৯. পৰিৱত্তনহাৰৱিভঙ্গৱণ্ণনা

৩৫. সম্মাদিট্ঠিস্স…পে… নিজ্জিণ্ণা ভৱতীতি এত্থ যথা মগ্গসম্মাদিট্ঠিৱসেনত্থো ৱুত্তো, এৱং কম্মস্সকতাকম্মপথসম্মাদিট্ঠীনম্পি ৱসেন অত্থো লব্ভতেৱ. কম্মপথকথা হেসা. যথাৱুত্তেনাকাৰেনাতি ‘‘অৱিমুত্তাৱ সমানা’’তি, ‘‘অৱিমুত্তিয’’ন্তি চ ৱুত্তপ্পকাৰেন. মিচ্ছাভিনিৱেসৱসেনাতি অসম্মাসম্বুদ্ধং এৱ সম্মাসম্বুদ্ধোতি, অনিয্যানিকং এৱ নিয্যানিকোতি, অসন্তং এৱ পন সন্তন্তি, অনৰিযং এৱ অৰিযোতি ৱিপৰীতাভিনিৱেসৱসেন. মিচ্ছাধিমোক্খোতি অযাথাৱপসাদো, অযাথাৱসন্নিট্ঠানং ৱা. উপ্পন্নমোহো মিচ্ছাৱিমুত্তিঞাণদস্সনন্তি সম্বন্ধো.

৩৬. ৱাদানং ৱা অনুৱাদা ৱাদানুৱাদা, তেসং ৱাদানং উপাদাতি অত্থো. ৱাদানুপৱত্তিযোতি ৱাদানং দোসানং অনুপৱত্তিযো.

অন্তদ্ৱযপৰিৱত্তনন্তি কামসুখঅত্তকিলমথানুযোগসঙ্খাতস্স অন্তদ্ৱযস্স পটিপক্খৱসেন পৰিৱত্তনং.

এতেসুপি ৱাৰেসূতি ‘‘নিয্যানিকো ধম্মো তেসং অধম্মো, সুখো তেসং অধম্মো’’তি চ ইমেসু ৱাৰেসু. ৱুত্তনযেনাতি যদি অত্তপৰিতাপনং অত্তনো দুক্খাপনং ধম্মো, ধম্মস্স পটিৱিৰুদ্ধো অধম্মো সিযা, দুক্খস্স চ সুখপটিৱিৰুদ্ধন্তি ঝানমগ্গফলসুখস্স, অনৱজ্জপচ্চযপৰিভোগসুখস্স চ তেসং অধম্মভাৱো আপজ্জতীতি এৱং ৱত্তব্বা. ‘‘যং যং ৱা পনাতিআদিনা’’তি ইদং অৱসেসপাঠামসনং. এত্থ যং যং ৱা পন ধম্মন্তি যং ৱা তং ৱা ধম্মং, কুসলং ৱা অকুসলং ৱা ইট্ঠং ৱা অনিট্ঠং ৱাতি ৱুত্তং হোতি. ৰোচযতি ৱা উপগচ্ছতি ৱাতি চিত্তেন ৰোচতি, দিট্ঠিযা উপগচ্ছতীতি. তস্স তস্স ধম্মস্স যো পটিপক্খোতি তস্স তস্স ৰুচিতস্স, উপগতস্স ৱা ধম্মস্স যো পটিপক্খো নাম. স্ৱস্স অনিট্ঠতো অজ্ঝাপন্নো ভৱতীতি যো ধম্মো অস্স ৰুচিতস্স, উপগতস্স ৱা ধম্মস্স অনিট্ঠতো পচ্চনীকতো অব্ভুপগতো হোতি, তেন পটিপক্খেন দেসনায পৰিৱত্তনং পৰিৱত্তনো হাৰোতি অত্থো. তেনাহ ‘‘পটিপক্খস্স লক্খণং ৱিভাৱেতী’’তি.

পৰিৱত্তনহাৰৱিভঙ্গৱণ্ণনা নিট্ঠিতা.