৭. পৱাৰণানিদ্দেসৱণ্ণনা

৭৩. যেন ইৰিযাপথেন উপলক্খিতো পঞ্চন্নং ভোজনানং যং কিঞ্চি ভোজনং ভুঞ্জমানো অযং ভিক্খু কপ্পিযানং পঞ্চন্নং ভোজনানং হত্থপাসোপনীতানং পৱাৰিতো, ততো ইৰিযাপথতো অঞ্ঞেন ইৰিযাপথেন অনতিৰিত্তকং যাৱকালিকং ভুঞ্জেয্য চে, ইমস্স পাচিত্তি হোতীতি পদত্থযোজনা. ভুঞ্জনত্থায পটিগ্গহণে পন দুক্কটং. তত্থ ইৰিযায কাযিককিৰিযায পথো পৱত্তনূপাযো ইৰিযাপথো, ঠানগমননিসজ্জনসযনানি. পৱাৰেতি পটিক্খিপতীতি পৱাৰিতো, অথ ৱা পৱাৰণং পটিক্খিপনং পৱাৰিতং, তমস্স অত্থীতি পৱাৰিতো, কতপ্পৱাৰণো কতপ্পটিক্খেপোতি অত্থো, অথ ৱা পৰিৱেসকেন ৱাৰীযতীতি পৱাৰিতো পটিক্খেপিতো. অনতিৰিত্তকন্তি যং পৱাৰেত্ৱা আসনা ৱুট্ঠহন্তস্স ‘‘অলমেতং সব্ব’’ন্তি এৱং অতিৰিত্তকৰণাদীহি সত্তহি ৱিনযকম্মাকাৰেহি কপ্পিযং কতং, তঞ্চ ‘‘অজ্জ ৱা যদা ৱা ইচ্ছতি, তদা খাদিস্সতী’’তি আহটং, গিলানাতিৰিত্তঞ্চ অতিৰিত্তং অধিকন্তি ৱুচ্চতি, ততো অঞ্ঞং অনতিৰিত্তকং অনধিকন্তি অত্থো. কুসলং চিত্তং পাতেতীতি পাচিত্তি, তস্মা ইত্থিযং তিম্হি ত-কাৰস্স চ-কাৰে, দ্ৱিত্তে চ পাচিত্তি. যামকালিকং সত্তাহকালিকং যাৱজীৱিকং আহাৰত্থায পটিগ্গণ্হতো আপত্তি দুক্কটস্স, অজ্ঝোহাৰে অজ্ঝোহাৰে আপত্তি দুক্কটস্স.

৭৪. ইদানি যায পৱাৰিতা, সা পঞ্চঙ্গসম্পন্নাযেৱ পৱাৰণা নাম হোতীতি দস্সেতুং ‘‘অসন’’ন্তিআদিমাহ. তত্থ অসনন্তি ভুঞ্জমানস্স ভুঞ্জনং. ইমিনা যং ৱিপ্পকতং ভোজনং, তং দস্সেতি. ভোজনঞ্চেৱাতি পৱাৰণপ্পহোনকং ভোজনঞ্চেৱ হোতীতি. অভিহাৰোতি দাযকস্স কাযেন পৱাৰণপ্পহোনকস্স অভিহৰণং, ন ৱাচায. সমীপতাতি অড্ঢতেয্যহত্থপ্পমাণসঙ্খাতা সমীপতা চ. এত্থ পন সচে ভিক্খু নিসিন্নো হোতি, আসনস্স পচ্ছিমন্ততো পট্ঠায, সচে ঠিতো, পণ্হিঅন্ততো পট্ঠায, সচে নিপন্নো, যেন পস্সেন নিপন্নো, তস্স পাৰিমন্ততো পট্ঠায দাযকস্স ঠিতস্স ৱা নিসিন্নস্স ৱা নিপন্নস্স ৱা ঠপেত্ৱা পসাৰিতহত্থং যং আসন্নতৰং অঙ্গং, তস্স ওৰিমন্তেন পৰিচ্ছিন্দিত্ৱা অড্ঢতেয্যহত্থপাসো ৱেদিতব্বো. কাযৱাচাপটিক্খেপোতি তস্স অভিহটভোজনস্স অঙ্গুলিচলনাদিকাযৱিকাৰেন ৱা ‘‘অল’’ন্তিআদিনা ৱচীৱিকাৰেন ৱা পটিক্খিপনং. ইতি ইমেহি পঞ্চহঙ্গেহি পৱাৰণা পকাৰযুত্তৱাৰণা পঞ্চঅঙ্গাতি সম্বন্ধো. পঞ্চ অঙ্গানি যস্সা সা পঞ্চঅঙ্গা.

৭৫. ইদানি এতেসু ওদনাদিপঞ্চৱিধং ভোজনং দস্সেত্ৱা তানি চ পুন ৱিভজিত্ৱা দস্সেতুং ‘‘ওদনো’’তিআদি আৰদ্ধং. তত্থ সালীতি ৰত্তসালিআদিকা সব্বাপি সালিজাতি. ৱীহীতি সব্বাপি ৱীহিনামিকা ৱীহিজাতি. কঙ্গূতি সেতৰত্তকাড়ভেদা সব্বাপি কঙ্গুজাতি. কুদ্ৰূসো নাম কাড়কোদ্ৰৱো. ৱৰকো নাম সেতৱণ্ণো কোদ্ৰৱো. যৱগোধুমেসু পন ভেদো নত্থি. এৱং যথাৱুত্তানং সানুলোমানং সত্তন্নং ধঞ্ঞানং ভোজ্জযাগু চাতি সম্বন্ধো. ভোজ্জযাগু চাতি উণ্হং ৱা সীতলং ৱা ভুঞ্জন্তানং ভোজনকালে গহিতট্ঠানে ওধি পঞ্ঞাযতি, সা ভোজ্জযাগু. চ-সদ্দেন ওদনো চাতি সম্বন্ধো, ওদনো নামাতি অত্থো. সচে পন ভত্তে উদককঞ্জিকখীৰাদীনি আকিৰিত্ৱা ‘‘যাগুং গণ্হথা’’তি দেন্তি, কিঞ্চাপি তনুকা হোতি, পৱাৰণং জনেতি. সচে পন উদকাদীসু পক্খিপিত্ৱা পচিত্ৱা দেন্তি, যাগুসঙ্গহমেৱ গচ্ছতি. সচে পন তনুকাযপি যাগুযা সাসপমত্তম্পি মচ্ছমংসখণ্ডং ৱা ন্হাৰু ৱা পক্খিত্তং হোতি, পৱাৰণং জনেতি.

৭৬. সামাকাদিতিণং কুদ্ৰূসকে সঙ্গহং গতং, ৱৰকচোৰকো ৱৰকে সঙ্গহং গতো, নীৱাৰো চেৱ সালিযং সঙ্গহং গতোতি যোজনা. সামাকাদিতিণন্তি সামাকো আদি যস্স, তমেৱ তিণং তিণধঞ্ঞন্তি সমাসো.

৭৭. ভট্ঠধঞ্ঞমযোতি খৰপাকভজ্জিতেহি সত্তৱিধেহি ধঞ্ঞেহি কোট্টেত্ৱা কতো, অন্তমসো চুণ্ণম্পি কুণ্ডকম্পি সত্তু নামাতি অত্থো. সমপাকভজ্জিতানং পন আতপসুক্খানং ৱা তণ্ডুলানং সত্তু ৱা কুণ্ডকানি এৱ ৱা ন পৱাৰেন্তি. যৱেন সম্ভৱো উপ্পত্তি অস্সাতি যৱসম্ভৱো, কুম্মাসো কুম্মাসো নাম. মুগ্গাদীহি কতো পন পৱাৰণং ন জনেতি. কপ্পিযো চাতি কপ্পিযোযেৱ মংসো ‘‘মংসো’’তি ৱুত্তোতি যোজনা. চাতি অৱধাৰণে. অকপ্পিযো পন পটিক্খিপিতব্বোৱ. পটিক্খিত্তোপি ন পৱাৰেতি. উদকে সম্ভৱো যস্স সো মচ্ছো নাম. দ্ৱীসু পনেতেসু সচে যাগুং পিৱন্তস্স যাগুসিত্থমত্তেসুপি মচ্ছখণ্ডেসু ৱা মংসখণ্ডেসু ৱা একং খাদিতং একং হত্থে ৱা পত্তে ৱা হোতি, সো চে অঞ্ঞং পটিক্খিপতি, পৱাৰেতি. দ্ৱেপি খাদিতানি হোন্তি, মুখে সাসপমত্তম্পি অৱসিট্ঠং নত্থি, সচেপি অঞ্ঞং পটিক্খিপতি, ন পৱাৰেতি.

৭৮. ইদানি ‘‘কীদিসং ভুঞ্জন্তো কিন্তি ৱত্ৱা উপনীতং কিং নাম নিসেধেন্তো পৱাৰেতি নামা’’তি চোদনং মনসি নিধাযাহ ‘‘ভুঞ্জন্তো’’তিআদি. তত্থ কপ্পং ৱা অকপ্পং ৱা পঞ্চসু ভোজনেসু যং কিঞ্চি ভোজনং ভুঞ্জন্তো ভিক্খু তন্নামেন তেসং পৱাৰণাজনকভোজনানং নামেন ৱা ‘‘ইম’’ন্তি সামঞ্ঞেন ৱা ৱত্ৱা অভিহটং হত্থপাসোপনীতং কপ্পং কপ্পিযং যথাৱুত্তভোজনং নিসেধযং নিসেধযন্তো পৱাৰেয্যাতি পদত্থসম্বন্ধো. অযমেত্থ অধিপ্পাযো – যেন চে অকপ্পিযমংসঞ্চ কুলদূসনৱেজ্জকম্মউত্তৰিমনুস্সধম্মাৰোচনসাদিতৰূপিযাদীহি নিব্বত্তং অকপ্পিযভোজনঞ্চ তথা অঞ্ঞঞ্চ কপ্পিযং ৱা অকপ্পিযং ৱা একসিত্থমত্তম্পি অজ্ঝোহটং হোতি, সো সচে পত্তমুখহত্থেসু যত্থ কত্থচি ভোজনে সতি সাপেক্খোৱ অঞ্ঞং হত্থপাসে ঠিতেন ‘‘ওদনং গণ্হথা’’তিআদিনা পৱাৰণপ্পহোনকস্সেৱ নামেন ৱা ‘‘ইম’’ন্তি সামঞ্ঞৱসেনেৱ ৱা কাযেনেৱ অভিহটং ৱুত্তলক্খণং কপ্পিযমেৱ ভোজনং কেৱলং ৱা মিস্সং ৱা কাযেন ৱা ৱাচায ৱা পটিক্খিপতি পৱাৰেতীতি. ‘‘আকিৰ আকিৰ, কোট্টেত্ৱা কোট্টেত্ৱা পূৰেহী’’তি পন ৱত্তুং ৱট্টতি.

৭৯-৮০. ইদানি যে পৱাৰণং ন জনেন্তি, তে দস্সেতুং ‘‘লাজা’’তিআদিমাহ. তত্থ লাজা…পে… ফলাদীনি পৱাৰণং ন জনেন্তীতি সম্বন্ধো. লাজাতি সালিআদীহি কতা লাজা. তংসত্তুভত্তানীতি তেহি লাজেহি কতা সত্তু চেৱ ভত্তানি চ. গোৰসোতি গুন্নং ৰসো খীৰাদি. সুদ্ধখজ্জকোতি মচ্ছমংসেহি অসম্মিস্সতায সুদ্ধখজ্জকো. সত্তুযো পিণ্ডেত্ৱা কতো অপক্কো সত্তুগুড়ো পন সত্তুমোদকসঙ্খাতো পৱাৰেতি. তণ্ডুলাতি সমপাকভজ্জিতানং সালিআদীনং তণ্ডুলা, ভজ্জিততণ্ডুলা এৱ ৱা. ভট্ঠপিট্ঠন্তি সুদ্ধং যং কিঞ্চি ভজ্জিতং পিট্ঠং. পুথুকাতি সালিআদীনং পুথুকা. পুথুকা হি তন্তিআগমযুত্তিযা ৱিসুম্পি গয্হতি, একতোপি, তস্মা ৱুত্তাৱসেসানং পুথুকাৱেড়ুআদীনং ভত্তন্তি চ সম্বন্ধো. ৱেড়ূতি তেসং তণ্ডুলা ৱুচ্চন্তি. পুথুকা চ ৱেড়ু চ, তে আদযো যেসন্তি সমাসো. চ-সদ্দো পনেত্থ সব্বত্থাপি যোজেতব্বো. আদি-সদ্দেন কন্দমূলফলানিপি গয্হন্তি. ৱুত্তাৱসেসানন্তি ৱুত্তেহি সত্তৱিধেহি ধঞ্ঞেহি অৱসেসানং. ৰসযাগূতি ৰসেহি পক্কমংসাদীহি সম্মিস্সা যাগু. ৰসোপি তাদিসোৱ. সুদ্ধযাগূতি মংসাদীহি অমিস্সা সুদ্ধযাগু. ফলাদীনীতি আদি-সদ্দেন কন্দাদীনম্পি গহণং. অপি চাতি নিপাতো, নিপাতসমুদাযো ৱা সমুচ্চযে, সো পচ্চেকং যোজেতব্বো.

৮১. ইদানি যস্মা সত্তহি ৱিনযকম্মাকাৰেহি যং অতিৰিত্তং অকতং, তত্থ পাচিত্তিযং ৱুত্তং, ব্যতিৰেকতো অতিৰিত্তকতে নত্থি, তস্মা অতিৰিত্তং কৰোন্তেন এৱং কাতব্বন্তি দস্সেন্তো ‘‘পৱাৰিতেনা’’তিআদিমাহ. তত্থ পৱাৰিতেন ৱুট্ঠায অতিৰিত্তং ন কাতব্বং, ভোজনং অভুত্তেন চ অতিৰিত্তং ন কাতব্বন্তি সম্বন্ধো. ভোজনন্তি পৱাৰণপ্পহোনকভোজনং. অভুত্তেনাতি একসিত্থমত্তম্পি অভুত্তাৱিনা. যেন যংৱা পুৰে কতন্তি এত্থ চ এৱ-সদ্দো দীঘং কত্ৱা নিদ্দিট্ঠো, সো চ অজ্ঝাহটেন তং-সদ্দেন সম্বন্ধীযতি, তস্মা যেন ভিক্খুনা যং ভোজনং পুৰে পুব্বে অতিৰিত্তং কতং, তেনেৱ তমেৱ অতিৰিত্তং ন কাতব্বন্তি যোজেত্ৱা অত্থো ৱেদিতব্বো. তস্মা কপ্পিযং কাৰেত্ৱা ভুঞ্জন্তস্স অঞ্ঞং আমিসং আকিৰন্তি, তং সো পুন কাতুং ন লভতি, তস্মিং ভোজনে কৰিযমানে পঠমকতেন সদ্ধিং কতং হোতীতি. অঞ্ঞস্মিং পন তেন ৱা অঞ্ঞেন ৱা কাতুং ৱট্টতি.

৮২. ‘‘কপ্পিয’’ন্তিআদীনি ‘‘কৰোন্তো’’তি এতস্স কম্মপদানি. কপ্পিযঞ্চেৱ গহিতঞ্চেৱ উচ্চাৰিতঞ্চেৱ হত্থপাসগঞ্চেৱ যাৱকালিকং অতিৰিত্তং কৰোন্তো ‘‘অলমেতং সব্ব’’ন্তি এৱং ভাসতূতি যোজনা. তত্থযং ফলং ৱা কন্দমূলাদি ৱা পঞ্চহি সমণকপ্পেহি কপ্পিযং কতং, যঞ্চ কপ্পিযমংসং ৱা কপ্পিযভোজনং ৱা, এতং কপ্পিযং নাম. গহিতন্তি ভিক্খুনা পটিগ্গহিতং. উচ্চাৰিতন্তি কপ্পিযং কাৰেতুং আগতেন ভিক্খুনা ঈসকম্পি উক্খিত্তং ৱা অপনামিতং ৱা, তং পন অতিৰিত্তকাৰকেন ‘‘অলমেতং সব্ব’’ন্তি ৱুত্তেন কাতব্বং. হত্থপাসগন্তি কপ্পিযং কাৰেতুং আগতেন হত্থপাসং গতং. অতিৰিত্তং কৰোন্তোতি ঈদিসং চতুব্বিধাকাৰসম্পন্নং ভোজনং অতিৰিত্তং কৰোন্তো পৱাৰেত্ৱা আসনা অৱুট্ঠিতো ৱা অপ্পৱাৰেত্ৱাপি সব্বথা ভুত্তো ৱাতি এৱং দুৱিধৱিনযকম্মাকাৰসম্পন্নো ভিক্খু. অলমেতং সব্বন্তি এৱং ভাসতূতি অলমেতং সব্বং ইতি এৱং ভাসতু. এৱং সত্তৱিধং ৱিনযকম্মাকাৰং সম্পাদেন্তো ৱচীভেদং কত্ৱা সকিম্পি এৱং ৱদেয্যাতি অত্থো.

৮৩. কপ্পিযং কৰোন্তেন পন অনুপসম্পন্নস্স হত্থে ঠিতং ন কাতব্বং. তেনাহ ‘‘ন কৰে…পে… হত্থগ’’ন্তি. উপসম্পন্নতো অঞ্ঞো অনুপসম্পন্নো, তস্স হত্থে গতং অনুপসম্পন্নহত্থগং. পেসযিত্ৱাপীতি সচে তত্থ অঞ্ঞো ব্যত্তো ভিক্খু নত্থি, যত্থ অত্থি, তত্থ পেসযিত্ৱাপি. তং অতিৰিত্তকতং অকাৰকো অতিৰিত্তকাৰকতো অঞ্ঞো সব্বো পৱাৰিতোপি অপ্পৱাৰিতোপি ভুঞ্জিতুং লব্ভতেতি সম্বন্ধনীযং. পৱাৰিতেন পন মুখঞ্চ হত্থঞ্চ সোধেত্ৱা ভুঞ্জিতব্বং.

পৱাৰণানিদ্দেসৱণ্ণনা নিট্ঠিতা.