১১. সচ্চৱিভঙ্গসুত্তৱণ্ণনা

৩৭১. আচিক্খনাতি – ‘‘ইদং দুক্খং অৰিযসচ্চং, অযং দুক্খনিৰোধগামিনী পটিপদা অৰিযসচ্চ’’ন্তি আদিতো কথনং. দেসনাতি তস্সেৱ অত্থস্স অতিসজ্জনং পবোধনং. পঞ্ঞাপনাতি পকাৰেহি ঞাপনা, সা পন যস্মা ইত্থমিদন্তি ৱেনেয্যানং পচ্চক্খতো দস্সনা, তেসং ৱা সন্তানে পতিট্ঠাপনা হোতি, তস্মা আহ – ‘‘দুক্খসচ্চাদীনং ঠপনা’’তি. পট্ঠপনাতি পতিট্ঠাপনা. যস্মা পট্ঠপিযমানসভাৱা দেসনা ভাজনং উপগচ্ছন্তী ৱিয হোতি, তস্মা ৱুত্তং – ‘‘পঞ্ঞাপনা’’তি, জানাপনাতি অত্থো. ৱিৱটকৰণাতি দেসিযমানস্স অত্থস্স ৱিৱটভাৱকৰণং. ৱিভাগকিৰিযাতি যথাৱুত্তস্স অত্থৱিভাগস্স ৱিত্থাৰকৰণং. পাকটভাৱকৰণন্তি অগম্ভীৰভাৱাপাদনং. অপৰো নযো – চতুসচ্চসঞ্ঞিতস্স অত্থস্স পচ্চেকং সৰূপতো দস্সনৱসেন ইদন্তি আদিতো সিক্খাপনং কথনং আচিক্খনা, এৱং পৰসন্তানে পবোধনৱসেন পৱত্তাপনা দেসনা, এৱং ৱিনেয্যানং চিত্তপৰিতোসজননেন তেসং বুদ্ধিপৰিপাচনং ‘‘পঞ্ঞাপনা’’তি ৱুচ্চতি. এৱং পঞ্ঞাপেন্তী চ সা দেসিযমানং অত্থং ৱেনেয্যসন্তানে পকাৰতো ঠপেতি পতিট্ঠপেতীতি ‘‘পট্ঠপনা’’তি ৱুচ্চতি. পকাৰতো ঠপেন্তী পন সংখিত্তস্স ৱিত্থাৰতো পটিৱুত্তস্স পুনাভিধানতো ‘‘ৱিৱৰণা’’তি, তস্সেৱত্থস্স ৱিভাগকৰণতো ‘‘ৱিভজনা’’তি, ৱুত্তস্স ৱিত্থাৰেনাভিধানতো ৱিভত্তস্স হেতুদাহৰণদস্সনতো, ‘‘উত্তানীকম্ম’’ন্তি ৱুচ্চতি. তেনাহ – ‘‘পাকটভাৱকৰণ’’ন্তি, হেতূপমাৱসেনত্থস্স পাকটভাৱকৰণতোতি অত্থো.

অনুগ্গাহকাতি অনুগ্গণ্হনকামা. স্ৱাযমনুগ্গহো সঙ্গহৱত্থুৱসেন পাকটো হোতীতি আহ ‘‘আমিসসঙ্গহেনা’’তিআদি. জনেতা জনেত্তীতি আহ ‘‘জনিকা মাতা’’তি. ৱুদ্ধিং পৰিসং আপাদেতীতি আপাদেতা. তেনাহ ‘‘পোসেতা’’তি. ইদানি দ্ৱিন্নং মহাথেৰানং যথাক্কমং সব্ৰহ্মচাৰীনং ভগৱতা ৱুত্তেহি জনিকপোসিকমাতুট্ঠানিযেহি সঙ্গাহকতং ৱিত্থাৰতো দস্সেতুং, ‘‘জনিকমাতা হী’’তিআদি ৱুত্তং. পৰতোঘোসেন ৱিনাপি উপৰিমগ্গাধিগমো হোতীতি ‘‘পচ্চত্তপুৰিসকাৰেনা’’তি ৱুত্তং. পঠমমগ্গো এৱ হি সাৱকানং একন্ততো ঘোসাপেক্খোতি. পত্তেসুপীতি পি-সদ্দেন পগেৱ অপ্পত্তেসূতি দস্সেতি. ভৱস্স অপ্পমত্তকতা নাম ইত্তৰকালতাযাতি আহ ‘‘অচ্ছৰাসঙ্ঘাতমত্তম্পী’’তি. জনেতাতি জনকো, থেৰো পন অৰিযায জনযিতা. আপাদেতাতি ৱড্ঢেতা পৰিব্ৰূহেতা. পুৰিমস্মিং সচ্চদ্ৱযে সম্মসনগ্গহণং লোকিযত্তা তস্স, ইতৰস্মিং তস্স অগ্গহণং লোকুত্তৰত্তা.

কামেহি নিক্খন্তো সঙ্কপ্পো নেক্খম্মসঙ্কপ্পো. স্ৱাযমস্স ততো নিক্খমনত্থো তেসং পটিপক্খভাৱতো তেহি ৱিসংসগ্গতো ৱিৰজ্জনতো সমুচ্ছিন্দনতো সব্বসো ৱিৱিত্তভাৱতো চ হোতীতি দস্সেতুং, ‘‘কামপচ্চনীকট্ঠেনা’’তিআদি ৱুত্তং. তত্থ কামপদঘাতন্তি যথা কামো পদং পতিট্ঠং ন লভতি, এৱং হননং, কামসমুচ্ছেদন্তি অত্থো. কামেহি সব্বসো ৱিৱিত্তত্তা কামৱিৱিত্তো, অৰিযমগ্গো, তস্স অন্তো, অৰিযফলং, তস্মিং কামৱিৱিত্তন্তে. এসেৱ নযোতি ইমিনা ‘‘ব্যাপাদপচ্চনীকট্ঠেনা’’তিআদিযোজনং অতিদিসতি. সব্বে চেতে নেক্খম্মসঙ্কপ্পাদযো নানাচিত্তেসু লব্ভন্তীতি যোজনা. যদি একচিত্তে লব্ভন্তি, কথং তিৱিধমিচ্ছাসঙ্কপ্পানং সমুগ্ঘাতোতি আহ ‘‘তত্ৰ হী’’তিআদি. ন নানা লব্ভতীতি ইমিনা তিৱিধকিচ্চকাৰিতং সম্মাসঙ্কপ্পস্স দস্সেতি. কিচ্চৱসেন হি তস্স নামস্স লাভো. সম্মাৱাচাদীনম্পি মগ্গক্খণে একচিত্তে লব্ভমানানম্পি চতুকিচ্চকাৰিতায চতুব্বিধনামাদিতা ৱেদিতব্বা. সেসং সুৱিঞ্ঞেয্যমেৱ.

সচ্চৱিভঙ্গসুত্তৱণ্ণনায লীনত্থপ্পকাসনা সমত্তা.