৪৮. থেয্যসংৱাসকৱত্থুকথা

১১০. পাৰিজঞ্ঞপত্তস্সাতি পৰিহাযতীতি পৰিজানি, ইস্সৰিযভোগাদি, তস্স ভাৱো পাৰিজঞ্ঞং, ইস্সৰিযভোগাদিক্খযো, তং পত্তোতি পাৰিজঞ্ঞপত্তো, তস্স. ‘‘পাৰিজুঞ্ঞপত্তস্সা’’তিপি উকাৰেন সহ পাঠো অত্থি. খীণকোলঞ্ঞোতি এত্থ কুলে জাতা কোলঞ্ঞা, ণ্যপচ্চযো, নকাৰাগমো. খীণা কোলঞ্ঞা অস্সাতি খীণকোলঞ্ঞোতি ৱচনত্থং দস্সেন্তো আহ ‘‘মাতিপক্খপিতিপক্খতো’’তিআদি. তত্থ মাতিপক্খপিতিপক্খতোতি মাতুযা পক্খো মাতিপক্খো, পিতুনো পক্খো পিতিপক্খো, মাতিপক্খো চ পিতিপক্খো চ মাতিপক্খপিতিপক্খা. ফাতিং কাতুন্তি এত্থ ফা-ধাতু ৱড্ঢনত্থোতি আহ ‘‘ৱড্ঢেতু’’ন্তি. ‘‘পুচ্ছিযমানো’’তি ইমিনা অনুযুঞ্জিযমানোতি এত্থ অনুত্যূপসগ্গৱসেন যুজসদ্দো পুচ্ছনত্থোতি দস্সেতি.

থেয্যসংৱাসকোতি থেননং থেয্যং নকাৰস্স যকাৰং কত্ৱা, থেয্যায সংৱাসকো ইমস্সাতি থেয্যসংৱাসকো. এত্থ চ ন কেৱলং ৱস্সগণনাদিকোযেৱ সংৱাসো নাম হোতি, অথ খো থেয্যায লিঙ্গগহণম্পি সংৱাসোযেৱ নাম. তস্মা তস্স তিৱিধভাৱং দস্সেন্তো আহ ‘‘তযো’’তিআদি. তত্থ লিঙ্গং থেনেতীতি লিঙ্গথেনকো, এসেৱ নযো ইতৰেসুপি. তমত্থং ৱিত্থাৰেন্তো আহ ‘‘তত্থা’’তিআদি. তত্থ যোতি থেয্যসংৱাসকো. লিঙ্গমত্তস্সেৱাতি এত্থ মত্তসদ্দেন সংৱাসাদযো নিৱত্তেতি.

ৱিদেসন্তি অত্তনো দেসতো ৱিযোগং দেসং. ৱিসদ্দো হেত্থ ৱিযোগত্থৱাচকো. অথ ৱা ৱি দূৰং দেসং. ৱিসদ্দো হেত্থ দূৰত্থৱাচকো. মুসাতি অভূতত্থে দুতিযন্তনিপাতো, অভূতং ৱচনন্তি অত্থো. পটিবাহতীতি অঞ্ঞে নিৱাৰেতি. সংৱাসথেনকো নামাতি এত্থ কো সংৱাসো নাম, ননু এককম্মাদিকোতি আহ ‘‘ভিক্খুৱস্সগণনাদিকো’’তিআদি. ভিক্খুৱস্সগণনাদিকোতি আদিসদ্দেন যথাৱুড্ঢং ৱন্দনসাদিযনং আসনপটিবাহনং উপোসথপৱাৰণাদীসু সন্দিস্সনন্তি ইমানি সঙ্গণ্হাতি. ‘‘কিৰিযভেদো’’তি ইমিনা সং একতো ৱসিযতি অনেনাতি সংৱাসোতি ৱচনত্থেন কিৰিযভেদো সংৱাসো নামাতি দস্সেতি. ইমস্মিং অত্থেতি ইমস্মিং ৱত্থুম্হি, ইমস্মিং ঠানেতি অত্থো. ইমিনা পাৰাজিকাদিট্ঠানে পন এককম্মাদিকো সংৱাসো নামাতি দস্সেতি.

‘‘লিঙ্গস্স চেৱ সংৱাসস্স চা’’তি ইমিনা উভযথেনকোতি এত্থ উভযসৰূপং দস্সেতি.

এত্থাতি থেয্যসংৱাসকট্ঠানে. ৰাজ…পে… ভযেহি ৱাতি এত্থ ভযসদ্দো পচ্চেকং যোজেতব্বো. ৰাজভযেন চ দুব্ভিক্খভযেন চ কন্তাৰভযেন চ ৰোগভযেন চ ৱেৰিভযেন চাতি হি অত্থো. চীৱৰগহণত্থন্তি চীৱৰাহৰণত্থং, অযমেৱ ৱা পাঠো. ৱাসদ্দো হেত্ৱত্থং ৱা সম্পদানত্থং ৱা সম্পিণ্ডেতি. অযং গাথা ৱিভত্তিযা উপ্পটিপাটিত্তা ভগ্গৰীতিসঙ্খাতা অলঙ্কাৰদোসা ন মুত্তা. লিঙ্গন্তি সমণলিঙ্গং. ইধাতি ইমস্মিং সাসনে.

নাধিৱাসেতীতি ন সম্পটিচ্ছতি. যাৱাতি যত্তকং কালং, অযং পনেত্থ যোজনা – ইধ যো ৰাজ…পে… ভযেন ৱা চীৱৰগহণত্থং ৱা লিঙ্গং আদিযতি, সো সুদ্ধমানসো হুত্ৱা যাৱ সংৱাসং নাধিৱাসেতি, তাৱ এসো ‘‘থেয্যসংৱাসকো নামা’’তি ন ৱুচ্চতীতি.

তত্ৰাতি তাসু গাথাসু. ইধাতি ইমস্মিং সাসনে. এৱন্তি লিঙ্গে গহিযমানে. তস্মিন্তি জনে. অনোসৰিত্ৱাৱাতি অনোক্কমিত্ৱাৱ. লিঙ্গং অপনেত্ৱাতি সযং গহিতং সমণলিঙ্গং ৱিনাসেত্ৱা. পব্বজিতালযন্তি পব্বজিতছাযং. পুব্বেতি সংৱাসথেনকে.

সব্বপাসণ্ডিযভত্তানীতি সব্বানি পাসণ্ডং উদ্দিস্স দিন্নানি ভত্তানি.

সত্তে ৱহতীতি সত্তৱাহো. ৱিৰমিতব্বন্তি ৱেৰং, তং পৱত্তেতীতি ৱেৰিকো. কাযেন পৰিহৰিতব্বানীতি কাযপৰিহাৰিযানি. তন্তি তুৱং. হীনাযাৱত্তভাৱন্তি হীনায গিহিভাৱায আৱত্তভাৱং.

উপ্পব্বজিত্ৱাতি পব্বজৱিযোগং কত্ৱা. তমত্থন্তি উপ্পব্বজিতসঙ্খাতমত্থং. অস্সাতি মহাসামণেৰস্স.

মহন্তো ৱাতি এত্থ ৱাসদ্দো গৰহত্থো. পগেৱ দহৰোতি দস্সেতি. অব্যত্তো হোতীতি যোজনা. সোতি সামণেৰো.

ৱচ্ছগোৰক্খাদীনীতি এত্থ ৱচ্ছোতি তৰুণগোণো. সো হি মাতুসন্তিকে ৱসতীতি ৱচ্ছো. মাতুযা ৱিযোগকালে ৱা ৱস্সতীতি ৱচ্ছোতি ৱুচ্চতি. ইমিনা দম্মগৱজৰগ্গৱাপি সামঞ্ঞতো গহিতা. গো ৱুচ্চতি খেত্তভূমি. ৱচ্ছো চ গো চ ৱচ্ছগৱা, তেসং ৰক্খনং ৱচ্ছগোৰক্খো, সো আদি যেসং কসিকম্মাদীনন্তি ৱচ্ছগোৰক্খাদীনি. ‘‘সূপসম্পন্নো’’তি ইমিনা গহট্ঠম্পি সচে উপসম্পাদেতি, সূপসম্পন্নোতি দস্সেতি. অনুপসম্পন্নকালেযেৱাতি সামণেৰকালেযেৱ. ৱিনযৱিনিচ্ছযেতি ৱিনযে ৱুত্তস্স থেয্যসংৱাসকস্স ৱিনিচ্ছযে. থেয্যসংৱাসকো হোতি লিঙ্গস্স অপনীতত্তা.

থেয্যসংৱাসকো ন হোতি সলিঙ্গে ঠিতত্তা. অযম্পি থেয্যসংৱাসকো ন হোতি কাসাযে সউস্সাহত্তা. থেয্যসংৱাসকো হোতি কাসাযে ধুৰস্স নিক্খিত্তত্তা.

থেয্যসংৱাসকো ন হোতি সলিঙ্গে ঠিতত্তা. নেৱ থেয্যসংৱাসকো হোতি কাসাযে সউস্সাহত্তা. মেথুনসেৱনাদীহীতিআদিসদ্দেন পাণাতিপাতাদযো সঙ্গণ্হাতি. থেয্যসংৱাসকো হোতি কাসাযে ধুৰস্স নিক্খিত্তত্তা. ওৱট্টিকন্তি অধোৱট্টেন কৰণং. ৰক্খতি তাৱাতি তাৱ ৰক্খতি ৱীমংসনেন নিৱাসিতত্তা. লিঙ্গন্তি সমণলিঙ্গং. থেয্যসংৱাসকো হোতি গিহিলিঙ্গস্স সম্পটিচ্ছিতত্তা.

ৱীমংসতি ৱা সম্পটিচ্ছতি ৱা ৰক্খতিযেৱ ওদাতৱত্থস্স অন্তোকাসাযভাৱতো. ‘‘ভিক্খুনিযাপি এসেৱ নযো’’তি ৱুত্তমেৱত্থং ৱিভাৱেন্তো আহ ‘‘সাপী’’তিআদি.

ৱুড্ঢপব্বজিতো সামণেৰোতি সম্বন্ধো. পাড়িযম্পীতি পন্তিযম্পি. সেনো মংসপেসিং গহেত্ৱা গচ্ছতি ৱিয ভত্তপিণ্ডে পত্তং উপনামেত্ৱা গহেত্ৱা গচ্ছতি. থেয্যসংৱাসকো ন হোতি ৱস্সানং অগণনত্তা.