৯. কাযগতাসতিসুত্তৱণ্ণনা

১৫৩-৪. তপ্পটিসৰণানং কামাৱচৰসত্তানং পটিসৰণট্ঠেন গেহা কামগুণা, গেহে সিতা আৰব্ভ পৱত্তিযা অল্লীনাতি গেহস্সিতা. সৰন্তীতি ৱেগসা পৱত্তন্তি. ৱেগেন হি পৱত্তি ধাৱতীতি ৱুচ্চতি. সঙ্কপ্পাতি যে কেচি মিচ্ছাসঙ্কপ্পা, ব্যাপাদৱিহিংসাসঙ্কপ্পাদযোপি কামগুণসিতা এৱাতি. গোচৰজ্ঝত্তস্মিংযেৱাতি পৰিগ্গহিতে কম্মট্ঠানে এৱ ৱত্তন্তি. তঞ্হি ধম্মৱসেন উপট্ঠিতায ভাৱনায গোচৰভাৱতো ‘‘গোচৰজ্ঝত্ত’’ন্তি ৱুত্তং. অস্সাসপস্সাসকাযে গতা পৱত্তাতি কাযগতা, তং কাযগতাসতিং. সতিসীসেন তংসহগতে ভাৱনাধম্মে ৱদতি অস্সাসপস্সাসকাযাদিকে তংতংকোট্ঠাসে সমথৱত্থুভাৱেন পৰিগ্গহেত্ৱা সতিযা পৰিগ্গহিতত্তা; তথাপৰিগ্গহিতে ৱা তে আৰব্ভ অনিচ্চাদিমনসিকাৰৱসেন পৱত্তা কাযাৰম্মণা সতী সতিভাৱেন ৱত্ৱা একজ্ঝং দস্সেন্তো ‘‘কাযপৰিগ্গাহিক’’ন্তিআদিমাহ.

সতিপট্ঠানেতি মহাসতিপট্ঠানসুত্তে (দী. নি. ২.৩৭৮; ম. নি. ১.১১১), চুদ্দসৱিধেন কাযানুপস্সনা কথিতা, চুণ্ণকজাতানি অট্ঠিকানি পৰিযোসানং কত্ৱা কাযানুপস্সনা নিদ্দিট্ঠা, ইধ পন কেসাদীসু ৱণ্ণকসিণৱসেন নিব্বত্তিতানং চতুন্নং ঝানানং ৱসেন উপৰিদেসনায ৱড্ঢিতত্তা অট্ঠাৰসৱিধেন কাযগতাসতিভাৱনা.

১৫৬. তস্স ভিক্খুনোতি যো কাযগতাসতিভাৱনায ৱসীভূতো, তস্স ভিক্খুনো. সম্পযোগৱসেন ৱিজ্জং ভজন্তীতি সহজাত-অঞ্ঞমঞ্ঞ-নিস্সয-সম্পযুত্ত-অত্থি-অৱিগতপচ্চযৱসেন ৱিজ্জং ভজন্তি, তায সহ একীভাৱমিৱ গচ্ছন্তীতি অত্থো. ৱিজ্জাভাগে ৱিজ্জাকোট্ঠাসে ৱত্তন্তীতি ৱিজ্জাসভাগতায তদেকদেসে ৱিজ্জাকোট্ঠাসে ৱত্তন্তি. তাহি সম্পযুত্তধম্মা ফস্সাদযো. ননু চেত্থ ৱিজ্জানং ৱিজ্জাভাগিযতা ন সম্ভৱতীতি? নো ন সম্ভৱতি. যায হি ৱিজ্জায ৱিজ্জাসম্পযুত্তানং ৱিজ্জাভাগিযতা, সা তংনিমিত্তায ৱিজ্জায উপচৰীযতীতি. একা ৱিজ্জা ৱিজ্জা, সেসা ৱিজ্জাভাগিযাতি অট্ঠসু ৱিজ্জাসু একং ‘‘ৱিজ্জা’’তি গহেত্ৱা ইতৰা তস্সা ভাগতায ‘‘ৱিজ্জাভাগিযা’’তি ৱেদিতব্বা. সদ্ধিং পৱত্তনসভাৱাসু অযমেৱ ৱিজ্জাতি ৱত্তব্বাতি নিযমস্স অভাৱতো ৱিজ্জাভাগো ৱিয ৱিজ্জাভাগিযাপি পৱত্ততি এৱাতি ৱত্তব্বং. আপোফৰণন্তি পটিভাগনিমিত্তভূতেন আপোকসিণেন সব্বসো মহাসমুদ্দফৰণং আপোফৰণং নাম. দিব্বচক্খুঞাণস্স কিচ্চং ফৰণন্তি কত্ৱা, দিব্বচক্খুঅত্থং ৱা আলোকফৰণং দিব্বচক্খুফৰণন্তি দট্ঠব্বং. উভযস্মিম্পি পক্খে সমুদ্দঙ্গমানং কুন্নদীনং সমুদ্দন্তোগধত্তা তেসং চেতসা ফুটতা ৱেদিতব্বা. কুন্নদিগ্গহণঞ্চেত্থ কঞ্চিমেৱ কালং সন্দিত্ৱা তাসং উদকস্স সমুদ্দপৰিযাপন্নভাৱূপগমনত্তা, ন বহি মহানদিযো ৱিয পৰিত্তকালট্ঠিতিকাতি.

ওতাৰন্তি কিলেসুপ্পত্তিযা অৱসৰং, তং পন ৱিৱৰং ছিদ্দন্তি চ ৱুত্তং. আৰম্মণন্তি কিলেসুপ্পত্তিযা ওলম্বনং. যাৱ পৰিযোসানাতি মত্তিকাপুঞ্জস্স যাৱ পৰিযোসানা.

১৫৮. অভিঞ্ঞাযাতি ইদ্ধিৱিধাদিঅভিঞ্ঞায. সচ্ছিকাতব্বস্সাতি পচ্চক্খতো কাতব্বস্স অধিট্ঠানৱিকুব্বনাদিধম্মস্স. অভিঞ্ঞাৱ কাৰণন্তি আহ – ‘‘সচ্ছিকিৰিযাপেক্খায, অভিঞ্ঞাকাৰণস্স পন সিদ্ধিযা পাকটা’’তি. মৰিযাদবদ্ধাতি উদকমাতিকামুখে কতা.

যুত্তযানং ৱিয কতায ইচ্ছিতিচ্ছিতে কালে সুখেন পচ্চৱেক্খিতব্বত্তা. পতিট্ঠাকতাযাতি সম্পত্তীনং পতিট্ঠাভাৱং পাপিতায. অনুপ্পৱত্তিতাযাতি ভাৱনাবহুলীকাৰেহি অনুপ্পৱত্তিতায. পৰিচযকতাযাতি আসেৱনদড়্হতায সুচিৰং পৰিচযায. সুসম্পগ্গহিতাযাতি সব্বসো উক্কংসং পাপিতায. সুসমাৰদ্ধাযাতি অতিৱিয সম্মদেৱ নিব্বত্তিকতায. সেসং সুৱিঞ্ঞেয্যমেৱ.

কাযগতাসতিসুত্তৱণ্ণনায লীনত্থপ্পকাসনা সমত্তা.