৯. বহুৱেদনিযসুত্তৱণ্ণনা

৮৮. পঞ্চকঙ্গোতি ৱড্ঢকীকিচ্চসাধনে ৱাসিআদিপঞ্চকং অঙ্গং সংধনং এতস্মিন্তি পঞ্চকঙ্গো. থম্ভাদিৱত্থূনং থপনট্ঠেন থপতি. পণ্ডিতউদাযিত্থেৰো, ন কাড়ুদাযী থেৰো.

৮৯. পৰিযাযতি অত্তনো ফলং ৱত্তেতীতি পৰিযাযো, কাৰণং. ৱেদনাসন্নিস্সিতো চ কাযিকচেতসিকভাৱো কাৰণং. তেনাহ – ‘‘কাযিকচেতসিকৱসেন দ্ৱে ৱেদিতব্বা’’তি. তত্থ পসাদকাযসন্নিস্সিতা কাযিকা, চেতোসন্নিস্সিতা চেতসিকা. সুখাদিৱসেন তিস্সোতি এত্থ সুখনদুক্খনুপেক্খনানি সুখাদিৱেদনায কাৰণং. তানি হি পৱত্তিনিমিত্তানি কত্ৱা তত্থ সুখাদিসদ্দপ্পৱত্তি, ইমিনা নযেন সেসেসুপি যথাৰহং কাৰণং নিদ্ধাৰেত্ৱা ৱত্তব্বং. উপৱিচাৰৱসেনাতি আৰম্মণং উপেচ্চ সৱিসেসপৱত্তিৱসেন. যস্মিঞ্হি আৰম্মণে সোমনস্সৱেদনা পৱত্ততি, আৰম্মণতায তং উপগন্ত্ৱা ইতৰৱেদনাহি ৱিসিট্ঠতায সৱিসেসং তত্থ পৱত্তি. তেনাহ ‘‘সোমনস্সট্ঠানিযং ৰূপং উপৱিচৰতী’’তি. এস নযো সেসৱেদনাসু গেহস্সিতানীতি গেহনিস্সিতানি.

৯০. পৰিযাযেনাতি ‘‘ইদমেত্থ দুক্খস্মিন্তি ৱদামী’’তি ৱুত্তট্ঠানং সন্ধায ৱদতি. তং দস্সেন্তোতি কামঞ্চেত্থ সুত্তে – ‘‘দ্ৱেপানন্দ, ৱেদনা ৱুত্তা’’তি দ্ৱে আদিং কত্ৱা ৱেদনা দস্সিতা, একাপি পন দস্সিতা এৱাতি দস্সেন্তো. উপত্থম্ভেতুন্তি একাপি ৱেদনা ৱুত্তা মযা পৰিযাযেন, এৱং সতি দ্ৱেপি ৱত্তব্বাতি এৱং তস্স ৱাদং উপত্থম্ভেতুং. কথং পন একা ৱেদনা ৱুত্তাতি? যং কিঞ্চি ৱেদযিতং সুখং ৱা দুক্খং ৱা অদুক্খমসুখং ৱা, ইদমেত্থ দুক্খস্মিন্তি ৱদামীতি. যং পনেত্থ ৱত্তব্বং, তং ইতিৱুত্তকৱণ্ণনাযং (ইতিৱু. অট্ঠ. ৫২ আদযো) পৰমত্থদীপনিযং ৱুত্তনযেন ৱেদিতব্বং.

কথং পনেত্থ ৰূপাৱচৰচতুত্থে অৰূপেসু সঞ্ঞাৱেদযিতনিৰোধে সুখং উদ্ধতন্তি আহ ‘‘এত্থ চা’’তিআদি. সন্তট্ঠেনাতি পটিপক্খধম্মানং ৱূপসন্তভাৱেন. পণীতট্ঠেনাতি ভাৱনাৱিসেসৱিসিট্ঠেন অতপ্পকভাৱেনেৱ সেট্ঠভাৱেন চ, পচ্চযৱিসেসেন পধানভাৱং নীতন্তিপি পণীতং. ৱেদযিতসুখং নাম ৱেদনাভূতং সুখন্তি কত্ৱা. অৱেদযিতসুখং নাম যাৱতা নিদ্দুক্খতা, তাৱতা সুখন্তি ৱুচ্চতীতি.অথ ৱা নিৰোধো সুট্ঠু খাদতি খনতি কাযিকচেতসিকাবাধন্তি ৱত্তব্বতং অৰহতি সত্তাহম্পি তত্থ দুক্খস্স নিৰুজ্ঝনতো. তেনাহ ‘‘নিদ্দুক্খভাৱসঙ্খাতেন সুখট্ঠেনা’’তি.

৯১. যস্মিং যস্মিং ভৱে, চিত্তুপ্পাদে, অৱত্থায ৱা নিদ্দুক্খভাৱো, দুক্খস্স পটিপক্খতা অনুপলব্ভনেন দুক্খৱিৱিত্তং, তং সুখস্মিংযেৱ পঞ্ঞপেতি. সেসং সুৱিঞ্ঞেয্যমেৱ.

বহুৱেদনীযসুত্তৱণ্ণনায লীনত্থপ্পকাসনা সমত্তা.