১০. অকপ্পিযমংসনিদ্দেসৱণ্ণনা

১১৩-৪. মনুস্সহত্থিঅস্সানঞ্চ …পে… উৰগস্স চ যং মংসঞ্চ, যং উদ্দিস্সকতমংসঞ্চ, অপ্পটিৱেক্খিতং যঞ্চ মংসং, তেসু মংসেসূতি এৱং যোজেত্ৱা অত্থো ৱেদিতব্বো. তত্থ সীসগীৱাতৰঙ্গেন চৰন্তা অচ্ছৱিসেসাৱ তৰচ্ছা. উৰগস্সাতি ইমিনা সব্বাপি দীঘজাতি সঙ্গহিতা. উদ্দিস্সকতমংসন্তি ভিক্খুং উদ্দিসিত্ৱা কতং উদ্দিস্সকতং, তঞ্চ তং মংসঞ্চ. এত্থ চ মংস-গ্গহণেন মচ্ছানম্পি গহণং ৱেদিতব্বং উপলক্খণৱসেন, চ-সদ্দেন ৱা. পঞ্চসুপি সহধম্মিকেসু যং কিঞ্চি উদ্দিস্সকতং সব্বেসম্পি ন কপ্পতি, তম্পি অদিট্ঠঅসুতঅপৰিসঙ্কিততায তিকোটিপৰিসুদ্ধং ৱট্টতি. অপ্পটিৱেক্খিতন্তি অনুপপৰিক্খিতং, অনাপুচ্ছিতন্তি অত্থো. আপত্তিভীৰুকেন হি ৰূপং সল্লক্খেন্তেনাপি পুচ্ছিত্ৱা পটিগ্গহেতব্বং পৰিভুঞ্জিতব্বঞ্চ. মনুস্সানং মংসেসু থুল্লচ্চযন্তি যোজনা. থূলো অচ্চযো এত্থাতি ৰস্সে, দ্ৱিত্তে চ থুল্লচ্চযং. পাৰাজিকসঙ্ঘাদিসেসেহি ঠপেত্ৱা ইতো অধিকং ৱজ্জং নত্থি. সেসেসূতি অৱসেসেসু একাদসসু.

১১৫. ইদানি মনুস্সাদীনং অট্ঠিআদীনিপি অকপ্পিযানীতি দস্সেতুং ‘‘অট্ঠিপী’’তিআদিমাহ. পি-সদ্দো ‘‘লোহিত’’ন্তিআদীসুপি অনুৱত্তেতব্বো. এসন্তি মনুস্সাদীনং দসন্নং. ৱসাসু পন একা মনুস্সৱসা ন ৱট্টতি. খীৰাদীসু অকপ্পিযং নাম নত্থি. উদ্দিস্সকতংযেৱ সচিত্তকন্তি যোজনা. সচিত্তকন্তি উদ্দিস্সকতভাৱজাননচিত্তেন সহ ৱত্ততীতি সচিত্তকং. ৱত্থুৱীতিক্কমৱিজাননচিত্তেন হি সচিত্তকত্তং. এত্থ চ সচিত্তকত্তং আপত্তিযা এৱ, ন চ মংসস্স, তথাপি মংসসীসেন আপত্তি এৱ ৱুত্তাতি ৱিঞ্ঞাতব্বন্তি.

অকপ্পিযমংসনিদ্দেসৱণ্ণনা নিট্ঠিতা.