৩. কিন্তিসুত্তৱণ্ণনা

৩৪. ভৱোতি পৰিত্তো. অভৱোতি মহন্তো. ৱুদ্ধিঅত্থো হি অযং অ-কাৰো, ‘‘সংৱৰাসংৱৰো, ফলাফল’’ন্তিআদীসু ৱিয, তস্মা ভৱাভৱহেতূতি খুদ্দকস্স মহন্তস্স ৱা ভৱস্স হেতু, তং পচ্চাসীসমানোতি অত্থো. তেনাহ – ‘‘তস্মিং তস্মিং ভৱে সুখং ৱেদিস্সামী’’তিআদি.

৩৫. লোকুত্তৰবোধিপক্খিযধম্মে উদ্দিস্স পুথুজ্জনানং ৱিৱাদো সম্ভৱতীতি আহ – ‘‘লোকিযলোকুত্তৰাৱ কথিতা’’তি. লোকিযাপি হি বোধিপক্খিযধম্মা লোকুত্তৰধম্মাধিগমস্স আসন্নকাৰণত্তা ৱিসেসকাৰণন্তি যাৱ অঞ্ঞেহি লোকিযধম্মেহি অভিৱিসিট্ঠোতি কত্ৱা, ‘‘ইমেসু সত্ততিংসবোধিপক্খিযধম্মেসূ’’তি অৱিসেসেন ৱুত্তং. অত্থতো নানং হোতীতি অত্থতো ভেদো হোতি বোধিপক্খিযধম্মানং সমধিগতত্তা. ন হি কাযাদযো ভাৱেতব্বা, সতিযেৱ পন ভাৱেতব্বাতি. ব্যঞ্জনতো নানং ভেদং. ইমিনাপি কাৰণেনাতি ইমাযপি যুত্তিযা. ইদানি তং যুত্তিং দস্সেন্তো – ‘‘অত্থঞ্চ ব্যঞ্জনঞ্চা’’তিআদিমাহ. তত্থ সমানেত্ৱাতি সুত্তন্তৰতো সমানেত্ৱা, সুত্তন্তৰপদেহি চ সমানেত্ৱা. অঞ্ঞথাতি অঞ্ঞতো, ভূততো অপগতং কত্ৱাতি অত্থো. মিচ্ছা ৰোপিতভাৱোতি অযাথাৱতো ঠপিতভাৱো. অত্থঞ্চ ব্যঞ্জনঞ্চ ৱিঞ্ঞাপনকাৰণমেৱাতি অৱিপৰীতত্থস্স সদ্দস্স চ বুজ্ঝনহেতুতায.

৩৭. ইধ ধম্মৱিনযট্ঠানে সতিযেৱ সতিপট্ঠানন্তি গহিতা, অত্থতো সমেতি নাম যাথাৱতো অত্থস্স গহিতত্তা. অসভাৱনিৰুত্তিভাৱতো ব্যঞ্জনতো নানত্তন্তি তং লিঙ্গভেদেন ৱচনভেদেন চ দস্সেন্তো, ‘‘সতিপট্ঠানোতি ৱা সতিপট্ঠানাতি ৱা মিচ্ছা ৰোপেথা’’তি আহ. অপ্পমত্তকন্তি অণুমত্তং সল্লহুকং, ন গৰুতৰং অধনিতং কত্ৱা ৱত্তব্বম্পি ধনিতং ঘোসৱন্তং কত্ৱা ৰোপিতে ৱুত্তদোসাভাৱতোতি তেনাহ – ‘‘নিব্বুতিং পত্তুং সক্কা হোতী’’তি.

ব্যঞ্জনস্স মিচ্ছাৰোপনং ন ৱিসেসন্তৰাযকৰং হোতীতি ঞাপনত্থং, চতুসু মগ্গেসু পঞ্হং কথেত্ৱাৱ পৰিনিব্বুতো. সুত্তন্তব্যঞ্জনং সন্ধাযেতং ৱুত্তং – ‘‘অপ্পমত্তকং খো পনা’’তি.

৩৮. অথ চতুত্থৱাৰে ৱিৱাদো কস্মা জাতো? যাৱতা নেসং ৱচনং অত্থতো চেৱ সমেতি ব্যঞ্জনতো চাতি অধিপ্পাযো. সঞ্ঞায ৱিৱাদোতি কিঞ্চাপি সমেতি অত্থতো চেৱ ব্যঞ্জনতো চ, সঞ্ঞা পন নেসং অৱিসুদ্ধা, তায সঞ্ঞায ৱসেন ৱিৱাদো জাতোতি দস্সেন্তো ‘‘অহ’’ন্তিআদিমাহ. অহং সতিপট্ঠানন্তি ৱদামি, অযং সতিপট্ঠানোতি ৱদতীতি এৱং তেসং ঞাণং হোতীতি ইমমত্থং, ‘‘এসেৱ নযো’’তি ইমিনা অতিদিসতি.

৩৯. ন চোদনত্থায ৱেগাযিতব্বন্তি সীঘং সীঘং ন চোদনা কাতব্বাতি অত্থো. তস্মাতি যস্মা একচ্চো কোধনভাৱেন এৱং পটিপ্ফৰি, তস্মা. অনাদানদিট্ঠীতি আদিযিত্ৱা অনভিনিৱিসনতো অনাদানদিট্ঠী অদড়্হগ্গাহী. পক্খিপন্তো ৱিযাতি গিলিত্ৱা পক্খিপন্তো ৱিয.

উপঘাতোতি চিত্তপ্পঘাতো ফৰসুপঘাতো ৱিয. ৱণঘট্টিতস্স ৱিযাতি ৱণে ঘট্টিতস্স ৱিয দুক্খুপ্পত্তি চিত্তদুক্খুপ্পত্তি. দ্ৱে ৱাৰে ৱত্ৱাপি ৱিসজ্জেতীতি সুপ্পটিনিস্সগ্গী এৱং পগেৱ চোদিতমত্তে ৱিস্সজ্জেতি চেতি অধিপ্পাযো. কথনৱসেন চ কাযচিত্তকিলমথো. এৱৰূপোতি সহসা অৱিস্সজ্জেন্তেন চোদকস্স ৱিহেসাৱাদো হুত্ৱাপি অক্কোধনাদিসভাৱো.

উপেক্খাতি সকেন কম্মেন পঞ্ঞাযিস্সতীতি তস্মিং পুগ্গলে অজ্ঝুপেক্খণা. উপেক্খং অতিমঞ্ঞতি নাম তস্স অনাচাৰস্স অনজ্ঝুপেক্খণতো.

৪০. ৱচনসঞ্চাৰোতি পেসুঞ্ঞৱসেন অঞ্ঞথাৱচনুপসংহাৰো. দিট্ঠিপড়াসোতি যুগগ্গাহৱসেন লদ্ধি. সা পন চিত্তস্স অনাৰাধনিযভাৱো সত্থুচিত্তস্স অনাৰাধকভাৱো. কলহোতি অধিকৰণুপ্পাদৱসেন পৱত্তো ৱিগ্গহো ভণ্ডনস্স পুব্বভাগো.

যেন কাৰণেনাতি যেন ধম্মেন সত্থুসাসনেন. তমেৱ হি সন্ধায ৱদতি – ‘‘ধম্মোতি সাৰণীযধম্মো অধিপ্পেতো’’তি. এত্থাতি ‘‘ধম্মস্স চানুধম্ম’’ন্তি এত্থ. ধম্মোতি সম্বুদ্ধস্স তস্স তথা পৱত্তং ব্যাকৰণং যথা ৱিৱাদাপন্না সঞ্ঞত্তিং গচ্ছন্তি. তেনাহ – ‘‘তেসং ভিক্খূনং সঞ্ঞত্তিকৰণ’’ন্তি. তদেৱ ব্যাকৰণং অনুধম্মোতি ভিক্খুনা ৱুচ্চমানো অনুপৱত্তো ধম্মো. তেনাহ – ‘‘তদেৱ ব্যাকৰোতি নামা’’তি. কোচীতি যো কোচি. সহধম্মিকো সকাৰণো. অঞ্ঞত্থো অযং কিং সদ্দোতি আহ ‘‘অঞ্ঞো’’তি. অস্সাতি ৱুত্তনযেন পটিপন্নভিক্খুনো, তস্স পটিপত্তি ন কেনচি গৰহণীযা হোতীতি অত্থো. সেসং সব্বং সুৱিঞ্ঞেয্যমেৱ.

কিন্তিসুত্তৱণ্ণনায লীনত্থপ্পকাসনা সমত্তা.