৫৯. গমিকাদিনিস্সযৱত্থুকথা

১২১. ‘‘কৰণীযনিস্সযো’’তি ইমিনা নিস্সযগহণং নিস্সযো উত্তৰপদলোপৱসেন, সো কৰণীযো ইমস্সাতি নিস্সযকৰণীযোতি ৱিসেসনপৰনিপাতভাৱং দস্সেতি. নিস্সযং অলভমানেনাতি এত্থ কিং নিস্সযস্স অলভনং নামাতি আহ ‘‘অত্তনা’’তিআদি. ৱুত্থপুব্বন্তি ৱসিতপুব্বং. একৰত্তং ৱসন্তেনাপীতি পিসদ্দো দ্ৱিৰত্তাদিকে কা নাম কথাতি দস্সেতি. ৱিস্সমন্তো ৱা সত্থং পৰিযেসন্তো ৱা হুত্ৱাতি যোজনা. নাৱায গচ্ছন্তস্সাতি নাৱায অদ্ধানমগ্গং পটিপন্নস্স.

যাচিযমানেনাতি এত্থ বহুকত্তুপসঙ্গত্তা ৱুত্তং ‘‘তেন গিলানেনা’’তি. ‘‘মানেনা’’তি ইমিনা যাচিতুমসক্কুণেয্যতাদীনি নিৱত্তেতি.

ফাসু হোতীতি এত্থ আৱাসসপ্পাযাদিৱসেন ফাসু হোতীতি আসঙ্কা ভৱেয্যাতি আহ ‘‘সমথৱিপস্সনানং পটিলাভৱসেনা’’তি. হীতি সচ্চং. ইমং পৰিহাৰন্তি ইমং ফাসুৱিহাৰপৰিহাৰং. থামগতায ৱিপস্সনাযাতি যোজনা. সমথো ৱা তৰুণো হোতীতি যোজনা. এতস্সেৱাতি তৰুণসমথৱিপস্সনিকস্সেৱ ভিক্খুনো. তস্স নিস্সাযাতি এত্থ তস্স ওৱাদং নিস্সাযাতি যোজনা. অথ ৱা উপযোগত্থে সামিৱচনং. তং নিস্সযদাযকং নিস্সাযাতি হি অত্থো. যত্তকো কালো আসড়্হীপুণ্ণমা অত্থি, তত্তকং কালন্তি যোজনা. ‘‘আসড়্হীপুণ্ণমা’’তি এত্থ ‘‘যাৱা’’তি নিপাতপযোগত্তা অভিৱিধিঅৱঝত্থে নিস্সক্কৱচনং দট্ঠব্বং. যত্থাতি যস্মিং ঠানে.

১২২. পাড়িযং গোত্তেনপীতি এত্থ পিসদ্দেন ন কেৱলং নামেনেৱ, অথ খো গোত্তেনপি সাৱেতুন্তি দস্সেতি. তস্মা ‘‘আযস্মতো পিপ্পলিস্সা’’তি নামং সাৱেত্ৱাতিপি ‘‘আযস্মতো মহাকস্সপস্সা’’তি গোত্তং সাৱেত্ৱাপি অনুসাৱেতব্বং. তেন ৱুত্তং ‘‘মহাকস্সপস্সা’’তিআদি. ইমিনা ‘‘কোনামো তে উপজ্ঝাযো? উপজ্ঝাযো মে ভন্তে আযস্মা মহাকস্সপো নামা’’তিআদীসু গোত্তম্পি নামেনেৱ সঙ্গহিতন্তি সিদ্ধং হোতি.

১২৩. একানুসাৱনেতি পদস্স সমানাধিকৰণবাহিৰত্থসমাসভাৱং নিৱত্তেন্তো আহ ‘‘একতো অনুসাৱনে’’তি. তত্থ একতোতি একক্খণে, একপহাৰেন ৱা. ৱক্খতি হি ‘‘একক্খণে’’তি চ ‘‘একপহাৰেনেৱা’’তি চ. ইমিনা একতো অনুসাৱনমেতেসন্তি একানুসাৱনাতি অসমানাধিকৰণবাহিৰত্থসমাসং দস্সেতি. একেনাতি একেন অনুসাৱনাচৰিযেন. একস্সাতি একস্স উপসম্পদাপেক্খস্স. ‘‘একক্খণে’’তি ইমিনা ‘‘একতো’’তি পদস্স অত্থং দস্সেতি. ‘‘উপসম্পাদেতু’’ন্তি দ্ৱিন্নং উপসম্পদাপেক্খানং উপসম্পাদেতুং.

পুৰিমনযেনেৱাতি ‘‘একেন একস্স, অঞ্ঞেন ইতৰস্সা’’তিআদিনা পুব্বে ৱুত্তনযেনেৱ. একতো অনুসাৱনে কাতুন্তি ‘‘একেন একস্স, অঞ্ঞেন অঞ্ঞস্স, ইতৰেন ইতৰস্সা’’তি এৱং তীহি আচৰিযেহি তিণ্ণং উপসম্পদাপেক্খানং একক্খণে অনুসাৱনে কাতুং. তঞ্চ খোতি এত্থ তসদ্দস্স ‘‘অনুসাৱনে কাতু’’ন্তি পদস্সেৱ অত্থৱিসযতং দস্সেতুং ৱুত্তং ‘‘অনুসাৱনকিৰিয’’ন্তি. দ্ৱে ৱা তযো ৱাতি এত্থ ৱাসদ্দো অনিযমৱিকপ্পত্থো. সচে একেনাচৰিযেন দ্ৱে অনুসাৱেতি, ‘‘অযং বুদ্ধৰক্খিতো চ অযং ধম্মৰক্খিতো চা’’তি অনুসাৱেতব্বা. সচে তযো অনুসাৱেতি, ‘‘অযং বুদ্ধৰক্খিতো চ অযং ধম্মৰক্খিতো চ অযং সঙ্ঘৰক্খিতো চা’’তি অনুসাৱেতব্বা. যথা একেনাচৰিযেন দ্ৱে ৱা তযো ৱা একতো অনুসাৱেতব্বা, এৱং দ্ৱীহি ৱা তীহি ৱা আচৰিযেহি একো অনুসাৱেতব্বোতিপি ৱদন্তি. একেন উপজ্ঝাযেন কৰণভূতেন, একো উপজ্ঝাযো হুত্ৱাতি ৱা অত্থো. ‘‘একপহাৰেনেৱা’’তি ইমিনা ‘‘একতো’’তি পদস্স অত্থং দস্সেতি. দ্ৱে তিস্সো কম্মৱাচাতি দ্ৱীহি আচৰিযেহি দ্ৱে, তীহি আচৰিযেহি তিস্সো কম্মৱাচা. একেন উপজ্ঝাযেন অনুসাৱনে একো ৱা দ্ৱে ৱা তযো ৱা আচৰিযা ৱট্টন্তি, নানুপজ্ঝাযেন অনুসাৱনে পন নানাচৰিযা এৱ ৱট্টন্তীতি দস্সেন্তো আহ ‘‘সচে পনা’’তিআদি. তিস্সত্থেৰোতি কম্মৱাচাচৰিযভূতো তিস্সত্থেৰো. সুমনত্থেৰস্সাতি উপজ্ঝাযভূতস্স সুমনত্থেৰস্স. ইদন্তি নানুপজ্ঝাযেন একস্সাচৰিযস্সানুসাৱনং. এস পটিক্খেপোতি ‘‘ন ত্ৱেৱ নানুপজ্ঝাযেনা’’তি এসো পটিক্খেপো.