৬. দুতিযপৱাৰণসিক্খাপদং

২৪২. ছট্ঠে ন আচৰিতব্বোতি অনাচাৰোতি ৱুত্তে পণ্ণত্তিৱীতিক্কমোতি আহ ‘‘পণ্ণত্তিৱীতিক্কম’’ন্তি. ‘‘কৰোতী’’তিইমিনা ‘‘অত্তানমাচৰতী’’তিআদীসু ৱিয চৰসদ্দো কৰসদ্দত্থোতি দস্সেতি. উপনন্ধীতি এত্থ উপসদ্দো উপনাহত্থো, নহধাতু বন্ধনত্থোতি দস্সেন্তো আহ ‘‘উপনাহ’’ন্তিআদি. জনিতো উপনাহো যেনাতি জনিতউপনাহো. ইমিনা ‘‘উপনন্ধো’’তি পদস্স উপনহতীতি উপনন্ধোতি কত্থুত্থং দস্সেতি.

২৪৩. অভিহট্ঠুন্তি এত্থ তুংপচ্চযো ত্ৱাপচ্চযত্থোতি আহ ‘‘অভিহৰিত্ৱা’’তি. পদভাজনে পন ৱুত্তন্তি সম্বন্ধো. সাধাৰণমেৱ অত্থন্তি যোজনা. অস্সাতি ভিক্খুস্স. তীহাকাৰেহীতি সামং জাননেন চ অঞ্ঞেসমাৰোচনেন চ তস্সাৰোচনেন চাতি তীহি কাৰণেহি. আসাদীযতে মঙ্কুং কৰীযতে আসাদনং, তং অপেক্খো আসাদনাপেক্খোতি দস্সেন্তো আহ ‘‘আসাদন’’ন্তিআদি.

যস্স অত্থায অভিহটন্তি সম্বন্ধো. ইতৰস্সাতি অভিহাৰকতো অঞ্ঞস্স ভুত্তস্সাতি. ছট্ঠং.