৫. পকিণ্ণকনিদ্দেসৱণ্ণনা

৫৩. ইদানি পকিণ্ণকং দস্সেতুং ‘‘সঙ্ঘিক’’ন্ত্যাদি আৰদ্ধং. তত্থ যো ভিক্খু ইস্সৰো হুত্ৱা সঙ্ঘিকং গৰুভণ্ডং অঞ্ঞস্স দেতি, তস্স থুল্লচ্চযং সিযা. থেয্যায অঞ্ঞস্স দেতি, যথাৱত্থু পাৰাজিকাদি সিযা, দুক্কটৱত্থু দুক্কটং, থুল্লচ্চযৱত্থু থুল্লচ্চযং, পাৰাজিকৱত্থু পাৰাজিকং সিযাতি ৱুত্তং হোতি.

৫৪. কুসাদিমযচীৰানীতি এত্থ আদি-সদ্দো ৱাকফলকং সঙ্গণ্হাতি, কুসমযচীৰং ৱাকমযচীৰং ফলকমযচীৰন্তি. তত্থ কুসে গন্থেত্ৱা কতচীৰং কুসমযচীৰং. ৱাকমযচীৰং নাম তাপসানং ৱক্কলং. ফলকমযচীৰং নাম ফলকসণ্ঠানানি ফলকানি সিব্বেত্ৱা কতচীৰং. কম্বলং কেসৱালজন্তি কেসজং কম্বলং ৱালজং কম্বলং, কেসকম্বলং ৱালকম্বলন্তি অত্থো. কেসেহি তন্তে ৱাযিত্ৱা কতকম্বলং কেসকম্বলং. চমৰিৱালেহি ৱাযিত্ৱা কতকম্বলং ৱালকম্বলং. সমযং ৱিনাতি নট্ঠচীৱৰকালং ঠপেত্ৱা. ধাৰযতো ধাৰযন্তস্স. লূকপক্খাজিনক্খিপন্তি উলূকপক্খিঅজিনক্খিপং. তত্থ উলূকপক্খীতি উলূকসকুণপক্খেহি কতনিৱাসনং. অজিনক্খিপন্তি সলোমং সখুৰং অজিনমিগচম্মং. নট্ঠচীৱৰকালং ঠপেত্ৱা ইমেসু সত্তসু ৱত্থূসু যং কিঞ্চি ধাৰযতো থুল্লচ্চযং সিযাতি অত্থো.

৫৫. সত্থকেন কত্তব্বং কম্মং সত্থকম্মং, তস্মিং সত্থকম্মে. ৱত্থিম্হি কত্তব্বং কম্মং ৱত্থিকম্মং, তস্মিং ৱত্থিকম্মে. সং নিমিত্তন্তি অত্তনো অঙ্গজাতং. তং ছিন্দতো থুল্লচ্চযং সিযাতি সম্বন্ধো. মংসাদিভোজনেতি এত্থ আদি-সদ্দো অট্ঠিলোহিতচম্মলোমানি সঙ্গণ্হাতি. তস্মা মনুস্সানং মংসঅট্ঠিলোহিতচম্মলোমভোজনপচ্চযা থুল্লচ্চযং সিযাতি অত্থো.

৫৬. কদলেৰকক্কদুস্সানীতি এত্থ কদলিএৰকঅক্কৱাকেহি কতানি ৱত্থানি ধাৰযন্তস্স দুক্কটং. পোত্থকন্তি মকচিৱাকেহি কতং পোত্থকদুস্সং. সব্বপীতাদিকন্তি এত্থ আদি-সদ্দেন সব্বলোহিতকসব্বকণ্হকসব্বমঞ্জেট্ঠিকং সঙ্গণ্হাতি. তত্থ সব্বমেৱ নীলকং সব্বনীলকং. এৱং সেসেসুপি. নীলং উম্মাৰপুপ্ফৱণ্ণং. পীতং কণিকাৰপুপ্ফৱণ্ণং. লোহিতং জযসুমনপুপ্ফৱণ্ণং. কণ্হকং অদ্দাৰিট্ঠকৱণ্ণং. মঞ্জেট্ঠিকং লাখাৰসৱণ্ণং. ইমেসু অট্ঠসু ৱত্থূসু যং কিঞ্চি ধাৰযন্তস্স দুক্কটং সিযাতি অত্থো.

৫৭-৮. হত্থিস্সুৰগসোণানন্তি হত্থিঅস্সউৰগসোণানং মংসং অট্ঠিৰুধিৰচম্মলোমানি. সীহব্যগ্ঘচ্ছদীপিনন্তি সীহব্যগ্ঘঅচ্ছদীপীনং মংসাদীনি. তৰচ্ছস্স চ মংসাদিং উদ্দিস্সকতমংসঞ্চ অনাপুচ্ছিতমংসঞ্চ ভুঞ্জতো দুক্কটং সিযা. দকতিত্থাদিকন্তি এত্থ আদি-সদ্দো ৱচ্চপস্সাৱকুটিযো সঙ্গণ্হাতি. তেন যাতানুপুব্বং আগতপ্পটিপাটিং হিত্ৱান ৱজ্জেত্ৱা নহানতিত্থঞ্চ ৱচ্চকুটিঞ্চ পস্সাৱকুটিঞ্চ ৱজে ৱজেয্য গচ্ছেয্য, দুক্কটং তস্স সিযাতি অত্থো.

৫৯. সহসাতি ৱেগসা ৱেগেন. ৱুব্ভজিত্ৱানাতি অন্তৰৱাসকং দূৰতোৱ উক্খিপিত্ৱা, ৱ-কাৰো সন্ধিৱসেনাগতো. পৱিসেতি পৱিসেয্য. ৱচ্চপস্সাৱকুটিকন্তি ৱচ্চকুটিকং পস্সাৱকুটিকং. ৱিসেতি পৱিসেয্য. যো ভিক্খু ৱচ্চপস্সাৱকুটিকং সহসা পৱিসেয্য ৱা নিক্খমেয্য ৱা, উব্ভজিত্ৱা ৱা পৱিসেয্য ৱা নিক্খমেয্য ৱা, উক্কাসিকং ৱজ্জেত্ৱা তং পৱিসেয্য, তস্স দুক্কটং সিযাতি যোজনা.

৬০. নিত্থুনন্তো ৱচ্চং কৰেয্য দন্তকট্ঠঞ্চ খাদন্তো, তস্স দুক্কটং সিযাতি অত্থো. ৱচ্চপস্সাৱদোণীনং বহি ৱচ্চাদিকং ৱচ্চপস্সাৱং কৰেয্য, তস্স দুক্কটং সিযা.

৬১. খৰেন চাৱলেখেয্যাতি ফালিতকট্ঠেন ৱা ফৰুসেন ৱা গণ্ঠিকেন ৱা পূতিকট্ঠেন ৱা সুসিৰেন ৱা অৱলেখেয্যাতি অত্থো. কট্ঠন্তি অৱলেখনকট্ঠং. কূপকেতি ৱচ্চকূপকে. ঊহতঞ্চাতি গূথমক্খিতঞ্চ. ন ধোৱেয্যাতি অত্তনা ৱা ন ধোৱেয্য পৰেন ৱা ন ধোৱাপেয্য. উক্লাপঞ্চাতি কচৱৰঞ্চ. ন সোধযেন সম্মজ্জেয্য.

৬২. চপুচপূতি সদ্দং কত্ৱা উদককিচ্চং কৰোন্তস্স আচমন্তস্স দুক্কটং সিযাতি অত্থো. অনজ্ঝিট্ঠোৱাতি অনাণত্তোযেৱ. থেৰেনাতি সঙ্ঘত্থেৰেন. পাতিমোক্খন্তি পাতিমোক্খুদ্দেসং. উদ্দিসে উদ্দিসেয্য, দুক্কটং সিযা.

৬৩. অনাপুচ্ছায পঞ্হস্স কথনে, অনাপুচ্ছায পঞ্হস্স ৱিস্সজ্জনে, অনাপুচ্ছায সজ্ঝাযকৰণে, অনাপুচ্ছায পদীপজালনে, অনাপুচ্ছায পদীপৱিজ্ঝাপনেতি ইমেসু চতূসু পচ্চযেসু তস্স দুক্কটং সিযা.

৬৪. অনাপুচ্ছা ৱাতপানকৱাটানি ৱিৱৰেয্য ৱা থকেয্য ৱা, তস্স দুক্কটং সিযাতি সম্বন্ধো. ৱন্দনাদিন্তি এত্থ আদি-সদ্দো ৱন্দাপনং সঙ্গণ্হাতি. যো ভিক্খু নগ্গো ৱন্দনং কৰেয্য, ৱন্দাপনং কৰেয্য, গমনং কৰেয্য, ভোজনং কৰেয্য, পিৱনং কৰেয্য, খাদনং কৰেয্য, গহণং কৰেয্য, দানং কৰেয্য, তস্স সব্বত্থ দুক্কটন্তি সম্বন্ধো.

৬৫. তিপটিচ্ছন্নকং ৱিনাতি ‘‘অনুজানামি, ভিক্খৱে, তিস্সো পটিচ্ছাদিযো জন্তাঘৰপ্পটিচ্ছাদিং উদকপ্পটিচ্ছাদিং ৱত্থপ্পটিচ্ছাদি’’ন্তি (চূড়ৱ. ২৬১) এৱং ৱুত্তা তিস্সো পটিচ্ছাদিযো সমাহটাতি ‘‘তিপটিচ্ছাদী’’তি ৱুত্তং. তিপটিচ্ছন্নকং ঠপেত্ৱা পৰিকম্মং সযং কৰেয্য, পৰং কাৰাপেয্য, তস্স দুক্কটং সিযাতি অত্থো. যো ভিক্খু নহাযং নহাযন্তো কুট্টে ৱা থম্ভে ৱা তৰুম্হি ৱা কাযং উপঘংসেয্য, তস্স দুক্কটং সিযা.

৬৬. যো ভিক্খু নহাযন্তো কুৰুৱিন্দকসুত্তেন কাযং ঘংসেয্য, কাযতো কাযেন অঞ্ঞমঞ্ঞং ঘংসেয্য, তস্স দুক্কটং সিযাতি সম্বন্ধো. যো অগিলানো সউপাহনো বহাৰামে বহিআৰামে চৰেয্য, তস্স দুক্কটং সিযাতি সম্বন্ধো.

৬৭. সব্বনীলাদিকম্পি চাতি এত্থ আদি-সদ্দো লোহিতোদাতপীতকণ্হমঞ্জেট্ঠমহাৰঙ্গমহানামৰঙ্গৰত্তাদযো উপাহনাযো সঙ্গণ্হাতি. যো ভিক্খু সব্বনীলসব্বলোহিতাদিকং উপাহনং ধাৰেতি, তস্স দুক্কটং সিযাতি সম্বন্ধো. যো ভিক্খু ৰত্তো ৰত্তচিত্তো তদহুজাতাযপি ইত্থিযা নিমিত্তং পস্সেয্য, তস্স দুক্কটং সিযা. যো ভিক্খু ভিক্খদাযিযা ভিক্খদাযিকায ইত্থিযা মুখং পস্সেয্য, তস্স দুক্কটং সিযা.

৬৮-৯. যো ভিক্খু উজ্ঝানসঞ্ঞী হুত্ৱা অঞ্ঞস্স ভিক্খুনো পত্তং ৱা পস্সেয্য, তস্স দুক্কটং সিযা. আদাসাদিম্হি উদকপত্তে অত্তনো মুখং পস্সেয্য, তস্স দুক্কটং সিযা. উচ্চাসনমহাসনে নিসজ্জাদিং নিসীদনসযনাদিং কৰোন্তস্স ভিক্খুনো দুক্কটং সিযা. উক্খিত্তানুপসম্পন্ননানাসংৱাসকাদীনং ৱন্দনেপি দুক্কটং সিযাতি সম্বন্ধো. তত্থ উক্খিত্তোতি আপত্তিযা অদস্সনে উক্খিত্তকো, আপত্তিযা অপ্পটিকম্মে উক্খিত্তকো, পাপিকায দিট্ঠিযা অপ্পটিনিস্সগ্গে উক্খিত্তকোতি তিৱিধোপি ইধাধিপ্পেতো. অনুপসম্পন্নোতি ইমিনা ভিক্খুনিসামণেৰসামণেৰিসিক্খমানপণ্ডকইত্থিসিক্খাপচ্চক্খাতকা গহিতা. নানাসংৱাসকাতি লদ্ধিনানাসংৱাসকা গহিতা. আদি-সদ্দেন ছিন্নমূলকা গহিতা.

৭০-৭১. যো দীঘাসনে পণ্ডকিত্থীহি পণ্ডকেন ৱা ইত্থিযা ৱা উভতোব্যঞ্জনেন ৱা একতো নিসীদেয্য, তস্স দুক্কটং সিযা. অদীঘে আসনেতি ৰস্সে আসনে. যো ভিক্খু ৰস্সাসনে মঞ্চে ৱা পীঠে ৱা অসমানাসনিকেন একতো সযেয্য, তস্স দুক্কটং সিযাতি অত্থো. ফলপুপ্ফাদিকন্তি এত্থ আদি-সদ্দেন ৱেড়ুচুণ্ণদন্তকট্ঠমত্তিকাদযো সঙ্গহিতা. কুলসঙ্গহত্থায ফলপুপ্ফাদিকং দদতো দুক্কটং সিযাতি সম্বন্ধো.

৭২-৩. যো ভিক্খু গন্থিমাদিং সযং কৰেয্য, পৰং কাৰাপেয্য, তস্স দুক্কটং সিযা. যো ভিক্খু জিনেন ৱাৰিতপচ্চযে পৰিভুঞ্জেয্য, তস্স দুক্কটং সিযা. অব্যত্তো বালো যো ভিক্খু আচৰিযুপজ্ঝাযে অনিস্সায নিস্সযং অগ্গহেত্ৱা ৱসেয্য, তস্স দুক্কটং সিযা. যো ভিক্খু অনুঞ্ঞাতেহি মাতাপিতুআদীহি পুগ্গলেহি অঞ্ঞস্স পুগ্গলস্স ভেসজ্জং কৰেয্য ৱা ৱদেয্য ৱা, তস্স দুক্কটং সিযা. সাপত্তিকো যো ভিক্খু উপোসথপ্পৱাৰণং কৰেয্য, তস্স দুক্কটং সিযাতি সম্বন্ধো. তত্থ জিনেন ভগৱতা ৱাৰিতা জিনৱাৰিতা, জিনৱাৰিতা চ তে পচ্চযা চেতি জিনৱাৰিতপচ্চযা, তে জিনৱাৰিতপচ্চযে. দ্ৱেমাতিকাঅপ্পগুণতায অব্যত্তো.

৭৪. যো ভিক্খু আভোগং ৱা নিযোগং ৱা ৱজ্জেত্ৱা দ্ৱাৰবন্ধাদিকে ঠানে পৰিৱত্তকৱাটকং অপিধায দিৱা সযেয্য, তস্স দুক্কটং সিযাতি সম্বন্ধো. দ্ৱাৰবন্ধাদিকেতি যেন কেনচি পৰিক্খিত্তে অব্ভোকাসেপি ৰুক্খমূলেপি অন্তমসো ইমিনা লক্খণেন যুত্তআকাসঙ্গণেপি. অপিধাযাতি অপিদহিত্ৱা. ৱিনাভোগন্তি ‘‘এস দ্ৱাৰং জগ্গিস্সতী’’তি আভোগং ঠপেত্ৱাতি অত্থো. নিযোগন্তি অৱসট্ঠানং, অত্তনো অৱসং বহুসাধাৰণট্ঠানং ঠপেত্ৱা. ‘‘সৱসো’’তি ৱা পাঠো, সৱসো হুত্ৱাতি অত্থো. দিৱাতি দিৱাকালে.

৭৫. ধঞ্ঞন্তি সালি ৱীহি যৱো গোধুমো কঙ্গু ৱৰকো কুদ্ৰূসকোতি সত্তৱিধং ধঞ্ঞং. ইত্থিৰূপন্তি দাৰুলোহমযাদিইত্থিৰূপং. ৰতনন্তি মুত্তাদিদসৱিধং ৰতনং. আৱুধন্তি সত্তিতোমৰাদিসব্বাৱুধভণ্ডং. ইত্থিপসাধনন্তি ইত্থিযা সীসাদিঅলঙ্কাৰং. তূৰিযভণ্ডন্তি ধমনসঙ্খাদিসব্বং তূৰিযভণ্ডং. ফলৰুক্খেতি ফলিতৰুক্খে. পুব্বণ্ণাদিকন্তি মুগ্গমাসাদিকং. আদি-সদ্দেন ৱাকুৰকুমিনাদযো গহিতা. এতেসু যং কিঞ্চি আমসেয্য, তস্স দুক্কটং সিযাতি অত্থো.

৭৬. সসিত্থোদকতেলেহীতি যো পন মধুসিত্থকতেলেন ৱা উদকমিস্সকতেলেন ৱা যেন কেনচি চিক্খল্লেন ৱা. ফণহত্থফণেহি ৱাতি দন্তমযাদিফণেন ৱা ফণকিচ্চসাধকেহি হত্থঙ্গুলীহি ৱা কোচ্ছেন ৱা কেসমোসণ্ঠনে দুক্কটং সিযাতি অত্থো. একস্মিং ভাজনে ভোজননিমিত্তে দুক্কটং সিযাতি অত্থো.

৭৭. দ্ৱে ভিক্খূ একত্থৰণা সযেয্যূং, দ্ৱে ভিক্খূ একপাৱুৰণা সযেয্যুং, দ্ৱে ভিক্খূ একমঞ্চকে সযেয্যুং, তেসং দুক্কটানি হোন্তীতি সম্বন্ধো. পমাণতো অধিকং ৱা ঊনং ৱা দন্তকট্ঠং খাদেয্য, তস্স দুক্কটং সিযাতি যোজনা. তত্থ অধিকন্তি অট্ঠঙ্গুলতো অধিকং. ঊনন্তি চতুৰঙ্গুলতো ঊনং.

৭৮. যো ভিক্খু নচ্চঞ্চ গীতঞ্চ ৱাদিতঞ্চ যোজেতি ৱা যোজাপেতি ৱা, তস্স দুক্কটং সিযা. তেসং নচ্চানং দস্সনং, তেসং গীতানং সৱনং, তেসং ৱাদিতানং সৱনঞ্চ কৰোন্তস্স দুক্কটং সিযাতি অত্থো.

৭৯. ৱীহাদিৰোপিমেতি ৱীহিআদীনং ৰুহনট্ঠানে. বহিপাকাৰকুট্টকেতি পাকাৰকুট্টানং বহি. ৱচ্চাদিছড্ডনাদিম্হীতি ৱচ্চপস্সাৱসঙ্কাৰচলকাদীনং ছড্ডনৱিস্সজ্জনপচ্চযা দুক্কটং সিযাতি অত্থো. দীঘকেসাদিধাৰণেতি দীঘকেসধাৰণে দীঘনখধাৰণে দুক্কটং সিযাতি অত্থো.

৮০. নখমট্ঠকৰণাদিম্হীতি এত্থ আদি-সদ্দেন ৰজনকৰণং গহিতং. সম্বাধে লোমহাৰণেতি সম্বাধে উপকচ্ছকমুত্তকৰণট্ঠানে লোমুদ্ধৰণে. সউপাহনো ভিক্খু পৰিকম্মকতং ভূমিং অক্কমেয্যাতি সম্বন্ধো.

৮১. অধোতঅল্লপাদেহীতি যো ভিক্খু অধোতপাদেহি ৱা অল্লপাদেহি ৱা সঙ্ঘিকং মঞ্চং ৱা পীঠং ৱা অক্কমেয্য, পৰিকম্মকতং ভিত্তিং ৱা কাযতো আমসন্তস্স দুক্কটং সিযাতি অত্থো.

৮২-৩. সঙ্ঘাটিযাপি পল্লত্থেতি অধিট্ঠিতচীৱৰেন ৱিহাৰে ৱা অন্তৰঘৰে ৱা পল্লত্থিকং কৰেয্য, তস্স দুক্কটং. দুপ্পৰিভুঞ্জেয্য চীৱৰন্তি তিণ্ণং চীৱৰানং অঞ্ঞতৰং চীৱৰং দুপ্পৰিভোগেন পৰিভুঞ্জেয্য. অকাযবন্ধনোতি কাযবন্ধনৱিৰহিতো ভিক্খু গামং ৱজেয্য গচ্ছেয্য. যো ভিক্খু ৱচ্চকং উচ্চাৰং কত্ৱান উদকে সন্তে নাচমেয্য উদকসুদ্ধিং ন কৰেয্য, তস্স দুক্কটং সিযাতি অত্থো. সমাদেয্য অকপ্পিযেতি ভিক্খুং ৱা সামণেৰাদিকে সেসসহধম্মিকে ৱা অকপ্পিযে নিযোজেয্য, তস্স দুক্কটং সিযাতি অত্থো. সভাগাপত্তিযা দেসনাৰোচনপচ্চযা দুক্কটং সিযাতি অত্থো. সভাগাতি এত্থ ৱত্থুসভাগতাৱ ইধাধিপ্পেতা, ন আপত্তিসভাগতা.

৮৪. ন ৱসে ৱস্সন্তি যো ভিক্খু ৱস্সং ন ৱসেয্য ন উপগচ্ছেয্য, তস্স দুক্কটং সিযা. ৱিসংৱাদে সুদ্ধচিত্তেতি এত্থ সম্পদানত্থে ভুম্মৱচনং, পটিস্সৱং ৱিসংৱাদেন্তস্স সুদ্ধচিত্তস্স দুক্কটং সিযাতি অত্থো. ৱস্সং ৱসিত্ৱা অননুঞ্ঞাতকিচ্চতো অননুঞ্ঞাতকিচ্চেন ভিক্খুনো গমনে দুক্কটং সিযাতি যোজনা.

৮৫. আপদং ৱজ্জেত্ৱা তৰুস্স উদ্ধং পোৰিসম্হা অভিৰুহণে দুক্কটং সিযাতি সম্বন্ধো. আপদন্তি অন্তৰাযং. তৰুস্সাতি ৰুক্খস্স. পোৰিসম্হাতি একপোৰিসপ্পমাণা মজ্ঝিমস্স পুৰিসস্স পঞ্চহত্থা. অপৰিস্সাৱনো যো ভিক্খু অদ্ধানং গচ্ছেয্য, যো চ ভিক্খু তং পৰিস্সাৱনং যাচতো ন দদেয্য, তস্স দুক্কটং সিযাতি যোজনা. অদ্ধানন্তি অদ্ধযোজনমেৱ অন্তিমমদ্ধানং.

৮৬. অত্তনো ঘাতনে দুক্কটং সিযাতি সম্বন্ধো. যো ভিক্খু ইত্থিৰূপাদিৰূপং কৰেয্য ৱা কাৰাপেয্য ৱা, তস্স দুক্কটং সিযা. মালাদিকং ৱিচিত্তং ঠপেত্ৱা জাতকাদিৱত্থুং সযং কৰেয্য, দুক্কটং সিযাতি সম্বন্ধো.

৮৭. ভুঞ্জন্তমুট্ঠপেতি যো ভিক্খু ভুঞ্জন্তং উট্ঠাপেয্য, তস্স দুক্কটং সিযা. ভত্তসালাদীসু ৱুড্ঢানং ওকাসং অদত্ৱা নিসীদতো দুক্কটং সিযাতি যোজনা.

৮৮. যানানীতি ৱয্হং ৰথো সকটং সন্দমানিকাদীনি. কল্লকোতি অগিলানো. অগিলানো যো ভিক্খু যানানি অভিৰুহেয্য, তস্স দুক্কটং সিযাতি অত্থো. ৱদে দৱন্তি কেড়িং ৱদেয্য, ৰতনত্তযং আৰব্ভ কেড়িং ৱদেয্য, তস্স দুক্কটং সিযাতি অত্থো. অঞ্ঞপৰিসায উপলালনে দুক্কটং হোতি.

৮৯. কাযাদিন্তি এত্থ আদি-সদ্দো ঊৰুনিমিত্তং সঙ্গণ্হাতি. কাযং ৱা ঊৰুং ৱা নিমিত্তং ৱা ৱিৱৰিত্ৱা ভিক্খুনীনং ন দস্সযে ন দস্সেয্যাতি অত্থো. লোকাযতং তিৰচ্ছানাদিৱিজ্জং ন চ সযং ৱাচেয্য, পৰঞ্চ ন ৱাচাপেয্য. পলিতং গণ্হেয্য ৱা গণ্হাপেয্য ৱা, তস্স দুক্কটং সিযাতি যোজনা.

৯০-৯২. যত্থ কত্থচি পেড়াযং পক্খিপিত্ৱা ভত্তং ভুঞ্জন্তস্স দুক্কটং সিযাতি সম্বন্ধো. পত্তহত্থকো যো ভিক্খু ৱাতপানং ৱা কৱাটং ৱা পণামে পণামেয্য, সোদকং পত্তং উণ্হেয্য উণ্হে ওতাপেয্য ৱা পটিসামেয্য ৱা, ৱোদকং পত্তং অতিউণ্হেয্য অতিঠপেয্য, তস্স দুক্কটং সিযাতি অত্থো. যো ভিক্খু পত্তং ভূমিযং ৱা অঙ্কে ৱা মঞ্চে ৱা পীঠে ৱা মিড্ঢন্তে ৱা পৰিভণ্ডন্তে ৱা পাদে ৱা ছত্তে ৱা ঠপেয্য, তস্স দুক্কটং সিযাতি সম্বন্ধো. ভূমিযন্তি যেন কেনচি অনত্থতায পংসুসক্খৰমিস্সায. অঙ্কেতি দ্ৱিন্নং ঊৰূনং মজ্ঝে. মিড্ঢন্তেতি মিড্ঢপৰিযন্তে. পৰিভণ্ডন্তেতি বাহিৰপস্সে কতায তনুকমিড্ঢিযা অন্তে. যো ভিক্খু চলকাদিং ৱা পত্তে ঠপেয্য, পত্তে ৱা হত্থধোৱনে হত্থস্স ধোৱনপ্পচ্চযা তস্স দুক্কটং সিযাতি সম্বন্ধো.

৯৩. উচ্ছিট্ঠং মুখধোৱনং উদকম্পি পত্তেন নীহৰন্তস্স ভিক্খুনো দুক্কটং সিযা. যো ভিক্খু অকপ্পিযং পত্তং পৰিভুঞ্জেয্য, তস্স দুক্কটং সিযাতি অত্থো. তত্থ অকপ্পিযং পত্তন্তি দাৰুমযপত্তাদিং.

৯৪. যো ভিক্খু খিপিতে ‘‘জীৱা’’তি ৱদে ৱদেয্য, তস্স দুক্কটং সিযাতি অত্থো. যো ভিক্খু পৰিমণ্ডলকাদিম্হি পঞ্চসত্ততি সেখিযে অনাদৰো হুত্ৱা ন সিক্খতি, তস্স দুক্কটং সিযাতি সম্বন্ধো.

৯৫. যো ভিক্খু ভণ্ডাগাৰে পযুতো মাতুযা পিতুনো চ ভণ্ডকং গোপেয্য, অস্স ভিক্খুনো পাচিত্তিযং সিযাতি সম্বন্ধো. তত্থ পযুতোতি ভণ্ডাগাৰে ব্যাপাৰৱসেন যুত্তপ্পযুত্তো. গোপযেতি গোপেয্য. যো ভিক্খু দৱায হীনেন জাতিআদিনা উত্তমম্পি ৱদেয্য, দুব্ভাসিতং সিযাতি সম্বন্ধো. তত্থ হীনেহি ৱা উক্কট্ঠেহি ৱা জাতিআদীহি এৱং উক্কট্ঠং ৱা হীনং ৱা ‘‘চণ্ডালোসী’’তিআদিনা নযেন উজুং ৱা ‘‘সন্তি ইধেকচ্চে চণ্ডালৱেননেসাদা’’তিআদিনা নযেন অঞ্ঞাপদেসেন ৱা উপসম্পন্নং ৱা অনুপসম্পন্নং ৱা অক্কোসাধিপ্পাযং ৱিনা কেৱলং কীড়াধিপ্পাযেন ৱদেয্য, দুব্ভাসিতং সিযাতি.

পকিণ্ণকনিদ্দেসৱণ্ণনা নিট্ঠিতা.