১০. সঙ্গাৰৱসুত্তৱণ্ণনা

৪৭৩. অভিপ্পসন্নাতি অভিসমেচ্চ পসন্না. তেনাহ – ‘‘অৱেচ্চপ্পসাদৱসেন পসন্না’’তি. ব্ৰাহ্মণী ৱিগতমলমচ্ছেৰতায ‘‘তুয্হং দেয্যধম্মং ৰুচ্চনকট্ঠানে দেহী’’তি আহ. মগ্গেনেৱ হিস্সা মচ্ছৰিযস্স পহীনত্তা বুদ্ধপক্খব্ৰাহ্মণপক্খৱসেন উভতোপক্খিকা.

কিংসূতি কিন্তি পুচ্ছাৱচনং. ছেত্ৱা অনাদিযিত্ৱা ৱিনাসেত্ৱা. সুখং সেতীতি চিত্তসন্তাপাভাৱেন সুখেন সুপতি. ন সোচতীতি ততো এৱ সোকং নাম ৱিনাসেতি. কোধন্তি কুজ্ঝনলক্খণং কোধং. ছেত্ৱা সমুচ্ছিন্দিত্ৱা. সুখং সেতীতি কোধপৰিড়াহেন অপৰিডয্হমানত্তা সুখং সুপতি. কোধৱিনাসেন ৱিনট্ঠদোমনস্সত্তা ন সোচতি. ৱিসমূলস্সাতি দুক্খৱিপাকস্স. মধুৰগ্গস্সাতি অক্কোসকস্স পচ্চক্কোসনেন, পহাৰকস্স পটিপ্পহৰণেন যং সুখং উপ্পজ্জতি, তং সন্ধাযেৱ ‘‘মধুৰগ্গো’’তি ৱুত্তো. ইমস্মিঞ্হি ঠানে পৰিযোসানং ‘‘অগ্গ’’ন্তি ৱুত্তং. অৰিযাতি বুদ্ধাদযো অৰিযা.

পঞ্হং কথেসীতি ব্ৰাহ্মণো কিৰ চিন্তেসি – ‘‘সমণো গোতমো লোকপূজিতো, ন সক্কা যং ৱা তং ৱা ৱত্ৱা সন্তজ্জেতুং, একং সণ্হপঞ্হং পুচ্ছিস্সামী’’তি. সো একং পুচ্ছাগাথং অভিসঙ্খৰিত্ৱা ‘‘সচে অসুকস্স নাম ৱধং ৰোচেমীতি ৱক্খতি, যে তুয্হং ন ৰুচ্চন্তি, তে মাৰেতুকামোসি, লোকৱধায উপ্পন্নো কিং তুয্হং সমণভাৱেনাতি নিগ্গহেস্সামি. সচে ন কস্সচি ৱধং ৰোচেমীতি ৱক্খতি, অথ নং ত্ৱং ৰাগাদীনম্পি ৱধং ন ইচ্ছসি, তস্মা সমণো হুত্ৱা আহিণ্ডসীতি নিগ্গণ্হিস্সামীতি ইমং উভতোকোটিকং পঞ্হং পুট্ঠো সমণো গোতমো নেৱ গিলিতুং ন উগ্গিলিতুং সক্খিস্সতী’’তি এৱং চিন্তেত্ৱা ইমং পয্হং পুচ্ছি. তস্স ভগৱা অজ্ঝাসযানুৰূপং কথেসি. সো পঞ্হব্যাকৰণেন আৰাধিতচিত্তো পব্বজ্জং যাচি. সত্থা তং পব্বাজেসি, সো পব্বজ্জাকিচ্চং মত্থকং পাপেসি. তেন ৱুত্তং ‘‘পব্বজিত্ৱা অৰহত্তং পত্তো’’তি.

অৱভূতাতি অধোভূতা. অধোভাৱো সত্তানং অৱড্ঢি অৱমঙ্গলন্তি আহ – ‘‘অৱড্ঢিভূতা অৱমঙ্গলভূতাযেৱা’’তি. পৰিভূতাতি পৰিভৱপ্পত্তা. ৱিজ্জমানানন্তি পাড়িযং অনাদৰে সামিৱচনন্তি তদত্থং দস্সেন্তো ‘‘ৱিজ্জমানেসূ’’তিআহ. পকট্ঠং, পৱড্ঢং ৱা ঞাণন্তি পঞ্ঞাণন্তি ভগৱতো ঞাণং ৱিসেসেত্ৱা ৱুত্তং.

৪৭৪. অভিজানিত্ৱাতি অভিৱিসিট্ঠেন ঞাণেন জানিত্ৱা. ৱোসিতৱোসানাতি কতকৰণীযতায সব্বসো পৰিসোসিতনিট্ঠা. পাৰমিসঙ্খাতন্তি পৰমুক্কংসভাৱতো পাৰমীতি সঙ্খাতং. তেনাহ ‘‘সব্বধম্মানং পাৰভূত’’ন্তি. ব্ৰহ্মচৰিযস্সাতি সাসনব্ৰহ্মচৰিযস্স আদিভূতং. তেনাহ ‘‘উপ্পাদকা জনকা’’তি. ‘‘ইদমেৱং ভৱিস্সতি ইদমেৱ’’ন্তি তক্কনং তক্কো, সো এতস্স অত্থীতি তক্কী. যস্মা সো তং তং ৱত্থুং তথা তথা তক্কিত্ৱা গণ্হতি, তস্মা ৱুত্তং ‘‘তক্কগাহী’’তি. ৱীমংসনসীলো ৱীমংসী পচ্চক্খভূতমত্থং ৱীমংসনভূতায পঞ্ঞায কেৱলং ৱীমংসনতো. তেনাহ ‘‘পঞ্ঞাচাৰং চৰাপেত্ৱা এৱংৱাদী’’তি. যথাৱুত্ততক্কীৱীমংসীভাৱেন তক্কপৰিযাহতং ৱীমংসানুচৰিতং সযংপটিভানং এৱমেতন্তি ৱত্ৱা.

৪৮৫. অট্ঠিতপধানৱতন্তি অঞ্ঞত্থ কিস্মিঞ্চি পুগ্গলে অট্ঠিতপধানৱতং অনঞ্ঞসাধাৰণং ভোতো গোতমস্স পধানং অহোসি. সপ্পুৰিসপধানৱতং অহোসি সপ্পুৰিসপধানৱতাধিগতানং এতাদিসানং অৰহতং অচ্ছৰিযপুগ্গলানংযেৱ আৱেণিকপধানৱতং অহোসি. অজানন্তোৱ পকাসেতীতি অযং পুচ্ছিতমত্থং সযং পচ্চক্খতো অজানন্তো এৱ কেৱলং সদ্দং উপ্পাদেত্ৱাৱ পকাসেসীতি সঞ্ঞায আহ. অজাননভাৱে সন্তেতি ইমে অধিদেৱাতি পচ্চক্খতো জাননে অসতি. পণ্ডিতেন মনুস্সেনাতি লোকৱোহাৰকুসলেন মনুস্সেন, ত্ৱং পন লোকৱোহাৰেপি অকুসলো. ৱচনত্থঞ্হি অজানন্তো যং কিঞ্চি ৱদতি. উচ্চেন সম্মতন্তি উচ্চং সুপাকটং সব্বসো তৰুণদাৰকেহিপি সম্মতং. ঞাতমেতং যদিদং অত্থি দেৱাতি. তেনাহ ‘‘সুসুদাৰকাপী’’তিআদি. দেৱাতি উপপত্তিদেৱা. অধিদেৱা নাম সম্মুতিদেৱেহি অধিকদেৱাতি কত্ৱা, তদঞ্ঞে চ মনুস্সে অধিকভাৱে কিমেৱ ৱত্তব্বং. সেসং সুৱিঞ্ঞেয্যমেৱ.

পপঞ্চসূদনিযা মজ্ঝিমনিকাযট্ঠকথায

সঙ্গাৰৱসুত্তৱণ্ণনায লীনত্থপ্পকাসনা সমত্তা.

নিট্ঠিতা চ ব্ৰাহ্মণৱগ্গৱণ্ণনা.

মজ্ঝিমপণ্ণাসটীকা সমত্তা.