২. উদ্দেসৱাৰৱণ্ণনা

১. ৱিভাগেনাতি সৰূপৱিভাগেন. অদিট্ঠং জোতীযতি এতাযাতি অদিট্ঠজোতনা. দিট্ঠং সংসন্দীযতি এতাযাতি দিট্ঠসংসন্দনা, সংসন্দনং চেত্থ সাকচ্ছাৱসেন ৱিনিচ্ছযকৰণং. ৱিমতি ছিজ্জতি এতাযাতি ৱিমতিচ্ছেদনা. অনুমতিযা পুচ্ছা অনুমতিপুচ্ছা. ‘‘তং কিং মঞ্ঞথা’’তি হি কা তুম্হাকং অনুমতীতি অনুমতি পুচ্ছিতা. কথেতুকম্যতাতি কথেতুকম্যতায.

‘‘হৰীযন্তি এতেহী’’তিআদিনা কৰণাধিকৰণকত্তুভাৱকম্মসাধনানং ৱসেন হাৰ-সদ্দস্স অত্থং ৱত্ৱা সদিসকপ্পনাৱসেন দস্সেতুং ‘‘হাৰা ৱিযা’’তিআদি ৱুত্তং. পুন গন্থকৰণাদিঅত্থেন গন্থাদিসদ্দানং ৱিয হাৰকৰণাদিঅত্থেন হাৰসদ্দসিদ্ধিং দস্সেতুং ‘‘হাৰযন্তী’’তিআদিমাহ. ‘‘হৰণতো, ৰমণতো চা’’তি ইমিনা মনোহৰা মনোৰমা চেতে সংৱণ্ণনাৱিসেসাতি দস্সেতি.

উপপত্তিসাধনযুত্তীতি লক্খণহেতু. ৱুত্তনযেনাতি ‘‘ননু চ অঞ্ঞেপি হাৰা যুত্তিসহিতা এৱা’’তিআদিনা দেসনাহাৰে ৱুত্তনযানুসাৰেন.

চতুন্নং ব্যূহো এত্থাতি ভিন্নাধিকৰণানম্পি পদানং অঞ্ঞপদত্থসমাসো লব্ভতি ‘‘উৰসিলোমো’’তিআদীনং (দী. নি. টী. ৩.৫৪, ৩০৩) ৱিযাতি ৱুত্তং.

সেসন্তি ‘‘ৱিৱচনমেৱ ৱেৱচন’’ন্তি এৱমাদি.

অনুপ্পৱেসীযন্তীতি অৱগাহীযন্তি. সমাধীযন্তীতি পৰিহৰীযন্তি. ৱিনা ৱিকপ্পেনাতি জাতি সামঞ্ঞং, ভেদো সামঞ্ঞং, সম্বন্ধো সামঞ্ঞন্তিআদিনা পদত্থন্তৰভাৱৱিকপ্পনমন্তৰেন.

পদট্ঠানাদিমুখেনাতি পদট্ঠানৱেৱচনভাৱনাপহানমুখেন. কেচীতি পদট্ঠানপৰিক্খাৰআৱট্টপৰিৱত্তনপঞ্ঞত্তিওতৰণে সন্ধায ৱদতি.

২. সম্বন্ধোতি হেতুফলভাৱযোগো. তথাভূতানঞ্হি ধম্মানং একসন্তানসিদ্ধতা একত্তনযো. ৱিভাগো সতিপি নেসং হেতুফলভাৱে ৱিভত্তসভাৱতা. অঞ্ঞো এৱ হি হেতু, অঞ্ঞং ফলন্তি. ব্যাপাৰৱিৰহো নিৰীহতা. ন হি হেতুফলানং এৱং হোতি ‘‘অহং ইমং নিব্বত্তেমি, ইমিনাহং নিব্বত্তো’’তি. অনুৰূপফলতা পচ্চযুপ্পন্নানং পচ্চযানুকূলতা. সমূহাদিং উপাদায লোকসঙ্কেতসিদ্ধা ৱোহাৰমত্ততা সম্মুতিসভাৱো. পথৱীফস্সাদীনং কক্খড়ফুসনাদিলক্খণং পৰমত্থসভাৱো. অযঞ্হেত্থ সঙ্খেপো – যস্মিং ভিন্নে, ইতৰাপোহে ৱা চিত্তেন কতেন তথা বুদ্ধি, ইদং সম্মুতিসচ্চং যথা ঘটে, সসম্ভাৰজলে চ, তব্বিপৰিযাযেন পৰমত্থসচ্চন্তি. পৰমত্থসচ্চপ্পটিৱেধাযাতি নিব্বানাধিগমায.

অন্তোতি অব্ভন্তৰো. পধানাৱযৱেনাতি মূলভাৱেন. ‘‘নন্দী দুক্খস্স মূল’’ন্তিআদীসু (ম. নি. ১.১৩) তণ্হা ‘‘নন্দী’’তি ৱুত্তা. ‘‘সঙ্গামে চ নন্দিং চৰতী’’তিআদীসু পমোদোতি আহ ‘‘তণ্হায, পমোদস্স ৱা’’তি.

৩. জাতিভেদতোতি কুসলা, অকুসলাতি ইমস্মা ৱিসেসা. যুজ্জন্তীতি এত্থ হেতুঅত্থো অন্তোনীতো ৱেদিতব্বোতি আহ ‘‘যোজীযন্তী’’তি. কেহি যোজীযন্তি? সংৱণ্ণনকেহীতি অধিপ্পাযো. যুজ্জন্তীতি ৱা যুত্তা হোন্তি, তেহি সমানযোগক্খমা তগ্গহণেনেৱ গহিতা হোন্তীতি অত্থো তদেকট্ঠভাৱতো. ইমস্মিং অত্থে ‘‘নৱহি পদেহী’’তি সহযোগে কৰণৱচনং, পুৰিমস্মিং কৰণে. ‘‘এতে খো’’তি চ পাঠো. তত্থ খো-সদ্দস্স পদপূৰণতা, অৱধাৰণত্থতা ৱা ৱেদিতব্বা. এতে এৱাতি এতে তণ্হাদযো এৱ, ন ইতো অঞ্ঞেতি অত্থো. অট্ঠাৰসেৱ ন ততো উদ্ধং, অধো ৱাতি. পুৰিমস্মিং পক্খে মূলপদন্তৰাভাৱো, দুতিযস্মিং তেসং অনূনাধিকতা দীপিতা হোতি.

উদ্দেসৱাৰৱণ্ণনা নিট্ঠিতা.