৪. পাচিত্তিযনিদ্দেসৱণ্ণনা

৩০. ইদানি পাচিত্তিযং দস্সেতুং ‘‘সম্পজানমুসাৱাদে’’ত্যাদি আৰদ্ধং. তত্থ সম্পজানমুসাৱাদেতি নিমিত্তত্থে ভুম্মৱচনং, তস্মা যো ভিক্খু সম্পজানন্তো মুসা ৱদতি, তস্স তন্নিমিত্তং তংহেতু তপ্পচ্চযা পাচিত্তিযং উদীৰিতন্তি অত্থো. ভিক্খুঞ্চ ওমসন্তস্সাতি জাতিনামগোত্তকম্মসিপ্পৱযআবাধলিঙ্গকিলেসাপত্তিঅক্কোসেসু ভূতেন ৱা অভূতেন ৱা যেন কেনচি মুখসত্তিনা ভিক্খুং ওৱিজ্ঝন্তস্স ভিক্খুনো পাচিত্তিযং উদীৰিতন্তি অত্থো. পেসুঞ্ঞহৰণেপি চাতি ভিক্খুস্স পেসুঞ্ঞহৰণে, জাতিআদীহি অক্কোসৱত্থূহি ভিক্খুং অক্কোসন্তস্স ভিক্খুনো সুত্ৱা ভিক্খুনো পিযকম্যতায ৱা ভেদাধিপ্পাযেন ৱা যো অক্কুদ্ধো, তস্স ভিক্খুস্স কাযেন ৱা ৱাচায ৱা পেসুঞ্ঞহৰণৱচনে পাচিত্তিযং উদীৰিতন্তি অত্থো.

৩১. সঙ্গীতিত্তযমাৰুড়্হং পিটকত্তযং ধম্মং ভিক্খুঞ্চ ভিক্খুনিঞ্চ ঠপেত্ৱা অঞ্ঞেন পুগ্গলেন সদ্ধিং একতো পদং পদং ভণন্তস্স ভিক্খুনো পদগণনায পাচিত্তিযং উদীৰিতন্তি সমুদাযত্থো.

৩২. অনুপসম্পন্নেনেৱাতি ভিক্খুং ঠপেত্ৱা অন্তমসো পাৰাজিকৱত্থুভূতেন তিৰচ্ছানগতেনাপি সহ তিৰত্তিযং সযিত্ৱা চতুত্থদিৱসে অত্থঙ্গতে সূৰিযে পুন সহসেয্যায পাচিত্তি সিযাতি সম্বন্ধো. তত্থ সহসেয্যাযাতি সব্বচ্ছন্নপৰিচ্ছিন্নে, যেভুয্যেনচ্ছন্নপৰিচ্ছিন্নে ৱা সেনাসনে পুব্বাপৰিযেন ৱা একক্খণে ৱা একতো নিসজ্জনায. তত্থ ছদনং অনাহচ্চ দিযড্ঢহত্থুব্বেধেন পাকাৰাদিনা পৰিচ্ছিন্নম্পি সব্বপৰিচ্ছিন্নমিচ্চেৱ ৱেদিতব্বং.

৩৩. একৰত্তম্পি ইত্থিযা সদ্ধিং সেয্যং কপ্পযতো তস্স ভিক্খুনোপি পাচিত্তি সিযাতি অত্থো. তত্থ ইত্থিযাতি অন্তমসো তদহুজাতাযপি মনুস্সিত্থিযা. দেসেন্তস্স ৱিনা ৱিঞ্ঞুং, ধম্মঞ্চ ছপ্পদুত্তৰিন্তি ৱিঞ্ঞুং পুৰিসং ৱিনা ইত্থিযা ছপ্পদতো উত্তৰিং ধম্মং দেসেন্তস্স ভিক্খুনো পাচিত্তি সিযাতি অত্থো. তত্থ ‘‘ছপ্পদুত্তৰি’’ন্তি এত্থ একো গাথাপাদো একং পদন্তি এৱং সব্বত্থ পদপ্পমাণং ৱেদিতব্বং. ছ পদানি ছপ্পদং, ছপ্পদতো উত্তৰিং ছপ্পদুত্তৰিং.

৩৪. ভিক্খুসম্মুতিং ঠপেত্ৱা ভিক্খুনো দুট্ঠুল্লং ৱজ্জং অভিক্খুনো ৱদন্তস্স পাচিত্তিযং উদীৰিতন্তি অত্থো. তত্থ দুট্ঠুল্লন্তি ইধ সঙ্ঘাদিসেসং অধিপ্পেতং. ভিক্খুসম্মুতিযাতি যং সঙ্ঘো অভিণ্হাপত্তিকস্স ভিক্খুনো আযতিং সংৱৰত্থায আপত্তীনঞ্চ কুলানঞ্চ পৰিযন্তং কত্ৱা ৱা অকত্ৱা ৱা তিক্খত্তুং অপলোকেত্ৱা কতিকং কৰোতি, তং ঠপেত্ৱা. অভিক্খুনোতি অনুপসম্পন্নস্স. ৱদন্তস্সাতি আৰোচেন্তস্স.

৩৫. যো অকপ্পিযং পথৱিং খণেয্য ৱা খণাপেয্য ৱা, তস্স পাচিত্তিযং সিযা. তত্থ অকপ্পিযন্তি উদ্ধনপচনাদিৱসেন ৱা তথা তথা অদড্ঢা ৱা জাতপথৱী ৱুচ্চতি. সা তিৱিধা সুদ্ধমিস্সপুঞ্জৱসেন. তত্থ সুদ্ধপথৱী নাম পকতিযা সুদ্ধপংসু ৱা সুদ্ধমত্তিকা ৱা. মিস্সপথৱী নাম যত্থ পংসুতো ৱা মত্তিকতো ৱা পাসাণসক্খৰকথলমৰুম্বৱালুকাসু অঞ্ঞতৰস্স ততিযভাগো হোতি. পুঞ্জপথৱী নাম অতিৰেকচাতুমাসং ওৱট্ঠো পংসুপুঞ্জো ৱা মত্তিকাপুঞ্জো ৱা হোতি. ৱুত্তলক্খণেন পন মিস্সকপুঞ্জোপি পিট্ঠিপাসাণে ঠিতসুখুমৰজম্পি চ দেৱে ফুসযন্তে সকিং চে তিন্তং, চাতুমাসচ্চযেন তিন্তোকাসো পুঞ্জপথৱীসঙ্খমেৱ গচ্ছতি. যো ভিক্খু ভূতগামং ৱিকোপেয্য, তস্স পাচিত্তিযং সিযাতি সম্বন্ধো. তত্থ ভূতগামন্তি ভৱন্তি, অভৱুং চাতি ভূতা, জাযন্তি ৱড্ঢন্তি জাতা ৱড্ঢিতা চাতি অত্থো, গামোতি ৰাসি, ভূতানং গামো, ভূতা এৱ ৱা গামোতি ভূতগামো, পতিট্ঠিতহৰিততিণৰুক্খাদীনমেতং অধিৱচনং. তং ভূতগামং. ৱিকোপেয্যাতি ছেদনভেদনাদীনি কৰেয্য.

৩৬. যো ভিক্খু সঙ্ঘিকং মঞ্চাদিং অজ্ঝোকাসে সন্থৰণাদিকং কত্ৱা আপুচ্ছনাদিকং অকত্ৱা যাতি, তস্স পাচিত্তি সিযাতি অত্থো. তত্থ সঙ্ঘিকন্তি সঙ্ঘস্স সন্তকং. মঞ্চাদিন্তি এত্থ আদি-সদ্দেন পীঠভিসিকোচ্ছাদিং সঙ্গণ্হাতি. সন্থৰণাদিকন্তি সন্থৰণাদিং কত্ৱা ৱা কাৰাপেত্ৱা ৱা. আপুচ্ছনাদিকন্তি আপুচ্ছনং ৱা উদ্ধৰণং ৱা উদ্ধৰাপনং ৱাতি অত্থো. যাতীতি গচ্ছতি.

৩৭. যো ভিক্খু সঙ্ঘিকাৱসথে সেয্যং সন্থৰণাদিকং কত্ৱা আপুচ্ছনাদিকং অকত্ৱা যাতি, তস্স ভিক্খুনো পাচিত্তি সিযাতি অত্থো. তত্থ সঙ্ঘিকাৱসথেতি সঙ্ঘস্স সন্তকে আৱসথে ৱিহাৰে গব্ভে ৱা অঞ্ঞস্মিং ৱা সব্বপৰিচ্ছিন্নে গুত্তসেনাসনে. সেয্যন্তি ভিসি চিমিলিকা পাৱুৰণং উত্তৰত্থৰণং ভূমত্থৰণং তট্টিকা চম্মক্খণ্ডং নিসীদনং পচ্চত্থৰণং তিণসন্থাৰো পণ্ণসন্থাৰোতি এৱমাদিকং. সন্থৰণাদিকন্তি তেসু যেন কেনচি অত্থৰণাদিকং কত্ৱা ৱা কাৰাপেত্ৱা ৱা.

৩৮-৯. যো পন ভিক্খু জানং সপ্পাণকং তোযং পৰিভুঞ্জযে, তস্স ভিক্খুনো পাচিত্তি সিযাতি যোজনা. তত্থ জানং সপ্পাণকন্তি ‘‘সপ্পাণকমিদ’’ন্তি দিস্ৱা ৱা সুত্ৱা ৱা যেন কেনচি আকাৰেন জানন্তো. তোযন্তি উদকং. পৰিভুঞ্জযেতি পৰিভুঞ্জেয্য. যো ভিক্খু পাৰিৱত্তকং ঠপেত্ৱা অঞ্ঞাতিকায ভিক্খুনিযা চীৱৰং দেতি, তস্স ভিক্খুনো পাচিত্তি সিযা. চীৱৰপ্পটিগ্গহণসিক্খাপদে ভিক্খু পটিগ্গাহকো ইধ ভিক্খুনী, অযং ৱিসেসো. অঞ্ঞাতিকায ভিক্খুনিযা চীৱৰং সিব্বতোপি তস্স ভিক্খুনো পাচিত্তি সিযাতি অত্থো. চীৱৰন্তি নিৱাসনপাৰুপনূপগং. সিব্বতোতি সযং সিব্বন্তস্স সূচিং পৱেসেত্ৱা নীহৰণে পযোগগণনায পাচিত্তি. সিব্বাপেন্তস্স পন ‘‘সিব্বা’’তি ৱুত্তো সচেপি সব্বং সূচিকম্মং নিট্ঠাপেসি, একমেৱ পাচিত্তি, আণত্তস্স পযোগগণনায পাচিত্তি হোতি. পৱাৰেত্ৱান অতিৰিত্তং অকাৰেত্ৱা ভুঞ্জতো পাচিত্তি সিযাতি অত্থো. তত্ৰাযং ৱিনিচ্ছযো – ওদনো সত্তু কুম্মাসো মচ্ছো মংসন্তি পঞ্চন্নং ভোজনানং অঞ্ঞতৰং সাসপমত্তম্পি অজ্ঝোহৰিত্ৱা ভোজনং পটিক্খেপং কত্ৱা অঞ্ঞেন ইৰিযাপথেন ‘‘অলমেতং সব্ব’’ন্তি অতিৰিত্তং অকাৰেত্ৱা পৰিভুঞ্জতো পাচিত্তি হোতীতি.

৪০. যো ভিক্খু আসাদনাপেক্খো ভুত্তাৱিং পৱাৰিতং ভিক্খুং ‘‘হন্দ, ভিক্খু, খাদ ৱা ভুঞ্জ ৱা’’তি অনতিৰিত্তেন পৱাৰেতি, ভোজনে ভুত্তে তস্স পাচিত্তিযং উদীৰিতন্তি অত্থো. তত্থ আসাদনাপেক্খোতি আসাদনং চোদনং মঙ্কুকৰণভাৱং অপেক্খমানো.

৪১-২. যো ভিক্খু সন্নিধিভোজনং ভুঞ্জেয্য, তস্স ভিক্খুনো পাচিত্তি সিযাতি অত্থো. তত্থ সন্নিধিভোজনন্তি পটিগ্গহেত্ৱা একৰত্তং ৱীতিনামিতভোজনং. ৱিকালে যাৱকালিকং ভুঞ্জতো ৱাপি পাচিত্তি সিযাতি যোজনা. তত্থ ৱিকালেতি ৱিগতকালে, মজ্ঝন্হিকাতিক্কমতো পট্ঠায যাৱ অৰুণুগ্গমনাতি অত্থো. যাৱকালিকন্তি ৱনমূলফলাদিকং আমিসভোজনং. অগিলানো ভিক্খু পণীতকং সপ্পিভত্তাদিকম্পি ৱিঞ্ঞাপেত্ৱান ভুঞ্জেয্য, তস্স ভিক্খুনো পাচিত্তি সিযাতি যোজনা. তত্থ অগিলানোতি কল্লকো. পণীতকন্তি সপ্পিতেলমধুফাণিতমচ্ছমংসখীৰদধিসঙ্খাতেহি সংসট্ঠং সত্তধঞ্ঞনিব্বত্তং পণীতভোজনং. যো ভিক্খু দন্তকট্ঠোদকং ৱজ্জেত্ৱা অপ্পটিগ্গহিতকং ভুঞ্জেয্য, পাচিত্তি সিযাতি অত্থো. তত্থ অপ্পটিগ্গহিতন্তি কাযেন ৱা কাযপ্পটিবদ্ধেন ৱা গণ্হন্তস্স হত্থপাসে ঠত্ৱা কাযকাযপ্পটিবদ্ধনিস্সগ্গিযানং অঞ্ঞতৰেন ন দিন্নং অপ্পটিগ্গহিতং নাম.

৪৩. যো ভিক্খু তিত্থিযস্স সহত্থতো কিঞ্চি ভুঞ্জিতব্বং দদেয্য, তস্স পাচিত্তি সিযাতি সম্বন্ধো. তত্থ তিত্থিযস্সাতি অঞ্ঞতিত্থিযস্স. কিঞ্চি ভুঞ্জিতব্বন্তি যং কিঞ্চি ভোজনীযং. সহত্থতোতি সহত্থা. যো ভিক্খু মাতুগামেন একতো ৰহো নিসজ্জং কপ্পেয্য, তস্স পাচিত্তি সিযাতি সম্বন্ধো. তত্থ ৰহোতি পটিচ্ছন্নে. কপ্পেতি কপ্পেয্য. একতোতি সদ্ধিং.

৪৪. সুৰামেৰযপানেপীতি এত্থ পিট্ঠাদীহি কতং মজ্জং সুৰা. পুপ্ফাদীহি কতো আসৱো মেৰযং. যো ভিক্খু তদুভযম্পি বীজতো পট্ঠায কুসগ্গেনাপি পিৱতি, তস্স তপ্পানপচ্চযা পাচিত্তিযং উদীৰিতন্তি অত্থো. অঙ্গুলিপতোদকে চাপীতি অঙ্গুলীহি উপকচ্ছকাদীনং ঘট্টনপচ্চযা পাচিত্তি সিযাতি অত্থো. হসধম্মেপি চোদকেতি উপৰিগোপ্ফকে উদকে হসধম্মে কীড়ানিমিত্তং তস্স পাচিত্তি সিযাতি অত্থো.

৪৫. অনাদৰেপি পাচিত্তীতি পুগ্গলস্স ৱা ধম্মস্স ৱা অনাদৰকৰণেপি পাচিত্তি সিযাতি অত্থো. যো ভিক্খু উপসম্পন্নেন পঞ্ঞত্তেন ৱুচ্চমানো তস্স ৱা ৱচনং অকত্তুকামতায, তং ৱা ধম্মং অসিক্খিতুকামতায অনাদৰিযং কৰোতি, তস্স তস্মিং অনাদৰিযে পাচিত্তি সিযাতি অত্থো. ভযানকং কথং কত্ৱা ৱা ভযানকং ৰূপং দস্সেত্ৱা ৱা ভিক্খুং ভীসযতোপি পাচিত্তি সিযাতি অত্থো.

৪৬. যো ভিক্খু অগিলানো কিঞ্চি পচ্চযং ঠপেত্ৱা জোতিং জলেয্য ৱা জলাপেয্য ৱা, তস্স পাচিত্তিযং সিযাতি সম্বন্ধো. তত্থ কিঞ্চি পচ্চযন্তি পদীপুজ্জলনং ৱা পত্তপচনাদীসু জোতিকৰণং ৱাতি এৱৰূপং পচ্চযং ঠপেত্ৱা. জোতিন্তি অগ্গিং.

৪৭-৮. কপ্পবিন্দুং অনাদায নৱচীৱৰভোগিনো নৱং চীৱৰং ভুঞ্জন্তস্স পাচিত্তি সিযাতি অত্থো. কপ্পবিন্দুন্তি মোৰক্খিমণ্ডলমঙ্গুলপিট্ঠীনং অঞ্ঞতৰপ্পমাণং কপ্পবিন্দুং. অনাদাযাতি অনাদিযিত্ৱা. ভিক্খুনো চীৱৰাদিকং পৰিক্খাৰং অপনেত্ৱা নিধেন্তস্স ৱা নিধাপেন্তস্স ৱা হসাপেক্খস্স ভিক্খুনো পাচিত্তি সিযাতি অত্থো. চীৱৰাদিকন্তি আদি-সদ্দেন পত্তনিসীদনসূচিঘৰকাযবন্ধনাদিং সঙ্গণ্হাতি. নিধেন্তস্সাতি নিদহন্তস্স. হসাপেক্খস্সাতি হসাধিপ্পাযস্স. জানং পাণং হনে ভিক্খু, তিৰচ্ছানগতম্পি চাতি যো ভিক্খু ‘‘পাণো’’তি জানন্তো তিৰচ্ছানগতং পাণং খুদ্দকম্পি মহন্তম্পি হনেয্য, তস্স পাচিত্তিযং সিযাতি অত্থো.

৪৯. ছাদেতুকামো ছাদেতি, দুট্ঠুল্লং ভিক্খুনোপি চাতি যো ভিক্খু ভিক্খুনো দুট্ঠুল্লসঙ্খাতং সঙ্ঘাদিসেসং ছাদেতুকামো হুত্ৱা ছাদেতি, তস্স পাচিত্তিযং সিযাতি অত্থো. ইত্থিযা সহ সংৱিধায গামন্তৰগতস্স ভিক্খুনো পাচিত্তিযং সিযাতি যোজনা.

৫০. ভিক্খুং ৱা পহৰেয্যাথাতি যো ভিক্খু ভিক্খুং পহৰেয্য, তস্স পাচিত্তিযং সিযাতি যোজনা. তলসত্তিকমুগ্গিৰেতি যো ভিক্খু পহৰণাকাৰং দস্সেন্তো কাযং ৱা কাযপ্পটিবদ্ধং ৱা উগ্গিৰেয্য, তস্স পাচিত্তিযং সিযাতি অত্থো. চোদেয্য ৱা চোদাপেয্য, ভিক্খুং অমূলকেন চাতি যো ভিক্খু ভিক্খুং অমূলকেন সঙ্ঘাদিসেসেন চোদেয্য ৱা চোদাপেয্য ৱা, তস্স পাচিত্তিযং সিযাতি অত্থো. তত্থ অমূলকেনাতি দিট্ঠাদিমূলৱিৰহিতেন.

৫১. কুক্কুচ্চুপ্পাদনে চাপীতি ‘‘ঊনৱীসতিৱস্সো ত্ৱং মঞ্ঞে’’তিআদীনি ভণন্তো কুক্কুচ্চং উপ্পাদেয্য, তস্স কুক্কুচ্চুপ্পাদনপচ্চযা পাচিত্তিযং হোতি. যো ভিক্খু ভণ্ডনত্থায ভণ্ডনজাতানং ৱচনং সোতুং উপস্সুতিং যাতি, তস্স পাচিত্তিযং সিযাতি সম্বন্ধো. তত্থ ভণ্ডনত্থাযাতি কলহত্থায. ভণ্ডনজাতানন্তি কলহজাতানং. উপস্সুতিন্তি সুতিসমীপং.

৫২. যো ভিক্খু সঙ্ঘস্স পৰিণামিতং যং লাভং, তং পৰপুগ্গলস্স নামেতি, তস্স পাচিত্তিযং সিযাতি সম্বন্ধো. তত্থ নামেতীতি পৰিণামেতি. পুচ্ছং অকত্ৱাতি ‘‘ৱিকালে গামপ্পৱেসনং আপুচ্ছামী’’তি ৱা ‘‘গামং পৱিসিস্সামী’’তি ৱা অনাপুচ্ছিত্ৱা. সন্তভিক্খুন্তি অন্তোউপচাৰসীমায দস্সনূপচাৰে ভিক্খুং দিস্ৱা যং সক্কা হোতি পকতিৱচনেন আপুচ্ছিতুং, তাদিসং ৱিজ্জমানং ভিক্খুং. গামস্সাতি গামং, কম্মত্থে সামিৱচনং. গতেতি সম্পদানত্থে ভুম্মৱচনং, গতস্সাতি অত্থো. সন্তং ভিক্খুং অনাপুচ্ছিত্ৱা ৱিকালে গামং গতস্স ভিক্খুনো পাচিত্তিযং সিযাতি অত্থো. সেসং উত্তানমেৱাতি.

পাচিত্তিযনিদ্দেসৱণ্ণনা নিট্ঠিতা.