৩৫. কম্মাৰভণ্ডুৱত্থুআদিকথা

৯৮. তুলাধাৰমুণ্ডকোতি মানভণ্ডধাৰো মুণ্ডকো. ইমিনা কম্মাৰভণ্ডূতি এত্থ কম্মাৰসদ্দো তুলাধাৰপৰিযাযো, ভণ্ডুসদ্দো মুণ্ডকপৰিযাযোতি দস্সেতি. তুলাধাৰো হি অলঙ্কাৰৱিকতিকৰণত্থায কম্মং অৰতি জানাতীতি কম্মাৰোতি ৱুচ্চতি. মুণ্ডকো ভণ্ডীযতি ‘‘মুণ্ডো’’তি পৰিভাসীযতীতি ভণ্ডূতি ৱুচ্চতি. ‘‘সুৱণ্ণকাৰপুত্তো’’তি ইমিনা তস্স সৰূপং দস্সেতি. অপলোকেতুন্তি এত্থ অপপুব্বো লোকসদ্দো আপুচ্ছনত্থোতি আহ ‘‘আপুচ্ছিতু’’ন্তি. ‘‘ভণ্ডুকম্মত্থাযা’’তি ইমিনা ভণ্ডুকম্মাযাতি এত্থ তদত্থে চতুত্থীতি দস্সেতি. তত্ৰাতি ‘‘সঙ্ঘং অপলোকেতু’’ন্তিআদিৱচনে. সীমাপৰিযাপন্নেতি ৱিহাৰসীমায ৱা উপচাৰসীমায ৱা পৰিযাপন্নে. তত্থাতি ভিক্খূনং সন্নিপাতট্ঠানং. এত্থ চাতি আপুচ্ছনে চ. ৱত্তুং ৱট্টতিযেৱাতি পঞ্চসু ৱাক্যেসু যংকিঞ্চি ৱাক্যং কথেতুং ৱট্টতিযেৱ. পিসদ্দেন ‘‘ইমস্স মুণ্ডকম্মং আপুচ্ছামী’’তি ৱাক্যম্পি সঙ্গণ্হাতি.

তেসন্তি ৱীসতিআদীনং ভিক্খূনং. ‘‘দহৰভিক্খূ ৱা সামণেৰে ৱা’’তি ইদং আসন্নৱসেন ৱুত্তং. গিহিম্পি পেসেত্ৱা আপুচ্ছাপেতুং ৱট্টতি. কস্মা? ‘‘পব্বজ্জাপেক্খং ৱিনা ৱা’’তি ৱুত্তত্তা.

পব্বাজেন্তস্স অনাপত্তিযেৱ, সুপব্বজিতোতি আহ ‘‘পব্বাজেন্তস্সাপি অনাপত্তী’’তি.

আপুচ্ছিতং পগেৱাতি যোজনা. খণ্ডসীমাযন্তি ৱিহাৰসীমায ৱা উপচাৰসীমায ৱা অব্ভন্তৰে ঠিতাযং খণ্ডসীমাযং. যো পনাতি পব্বজ্জাপেক্খো পন. ৱিব্ভন্তকো ৱাতি নৱৱিব্ভন্তকো ৱা. পব্বজিতানং দ্ৱঙ্গুলকেসো ৱট্টতীতি আহ ‘‘দ্ৱঙ্গুলকেসো ৱা’’তি. দ্ৱীহি অঙ্গুলীহি অতিৰিত্তো কেসো ইমস্সাতি দ্ৱঙ্গুলাতিৰিত্তকেসো. একসিখামত্তধৰোপি হোতীতি যোজনা.

১০০. মাৰব্যাধিনাতি মাৰণাবাধো. সো হি সত্তানং মাৰণট্ঠেন, ৱিৱিধস্স চ দুক্খস্স আদহট্ঠেন মাৰব্যাধীতি ৱুচ্চতি. ইমিনা অহিৱাতকৰোগেনাতি এত্থ অহিৱিসসদিসেন ৱাতেন পৱত্তো ৰোগো অহিৱাতকৰোগোতি ৱুচ্চতীতি দস্সেতি. তমত্থং ৱিত্থাৰেন্তো আহ ‘‘যত্ৰ হী’’তিআদি. তত্থ যত্ৰাতি যস্মিং কুলে. সো ৰোগো তস্মিং কুলে দ্ৱিপদে চতুপ্পদে পঠমং গণ্হাতি, পচ্ছা গেহসামিকে গণ্হাতীতি ধম্মপদঅট্ঠকথাযং (ধ. প. অট্ঠ. ১.সামাৱতীৱত্থু) ৱুত্তং. তথাতি যথা অঞ্ঞো ভিত্তিং ৱা ছদনং ৱা ভিন্দিত্ৱা পলাযিত্ৱা তিৰোগামাদিগতো ৱা হুত্ৱা মুচ্চতি, তথা. এত্থ চ কুলে পিতাপুত্তা মুচ্চিংসূতি অত্থো.

কাকুড্ডেপকন্তি এত্থ কাকে উড্ডাপেতীতি কাকুড্ডেপকো, কাকে ৱা উড্ডাপেত্ৱা ভত্তং ভুঞ্জিতুং সক্কোতীতি কাকুড্ডেপকোতি ৱচনত্থং দস্সেন্তো আহ ‘‘যো ৱামহত্থেনা’’তিআদি. তত্থ উড্ডাপেত্ৱাতি উদ্ধং আকাসং গমনাপেত্ৱা. তন্তি কাকুড্ডেপকং.

১০২. ইত্তৰসদ্দো অপ্পমত্তকৱাচকো অনিপ্ফন্নপাটিপদিকোতি আহ ‘‘অপ্পমত্তকো’’তি. ‘‘কতিপাহমেৱা’’তি ইমিনা তস্স অত্থং দস্সেতি.