি. সাধুকং সিক্খিতব্বন্তি সাধুকং অসিক্খন্তস্স লিঙ্গনাসনঞ্চ দণ্ডকম্মনাসনঞ্চ হোতীতি অধিপ্পাযো.