১২. পাচিত্তিযনিদ্দেসৱণ্ণনা

১২১. মুসা …পে… হৰণেতি নিমিত্তত্থে ভুম্মৱচনং, তস্স ‘‘পাচিত্তি ৱুত্তা’’তি ইমিনা সম্বন্ধো. এৱং সব্বত্থ. মুসাৱাদেতি নিপাতেন সদ্ধিং তপ্পুৰিসো. পুব্বেপি জানিত্ৱা ৱচনক্খণেপি জানন্তস্স মুসাভণননিমিত্তন্তি অত্থো. ভণনঞ্চ নাম ইধ অভূতস্স ৱা ভূততং, ভূতস্স ৱা অভূততং কত্ৱা কাযেন ৱা ৱাচায ৱা ৱিঞ্ঞাপনপ্পযোগো. পাৰাজিকসঙ্ঘাদিসেসাচাৰৱিপত্তিযো অমূলিকায চোদেন্তস্স যথাক্কমং সঙ্ঘাদিসেসপাচিত্তিযদুক্কটানি. অনুপধাৰেত্ৱা সহসা ভণন্তস্স, ‘‘অঞ্ঞং ভণিস্সামী’’তি অঞ্ঞং ভণন্তস্স যস্স ভণতি, সো ন সুণাতি, তস্স চ অনাপত্তি.

ওমসতি অমনাপতায কণ্ণেসু ৱিজ্ঝতি ৱিয এতেন, ওমসতি ৱাতি ওমসো, সো চাযং ৱাদোচ, তস্মিং. দীঘো পন গাথাবন্ধৱসেন. এৱং সব্বত্থ. হীনুক্কট্ঠেসু চ জাতিনামগোত্তৱযকম্মসিপ্পআবাধলিঙ্গকিলেসআপত্তিঅক্কোসসঙ্খাতেসু দসসু ভূতেন ৱা অভূতেন ৱা ‘‘খত্তিযোসি, চণ্ডালোসী’’তিআদিনা কাযেন ৱা ৱাচায ৱা অনঞ্ঞাপদেসেন ভিক্খুনো খুংসেতুকামতায অক্কোসৱচনেতি অত্থো. ‘‘সন্তি ইধেকচ্চে চণ্ডালা’’তিআদিনা অঞ্ঞাপদেসেন ৱা ‘‘চোৰোসি, ৱিকাৰীসি, মাতুঘাতকোসী’’তিআদীহি পাড়িমুত্তপদেহি ৱা ভিক্খুস্স, যথা ৱা তথা ৱা অনুপসম্পন্নং, পৰম্মুখা পন সব্বম্পি অক্কোসন্তস্স দুক্কটং. কেৱলং দৱকম্যতায ৱদতো পন সব্বত্থ দুব্ভাসিতং.

পেসুঞ্ঞহৰণেতি পিসুণস্স ভাৱো পেসুঞ্ঞং. অত্তনো পিযকম্যতায ৱা পৰস্স পৰেসু ভেদাধিপ্পাযেন ৱা জাতিআদীহি ওমসন্তস্স ভিক্খুনো ৱচনং সুত্ৱা ভিক্খুস্স তস্স পেসুঞ্ঞস্স হৰণে. অনুপসম্পন্নস্স হৰণে দুক্কটং. পদং পদং পদসো, ৱিচ্ছাযং সো, কোট্ঠাসেন কোট্ঠাসেনাতি অত্থো. সঙ্গীতিত্তযাৰুড়্হো তিপিটকধম্মো, অনাৰুড়্হো চ ৰাজোৱাদাদিকো ধম্মো নাম, তেন সহ পদসোতি নিপাতস্স ততিযাতপ্পুৰিসো. পদসোধম্মেতি একক্খৰাদিনা কোট্ঠাসেন কোট্ঠাসেন অনুপসম্পন্নেন সদ্ধিং যথাৱুত্তধম্মভণনেতি অত্থো. পদসোধম্মভণনঞ্হি পদসোধম্ম-সদ্দেন উপচাৰেন ৱুত্তং. অনুপসম্পন্নেন সদ্ধিং একতো উদ্দেসগ্গহণে সজ্ঝাযকৰণে, তংসন্তিকে উদ্দেসগ্গহণাদিকে চ তেন সদ্ধিং একতো যেভুয্যেন পগুণং গন্থং ভণন্তস্স ওসাৰেন্তস্স খলিতট্ঠানে ‘‘এৱং ভণাহী’’তি একতো ভণন্তস্সপি অনাপত্তি.

অন্তমসো ৱত্থাদিনা যেন কেনচি সব্বচ্ছন্নং ছদনং অনাহচ্চ দিযড্ঢহত্থুব্বেধেনাপি সব্বপৰিচ্ছিন্নং যেভুয্যেনছন্নং যেভুয্যেনপৰিচ্ছিন্নঞ্চ সেনাসনং অগাৰন্তি অধিপ্পেতং. তত্ৰট্ঠো পন ভিক্খুং ঠপেত্ৱা অন্তমসো পাৰাজিকৱত্থুভূতো তিৰচ্ছানগতোপি অন্তমসো তদহুজাতা ইত্থীপি উপচাৰতো অগাৰ-সদ্দেন ৱুচ্চতি. সহ অগাৰেনাতি সাগাৰো, ভিক্খু. উপচাৰেনেৱ চ পন অনুপসম্পন্নেন, মাতুগামেন চ সহ সেয্যকপ্পনং সাগাৰভাৱো নামাতি গহেতব্বং. সঙ্ঘসম্মতং সেনাসনপঞ্ঞাপকাদিভেদং উপসম্পন্নং অযসকামা হুত্ৱা ভিক্খূহি যেন চ উজ্ঝাপেন্তি অৱজানাপেন্তি অৱঞ্ঞায ওলোকাপেন্তি, লামকতো ৱা চিন্তাপেন্তি, তং ৱচনং উজ্ঝাপনকং. যেন খীযন্তি সব্বত্থ তস্স অৱণ্ণং পকাসেন্তি, তং খীযনং.

১২২. তলন্তি হত্থতলমধিপ্পেতং. তগ্গহণেন পন কাযোৱ তলং. সত্তীতি কাযপ্পটিবদ্ধা সত্তি আৱুধৱিসেসো, উপলক্খণত্তা পন সব্বম্পি কাযপ্পটিবদ্ধং সত্তি. তলঞ্চ সত্তি চ তলসত্তি. ইধ পন কোপেন ভিক্খুস্স তলসত্তিউগ্গিৰণং তলসত্তি. সচে পন ৱিৰদ্ধো পহাৰং দেতি, ন পহৰিতুকামতায দিন্নত্তা দুক্কটং, পহৰিতুকামতায পাচিত্তিযং, অনুপসম্পন্নে দুক্কটং, মোক্খাধিপ্পাযস্স অনাপত্তি.

পঞ্ঞত্তেন ৱদতো উপসম্পন্নস্স ৱা তেন ৱুচ্চমানধম্মস্স ৱা অনাদৰকৰণং অনাদৰো. অনুপসম্পন্নস্স তেন ৱুচ্চমানস্স ৱা উপসম্পন্নেন, পৰেন ৱা অপঞ্ঞত্তেন ৱা ৱুচ্চমানস্স অনাদৰে দুক্কটং.

‘‘ঊনৱস্সো ত্ৱং মঞ্ঞে’’তিআদিনা ভিক্খুনো কুক্কুচ্চস্স উপ্পাদনং অনুপসম্পন্নস্স দুক্কটং.

অনাপুচ্ছা গামপ্পৱেসনেতি পকতিৱচনেন পুচ্ছিতুমনুৰূপং অন্তোউপচাৰসীমায দস্সনূপচাৰে ভিক্খুং দিস্ৱা ‘‘ৱিকালে গামপ্পৱেসনং আপুচ্ছামী’’তি অনাপুচ্ছিত্ৱা ৱিকালে গামপ্পৱেসনে. দীঘো পন সন্ধিৱসেন. আপদাসু অনাপত্তি.

পৰম্পৰভোজনেতি পৰো চ পৰো চ পৰম্পৰা ম-কাৰো সন্ধিৱসেন, তস্মা পৰম্পৰা উপ্পত্তৱিসযঅপাদানৱচনং, পৰতো পৰতো লদ্ধা ভুঞ্জনেতি অত্থো. অযমেত্থ অধিপ্পাযো – পঞ্চহি ভোজনেহি নামং গহেত্ৱা নিমন্তিতস্স যেন যেন পঠমং নিমন্তিতো, তস্স তস্স ভোজনতো উপ্পটিপাটিযা, ‘‘ময্হং ভত্তপচ্চাসং তুয্হং দম্মী’’তি ৱা ‘‘ৱিকপ্পেমী’’তি ৱা আদিনা সম্মুখা ৱা পৰম্মুখা ৱা অৱিকপ্পেত্ৱা ৱা অঞ্ঞতো অঞ্ঞতো পঞ্চভোজনাদীনি লদ্ধা ভুঞ্জমানেতি. গিলানচীৱৰদানচীৱৰকাৰসমযে অনাপত্তি.

১২৩. সেয্যং সেনাসনানি ৱা অনুদ্ধৰিত্ৱা গমনেতি সম্বন্ধো. ৱা-সদ্দো সমুচ্চযে. তত্থ ‘‘ভিসি চিমিলিকা উত্তৰত্থৰণং ভূমত্থৰণং তট্টিকা চম্মক্খণ্ডো নিসীদনং পচ্চত্থৰণং তিণসন্থাৰো পণ্ণসন্থাৰো’’তি (পাচি. ১১৬) ৱুত্তাসু দসসু সেয্যাসু একম্পি অত্তনো ৱস্সগ্গনে গহেত্ৱা সঙ্ঘিকে সব্বপ্পটিচ্ছন্নে গুত্তে সেনাসনে সন্থৰিত্ৱা ৱা সন্থৰাপেত্ৱা ৱা যথা ঠপিতং উপচিকাদীহি ন খজ্জতি, তথা ঠপনৱসেন অনুদ্ধৰিত্ৱা পৰিক্খিত্তস্স আৰামস্স পৰিক্খেপং, অপৰিক্খিত্তস্স উপচাৰং অতিক্কমিত্ৱা গমনে চ, তথা মঞ্চপীঠতিসিকোচ্ছসঙ্খাতানি সেনাসনানি ৱস্সকালে অজ্ঝোকাসে সন্থৰিত্ৱা ৱা সন্থৰাপেত্ৱা ৱা অনুপসম্পন্নেন অনুদ্ধৰিত্ৱা থামমজ্ঝিমস্স পুৰিসস্স লেড্ডুপাতং অতিক্কমিত্ৱা গমনে চাতি অত্থো. যথাৱুত্ততো পন অঞ্ঞত্থ দুক্কটং.

ইত্থিযা অদ্ধানগমনেতি ‘‘গচ্ছাম ভগিনি, গচ্ছাম অয্যা’’তি অঞ্ঞমঞ্ঞং সংৱিদহিত্ৱা ‘‘অজ্জ ৱা স্ৱে ৱা’’তিআদিনা নিযমিতকালৱিসঙ্কেতং অকত্ৱাপি দ্ৱাৰৱিসঙ্কেতং মগ্গৱিসঙ্কেতং কত্ৱাপি ইত্থিযা সদ্ধিং অদ্ধানমগ্গগমনেতি অত্থো.

একেকায নিসীদনেতি একেন একাতি একেকা, তস্সা নিসজ্জাযাতি অত্থো. একেন সহ একিস্সা নিসজ্জং ৱিনা একায সহ একস্স নিসজ্জং নাম নত্থীতি একায সহ একস্স নিসজ্জাযং সতি নিসিন্নস্স ভিক্খুনো পাচিত্তিযন্তি অধিপ্পাযো. ‘‘একাযেকনিসীদনে’’তি ৱা পাঠো.

১২৪. ৰূপাদীনং উপসংহাৰেন, ভযানককথাকথনেন ৱা উপসম্পন্নস্স ভিংসাপনে. অনুপসম্পন্নস্স দুক্কটং.

আকোটনে উপসম্পন্নস্স অন্তমসো উপ্পলপত্তেনাপি পহাৰদানে. অনুপসম্পন্নস্স অন্তমসো তিৰচ্ছানগতস্সপি দুক্কটং. মোক্খাধিপ্পাযস্স অনাপত্তি.

সঙ্ঘমজ্ঝে ৱিনযধৰেন অনুযুঞ্জিযমানস্স পুচ্ছিততো অঞ্ঞস্স ৱাদো অঞ্ঞেন অঞ্ঞং পটিচৰণং অঞ্ঞৱাদো. তথেৱ পুচ্ছিযমানস্স অকথেতুকামতায ৱিহেসনং তুণ্হীভাৱো ৱিহেসা. অঞ্ঞৱাদকস্স ৱিহেসকস্স চ ঞত্তিদুতিযকম্মেন অঞ্ঞৱাদকৱিহেসককম্মে কতে পুন অঞ্ঞৱাদে ৱিহেসায পাচিত্তিযং. অনাৰোপিতে পন কম্মে দুক্কটং. কিঞ্চি ৱীতিক্কমং দিস্ৱা ‘‘আৱুসো, ইদং নাম তযা কত’’ন্তি ৱুত্তে তং ন কথেতুকামো তুণ্হীভূতো সঙ্ঘং ৱিহেসেতীতি ৱিহেসকো. অনাচাৰং আচৰিত্ৱা সঙ্ঘমজ্ঝে আপত্তিযা, ৱত্থুনা ৱা অনুযুঞ্জিযমানে তং অকথেতুকামো ‘‘কো আপন্নো, কিস্মিং আপন্নো’’তিআদিনা নযেন অঞ্ঞেহি ৱচনেহি তং ৱচনং পটিচ্ছাদেন্তো যো অঞ্ঞং ৱদতি, অযং অঞ্ঞৱাদকো নাম.

দুট্ঠুল্লং নাম পাৰাজিকসঙ্ঘাদিসেসা, ইধ পন সঙ্ঘাদিসেসোৱ. পকাসো চ ছাদো চ পকাসছাদো, দুট্ঠুল্লস্স পকাসছাদোতি তপ্পুৰিসো. অভিণ্হাপত্তিকস্স ভিক্খুনো আযতিং সংৱৰত্থায আপত্তিপৰিযন্তং কুলপৰিযন্তঞ্চ কত্ৱা ৱা অকত্ৱা ৱা তিক্খত্তুং অপলোকেত্ৱা কাতব্বং. ভিক্খুসম্মুতিং ঠপেত্ৱা অনুপসম্পন্নস্স ‘‘অযং অসুচিং মোচেত্ৱা সঙ্ঘাদিসেসং আপন্নো’’তিআদিনা নযেন ৱত্থুনা সদ্ধিং আপত্তিং ঘটেত্ৱা তস্স দুট্ঠুল্লস্স পকাসনে আৰোচনে চ, তস্সেৱ যেন কেনচি উপাযেন ঞত্ৱা ছাদনে চ, অদুট্ঠুল্লাৰোচনে ছাদনে চ, অনুপসম্পন্নস্স পন পুৰিমপঞ্চমসিক্খাপদে ইতৰা দুট্ঠুল্লেপি দুক্কটং.

হাসোদকেতি এত্থ হাসে উদকেতি পদৱিভাগো ৱেদিতব্বো. যেন কেনচি সৰীৰাৱযৱেন হসাধিপ্পাযস্স উপকচ্ছকাদীসু হাসে ফুসনে. হাসনিমিত্তঞ্হি ফুসনং হাসো. অনুপসম্পন্নে দুক্কটং. উদকে হাসেতি উপৰিগোপ্ফকে উদকে হসাধিপ্পাযস্স উম্মুজ্জননিমুজ্জনেন কীড়ায. কীড়া হি ইধ হাসোতি ৱুত্তো. নাৱায কীড়তো, হত্থাদিনা কট্ঠাদিনা ৱা উদকং হনতো অন্তমসো ভাজনগতকঞ্জিকাদীনিপি খিপনকীড়ায কীড়তো দুক্কটং. অহসাধিপ্পাযস্স অনাপত্তি.

নিচ্ছুভনে ৱিহাৰাতি সঙ্ঘিকৱিহাৰতো ভিক্খুনো নিক্কড্ঢননিক্কড্ঢাপনে. এত্থ চ একপ্পযোগে একা, নানাপযোগে দ্ৱাৰগণনায আপত্তিযো. পুগ্গলিকনিক্কড্ঢনে, তস্স পৰিক্খাৰনিক্কড্ঢনে, অনুপসম্পন্নস্স পন তস্স পৰিক্খাৰস্স ৱা নিক্কড্ঢনে দুক্কটং. ন সম্মাৱত্তন্তানং অন্তেৱাসিকসদ্ধিৱিহাৰিকানং ৱা নিক্কড্ঢনে, অত্তনো ৱিস্সাসিকস্স ৱিহাৰা নিক্কড্ঢনে, ভণ্ডনকাৰকস্স পন সকলসঙ্ঘাৰামতো নিক্কড্ঢনে অনাপত্তি.

অনুপখজ্জ সযনেতি ‘‘ৱুড্ঢো, গিলানো, সঙ্ঘেন দিন্নো’’তি জানিত্ৱা মঞ্চপীঠানং ৱা তস্স ভিক্খুনো পৱিসন্তস্স ৱা নিক্খমন্তস্স ৱা উপচাৰং অনুপখজ্জ অনুপৱিসিত্ৱা সঙ্ঘিকে ৱিহাৰে ‘‘যস্স সম্বাধো ভৱিস্সতি, সো পক্কমিস্সতী’’তি অধিপ্পাযেন নিসীদননিসজ্জনৱসেন সযনে. পুগ্গলিকে দুক্কটং.

এত্থ চ পাচিত্তীতি উদ্দিসিত্ৱা কানিচি পসিদ্ধানি দস্সিতানি. অৱুত্তানি পন তাদিসানি ইমিনাৱ সামঞ্ঞৱচনেন সঙ্গহেত্ৱা ৱেদিতব্বানি. কথং? অচেলকাদিঅঞ্ঞতিত্থিযানং যস্স কস্সচি আমিসস্স সহত্থা দানে চ, সপ্পিনৱনীততেলমধুফাণিতমচ্ছমংসখীৰদধিসঙ্খাতানং পণীতভোজনানং অত্তনো অত্থায ৱিঞ্ঞাপেত্ৱা ভুঞ্জনে, ৰাগপৰিযুট্ঠিতইত্থিপুৰিসস্স যোগ্গে কুলে অনুপৱিসিত্ৱা নিসজ্জনকপ্পনে, পঞ্চন্নং ভোজনানং অঞ্ঞতৰেন নিমন্তিতো তস্মিং ভুত্তে ৱা অভুত্তে ৱা সন্তং ভিক্খুং অনাপুচ্ছিত্ৱা পুৰেভত্তং পচ্ছাভত্তং ৱা যস্মিং কুলে নিমন্তিতো, ততো গিলানচীৱৰদানকাৰসমযং ঠপেত্ৱা অঞ্ঞস্মিং অঞ্ঞকুলপ্পৱেসনে, ঠপেত্ৱা একদিৱসং অঞ্ঞস্মিং দিনে আৱসথপিণ্ডস্স অগিলানেন হুত্ৱা ভুঞ্জনে, ৰত্তিপৰিচ্ছেদং ৱা ভেসজ্জপৰিচ্ছেদং ৱা কত্ৱা পৱাৰিততো উত্তৰি অঞ্ঞত্ৰ পুন পৱাৰণায অঞ্ঞত্ৰ নিচ্চপ্পৱাৰণায ৱিঞ্ঞাপনে, অঞ্ঞত্ৰ তথাৰূপপচ্চযা গামতো নিক্খন্তসেনাদস্সনায গমনে, পচ্চযেনপি গন্ত্ৱা তিৰত্ততো উত্তৰি সেনায ৱাসে, তস্স চ ৱসন্তস্স যুদ্ধট্ঠানবলগণট্ঠানসেনানিৱেসঅনীকদস্সনত্থং গমনে, পিট্ঠাদীহি কতমজ্জসঙ্খাতসুৰায, পুপ্ফাদীহি কতআসৱসঙ্খাতমেৰযস্স চ পানে, পদীপুজ্জলপত্তপচনাদিকাৰণং ৱিনা ৱিসিব্বিতুকামতায অগিলানস্স অগ্গিনো জালনজালাপনে, কপ্পবিন্দুং অনাদায নৱচীৱৰপৰিভোগে, সামং চীৱৰং ৱিকপ্পেত্ৱা অপচ্চুদ্ধায পৰিভোগে, ভিক্খুসন্তকপত্তাদিনো অন্তমসো হসাধিপ্পাযেনপি অপনিধানে অপনিধাপনে, সঞ্চিচ্চ তিৰচ্ছানগতস্স জীৱিতৱোৰোপনে, সঞ্চিচ্চ যথাধম্মং নিহতাধিকৰণস্স পুনকম্মায উক্কোটনে, সঞ্চিচ্চ থেয্যসত্থেন সদ্ধিং সংৱিধায একদ্ধানগমনে, ভিক্খূহি সিক্খাপদেহি ৱুচ্চমানস্স অঞ্ঞং অৱিচাৰেত্ৱা ‘‘ন তত্থ সিক্খিস্সামী’’তি ভণনে, সিক্খাপদৱিৱণ্ণনে, ইমেসং ‘‘সুত্ৱা ওৰমিস্সামী’’তি অধিপ্পাযং ৱিনা ৱিৱাদাপন্নানং উপস্সুতিট্ঠানে, ধম্মিকানং কম্মানং ছন্দং দত্ৱা পচ্ছা খীযনধম্মাপজ্জনে, সঙ্ঘে ৱিনিচ্ছযে ৱত্তমানে ছন্দং অদত্ৱা পক্কমনে, সমগ্গেন সঙ্ঘেন চীৱৰং দত্ৱা পচ্ছা খীযনধম্মাপজ্জনে, অঞ্ঞত্ৰ অজ্ঝাৰামা অজ্ঝাৱসথা ৱা ৰতনস্স ৱা ৰতনসম্মতস্স ৱা উগ্গণ্হনউগ্গহাপনে পাচিত্তিযন্তি.

পাচিত্তিযনিদ্দেসৱণ্ণনা নিট্ঠিতা.