১১. নিস্সগ্গিযনিদ্দেসৱণ্ণনা

১১৬-৭. ৰূপিযেন অৰূপিযং ৰূপিযঞ্চ ইতৰেন ৰূপিযঞ্চ পৰিৱত্তেয্যাতি সম্বন্ধো. তত্থ ৰূপিযেনাতি ৰূপিযসঙ্খাতেন নিস্সগ্গিযৱত্থুনা. অৰূপিযন্তি অৰূপিযসঙ্খাতং দুক্কটৱত্থুং কপ্পিযৱত্থুঞ্চ. ইতৰেনাতি অৰূপিযেন. নিস্সগ্গীতি নিস্সজ্জনং নিস্সগ্গো, পুব্বভাগে কত্তব্বস্স ৱিনযকম্মস্সেতং নামং. নিস্সগ্গো অস্স অত্থীতি নিস্সগ্গি, কিং তং? পাচিত্তিযং. ৰূপিযস্স মূলগ্গহণে পন ৰূপিযপ্পটিগ্গহণসিক্খাপদেন নিস্সগ্গিযং পাচিত্তিযং.

ইদানি ৰূপিযাদিং দস্সেতুং ‘‘ইধা’’তিআদি আৰদ্ধং. তত্থ কহা…পে… মাসকং ইধ ৰূপিযন্তি সম্বন্ধো. তত্থ কহাপণো নাম সুৱণ্ণমযো ৱা ৰজতমযো ৱা এতৰহি পকতিকহাপণো ৱা. সজ্ঝূতি ৰজতং. সিঙ্গীতি সুৱণ্ণভেদো, তথাপি চেত্থ সামঞ্ঞেন সুৱণ্ণমধিপ্পেতং. ৱোহাৰূপগমাসকন্তি ৱোহাৰং কযৱিক্কযং উপগচ্ছতীতি ৱোহাৰূপগং, তঞ্চ তং মাসকঞ্চ. তং পন সমুট্ঠাপিতৰূপঞ্চ অসমুট্ঠাপিতৰূপঞ্চ লোহদাৰুআদিমযং ৱুচ্চতি. ইধ ৰূপিযন্তি ইমস্মিং সিক্খাপদে ৰূপিযং নামাতি অত্থো. ৱত্থমুত্তাদি কপ্পং দুক্কটৱত্থুঞ্চ ইতৰন্তি যোজনা. তত্থ ৱত্থঞ্চ মুত্তা চ আদি যস্সাতি সমাসো. আদি-সদ্দো পচ্চেকং যোজেতব্বো ‘‘ৱত্থাদি মুত্তাদী’’তি. তত্থ পঠমেন আদি-সদ্দেন কপ্পাসসুত্তাপৰণ্ণাদিকং যং কিঞ্চি কপ্পিযৱত্থুং, দুতিযেন মণি সঙ্খো সিলা পৱাড়ং লোহিতঙ্কো মসাৰগল্লং সত্তধঞ্ঞানি দাসিদাসখেত্তৱত্থুপুপ্ফাৰামফলাৰামাদযোতি ইদং দুক্কটৱত্থুং সঙ্গণ্হাতি. ৱত্থাদিকপ্পিযৱত্থুং, মুত্তাদিদুক্কটৱত্থুঞ্চ ইতৰং অঞ্ঞং অৰূপিযং নামাতি অত্থো.

১১৮. এত্তাৱতা ৰূপিযসংৱোহাৰং দস্সেত্ৱা ইদানি কপ্পিযভণ্ডে কযৱিক্কযং দস্সেতুমাহ ‘‘ইম’’ন্তিআদি. তত্থ ‘‘ইমং গহেত্ৱা ইমং দেহি, ইমং কৰ, ইমং আনযা’’তি ৱা ‘‘ইমং ভুত্ৱা ইমং দেহি, ইমং কৰ, ইমং আনযা’’তি ৱা ‘‘ইমং দেমি, ইমং দেহি, ইমং কৰ, ইমং আনযা’’তি ৱা কযৱিক্কযে সমাপন্নে নিস্সগ্গীতি যোজনা. তত্থ ইমন্তি তণ্ডুলাদিং. ভুত্ৱাতি ওদনাদিং ভুঞ্জিত্ৱা. ইমং দেহীতি এতং ৱত্থাদিকং দেহি. ইমং কৰাতি এতং ৰজনপচনাদিং কৰোহি. ইমং আনযাতি এতং ৰজনকট্ঠাদিং আনেহি. ইমং দেমীতি এতং ৱত্থাদিকং তৱ দেমি. সমাপন্নেতি কতে. তস্মা কপ্পিযং ভণ্ডং পৰিৱত্তেন্তেন অঞ্ঞাতকেহি সদ্ধিং ‘‘ইমং দেহী’’তি ৱদতো ৱিঞ্ঞত্তি, ‘‘ইমং গণ্হাহী’’তি ৱদতো সদ্ধাদেয্যৱিনিপাতনং, ‘‘ইমিনা ইমং দেহী’’তি ৱদতো কযৱিক্কযন্তি ৱুত্তা তিস্সো আপত্তিযো. মাতাপিতূহি পন সদ্ধিং কযৱিক্কযমত্তং মোচেন্তেন পৰিৱত্তেতব্বং. অযঞ্হি কযৱিক্কযো ঠপেত্ৱা পঞ্চসহধম্মিকে অৱসেসেহি গিহিপব্বজিতেহি ন ৱট্টতি. সচে পন নৱকম্মানি কাৰেতি, অট্ঠকথাপমাণেন পাচিত্তিযমত্তং দেসেতব্বং.

১১৯-১২০. ইদানি পৰিণামনৱসেন আপত্তিভেদং দস্সেতুং ‘‘অত্তনো’’তিআদি আৰদ্ধং. তত্থাযং পিণ্ডত্থো – সঙ্ঘস্স নতং লাভং অত্তনো পৰিণামেয্য, নিস্সগ্গি. অঞ্ঞতো পুগ্গলস্স পৰিণামেয্য, পাচিত্তি. অঞ্ঞস্স সঙ্ঘস্স ৱা চেতিযস্স ৱা পৰিণামেয্য, দুক্কটং. অঞ্ঞস্স পুগ্গলস্স ৱা চেতিযস্স ৱা নতং লাভং অত্তনো ৱা সঙ্ঘস্স ৱা অঞ্ঞপুগ্গলস্স ৱা অঞ্ঞচেতিযস্স ৱা পৰিণামেয্য, দুক্কটন্তি যোজনা. তত্থ নতন্তি কাযেন ৱা ৱচসা ৱা নিন্নং কতং. লাভন্তি লভিতব্বং চীৱৰাদি. অঞ্ঞতো অঞ্ঞস্মিং পুগ্গলে ৱা চেতিযে ৱা, চেতিযে পন দুক্কটং. অঞ্ঞস্সাতি চেতিযাদিনো অন্তমসো সুনখস্স. অঞ্ঞতো ৱাতি চেতিযাদিম্হি ৱা. সঙ্ঘস্সাতি পন ইদং কাকক্খিগোড়কঞাযেন ‘‘নতং পৰিণামেয্যা’’তি উভযত্থ পৰিৱত্ততি. নিস্সট্ঠং সকসঞ্ঞায ন দদেয্য ৱা, দুক্কটন্তি সম্বন্ধো. অঞ্ঞথা অঞ্ঞেন পকাৰেন, থেয্যসঞ্ঞায ন দদেয্য চেতি ৱুত্তং হোতি. ইতৰন্তি ৱত্থুৱসেন অঞ্ঞং পাৰাজিকং থুল্লচ্চযং দুক্কটঞ্চ হোতীতি অত্থো.

নিস্সগ্গিযনিদ্দেসৱণ্ণনা নিট্ঠিতা.