৪. সামগামসুত্তৱণ্ণনা

৪১. দ্ৱেধিকজাতাতি জাতদ্ৱেধিকা সঞ্জাতভেদা. দ্ৱেজ্ঝজাতাতি দুৱিধভাৱং পত্তা. ভণ্ডন্তি পৰিভাসন্তি এতেনাতি ভণ্ডনং, ৱিৰুদ্ধচিত্ততা. তন্তি ভণ্ডনং. ধম্মৱিনযন্তি পাৱচনং. ৱিতুজ্জন্তা মুখসত্তীহি. সহিতং মেতি ময্হং ৱচনং সহিতং সিলিট্ঠং পুব্বাপৰসম্বন্ধং অত্থযুত্তং. তেনাহ ‘‘অত্থসংহিত’’ন্তি. অধিচিণ্ণন্তি আচিণ্ণং. ৱিপৰাৱত্তন্তি ৱিৰোধদস্সনৱসেন পৰাৱত্তিতং, পৰাৱত্তং দূসিতন্তি অত্থো. তেনাহ – ‘‘চিৰকালৱসেন…পে… নিৱত্ত’’ন্তি. পৰিযেসমানো চৰ, তত্থ তত্থ গন্ত্ৱা সিক্খাহীতি অত্থো. সচে সক্কোসি, ইদানিমেৱ মযা ৱেঠিতদোসং নিব্বেঠেহি. মৰণমেৱাতি অঞ্ঞমঞ্ঞঘাতৱসেন মৰণমেৱ.

নাটপুত্তস্স ইমেতি নাটপুত্তিযা. তে পন তস্স সিস্সাতি আহ ‘‘অন্তেৱাসিকেসূ’’তি. পুৰিমপটিপত্তিতো পটিনিৱত্তনং পটিৱানং, তং ৰূপং সভাৱো এতেসন্তি পটিৱানৰূপা. তেনাহ ‘‘নিৱত্তনসভাৱা’’তি. কথনং অত্থস্স আচিক্খনং. পৱেদনং তস্স হেতুদাহৰণানি আহৰিত্ৱা বোধনং. ন উপসমায সংৱত্ততীতি অনুপসমসংৱত্তনং, তদেৱ অনুপসমসংৱত্তনিকং, তস্মিং. সমুস্সিতং হুত্ৱা পতিট্ঠাহেতুভাৱতো থূপং পতিট্ঠাতি আহ – ‘‘ভিন্নথূপেতি ভিন্নপতিট্ঠে’’তি. থূপোতি ৱা ধম্মস্স নিয্যানভাৱো ৱেদিতব্বো, অঞ্ঞধম্মে অভিভুয্য সমুস্সিতট্ঠেন. সো নিগণ্ঠস্স সমযে কেহিচি অভিন্নসম্মতোপি ভিন্নো ৱিনট্ঠোযেৱ সব্বেন সব্বং অভাৱতোতি ভিন্নথূপো. সো এৱ নিয্যানভাৱো ৱট্টদুক্খতো মুচ্চিতুকামানং পটিসৰণং, তং এত্থ নত্থীতি অপ্পটিসৰণো, তস্মিং ভিন্নথূপে অপ্পটিসৰণেতি এৱমেত্থ অত্থো ৱেদিতব্বো.

আচৰিযপ্পমাণন্তি আচৰিযমুট্ঠি হুত্ৱা পমাণভূতং. নানানীহাৰেনাতি নানাকাৰেন. ‘‘ৱিৱাদো ন উপ্পজ্জী’’তি ৱত্ৱা তস্স অনুপ্পত্তিকাৰণং দস্সেন্তো, ‘‘সত্থা হি…পে… অৱিৱাদকাৰণং কত্ৱাৱ পৰিনিব্বাযী’’তি ৱত্ৱা তং ৱিৱৰিতুং ‘‘ভগৱতা হী’’তিআদি ৱুত্তং. পতিট্ঠা চ অৱস্সযো চ, ‘‘অযং ধম্মো অযং ৱিনযো ইদং সত্থুসাসন’’ন্তি ৱিনিচ্ছযনে মহাপদেসা, পঞ্হব্যাকৰণানি চ, যস্মা তেসু পতিট্ঠায তে অৱস্সায ধম্মৱিনযধৰা চ নিচ্ছযং গচ্ছন্তি. তথা হি সুত্তন্তমহাপদেসতো ৱিনযে কেনচি পুচ্ছিতো অত্থো চতুন্নং পঞ্হব্যাকৰণানং ৱসেন সুৱিনিচ্ছিতৰূপো, তস্মা ধম্মৱিনযো ইধ সত্থু কিচ্চং কাতুং সক্কোতীতি আহ – ‘‘তেনেৱা’’তিআদি, তস্মা উড়াৰায দেসনায ভাজনন্তি অধিপ্পাযো.

৪২. পটিপৱিট্ঠং কত্ৱা আহৰিতব্বতো, সচ্চং কাৰিতব্বতো পাভতং মূলন্তি আহ – ‘‘কথাপাভত’’ন্তি, ধম্মকথায মূলকাৰণন্তি অত্থো. যেসং ৱসেন ৱিৱাদো উপ্পন্নো, তেযেৱ অধম্মৱাদিনো, তেসং তাৱ সো অহিতায দুক্খায সংৱত্ততু, ততো অঞ্ঞেসং দেৱমনুস্সানং কথন্তি, চোদনা পৰম্পৰায সংকিলেসৱত্থুভাৱতোতি পৰিহাৰো. তেনাহ – ‘‘কোসম্বকক্খন্ধকে ৱিযা’’তিআদি.

৪৩. অভিঞ্ঞা দেসিতাতি অভিৱিসিট্ঠায পঞ্ঞায জানিত্ৱা বোধিতা. পতিস্সযমানৰূপাতি অপদিস্স পতিস্সযমানা গৰুকৱসেন নিস্সযমানসভাৱা. তেনাহ – ‘‘উপনিস্সায ৱিহৰন্তী’’তি, গৰুতৰং নিস্সযং কত্ৱা ৱিহৰন্তীতি অত্থো. পৰিৱাৰে পঞ্ঞত্তানীতি, ‘‘আজীৱহেতু আজীৱকাৰণা’’তি, এৱং নিদ্ধাৰেত্ৱা পৰিৱাৰপাড়িযং (পৰি. ৩৩৬) আসঙ্কৰৱসেন ঠপিতানি. ‘‘এৱঞ্চ পন, ভিক্খৱে, ইমং সিক্খাপদং উদ্দিসেয্যা’’তি (পাৰা. ৩৯, ৪২, ৪৩) ৱিভঙ্গপাঠৱসেনেৱ হি তানি ভগৱতা পঞ্ঞত্তানি. তানি ঠপেত্ৱা সেসানি সব্বসিক্খাপদানি অধিপাতিমোক্খং নামাতি, ইদং গোবলীবদ্দঞাযেন ৱুত্তন্তি দট্ঠব্বং তেসম্পি অধিপাতিমোক্খভাৱতো.

তত্ৰাযং নযোতি তস্মিং সুপ্পজহনায অপ্পমত্তকভাৱে অযং ৱক্খমানো. তানীতি পণীতভোজনানি. যো কোচীতি ভিক্খু ৱা ভিক্খুনী ৱা. দুক্কটৱত্থুকন্তি যং কিঞ্চি দুক্কটাপত্তিৱত্থুকং. তেনাতি সুপ্পজহনভাৱেন মূলাপত্তিৱীতিক্কমস্স অণুমত্ততায.

পুব্বভাগমগ্গন্তি লোকিযমগ্গং. তত্ৰাতি তস্মিং পুব্বভাগমগ্গং নিস্সায ৱিৱাদুপ্পাদে. ওভাসঞাণন্তি ওভাসস্স উপ্পত্তিহেতুভূতং ঞাণং. তত্থ পন সো মগ্গসঞ্ঞিভাৱেন মগ্গো চ চতুব্বিধোতি সুতত্তা, ‘‘পট্ঠমমগ্গো নামা’’তিআদিমাহ. এৱন্তি এৱং অসন্দিদ্ধং অপৰিসঙ্কিতং পৰিচ্চত্তং কত্ৱা কম্মট্ঠানং কথেতুং ন সক্কোতি.

চেতিযং ন দিট্ঠন্তি তস্স কতং থূপং ৱদতি. নিন্দিযে পুথুজ্জনভাৱে ঠিতং পাসংসং অৰিযভাৱং আৰোপেত্ৱা তং মিচ্ছালদ্ধিং অভিনিৱিস্স পগ্গয্হ ৱোহৰণতো সগ্গোপি মগ্গোপি ৱাৰিতোযেৱাতি. ৱুত্তঞ্হেতং –

‘‘যো নিন্দিযং পসংসতি, তং ৱা নিন্দতি যো পসংসিযো;

ৱিচিনাতি মুখেন সো কলিং, কলিনা তেন সুখং ন ৱিন্দতী’’তি. (সু. নি. ৬৬৩; সং. নি. ১.১৮০-১৮১; অ. নি. ৪.৩; নেত্তি. ৯২);

‘‘খণেনেৱ অৰহত্তং পাপুণিতুং সমত্থকম্মট্ঠানকথং আচিক্খিস্সামী’’তি হি ইমিনা তত্থ কোহঞ্ঞম্পি দিস্সতি; ইতৰেসু পন ৱত্তব্বমেৱ নত্থি. উপ্পাটেত্ৱাতি উদ্ধৰিত্ৱা. ‘‘অথ তে ভিক্খূ’’তিআদি সেসং নাম. ‘‘অমতং তে পৰিভুঞ্জন্তি, যে কাযগতাসতিং পৰিভুঞ্জন্তী’’তি (অ. নি. ১.৬০০) ৱচনং দুগ্গহিতং গণ্হাপেত্ৱা, ‘‘এত্তাৱতা ৱো অমতং পৰিভুত্তং নাম ভৱিস্সতী’’তি আহ.

৪৪. এৱন্তি আকাৰলক্খণমেতং, ন আকাৰনিযমনং. তেন ইমিনাৱ কাৰণেন চ যো ৱিৱাদো উপ্পজ্জেয্যাতি ৱুত্তং হোতি. গৰুস্মিং গৰূতি পৱত্তং চিত্তং গৰুৱিসযত্তা তংসহচৰিতত্তা গৰু, তস্স ভাৱো গাৰৱং, গৰুকৰণং, তং এত্থ নত্থীতি অগাৰৱো. তেনাহ ‘‘গাৰৱৱিৰহিতো’’তি. গৰুস্স গাৰৱৱসেন পতিস্সযনং পতিস্সোতি ৱুচ্চতি নীচৱুত্তিতা, তপ্পটিপক্খতো অপ্পতিস্সোতি আহ – ‘‘অপ্পতিস্সযো অনীচৱুত্তী’’তি. এত্থ যথাযং পুগ্গলো সত্থৰি অগাৰৱো নাম হোতি, তং দস্সেতুং, ‘‘এত্থ পনা’’তিআদি ৱুত্তং. তত্থ তীসুকালেসু উপট্ঠানং ন যাতীতিআদি সমুদাযকিত্তনঅনৱসেসদস্সনং, অৱযৱতো পন অগাৰৱসিদ্ধি যথা তং সামঞ্ঞতো সিক্খাপদসমাদানং তব্বিসেসো ভেদো. এস নযো সেসেসুপি.

সক্কচ্চং ন গচ্ছতীতি আদৰৱসেন ন গচ্ছতি. সঙ্ঘে কতোযেৱ হোতি সঙ্ঘপৰিযাপন্নত্তা তস্স, যথা সঙ্ঘং উদ্দিস্স দিন্নং একেন ভিক্খুনা পটিগ্গহিতং সঙ্ঘস্স দিন্নমেৱ হোতি. অপৰিপূৰযমানোৱ সিক্খায অগাৰৱো. তেনাহ ভগৱা – ‘‘সিক্খায ন পৰিপূৰকাৰী’’তি (ম. নি. ২.১৩৫). অত্তনো পৰিসায উপ্পন্নং ৱিৱাদমূলং ৱিসেসতো অত্তনা ৱূপসমেতব্বতো অত্তনো চ অনত্থাৱহতো ‘‘অজ্ঝত্ত’’ন্ত্ৱেৱ ৱুত্তং. এস নযো বহিদ্ধাতি এত্থাপি.

৪৬. ছঠানানীতি ছমূলানি. যথা সমনৱসেন সমথানং ৱিৱাদাদীসু অধিকত্তুভাৱো, এৱং ৱিৱাদাদীনং তেহি অধিকত্তব্বতাপীতি আহ – ‘‘ৱূপসমনত্থায…পে… অধিকৰণানী’’তি. তেন অধিকৰণসদ্দস্স কম্মত্থতং আহ. সমথা ৱা সমনৱসেন অধিকৰীযন্তি এত্থাতি অধিকৰণানি, ৱিৱাদাদযো.

ৱিৱাদো উপ্পন্নমত্তোৱ হুত্ৱা পৰতো কক্খড়ত্থায সংৱত্তনতো যং ৱত্থুং নিস্সায পঠমং উপ্পন্নো ৱিৱাদানুসাৰেন মূলকং ৱিয অনুবন্ধৰোগো তমেৱ তদঞ্ঞং ৱা ৱত্থুং কত্ৱা পৱড্ঢন্তো ৱিৱাদাধিকৰণং পত্ৱা উপৰি ৱড্ঢতি নাম, অনুৱাদাপত্তিকিচ্চাধিকৰণং পত্ৱা ৱিৱাদস্স চ ৱড্ঢনং পাকটমেৱ. তেন ৱুত্তং – ‘‘চত্তাৰি অধিকৰণানি পত্ৱা উপৰি ৱড্ঢন্তো সো ৱিৱাদো’’তি. উপ্পন্নানং উপ্পন্নানন্তি (দী. নি. টী. ৩.৩৩১) উট্ঠিতানং উট্ঠিতানং. সমথত্থন্তি সমনত্থং.

অট্ঠাৰসহি ৱত্থূহীতি লক্খণৱচনমেতং যথা ‘‘যদি মে ব্যাধী দাহেয্যুং. দাতব্বমিদমোসধ’’ন্তি (সং. নি. টী. ২.৩.৩৯-৪২; কঙ্খা. অভি. টী. অধিকৰণসমথৱণ্ণনা), তস্মা তেসু অঞ্ঞতৰেন ৱিৱদন্তা, ‘‘অট্ঠাৰসহি ৱত্থূহি ৱিৱদন্তী’’তি ৱুচ্চন্তি. উপৱদনাতি অক্কোসো. চোদনাতি অনুযোগো.

অধিকৰণস্স সম্মুখাৱ ৱিনযনতো সম্মুখাৱিনযো. সন্নিপতিতপৰিসায ধম্মৱাদীনং যেভুয্যতায যেভুয্যসিককম্মস্স কৰণং যেভুয্যসিকা. কাৰকসঙ্ঘস্স সামগ্গিৱসেন সম্মুখীভাৱো, ন যথা তথা কাৰকপুগ্গলানং সম্মুখতামত্তং. ভূততাতি তচ্ছতা. সচ্চপৰিযাযো হি ইধ ধম্ম-সদ্দো ‘‘ধম্মৱাদী’’তিআদীসু (দী. নি. ১.৯) ৱিয. ৱিনেতি এতেনাতি ৱিনযো, তস্স তস্স অধিকৰণস্স ৱূপসমায ভগৱতা ৱুত্তৱিধি, তস্স ৱিনযস্স সম্মুখতা ৱিনযসম্মুখতা. ৱিৱাদৱত্থুসঙ্খাতে অত্থে পচ্চত্থিকা অত্থপচ্চত্থিকা, তেসং অত্থপচ্চত্থিকানং. সঙ্ঘসম্মুখতা পৰিহাযতি সম্মতপুগ্গলেহেৱ ৱূপসমনতো.

নন্তি ৱিৱাদাধিকৰণং. ‘‘ন ছন্দাগতিং গচ্ছতী’’তিআদিনা (পৰি. ৩৮৩) ৱুত্তং পঞ্চঙ্গসমন্নাগতং. গুড়্হকাদীসু অলজ্জুস্সন্নায পৰিসায গুড়্হকো সলাকগ্গাহো কাতব্বো; লজ্জুস্সন্নায ৱিৱটকো, বালুস্সন্নায সকণ্ণজপ্পকো. যস্সা কিৰিযায ধম্মৱাদিনো বহুতৰা, সা যেভুয্যসিকাতি আহ – ‘‘ধম্মৱাদীনং যেভুয্যতাযা’’তিআদি.

এৱং ৱিনিচ্ছিতন্তি আপত্তিং দস্সেত্ৱা ৰোপনৱসেন ৱিনিচ্ছিতং, পটিকম্মং পন আপত্তাধিকৰণসমথে পৰতো আগমিস্সতি. ন সমণসাৰুপ্পং অস্সামণকং, সমণেহি অকাতব্বং, তস্মিং. অজ্ঝাচাৰে ৱীতিক্কমেসতি. পটিচৰতোতি পটিচ্ছাদেন্তস্স. পাপুস্সন্নতায পাপিযো, পুগ্গলো, তস্স কাতব্বকম্মং তস্সপাপিযসিকং.

সম্মুখাৱিনযেনেৱ ৱূপসমো নত্থি পটিঞ্ঞায, তথাৰূপায খন্তিযা ৱা ৱিনা অৱূপসমনতো. এত্থাতি আপত্তিদেসনাযং. পটিঞ্ঞাতে আপন্নভাৱাদিকে কৰণকিৰিযা, ‘‘আযতিং সংৱৰেয্যাসী’’তি, পৰিৱাসদানাদিৱসেন চ পৱত্তং ৱচীকম্মং পটিঞ্ঞাতকৰণং.

যথানুৰূপন্তি ‘‘দ্ৱীহি চতূহি তিহি একেনা’’তি এৱং ৱুত্তনযেন যথানুৰূপং. এত্থাতি ইমস্মিং সুত্তে, এতস্মিং ৱা সমথৱিচাৰে. ৱিনিচ্ছযনযোতি ৱিনিচ্ছযে নযমত্তং. তেনাহ ‘‘ৱিত্থাৰো পনা’’তিআদি.

৪৭. সঙ্খেপতোৱ ৱুত্তো, ন সমথক্খন্ধকে ৱিয ৱিত্থাৰতো. তথাতি ইমিনা ‘‘ধম্মা’’তি পদং আকড্ঢতি, এত্থ ইতি-সদ্দো আদিঅত্থো, এৱমাদিনা ইমিনা পকাৰেনাতি ৱাতি ৱুত্তং হোতি. বোধিপক্খিযধম্মানং একন্তানৱজ্জভাৱতো নত্থি অধম্মভাৱো, ভগৱতো দেসিতাকাৰং হাপেত্ৱা ৱড্ঢেত্ৱা ৱা কথনং যথাধম্মং অকতন্তি কত্ৱা অধম্মভাৱোতি দস্সেন্তো আহ – ‘‘তযো সতিপট্ঠানা’’তিআদি.

নিয্যানিকন্তি সপাটিহীৰং অপ্পটিৱানং হুত্ৱা পৱত্ততি. তথেৱাতি ইমিনা ‘‘এৱং অম্হাক’’ন্তিআদিনা ৱুত্তমত্থং আকড্ঢতি. ভূতেন…পে… কাতব্বকম্মং ধম্মো নাম যথাধম্মং কৰণতো, ৱুত্তৱিপৰিযাযতো ইতো পৰং অধম্মো. অযং ৱিনযো নাম ৰাগাদীনং সংৱৰণতো পহানতো পটিসঙ্খানতো চ. অযং অৱিনযো নাম ৰাগাদীনং অৱিনযনতো. অযং ৱিনযো নাম যথাৱিনযকৰণতো, ৱুত্তৱিপৰিযাযেন ইতৰো অৱিনযো. ৱত্থুসম্পত্তিআদিনা এৱ সব্বেসং ৱিনযকম্মানং অকুপ্পতাতি আহ – ‘‘ৱত্থুসম্পত্তি…পে… অযং ৱিনযো নামা’’তি, তপ্পটিপক্খতো অৱিনযো ৱেদিতব্বো. তেনাহ ‘‘ৱত্থুৱিপত্তী’’তিআদি.

সম্মাপটিপত্তিযা নযনট্ঠেন যথাৱুত্তো ধম্মো এৱ নেত্তি, ততো এৱ সত্তস্স ৱিয ৰজ্জু অসিথিলপৱত্তিহেতুতায ধম্মৰজ্জূতি অত্থো ৱুত্তো. সুত্তন্তপৰিযাযেন তাৱ দস কুসলকম্মপথা ধম্মোতি এৱং ৱুত্তা. সা এৱ ৱা হোতু ধম্মনেত্তি, যো ইধ ইমিস্সা ৱণ্ণনায, ‘‘ছত্তিংস বোধিপক্খিযধম্মা’’তিআদিনা ধম্মেন চ ৱিনযেন চ ৱুত্তো, সো এৱ ৱা ধম্মনেত্তি হোতূতি আনেত্ৱা যোজনা. তায ধম্মনেত্তিযা সমেতি তায যথাৱুত্তায ধম্মনেত্তিযা সংসন্দতি, একলক্খণমেৱ হোতীতি অত্থো. এৱং ৱিৱাদৱত্থুভূতো ধম্মো চে ‘‘ধম্মো’’তি, অধম্মো চে ‘‘অধম্মো’’তি, ৱিনযো চে ‘‘ৱিনযো’’তি, অৱিনযো চে ‘‘অৱিনযো’’তি নিচ্ছিনন্তেন একচ্চানং ৱিৱাদাধিকৰণমেৱ দস্সিতং তস্স ৱূপসমধম্মানং অপৰিযোসাপিতত্তা.

৪৮. তং পনেতন্তি ৱিৱাদাধিকৰণং পচ্চামসতি. ৱাৰে অত্থসংৱণ্ণনাৱসেন পত্তেপি. দ্ৱীহীতি যস্মিং আৱাসে ৱিৱাদাধিকৰণং উপ্পন্নং, তত্থ ৱাসীহি দ্ৱীহিপি ভিক্খূহি অতিৰেকতৰা.

৪৯. খন্ধসামন্তন্তি আপত্তিক্খন্ধভাৱেন সমীপং. আপত্তিসামন্তং নাম পুব্বভাগা আপজ্জিতব্বআপত্তি. মেথুনৰাগৱসেন কাযসংসগ্গে দুক্কটস্স ৱত্থূতি আহ – ‘‘পঠমপাৰাজিকস্স পুব্বভাগে দুক্কট’’ন্তি. সেসানং তিণ্ণং পাৰাজিকানং পুব্বভাগে থুল্লচ্চযমেৱ.

৫০. পৰিক্কমিত্ৱা উপক্কমিত্ৱা. আপত্তাধিকৰণং দস্সিতং তত্থেৱ ৱিসেসতো পটিঞ্ঞায কাৰেতব্বতায ইচ্ছিতব্বত্তা.

৫২. কম্মস্স ৱত্থু দস্সিতং ন সমথোতি অধিপ্পাযো. ননু চাযং সমথাধিকাৰোতি? সচ্চং, সমথস্স পন কাৰণে দস্সিতে সমথো দস্সিতোৱ হোতীতি দস্সেতুং ‘‘এৱৰূপস্স হী’’তিআদি ৱুত্তং.

৫৩. ইদং কম্মন্তি ‘‘ইদং অম্হাকং ভণ্ডনজাতান’’ন্তিআদিনা ৱুত্তকম্মং. তিণৱত্থাৰকসদিসত্তাতি তংসদিসতায তব্বোহাৰোতি দস্সেতি যথা – ‘‘এস ব্ৰহ্মদত্তো’’তি. আকাৰমত্তমেৱ তিণৱত্থাৰককম্মং নাম, ন পন তস্স সব্বসো কৰণৱিধানং. তেনাহ ‘‘খন্ধকে’’তিআদি. গিহীনং হীনেন খুংসনৱম্ভনং যথা ‘‘তিলসংগুড়িকা নত্থী’’তি. ধম্মিকপটিস্সৱেসু ৱিসংৱাদনৱসেন আপন্না আপত্তি. অস্সাতি কিচ্চাধিকৰণস্স. সম্মুখাৱিনযেনেৱ ৱূপসমো সঙ্ঘসম্মুখতাদিনাৱ ৱূপসমনতো.

৫৪. সোতাপত্তিফলসচ্ছিকিৰিযৱচনতো কোসম্বিযসুত্তে (ম. নি. ১.৪৯২) সোতাপত্তিমগ্গসম্মাদিট্ঠি কথিতা, ইধ পন ‘‘দিট্ঠিসামঞ্ঞগতো ৱিহৰতি’’চ্চেৱ ৱুত্তত্তা, ‘‘ইমস্মিং সুত্তে সোতাপত্তিফলসম্মাদিট্ঠি ৱুত্তাতি ৱেদিতব্বা’’তি ৱুত্তং. পাপকম্মস্স অপ্পতা মহন্ততা সাৱজ্জভাৱস্স মুদুতিক্খভাৱেন ৱেদিতব্বাতি আহ ‘‘অণুন্তি অপ্পসাৱজ্জং. থূলন্তি মহাসাৱজ্জ’’ন্তি. সেসং সুৱিঞ্ঞেয্যমেৱ.

সামগামসুত্তৱণ্ণনায লীনত্থপ্পকাসনা সমত্তা.