৮. অভযৰাজকুমাৰসুত্তৱণ্ণনা

৮৩. জাতিযা অসমানো নিহীনাচৰিযো পৰদত্তূপজীৱিকায মাতুযা কুচ্ছিযং জাতো পাদসিকপুত্তো. নিন্দাৱসেন ৱদতি এতেনাতি ৱাদো অগুণোতি আহ – ‘‘ৱাদং আৰোপেহীতি দোসং আৰোপেহী’’তি. নিব্বত্তৱসেন নিৰযং অৰহতি, নিৰযসংৱত্তনিযেন ৱা কম্মেন নিৰযে নিযুত্তো নেৰযিকো. আপাযিকোতি এত্থাপি এসেৱ নযো. অৱীচিম্হি উপ্পজ্জিত্ৱা তত্থ আযুকপ্পসঞ্ঞিতং অন্তৰকপ্পং তিট্ঠতীতি কপ্পট্ঠো. নিৰযূপপত্তিপৰিহৰণৱসেন তিকিচ্ছিতুং সক্কুণেয্যোতি তেকিচ্ছো, ন তেকিচ্ছো অতেকিচ্ছো. দ্ৱে অন্তে মোচেত্ৱাতি ফৰুসং ৱা অপ্পিযং ৱা কপ্পেয্যাতি দ্ৱে কোট্ঠাসে মুঞ্চিত্ৱা তে অনামসিত্ৱা পুচ্ছিতং অত্থং ততো বহি কৰোন্তো উগ্গিলতি নাম. তং পন এৱং কাতুং ন সক্কোতীতি আহ – ‘‘উগ্গিলিতুং বহি নীহৰিতুং ন সক্খিতী’’তি. এৱমেৱাযং পুচ্ছা ন গহেতব্বা, অযমেত্থ দোসোতি তং অপুচ্ছং কৰোন্তো অপনযন্তো ওগিলতি নাম, তথা পন অসক্কোন্তো পতিট্ঠাপেন্তো ন ওগিলতি নাম, ভগৱা পন তমত্থং ওকাসম্পি অকৰোন্তো উভযথাপি অসক্খীতি ৱেদিতব্বো. কথং? ভগৱা হি ‘‘ন খ্ৱেত্থ ৰাজকুমাৰ একংসেনা’’তি ৱদন্তো নিগণ্ঠস্স অধিপ্পাযং ৱিপৰিৱত্তেতি, উভো অন্তে মোচেত্ৱা পঞ্হং ৱিস্সজ্জেসি, এৱং তাৱ উগ্গিলিতুং অসক্খি. ‘‘ন তত্ৰ ৰাজকুমাৰ একংসেনা’’তি ৱদন্তো এৱ চ ‘‘নাযং পুচ্ছা এৱং অৱিভাগেন পুচ্ছিতব্বা, ৱিভজিত্ৱা পন পুচ্ছিতব্বা’’তি পুচ্ছায দোসং দীপেন্তো তং হাৰেন্তো ওগিলিতুম্পি সক্খতীতি.

উট্ঠাতুং ন সক্খিস্সতি চিত্তস্স অঞ্ঞথা পৱত্তিযা. অভযো দ্ৱে মগ্গে কতপৰিচযো ছেকো নিপুণো ৱাদসীলো চ হুত্ৱা ৱিচৰতি. তেনাহ – ‘‘সো ৱাদজ্ঝাসযতায তস্স ৱচনং সম্পটিচ্ছন্তো ‘এৱং, ভন্তে’তি আহা’’তি.

৮৫. এৱৰূপন্তি যা পৰেসং অপ্পিযা অমনাপা দুৰুত্তৱাচা, এৱৰূপা ৱাচা, ন পন ফৰুসৱাচা. ফৰুসৱাচায হি সেতুঘাতো তথাগতানং. চেতনাফৰুসতায হি ফৰুসৱাচা ইচ্ছিতা, ন পৰেসং অপ্পিযতামত্তেন. নট্ঠা নিগণ্ঠা ওগিলিকাদিসম্মতস্স পঞ্হস্স একৱচনেন ৱিদ্ধংসিতত্তা.

৮৬. দাৰকস্স অঙ্কে নিসীদনস্স কাৰণং দস্সেতুং ‘‘লেসৱাদিনো’’তিআদি ৱুত্তং. তত্থ লেসৱাদিনোতি ছলৱাদিনো, ৱাদমগ্গে ৱা অপৰিপুণ্ণতায লেসমত্তেনেৱ ৱাদসীলা. ওসটসঙ্গামোতি অনেকৱাৰং পৰৱাদমদ্দনৱসেন ওতিণ্ণৱাদসঙ্গামো. ৱিজ্ঝিত্ৱাতি নখেন ৱিজ্ঝিত্ৱা. ইমমেৱাতি য্ৱাযং দাৰকো অত্তনো ৱাদভঙ্গপৰিহৰণত্থং ইমিনা অঙ্কে নিসীদাপিতো, ইমমেৱ অস্স দাৰকং উপমং নিস্সযং কত্ৱা ৱাদং ভিন্দিস্সামি. ‘‘অস্স ৱাদং অপ্পটিততায উপমায ভঞ্জিস্সামী’’তি চিন্তেত্ৱা.

অপনেয্যং অস্স অহন্তি অস্স দাৰকস্স মুখতো অহং তং অপনেয্যং. অভূতত্থোৱ অভূতং উত্তৰপদলোপেনাতি আহ ‘‘অভূতন্তি অভূতত্থ’’ন্তি. অতচ্ছন্তি তস্সেৱ ৱেৱচনন্তি আহ ‘‘অতচ্ছন্তি ন তচ্ছ’’ন্তি. অভূতন্তি ৱা অসন্তং অৱিজ্জমানং. অতচ্ছন্তি অতথাকাৰং. অনত্থসংহিতন্তি দিট্ঠধম্মিকেন, সম্পৰাযিকেন ৱা অনত্থেন সংহিতং, অনত্থে ৱা সংহিতং, ন অত্থোতি ৱা অনত্থো, অত্থস্স পটিপক্খো সভাৱো, তেন সংহিতন্তি অনত্থসংহিতং, পিসুণৱাচং সম্ফপ্পলাপঞ্চাতি অত্থো. এৱমেত্থ চতুব্বিধস্সপি ৱচীদুচ্চৰিতস্স গহিততা দট্ঠব্বা.

দুপ্পযুত্তোতি দুপ্পটিপন্নো. ন তং তথাগতো ভাসতি অভূততাদিদোসদুট্ঠত্তা. তম্পি তথাগতো ন ভাসতি ভূতত্থেপি অনত্থসংহিততাদিদোসদুট্ঠত্তা.

ঠানং কাৰণং এতিস্সা অত্থীতি ঠানিযা ক-কাৰস্স য-কাৰং কত্ৱা, ন ঠানিযাতি অট্ঠানিযা, নিক্কাৰণা অযুত্তিযুত্তা, সা এৱ কথাতি অট্ঠানিযকথা. অত্তপচ্চক্খকথং কথেমাতি অত্তনা এৱ পচ্চক্খং কত্ৱা পৱত্তিযমানং ছলকথং কথেম.

গামিকমহল্লকো ‘‘ইমে মং ৱঞ্চেতুকামা, অহমেৱ দানি ইমে ৱঞ্চেস্সামী’’তি চিন্তেত্ৱা ‘‘এৱং ভৱিস্সতী’’তিআদিমাহ. ‘‘ন মযং দাসা’’তিপি ৱত্তুং নাসক্খিংসু পুব্বে তথাকতিকায কতত্তা.

ততিযং ততিযমেৱাতি দ্ৱীসুপি পক্খেসু ততিযং ততিযমেৱ ৱাচং. ভাসিতব্বকালং অনতিক্কমিত্ৱাতি যস্স যদা যথা ভাসিতব্বং, তস্স তদা তথেৱ চ ভাসনতো ভাসিতব্বং কাৰণং ভাসিতব্বকালঞ্চ অনতিক্কমিত্ৱাৱ ভাসতি.

৮৭. ঠানুপ্পত্তিকঞাণেনাতি ঠানে এৱ উপ্পজ্জনকঞাণেন. তস্মিং তস্মিং কাৰণে তস্স তং তং অৱত্থায উপ্পজ্জনকঞাণেন, ধম্মানং যথাসভাৱতো অৱবুজ্ঝনসভাৱোতি ধম্মসভাৱো. ধম্মে সভাৱধম্মে অনৱসেসে ৱা যাথাৱতো উপধাৰেতীতি ধম্মধাতু, সব্বঞ্ঞুতা. তেনাহ ‘‘সব্বঞ্ঞুতঞ্ঞাণস্সেতং অধিৱচন’’ন্তি. সুপ্পটিৱিদ্ধন্তি সব্বং ঞেয্যধম্মং সুট্ঠু পটিৱিজ্ঝনৱসেন, সুট্ঠু পটিৱিদ্ধন্তি অত্থো. তেনাহ ‘‘হত্থগতং ভগৱতো’’তি. নেয্যপুগ্গলৱসেন পৰিনিট্ঠিতাতি কথাপৰিৱিভাগেন অযমেৱ দেসনা চত্তাৰি অৰিযসচ্চানি দস্সেন্তো অৰহত্তং পচ্চক্খাসীতি.

অভযৰাজকুমাৰসুত্তৱণ্ণনায লীনত্থপ্পকাসনা সমত্তা.