৭. নিসীদনসিক্খাপদং

৫৩১. সত্তমে কত্থাতি কিস্মিং খন্ধকে, কিস্মিং ৱত্থুস্মিং ৱা. হীতি সচ্চং. তত্থাতি চীৱৰক্খন্ধকে, পণীতভোজনৱত্থুস্মিং ৱা. ‘‘যথা নামা’’তি ইমিনা ‘‘সেয্যথাপী’’তি পদস্স অত্থং দস্সেতি, ‘‘পুৰাণো চম্মকাৰো’’তি ইমিনা ‘‘পুৰাণাসিকোট্ঠো’’তি পদস্স. চম্মকাৰো হি অসিনা চম্মং কুটতি ছিন্দতীতি ‘‘অসিকোট্ঠো’’তি ৱুচ্চতি. ৱত্থুপ্পন্নকালমুপনিধায ৱুত্তং ‘‘পুৰাণো’’তি. তমেৱূপমং পাকটং কৰোন্তো আহ ‘‘যথা হী’’তি. হীতি তপ্পাকটীকৰণং, তং পাকটং কৰিস্সামীতি হি অত্থো. চম্মকাৰো কড্ঢতীতি সম্বন্ধো. ৱিত্থতন্তি ৱিসালং. সোপীতি উদাযীপি. তং নিসীদনং কড্ঢতীতি যোজনা. তেনাতি কড্ঢনহেতুনা. তন্তি উদাযিং. সন্থতসদিসন্তি সন্থতেন সদিসং. একস্মিং অন্তেতি একস্মিং কোট্ঠাসে, ফালেত্ৱাতি সম্বন্ধোতি. সত্তমং.