৯. মহাসাৰোপমসুত্তৱণ্ণনা

৩০৭. নচিৰপক্কন্তেতি ন চিৰং পক্কন্তে, পক্কন্তস্স সতো ন চিৰস্সেৱ. সলিঙ্গেনেৱাতি মুণ্ডিযকাসাযগ্গহণাদিনা অত্তনো পুৰিমলিঙ্গেনেৱ. পাটিযেক্কে জাতেতি ৱিপন্নাচাৰদিট্ঠিতায পকাসনীযকম্মকৰণতো পৰং অঞ্ঞতিত্থিযসদিসে ৱিসুং ভূতে. কুলপুত্তোতি জাতিমত্তেন কুলপুত্তো. অসম্ভিন্নাযাতি সম্ভেদৰহিতায, জাতিসঙ্কৰৱিৰহিতাযাতি অত্তো. জাতিসীসেন ইধ জাতিৱত্থুকং দুক্খং ৱুত্তন্তি আহ ‘‘ওতিণ্ণোতি যস্স জাতি অন্তো অনুপৱিট্ঠা’’তি. জাতো হি সত্তো জাতকালতো পট্ঠায জাতিনিমিত্তেন দুক্খেন অন্তো অনুপৱিট্ঠো ৱিয ৱিবাধীযতি. জৰাযাতিআদীসুপি এসেৱ নযো. চত্তাৰো পচ্চযা লব্ভন্তীতি লাভা, চতুন্নং পচ্চযানং লব্ভমানানং সুকতভাৱো সুট্ঠু অভিসঙ্খতভাৱো. ৱণ্ণভণনন্তি গুণকিত্তনং. অপঞ্ঞাতাতি সম্ভাৱনাৱসেন ন পঞ্ঞাতা. লাভাদিনিব্বত্তিযাভাৱদস্সনঞ্হেতং. তেনাহ ‘‘ঘাসচ্ছাদনমত্তম্পি ন লভন্তী’’তি. অপ্পেসক্খাতি অপ্পানুভাৱা. সা পন অপ্পেসক্খতা অধিপতেয্যসম্পত্তিযা চ পৰিৱাৰসম্পত্তিযা চ অভাৱেন পাকটা হোতি. তত্থ পৰিৱাৰসম্পত্তিযা অভাৱং দস্সেন্তো ‘‘অপ্পপৰিৱাৰা’’তি আহ.

সাৰেনপি কেচি অজাননেন অঞ্ঞালাভেন ৱা অসাৰভূতম্পি কত্তব্বং কৰোন্তীতি ততো ৱিসেসনত্থং ‘‘সাৰেন সাৰকৰণীয’’ন্তি ৱুত্তন্তি তং দস্সেন্তো ‘‘অক্খচক্কযুগনঙ্গলাদিক’’ন্তি আহ. ব্ৰহ্মচৰিযস্সাতি সিক্খাত্তযসঙ্গহস্স সাসনব্ৰহ্মচৰিযস্স. মহাৰুক্খস্স মগ্গফলসাৰস্স ঞাণদস্সনফেগ্গুকস্স সমাধিতচস্স সীলপপটিকস্স চঞ্চলসভাৱা সংসপ্পচাৰীতি চ চত্তাৰো পচ্চযা সাখাপলাসং নাম. তেনেৱাতি লাভসক্কাৰসিলোকনিব্বত্তনেনেৱ. সাৰো মে পত্তোতি ইমস্মিং সাসনে অধিগন্তব্বসাৰো নাম ইমিনা লাভাদিনিব্বত্তনেন অনুপ্পত্তোতি ৱোসানং নিট্ঠিতকিচ্চং আপন্নো.

৩১০. ঞাণদস্সনন্তি ঞাণভূতং দস্সনং ৱিসযস্স সচ্ছিকৰণৱসেন পৱত্তং অভিঞ্ঞাঞাণং. সুখুমং ৰূপন্তি দেৱাদীনং, অঞ্ঞম্পি ৱা সুখুমসভাৱং ৰূপং. তেনাহ ‘‘অন্তমসো…পে… ৱিহৰন্তী’’তি, দিব্বচক্খু হি ইধ উক্কট্ঠনিদ্দেসেন ‘‘ঞাণদস্সন’’ন্তি গহিতং.

৩১১. অসমযৱিমোক্খং আৰাধেতীতি এত্থ অধিপ্পেতং অসমযৱিমোক্খং পাড়িযা এৱ দস্সেতুং ‘‘কতমো অসমযৱিমোক্খো’’তিআদি ৱুত্তং. অট্ঠন্নঞ্হি সমাপজ্জনসমযোপি অত্থি অসমযোপি, মগ্গৱিমোক্খেন পন ৱিমুচ্চনস্স সমযো ৱা অসমযো ৱা নত্থি. যস্স সদ্ধা বলৱতী, ৱিপস্সনা চ আৰদ্ধা, তস্স গচ্ছন্তস্স তিট্ঠন্তস্স নিসীদন্তস্স ভুঞ্জন্তস্স চ মগ্গফলপটিৱেধো নাম ন হোতীতি ন ৱত্তব্বং, ইতি মগ্গৱিমোক্খেন ৱিমুচ্চন্তস্স সমযো ৱা অসমযো ৱা নত্থীতি সো অসমযৱিমোক্খো. তেনাহ ‘‘লোকিযসমাপত্তিযো হী’’তিআদি.

ন কুপ্পতি, ন নস্সতীতি অকুপ্পা, কদাচিপি অপৰিহানসভাৱা. সব্বসংকিলেসেহি পটিপ্পস্সদ্ধিৱসেন চেতসো ৱিমুত্তীতি চেতোৱিমুত্তি. তেনাহ ‘‘অৰহত্তফলৱিমুত্তী’’তি. অযমত্থো পযোজনং এতস্সাতি এতদত্থং, সাসনব্ৰহ্মচৰিযং, তস্স এসা পৰমকোটি. যথাৰদ্ধস্স সাৰোপমেন ফলেন দেসনা নিট্ঠাপিতাতি আহ ‘‘যথানুসন্ধিনাৱ দেসনং নিট্ঠপেসী’’তি. যং পনেত্থ অত্থতো অৱিভত্তং, তং সুৱিঞ্ঞেয্যমেৱ.

মহাসাৰোপমসুত্তৱণ্ণনায লীনত্থপ্পকাসনা সমত্তা.