৬. আৰামৱগ্গো

১. পঠমসিক্খাপদ-অত্থযোজনা

১০২৫. আৰামৱগ্গস্স পঠমে উপচাৰন্তি অপৰিক্খিত্তস্স আৰামস্স পৰিক্খেপাৰহট্ঠানং উপচাৰং.

১০২৭. ‘‘সীসানুলোকিকা’’তি সামঞ্ঞতো ৱুত্তেপি ভিক্খুনীনমেৱ সীসন্তি আহ ‘‘ভিক্খুনীন’’ন্তি. যত্থাতি যস্মিং ঠানেতি. পঠমং.

২. দুতিযসিক্খাপদং

১০২৮. দুতিযে অব্ভন্তৰোতি অব্ভন্তৰে পৰিযাপন্নো, জাতো ৱা. ‘‘সঙ্কামেসী’’তি ইমিনা সংহৰীতি এত্থ হৰধাতুযা সঙ্কমনত্থং দস্সেতি. ন্হাপিতাতি কপ্পকা. তে হি নহাপেন্তি সোচাপেন্তীতি ন্হাপিতাতি ৱুচ্চন্তি. তন্তি কাসাৱনিৱাসনন্তি. দুতিযং.

৩-৪. ততিয-চতুত্থসিক্খাপদং

১০৩৬. ততিযচতুত্থেসু অনুত্তানট্ঠানং নত্থীতি. ততিযচতুত্থানি.

৫. পঞ্চমসিক্খাপদং

১০৪৩. পঞ্চমে ‘‘কুলে মচ্ছৰো’’তি এত্থ মচ্ছৰনং মচ্ছৰোতি ৱচনত্থো কাতব্বো. ‘‘তং কুলং অস্সদ্ধং অপ্পসন্ন’’ন্তি কুলস্স অৱণ্ণং ভাসতীতি যোজনা. ‘‘ভিক্খুনিযো দুস্সীলা পাপধম্মা’’তি ভিক্খুনীনং অৱণ্ণং ভাসতীতি যোজনা.

১০৪৫. ‘‘সন্তংযেৱ আদীনৱ’’ন্তি সম্বন্ধিযা সম্বন্ধং দস্সেতুং ৱুত্তং ‘‘কুলস্স ৱা ভিক্খুনীনং ৱা’’তি ইমিনা দ্ৱীসু অঞ্ঞতৰমেৱ ন সম্বন্ধো হোতি, অথ খো দ্ৱযম্পীতি দস্সেতীতি. পঞ্চমং.

৬. ছট্ঠসিক্খাপদং

১০৪৮. ছট্ঠে ওৱাদাযাতি এত্থ ন যো ৱা সো ৱা ওৱাদো হোতি, অথ খো গৰুধম্মোযেৱাতি আহ ‘‘গৰুধম্মত্থাযা’’তি. সহ ৱসতি এত্থ, এতেনাতি ৱা সংৱাসোতি ৱচনত্থেন উপোসথপৱাৰণা সংৱাসো নামাতি আহ ‘‘উপোসথপৱাৰণাপুচ্ছনত্থাযা’’তি. ‘‘পুচ্ছনত্থাযা’’তি ইমিনা ‘‘সংৱাসাযা’’তি এত্থ উত্তৰপদলোপভাৱং দস্সেতি. এত্থাতি ভিক্খুনিৱিভঙ্গে, সিক্খাপদে ৱা পাড়িযং ৱাতি. ছট্ঠং.

৭-৯. সত্তম-অট্ঠম-নৱমসিক্খাপদং

১০৫৩. সত্তমট্ঠমনৱমেসু অনুত্তানৱচনং নত্থি. কেৱলং পন ‘‘ইমিস্সাপী’’তি পদং ৱিসেসো, ইমিস্সাপি পাড়িযাতি অত্থোতি. সত্তমট্ঠমনৱমানি.

১০. দসমসিক্খাপদং

১০৬২. দসমে দ্ৱে কাযা উপৰিমকাযো হেট্ঠিমকাযোতি. তত্থ কটিতো উদ্ধং উপৰিমকাযো, হেট্ঠা হেট্ঠিমকাযো. তত্থ ‘‘পসাখে’’তি ইদং হেট্ঠিমকাযস্স নামন্তি আহ ‘‘অধোকাযে’’তি. হীতি সচ্চং. ততোতি অধোকাযতো. ইমিনা পঞ্চমীবাহিৰত্থসমাসং দস্সেতি. ৰুক্খস্স সাখা পভিজ্জিত্ৱা গতা ৱিয উভো ঊৰূ পভিজ্জিত্ৱা গতাতি যোজনা.

১০৬৫. ফালেহীতি এত্থ ইতিসদ্দো আদ্যত্থো. তেন ‘‘ধোৱা’’তিআদীনি চত্তাৰি পদানি সঙ্গণ্হাতি. আণত্তিদুক্কটানীতি হেট্ঠা ৱুত্তেসু অট্ঠসু দুক্কটেসু ৱিনযদুক্কটমেৱ. সেসেসূতি ভিন্দনতো সেসেসু ফালনাদীসূতি. দসমং.

আৰামৱগ্গো ছট্ঠো.