৯. পটিগ্গাহনিদ্দেসৱণ্ণনা

১০৬. দাতুং কামেতীতি দাতুকামো, তস্স অভিহাৰো ঈসকম্পি ওণমনাদিনাভিহৰণন্তি তপ্পুৰিসো, হত্থস্স পাসো হত্থপাসো. ৰুড়্হীৱসেন তু অড্ঢতেয্যহত্থো হত্থপাসো নাম. সো চ সচে ভিক্খু নিসিন্নো হোতি, আসনস্স পচ্ছিমন্ততো পট্ঠায, সচে ঠিতো, পণ্হিঅন্ততো পট্ঠায, সচে নিপন্নো, যেন পস্সেন নিপন্নো, তস্স পাৰিমন্ততো পট্ঠায দাযকস্স নিসিন্নস্স ঠিতস্স ৱা ঠপেত্ৱা পসাৰিতহত্থং যং আসন্নতৰং অঙ্গং, তস্স ওৰিমন্তেন পৰিচ্ছিন্দিত্ৱা ৱেদিতব্বো. এৰণক্খমন্তি থামমজ্ঝিমেন পুৰিসেন এৰণস্স উক্খিপনস্স খমং যোগ্গং. ৱত্থুসদ্দাপেক্খং নপুংসকত্তং. তিধা দেন্তেতি কাযকাযপ্পটিবদ্ধনিস্সগ্গিযানং ৱসেন তীহি পকাৰেহি দাযকে দদমানে. তত্থ যেন কেনচি সৰীৰাৱযৱেন অন্তমসো পাদঙ্গুলিযাপি দীযমানং কাযেন দিন্নং নাম হোতি, কটচ্ছুআদীসু যেন কেনচি দীযমানং কাযপ্পটিবদ্ধেন, কাযতো পন কাযপ্পটিবদ্ধতো ৱা মোচেত্ৱা হত্থপাসে ঠিতস্স কাযেন ৱা কাযপ্পটিবদ্ধেন ৱা পাতিযমানং নিস্সগ্গিযেন পযোগেন দিন্নং নাম. দ্ৱিধা গাহোতি কাযকাযপ্পটিবদ্ধানং ৱসেন দ্ৱীহি পকাৰেহি যেহি কেহিচি দীযমানস্স গহণং. এৱং পটিগ্গহো পঞ্চঙ্গোতি যোজনা. পঞ্চঙ্গোতি পঞ্চ অঙ্গানি যস্সাতি বহুব্বীহি.

১০৭. ইদানি অনেৰণক্খমে চ কিস্মিঞ্চি কাযপ্পটিবদ্ধে চ পটিগ্গহণাৰোহনং দস্সেতুং ‘‘অসংহাৰিযে’’তিআদিমাহ. তত্থ অসংহাৰিযেতি আনেতুমসক্কুণেয্যে ফলকপাসাণাদিম্হি. তত্থজাতেতি তেসুযেৱ ৰুক্খাদীসু জাতে কিংসুকপদুমিনিপণ্ণাদিকে. চিঞ্চআদীনং সুখুমে পণ্ণেতি সম্বন্ধো. তানি হি সন্ধাৰেতুং ন সক্কোন্তি. তেসং পন সাখাসু ৱট্টতি. আদি-সদ্দেন ‘‘অঙ্গ’’ন্তিআদিকং সঙ্গণ্হাতি. ৱা-সদ্দো সমুচ্চযে. অসয্হভাৰেতি থামমজ্ঝিমপুৰিসেন সহিতুং সন্ধাৰেতুং অসক্কুণেয্যে ভাৰে. সব্বেসং পটিগ্গহো ‘‘ন ৰূহতী’’তি ইমিনা সম্বন্ধো.

১০৮. ইদানি পটিগ্গহণৱিজহনং দস্সেতি ‘‘সিক্খা’’তিআদিনা. তত্থ সিক্খামৰণলিঙ্গেহীতি সিক্খাপচ্চক্খানেন চ মৰণেন চ লিঙ্গপৰিৱত্তনেন চ. অনপেক্খৱিসগ্গতোতি নত্থি অপেক্খো এতস্সাতি অনপেক্খো, সোৱ ৱিসগ্গো, ততো চ. অচ্ছেদাতি চোৰাদীহি অচ্ছিন্দিত্ৱা গহণেন. অনুপসম্পন্নদানাতি অনুপসম্পন্নস্স দানেন. চ-সদ্দো সব্বত্থ আনেতব্বো. গাহোতি পটিগ্গহণং. উপসম্মতীতি ৱিজহতি.

১০৯-১০. ইদানি অপ্পটিগ্গহিতং পৰিভোগে দোসং দস্সেতুং ‘‘অপ্পটিগ্গহিত’’ন্তিআদিমাহ. তত্থ সব্বন্তি চতুকালিকপৰিযাপন্নং সকলম্পি. ইদানি অপ্পটিগ্গহেত্ৱা পৰিভুঞ্জিতব্বং দস্সেতুং ‘‘সুদ্ধ’’ন্তিআদিমাহ. তত্থ সুদ্ধং নাতিবহলং উদকঞ্চ তথা অঙ্গলগ্গং অৱিচ্ছিন্নং দন্ত…পে… গূথকঞ্চ লোণ…পে… কৰীসকঞ্চ কপ্পতেতি সম্বন্ধো. তত্থ সুদ্ধন্তি ৰজৰেণূহি অঞ্ঞৰসেন চ অসম্মিস্সতায পৰিসুদ্ধং. নাতিবহলন্তি যং কসিতট্ঠানে বহলমুদকং ৱিয মুখে ৱা হত্থে ৱা ন লগ্গং, তং. অৱিচ্ছিন্নন্তি অঙ্গতো ৱিচ্ছিন্দিত্ৱা ন গতং. দন্তানি চ অক্খীনি চ কণ্ণঞ্চ দন্তক্খিকণ্ণং পাণ্যঙ্গত্তা, তস্স গূথকন্তি তপ্পুৰিসো. লোণং সৰীৰুট্ঠিতং. সিঙ্ঘাণীতি সিঙ্ঘাণিকা. ৱিচ্ছিন্নং ন পটিগ্গহেতব্বং.

১১১. ইদানি ‘‘গূথা’’তিআদিনা কালোদিস্সং দস্সেতি. তথাৱিধেতি সপ্পদট্ঠক্খণাদিকে তথাৱিধে কালে. তথা তাদিসো ৱিধো কালো এতস্সাতি বহুব্বীহি. সেৱেয্যাতি সেৱনং কৰেয্য, পৰিভুঞ্জেয্যাতি ৱুত্তং হোতি. অসন্তে কপ্পকাৰকেতি এত্থ দুব্বচোপি অসমত্থোপি কপ্পিযকাৰকো অসন্তপক্খেযেৱ তিট্ঠতীতি ৱেদিতব্বো. কালোদিস্সত্তা পন ছাৰিকায অসতি অল্লদাৰুং ৰুক্খতো ছিন্দিত্ৱা কাতুং, মত্তিকায অসতি ভূমিং খণিত্ৱাপি মত্তিকং গহেতুং ৱট্টতি.

১১২. দুৰূপচিণ্ণেতি দুট্ঠুং উপচিণ্ণং আমট্ঠং দুৰূপচিণ্ণং. সচে ভিক্খু অপ্পটিগ্গহিতং সামিসং ভাজনং ঠিতট্ঠানতো অপনেত্ৱা আমসতি, পিধানং আমসতি, উপৰি ঠিতকচৱৰাদিং ছড্ডেতি, তত্থজাতকফলিনিযা সাখায ৱা ৱল্লিযা ৱা গহেত্ৱা ৱা চালেতি, দুৰূপচিণ্ণং নাম হোতি. তস্মিং দুক্কটন্তি সম্বন্ধো. ফলৰুক্খং পন অপস্সযিতুং ৱা তত্থ কণ্টকং ৱা বন্ধিতুং ৱট্টতি. অৰঞ্ঞে পতিতঅম্বফলাদিং ‘‘সামণেৰস্স দস্সামী’’তি আহৰিত্ৱা দাতুং ৱট্টতি. ৰজোকিণ্ণেতি ৰজসা ওকিণ্ণে, তস্মিং পত্তাদিকে যং কিঞ্চি পটিগ্গণ্হতো ৱিনযদুক্কটং হোতীতি অত্থো. সচে পিণ্ডায চৰন্তস্স পত্তে ৰজং পততি, পটিগ্গহেত্ৱা ভিক্খা গণ্হিতব্বা. ‘‘পটিগ্গহেত্ৱা দেথা’’তি ৱুত্তেপি আকিৰন্তি, হত্থতো অমোচেন্তেনেৱ পটিগ্গাহাপকস্স সন্তিকং নেত্ৱা পটিগ্গহেতব্বং. সচে মহাৱাতো ততো ততো ৰজং পাতেতি, ন সক্কা হোতি ভিক্খং গহেতুং, ‘‘অনুপসম্পন্নস্স দস্সামী’’তি সুদ্ধচিত্তেন আভোগং কত্ৱা গণ্হিতুং ৱট্টতি. তং পন তেন দিন্নং ৱা ৱিস্সাসেন ৱা পটিগ্গহেত্ৱা পৰিভুঞ্জিতুং ৱট্টতি.

অথাতি ৱক্খমানাৰম্ভে. উগ্গহপ্পটিগ্গহেতি উগ্গহিত্থাতি উগ্গহো, উগ্গহিতং, তস্স পটিগ্গহো, তস্মিং. অপ্পটিগ্গহিতভাৱং জানতো অত্তনা এৱ উগ্গহেত্ৱা গহণেতি অধিপ্পাযো. মাতাপিতূনং অত্থায পন অপ্পটিগ্গহেত্ৱা তেলাদীনি, ছাযত্থায সাখাদীনি ৱা গহেত্ৱা পচ্ছতো ভুঞ্জিতুকামতায পটিগ্গহেত্ৱা পৰিভুঞ্জিতুং ৱট্টতি. উচ্ছুআদীসু ফালিতেসু মলং ন পঞ্ঞাযতি, মূলভেসজ্জাদীনি পিসন্তানং ৱা কোট্টেন্তানং ৱা নিসদনিসদপোতকউদুক্খলমুসলানি খীযন্তি, দন্তন্তৰে লগ্গং সুখুমআমিসং হোতি, ৰসো ন পঞ্ঞাযতি, অব্বোহাৰিকং. অন্তোৱুত্থেতি অকপ্পিযকুটিযা ছদনব্ভন্তৰে ৱুত্থেতি অত্থো. সযংপক্কেতি অত্তনা যত্থ কত্থচি পক্কে. সচে ৱাসিআদিং তাপেত্ৱা তক্কাদীসু পক্খিপতি, এত্তাৱতাপি সামপাকতো ন মুচ্চতি. পুৰিমকালিকদ্ৱযে পুনপাকঞ্হি ঠপেত্ৱা যং কিঞ্চি আমিসং ভিক্খুনো পচিতুং ন ৱট্টতি. সচেপিস্স উণ্হযাগুযা সুলসিপণ্ণাদীনি ৱা সিঙ্গিৱেৰং ৱা পক্খিপন্তি, চালেতুং ন ৱট্টতি. উত্তণ্ডুলং ভত্তং লভিত্ৱা পিদহিতুং ন ৱট্টতি. অন্তোপক্কেতি অকপ্পিযকুটিযা অন্তো পক্কে. সব্বত্থ দুক্কটন্তি সম্বন্ধো.

পটিগ্গাহনিদ্দেসৱণ্ণনা নিট্ঠিতা.