৩. অস্সলাযনসুত্তৱণ্ণনা

৪০১. অঞ্ঞমঞ্ঞৱিসিট্ঠত্তা ৱিসদিসং ৰজ্জং ৱিৰজ্জং, ৱিৰজ্জতো আগতা, তত্থ জাতাতি ৱা ৱেৰজ্জকা, এৱং জাতা খো পন তে, যস্মা ৱত্থাভৰণাদিৱিভাগেন নানপ্পকাৰা হোন্তি, তস্মা ৱুত্তং ‘‘নানাৱেৰজ্জকান’’ন্তি. অট্ঠকথাযং পন ৱেৰজ্জস্সেৱ ৱসেন নানপ্পকাৰতা ৱুত্তা. যঞ্ঞুপাসনাদিনাতি যঞ্ঞানুভৱনমন্তজ্ঝেনদক্খিণপৰিযেসনাদিনা. চতুৱণ্ণসাধাৰণন্তি খত্তিযাদীনং চতুন্নং ৱণ্ণানং সাধাৰণং সংসাৰসুদ্ধিপাপতস্সনং. ন্হানসুদ্ধিযাতি তিত্থসমুদ্দখাতেসু মন্তজপ্পনপুব্বকং সাযংততিযউদকোৰোহনাদিন্হানসুদ্ধিযা. ভাৱনাসুদ্ধিযাতি পৰমজোতিভূতায পুৰিসভাৱনাসঙ্খাতায সুদ্ধিযা. ৱাপিতসিৰোতি ওৰোপিতকেসো. তমেৱ হি সিৰো ৱাপিতন্তি ৱুচ্চতি.

সভাৱৱাদীতি যথাভূতৱাদী. পব্বজন্তাতি ব্ৰাহ্মণপব্বজ্জং উপগচ্ছন্তা, তস্মা ব্ৰাহ্মণানং পব্বজ্জাৱিধানং সিক্খন্তেন ভোতা ‘‘ব্ৰাহ্মণাৱ সুজ্ঝন্তি, নো অব্ৰাহ্মণা’’তি অযং ৱিধি সহেতুকো সউপাদানো সক্কচ্চং উগ্গহিতো, তস্মা তুয্হং পৰাজযো নত্থি…পে… এৱমাহংসু.

৪০২. লদ্ধিভিন্দনত্থন্তি ‘‘ব্ৰাহ্মণাৱ ব্ৰহ্মুনো পুত্তা ওৰসা মুখতো জাতা ব্ৰহ্মজা’’তি এৱং পৱত্তলদ্ধিযা ৱিনিৱেঠনত্থং. পুত্তপটিলাভত্থাযাতি ‘‘এৱং মযং পেত্তিকং ইণধাৰং সোধেয্যামা’’তি লদ্ধিযং ঠত্ৱা পুত্তপটিলাভত্থায. অযঞ্হেত্থ অধম্মিকানং ব্ৰাহ্মণানং অজ্ঝাসযো. নেসন্তি ব্ৰাহ্মণানং. সচ্চৱচনং সিযাতি ‘‘ব্ৰহ্মুনো পুত্তা’’তিআদিৱচনং সচ্চং যদি সিযা ব্ৰাহ্মণীনং…পে… ভৱেয্য, ন চেতং অত্থি. মহাব্ৰহ্মুনো মুখতো জাতোতি ৱাদচ্ছেদকৱাদো মুখতোজাতচ্ছেকৱাদো. অস্সলাযনোৱিঞ্ঞূ জাতিকো ‘‘নিৰক্খেপং সমণেন গোতমেন ৱুত্ত’’ন্তি জানন্তোপি সহগতানং ব্ৰাহ্মণানং চিত্তানুৰক্খণত্থং ‘‘কিঞ্চাপি ভৱং গোতমো’’তিআদিমাহ.

৪০৩. ইদানি ব্ৰাহ্মণোৱ সেট্ঠো ৱণ্ণোতি ৱাদং ভিন্দিতুং ‘‘সুতং তে যোনককম্বোজেসূ’’তিআদি আৰদ্ধং. যদি ব্ৰাহ্মণোৱ সেট্ঠো ৱণ্ণো, সব্বত্থ ব্ৰাহ্মণোৱ সেট্ঠো ভৱেয্য, অথ কস্মা যোনককম্বোজাদিজনপদেসু ব্ৰাহ্মণানং সেট্ঠভাৱো নত্থি? এৱঞ্হি তত্থ ৱণ্ণা, তস্মা ‘‘ব্ৰাহ্মণোৱ সেট্ঠো’’তি লদ্ধিমত্তমেতং. তেসু হি জনপদেসু জনা একজ্ঝং সন্নিপতিত্ৱা সম্মন্তযিত্ৱা কতিকং অকংসু, দাসং সামিকং কত্ৱা ইতৰে সব্বে তং পূজেত্ৱা তস্স ৱসে ৱত্তন্তি, যো তেসং অয্যো হোতি ইতৰে সব্বে তস্স দাসা হোন্তি, তে কতিপযসংৱচ্ছৰাতিক্কমেন তস্স কিঞ্চি দোসং দিস্ৱা তং ততো ঠানতো অপনেত্ৱা অঞ্ঞং ঠপেন্তি, ইতি সো অয্যো হুত্ৱা দাসো হোতি, ইতৰো দাসো হুত্ৱা অয্যো হোতি, এৱং তাৱ কেচি ‘‘অয্যো হুত্ৱা দাসো হোতি, দাসো হুত্ৱা অয্যো হোতী’’তি এত্থ অত্থং ৱদন্তি. অট্ঠকথাযং পন পুৰিমৱসেনেৱ তমত্থং দস্সেতুং ‘‘ব্ৰাহ্মণো সভৰিযো’’তিআদি ৱুত্তং. ৱযপ্পত্তে পুত্তে অসতীতি ইদং ৱক্খমানস্স দাৰকস্স দাযজ্জসামিকভাৱস্স তাৱ দস্সনং. মাতিতো সুদ্ধোতি এত্থ যো মাতিতো সুদ্ধত্তা অয্যো, পিতিতো অসুদ্ধত্তা দাসো হোতি, সো এৱ পিতিতো অসুদ্ধত্তা দাসো হুত্ৱা মাতিতো অয্যো হোতীতি জাতিং সম্ভেদেতি. সোৱ সব্বেন সব্বং হোতীতি ন সক্কা ৱত্তুন্তি অপৰে. কো থামোতি মহন্তে লোকসন্নিৱাসে অনমতগ্গে অতীতে কালে ইত্থীনং ৱা চিত্তে অনৱট্ঠিতে দাসা দাসা এৱ হোন্তি, অয্যা অয্যা এৱ হোন্তীতি এত্থ কো একন্তিকো সহেতুকো অৱস্সযো, তস্স সাধকো সিদ্ধন্তো, কিং নিদস্সনন্তি অত্থো.

৪০৪. সুক্কচ্ছেদকৱাদো নামাতি ‘‘ব্ৰাহ্মণোৱ সুক্কো ৱণ্ণো’’তি এৱং ৱুত্তো সুক্কচ্ছেদকৱাৰো নাম.

৪০৮. সব্বস্মিং অগ্গিকিচ্চং কৰোন্তেতি এতেন যথা যতো কুতোচি নিস্সযতো উপ্পন্নো অগ্গিউপাদানসম্পন্নো অগ্গিকিচ্চং কৰোতি, এৱং যস্মিং কস্মিঞ্চি দাসকুলে জাতো উপনিস্সযসম্পন্নো সম্মাপটিপজ্জমানো সংসাৰতো সুজ্ঝতি এৱাতি দস্সেতি.

৪০৯. পাদসিকৱণ্ণোতি অন্তৰাড়ৱণ্ণো. এতেসন্তি খত্তিযকুমাৰেন ব্ৰাহ্মণকঞ্ঞায উপ্পন্নপুত্তো, ব্ৰাহ্মণকুমাৰেন খত্তিযকঞ্ঞায উপ্পন্নপুত্তোতি এতেসং দ্ৱিন্নং মাণৱকানং. মতকভত্তেতি মতে উদ্দিস্স কতভত্তে. থালিপাকেতি কতমঙ্গলভত্তে.

৪১০. তুম্হেতি জাতিসামঞ্ঞতো মাণৱং ব্ৰাহ্মণেহি সদ্ধিং একজ্ঝং সঙ্গণ্হন্তো আহ. কো নু খোতি অৱংসিৰো ইসিৱাদো, তেসং ব্ৰাহ্মণীসীনং অসামত্থিযদস্সনেন জাতিযা অপ্পমাণতং ৱিভাৱেতুং গামদাৰকৱেসেন উপগচ্ছি. তেন ৱুত্তং ‘‘গামণ্ডলৰূপো ৱিযা’’তি. কোণ্ডদমকোতি অদন্তদমকো.

৪১১. জনেতীতি জনিকা জনেত্তি. জনকো পিতাতি এত্থাপি এসেৱ নযো. গন্ধব্বপঞ্হন্তি গন্ধব্বস্স মাতুকুচ্ছিযং উপ্পজ্জনকসত্তস্স খত্তিযভাৱাদিপুচ্ছং. দব্বিগহণসিপ্পম্পি একা ৱিজ্জা ৱেদিতব্বা. তত্থ কিৰ কুসলো যং কিঞ্চি আহাৰূপগপণ্ণপুপ্ফফলবীজং অন্তমসো এলালুকম্পি গহেত্ৱা ভেসজ্জেহি যোজেত্ৱা পচন্তো সপ্পিমধুফাণিতেহি সমানৰসং কত্ৱা সম্পাদেতুং সক্কোতি, পুণ্ণোপি তাদিসো, তেন ঞাতং ত্ৱং দব্বিগহণসিপ্পমত্তম্পি ন জানাসীতি সম্বন্ধো. সদ্ধোতি কম্মফলসদ্ধায সদ্ধো, পোথুজ্জনিকেনেৱ ৰতনত্তযপসাদেন পসন্নো. তেনেৱাহ – ‘‘উপাসকং মং ভৱং…পে… সৰণং গত’’ন্তি.

অস্সলাযনসুত্তৱণ্ণনায লীনত্থপ্পকাসনা সমত্তা.