৩. ততিযপাটিদেসনীযসিক্খাপদং

৫৬২. ততিযে ‘‘উভতো’’তি এত্থ কৰণত্থে তোতি আহ ‘‘দ্ৱীহী’’তি. ‘‘উভতোপসন্ন’’ন্তি ব্যাসোপি সমাসোপি যুত্তোযেৱ, সমাসে তোপচ্চযস্স অলোপো হোতি. ‘‘উভতো’’তিপদস্স সৰূপং দস্সেতুং ৱুত্তং ‘‘উপাসকেনপি উপাসিকাযপী’’তি. কস্মা উভতো পসন্নং হোতীতি আহ ‘‘তস্মিং কিৰা’’তিআদি. যস্মা তস্মিং কুলে…পে… সোতাপন্নাযেৱ হোন্তি কিৰ, তস্মা ‘‘উভতোপসন্ন’’ন্তি ৱুত্তং হোতি. ‘‘সচেপী’’তি এত্থ পিসদ্দেন অসীতিকোটিধনতো অধিকম্পি সম্পিণ্ডেতি. হাযনস্স কাৰণং দস্সেতি ‘‘যস্মা’’তিআদিনা.

৫৬৯. ‘‘ঘৰতো নীহৰিত্ৱা’’তি এত্থ ‘‘নীহৰিত্ৱা’’তি পদস্স কম্মং দস্সেতুং ৱুত্তং ‘‘আসনসালং ৱা ৱিহাৰং ৱা’’তি. ‘‘আনেত্ৱা’’তিইমিনা নীপুব্বহৰধাতুযা অত্থং দস্সেতি. দ্ৱাৰেতি অত্তনো গেহদ্ৱাৰেতি. ততিযং.