৬. পাটিদেসনীযকণ্ডং

১. পঠমপাটিদেসনীযসিক্খাপদ-অত্থযোজনা

খুদ্দকানং অনন্তৰা পাটিদেসনীযা যে ধম্মা সঙ্গীতিকাৰেহি ঠপিতা, ইদানি তেসং ধম্মানং অযং ৱণ্ণনা ভৱতীতি যোজনা.

৫৫২. পঠমপাটিদেসনীযে তাৱ অত্থো এৱং ৱেদিতব্বোতি যোজনা. পটিআগমনকালেতি পিণ্ডায চৰণট্ঠানতো পক্কমিত্ৱা, পটিনিৱত্তিত্ৱা ৱা আগমনকালে. সব্বেৱাতি এত্থ নিগ্গহীতলোপৱসেন সন্ধি হোতীতি আহ ‘‘সব্বমেৱা’’তি. ‘‘কম্পমানা’’তি ইমিনা পপুব্বৱিধধাতুযা কম্পনত্থং দস্সেতি. অপেহীতি এত্থ অপপুব্বইধাতু গত্যত্থোতি আহ ‘‘অপগচ্ছা’’তি.

৫৫৩. পটিদেসেতব্বাকাৰং দস্সেতি অনেনাতি পটিদেসেতব্বাকাৰদস্সনং. দ্ৱিন্নং সদ্দানং পৰিযাযভাৱং দস্সেতুং ৱুত্তং ‘‘ৰথিকাতি ৰচ্ছা’’তি. ৰথস্স হিতা ৰথিকা. ণ্যপচ্চযে কতে ‘‘ৰচ্ছা’’তি (মোগ্গল্লানে ৪.৭২ সুত্তে) ৱুচ্চতি. ৰচ্ছন্তৰেন অনিব্বিদ্ধা ৰচ্ছা ব্যূহো নামাতি আহ ‘‘অনিব্বিজ্ঝিত্ৱা’’তিআদি. ব্যূহেতি সম্পিণ্ডেতি জনে অঞ্ঞত্থ গন্তুমপদানৱসেনাতি ব্যূহো. সিঙ্ঘাটকং নাম মগ্গসন্ধীতি আহ ‘‘মগ্গসমোধানট্ঠান’’ন্তি. সিঙ্ঘতি মগ্গসমোধানং কৰোতি এত্থাতি সিঙ্ঘাটকং. এতেসূতি ৰথিকাদীসু. এসেৱ নযোতি দুক্কটপাটিদেসনীযে অতিদিসতি. হীতি সচ্চং. ‘‘ৱচনতো’’তি পদং ‘‘ৱেদিতব্বো’’তি পদে ঞাপকহেতু. দদমানায ভিক্খুনিযা ৱসেনাতি যোজনা. এত্থাতি সিক্খাপদে. তস্মাতি যস্মা অপমাণং, তস্মা.

ইদন্তি ৱচনং ৱুত্তন্তি সম্বন্ধো. সম্ভিন্নে একৰসে কালিকত্তযেতি যোজনা.

৫৫৬. ‘‘দাপেতী’’তি হেতুত্থকিৰিযায কাৰিতকত্তুকাৰিতকম্মানি দস্সেতুং ৱুত্তং ‘‘অঞ্ঞাতিকায অঞ্ঞেন কেনচী’’তি. অঞ্ঞেনাতি অত্তনা অঞ্ঞেন. ‘‘তায এৱ ৱা ভিক্খুনিযা অঞ্ঞেন ৱা কেনচী’’তি পদানি ‘‘পটিগ্গহাপেত্ৱা’’তিপদে কাৰিতকম্মানীতি. পঠমং.

২. দুতিযপাটিদেসনীযসিক্খাপদং

৫৫৮. দুতিযে পুৰিমসিক্খাপদেন আপত্তি অন্তৰঘৰত্তাতি অধিপ্পাযো. ইমিনা সিক্খাপদেন আপত্তি ভৱেয্য ৱোসাসমানত্তাতি অধিপ্পাযো. দেন্তিযা পন নেৱ ইমিনা, ন পুৰিমেন আপত্তি অঞ্ঞস্স ভত্তত্তাতি অধিপ্পাযোতি. দুতিযং.

৩. ততিযপাটিদেসনীযসিক্খাপদং

৫৬২. ততিযে ‘‘উভতো’’তি এত্থ কৰণত্থে তোতি আহ ‘‘দ্ৱীহী’’তি. ‘‘উভতোপসন্ন’’ন্তি ব্যাসোপি সমাসোপি যুত্তোযেৱ, সমাসে তোপচ্চযস্স অলোপো হোতি. ‘‘উভতো’’তিপদস্স সৰূপং দস্সেতুং ৱুত্তং ‘‘উপাসকেনপি উপাসিকাযপী’’তি. কস্মা উভতো পসন্নং হোতীতি আহ ‘‘তস্মিং কিৰা’’তিআদি. যস্মা তস্মিং কুলে…পে… সোতাপন্নাযেৱ হোন্তি কিৰ, তস্মা ‘‘উভতোপসন্ন’’ন্তি ৱুত্তং হোতি. ‘‘সচেপী’’তি এত্থ পিসদ্দেন অসীতিকোটিধনতো অধিকম্পি সম্পিণ্ডেতি. হাযনস্স কাৰণং দস্সেতি ‘‘যস্মা’’তিআদিনা.

৫৬৯. ‘‘ঘৰতো নীহৰিত্ৱা’’তি এত্থ ‘‘নীহৰিত্ৱা’’তি পদস্স কম্মং দস্সেতুং ৱুত্তং ‘‘আসনসালং ৱা ৱিহাৰং ৱা’’তি. ‘‘আনেত্ৱা’’তিইমিনা নীপুব্বহৰধাতুযা অত্থং দস্সেতি. দ্ৱাৰেতি অত্তনো গেহদ্ৱাৰেতি. ততিযং.

৪. চতুত্থপাটিদেসনীযসিক্খাপদং

৫৭০. চতুত্থে অৱৰুদ্ধসদ্দো পৰিৰুদ্ধসদ্দস্স পৰিযাযোতি আহ ‘‘পৰিৰুদ্ধা হোন্তী’’তি. আৰঞ্ঞকস্স সেনাসনস্স পৰিসমন্ততো ৰুদ্ধা আৱুতা হোন্তীতি অত্থো.

৫৭৩. ‘‘পঞ্চন্ন’’ন্তি নিদ্ধাৰণে সামিৱচনভাৱঞ্চ ‘‘যংকিঞ্চী’’তি নিদ্ধাৰণীযেন সম্বন্ধিতব্বভাৱঞ্চ দস্সেতুং ৱুত্তং ‘‘পঞ্চসু সহধম্মিকেসু যং কিঞ্চী’’তি. ‘‘পেসেত্ৱা খাদনীযং ভোজনীযং আহৰিস্সামী’’তিইমিনা পটিসংৱিদিতাকাৰদস্সনং. ‘‘আৰাম’’ন্তি সামঞ্ঞতো ৱুত্তেপি আৰঞ্ঞকসেনাসনস্স আৰামো এৱ অধিপ্পেতোতি আহ ‘‘আৰঞ্ঞকসেনাসনাৰামঞ্চা’’তি. তস্সাতি আৰঞ্ঞকসেনাসনাৰামস্স. ‘‘কস্মা’’তি পুচ্ছায ‘‘পটিমোচনত্থ’’ন্তি ৱিসজ্জনায সমেতুং সম্পদানত্থে নিস্সক্কৱচনং কাতব্বং. কিমত্থন্তি হি অত্থো. পটিমোচনত্থন্তি তদত্থে পচ্চত্তৱচনং. পটিমোচনসঙ্খাতায অত্থাযাতি হি অত্থো. অত্থসদ্দো চ পযোজনৱাচকো. পযোজনাযাতি হি অত্থো. অথ ৱা ‘‘পটিমোচনত্থ’’ন্তি ৱিসজ্জনাযং. ‘‘কস্মা’’তি পুচ্ছায সমেতুং নিস্সক্কত্থে পচ্চত্তৱচনং কাতব্বং. পটিমোচনসঙ্খাতা অত্থাতি হি অত্থো. অত্থসদ্দো চ কাৰণৱাচকো. কাৰণাতি হি অত্থো. এৱঞ্হি পুচ্ছাৱিসজ্জনানং পুব্বাপৰসমসঙ্খাতো ৱিচযো হাৰো পৰিপুণ্ণো হোতীতি দট্ঠব্বং. অম্হাকন্তি খাদনীযভোজনীযপটিহৰন্তানং অম্হাকং. অম্হেতি চোৰসঙ্খাতে অম্হে.

‘‘তস্সা’’তি পদস্সত্থং দস্সেতুং ৱুত্তং ‘‘এতিস্সা যাগুযা’’তি. অঞ্ঞানিপীতি পটিসংৱিদিতকুলতো অঞ্ঞানিপি কুলানি. তেনাতি পটিসংৱিদিতকুলেন. কুৰুন্দিৱাদে যাগুযা পটিসংৱিদিতং কত্ৱা যাগুং অগ্গহেত্ৱা পূৱাদীনি আহৰন্তি, ৱট্টতীতি অধিপ্পাযো.

৫৭৫. একস্সাতি ভিক্খুস্স. তস্সাতি পটিসংৱিদিতভিক্খুস্স, চতুন্নং ৱা পঞ্চন্নং ৱা ভিক্খূনং অত্থাযাতি যোজনা. অঞ্ঞেসম্পীতি চতুপঞ্চভিক্খুতো অঞ্ঞেসম্পি. অধিকমেৱাতি পৰিভুত্ততো অতিৰেকমেৱ. যং পনাতি খাদনীযভোজনীযং পন, যম্পি খাদনীযভোজনীযং ৱনতো আহৰিত্ৱা দেন্তীতি যোজনা. ‘‘তত্থজাতক’’ন্তি এত্থ তসদ্দস্স ৱিসযং দস্সেতুং ৱুত্তং ‘‘আৰামে’’তি. অঞ্ঞেন দিন্নন্তি সম্বন্ধো. নন্তি মূলখাদনীযাদিং. পটিসংৱিদিতন্তি পটিকচ্চেৱ সুট্ঠু জানাপিতন্তি অত্থোতি. চতুত্থং.

ইতি সমন্তপাসাদিকায ৱিনযসংৱণ্ণনায

পাটিদেসনীযৱণ্ণনায

যোজনা সমত্তা.