১০. চূড়পুণ্ণমসুত্তৱণ্ণনা

৯১. তুণ্হীভূতং তুণ্হীভূতন্তি আমেডিতৱচনং ব্যাপনিচ্ছাৱসেন ৱুত্তন্তি আহ – ‘‘যং যং দিস’’ন্তিআদি. অনুৱিলোকেত্ৱাতি এত্থ অনুসদ্দোপি ব্যাপনিচ্ছাযমেৱাতি অনু অনু ৱিলোকেত্ৱাতি অত্থো. তেনেৱাহ – ‘‘ততো ততো ৱিলোকেত্ৱা’’তি. অসন্তো নীচো পুৰিসোতি অসপ্পুৰিসোতি আহ – ‘‘পাপপুৰিসো লামকপুৰিসো’’তি. সোতি অসপ্পুৰিসো. তন্তি অসপ্পুৰিসং জানিতুং ন সক্কোতি অসপ্পুৰিসধম্মানং যাথাৱতো অজাননতো. পাপধম্মসমন্নাগতোতি কাযদুচ্চৰিতাদিঅসন্তুট্ঠিতাদিলামকধম্মসমন্নাগতো. অসপ্পুৰিসে ভত্তি এতস্সাতি অসপ্পুৰিসভত্তি. তেনাহ – ‘‘অসপ্পুৰিসসেৱনো’’তি. অসপ্পুৰিসধম্মো অসপ্পুৰিসো উত্তৰপদলোপেন, তেসং চিন্তনসীলোতি অসপ্পুৰিসচিন্তী. তেনাহ ‘‘অসপ্পুৰিসচিন্তায চিন্তকো’’তি, দুচ্চিন্তিতচিন্তীতি অত্থো. অসপ্পুৰিসমন্তনন্তি অসাধুজনৱিচাৰং অসপ্পুৰিসৱীমংসং. অসপ্পুৰিসৱাচন্তি চতুব্বিধং দুব্ভাসিতং. অসপ্পুৰিসকম্মং নাম তিৱিধম্পি কাযদুচ্চৰিতং. অসপ্পুৰিসদিট্ঠি নাম ৱিসেসতো দসৱত্থুকা মিচ্ছাদিট্ঠি, তায সমন্নাগতো অসপ্পুৰিসদিট্ঠিযা সমন্নাগতো, অসপ্পুৰিসদানং নাম অসক্কচ্চদানাদি. সব্বোপাযমত্থো পাড়িতো এৱ ৱিঞ্ঞাযতি.

‘‘পাণং হনিস্সামী’’তিআদিকা চেতনা কামং পৰব্যাবাধাযপি হোতিযেৱ, যথা পন সা অত্তনো বলৱতৰদুক্খত্থায হোতি, তথা ন পৰস্সাতি ইমমত্থং দস্সেতুং, ‘‘অত্তনো দুক্খত্থায চিন্তেতি’’ইচ্চেৱ ৱুত্তো. যথা অসুকো অসুকন্তিআদীহি পাপকো পাপৱিপাকেকদেসং বলৱং গৰুতৰং ৱা পচ্চনুভোন্তোপি যথা পৰো পচ্চনুভোতি, ন তথা সযন্তি দস্সেতি. তেনাহ ‘‘পৰব্যাবাধাযা’’তি. গহেত্ৱাতি পাপকিৰিযায সহাযভাৱেন গহেত্ৱা.

অসক্কচ্চন্তি অনাদৰং কত্ৱা. দেয্যধম্মস্স অসক্কৰণং অপ্পসন্নাকাৰো, পুগ্গলস্স অসক্কৰণং অগৰুকৰণন্তি ইমমত্থং দস্সেন্তো, ‘‘দেয্যধম্মং ন সক্কৰোতি নামা’’তিআদিমাহ. অচিত্তীকত্ৱাতি ন চিত্তে কত্ৱা, ন পূজেত্ৱাতি অত্থো. পূজেন্তো হি পূজেতব্বৱত্থুং চিত্তে ঠপেতি, ততো ন বহি কৰোতি. চিত্তং ৱা অচ্ছৰিযং কত্ৱা পটিপত্তি চিত্তীকৰণং, সম্ভাৱনকিৰিযা. তপ্পটিক্খেপতো অচিত্তীকৰণং, অসম্ভাৱনকিৰিযা. অপৱিদ্ধন্তি উচ্ছিট্ঠাদিছড্ডনীযধম্মং ৱিয অৱখিত্তকং. তেনাহ – ‘‘ছড্ডেতুকামো ৱিযা’’তিআদি. ৰোগং পক্খিপন্তো ৱিযাতি ৰোগিকসৰীৰং ওদনাদীহি পমজ্জিত্ৱা ৱম্মিকে ৰোগং পক্খিপন্তো ৱিয. অদ্ধা ইমস্স দানস্স ফলং মমেৱ আগচ্ছতীতি এৱং যস্স তথা দিট্ঠি অত্থি, সো আগমনদিট্ঠিকো, অযং পন ন তাদিসোতি আহ ‘‘অনাগমনদিট্ঠিকো’’তি. তেনাহ – ‘‘নো ফলপাটিকঙ্খী হুত্ৱা দেতী’’তি.

কামঞ্চাযং যথাৱুত্তপুগ্গলো অসদ্ধম্মাদীহি পাপধম্মেহি সমন্নাগতো, তেহি পন সব্বেহিপি মিচ্ছাদস্সনং মহাসাৱজ্জন্তি দস্সেতুং, ‘‘তায মিচ্ছাদিট্ঠিযা নিৰযে উপপজ্জতী’’তি ৱুত্তং. ৱুত্তপটিপক্খনযেনাতি কণ্হপক্খে ৱুত্তস্স অত্থস্স ৱিপৰিযাযেন সুক্কপক্খে অত্থো ৱেদিতব্বো. ‘‘সদেৱকং লোক’’ন্তিআদীসু (পাৰা. ১) দেৱসদ্দো ছকামাৱচৰদেৱেসু, এৱমিধাতি আহ ‘‘ছকামাৱচৰদেৱা’’তি. তত্থ ব্ৰহ্মানং ৱিসুং গহিতত্তা কামাৱচৰদেৱগ্গহণন্তি চে? ইধ দানফলস্স অধিপ্পেতত্তা কামাৱচৰদেৱগ্গহণং, তত্থাপি ছকামাৱচৰগ্গহণং দট্ঠব্বং দেৱমহত্ততাদিৱচনতো. তিণ্ণং কুলানং সম্পত্তীতি খত্তিযমহত্তাদীনং তিণ্ণং কুলানং সম্পত্তি, ন কেৱলং কুলসম্পদা এৱ অধিপ্পেতা, অথ খো তত্থ আযুৱণ্ণযসভোগইস্সৰিযাদিসম্পদাপি অধিপ্পেতাতি দট্ঠব্বং উড়াৰস্স দানমযপুঞ্ঞস্স ৱসেন তেসম্পি সমিজ্ঝনতো. সুদ্ধৱট্টৱসেনেৱ কথিতং সুক্কপক্খেপি সব্বসো ৱিৱট্টস্স অনামট্ঠত্তা. সদ্ধাদযো হি লোকিযকুসলসম্ভাৰা এৱেত্থ অধিপ্পেতাতি. সেসং সুৱিঞ্ঞেয্যমেৱ.

চূড়পুণ্ণমসুত্তৱণ্ণনায লীনত্থপ্পকাসনা সমত্তা.

নিট্ঠিতা চ দেৱদহৱগ্গৱণ্ণনা.