৪২. দেসনানিদ্দেসৱণ্ণনা

৩৮২. ইদানি দেসনানিদস্সনব্যাসেন হেট্ঠা অৱুত্তানি কানিচি সিক্খাপদানি উপদিসিতুং ‘‘চাগো’’তিআদিমাহ. ভিক্খুভাৱস্স যো চাগো, সা পাৰাজিকদেসনাতি সম্বন্ধো. ভৱতি অনেনাতি ভাৱো, সদ্দপ্পৱত্তিনিমিত্তং, ভিক্খুনো ভাৱো ভিক্খু-সদ্দস্স পৱত্তিনিমিত্তং ভিক্খুকিচ্চং ভিক্খুভাৱো, তস্স. দিসী উচ্চাৰণে, উচ্চাৰণা পকাসনা দেসনা. ‘‘ছন্নমতিৱস্সতি, ৱিৱট্টং নাতিৱস্সতী’’তি (উদা. ৪৫) হি ৱুত্তং. ইধ পন ভিক্খুভাৱপৰিচ্চাগোযেৱ পাৰাজিকায পকাসনা নাম পাৰাজিকায দেসনা. ‘‘যো’’তি ৱুত্তত্তা ‘‘সো’’তি ৱত্তুং যুত্তং, তথাপি সব্বাদীহি ৱুত্তস্স ৱা লিঙ্গমাদিয্যতে ৱক্খমানস্স ৱাতি ৱক্খমানদেসনাপেক্খায ‘‘সো’’তি ৱুত্তং. যথা যেন পকাৰেন ‘‘ছাদেতি জানমাপন্ন’’ন্তিআদিনা ৱুত্তং যথাৱুত্তং, তেন. ৱুত্তমনতিক্কম্মাতি অব্যযীভাৱৱসেন ৱা অত্থো ৱেদিতব্বো. ইধাপি গৰুকাপত্তিযা ৱুট্ঠানানতিক্কমেনেৱ পকাসনা দেসনা সিযাতি ‘‘ৱুট্ঠানং গৰুকাপত্তিদেসনা’’তি ৱুচ্চতি.

৩৮৩. ইদানি ৱত্তব্বং সন্ধায ‘‘এৱ’’ন্তি ৱুত্তং. একস্সাতি একস্স ভিক্খুনো.

৩৮৪. তুম্হমূলেতি তুম্হাকং মূলে সমীপে. পটিদেসেমীতি পকাসেমি. সংৱৰেয্যাসীতি সংযমেয্যাসি, সংৱৰে পতিট্ঠেয্যাসীতি অত্থো.

৩৮৫. নিস্সজ্জিত্ৱানাতি একবহুভাৱং সন্নিহিতাসন্নিহিতভাৱং ঞত্ৱা ‘‘ইদং মে, ভন্তে, চীৱৰ’’ন্তিআদিনা নিস্সজ্জিত্ৱা. তেনাতি যস্স চীৱৰং নিস্সট্ঠং, তেন. ‘‘ইমং…পে… দম্মী’’তি নিস্সট্ঠচীৱৰং দেয্যন্তি সম্বন্ধিতব্বং. ‘‘ইমং চীৱৰং দসাহাতিক্কন্ত’’ন্তিআদিনা যোজেতব্বং.

৩৮৬. (ক) চীৱৰন্তি তিচীৱৰাধিট্ঠাননযেন অধিট্ঠিতেসু সঙ্ঘাটিআদীসু যং কিঞ্চি চীৱৰং. ৱিপ্পৱুত্থন্তি ৱিপ্পযুত্তেন ৱুত্থং.

(খ) অকালচীৱৰন্তি অনত্থতে কথিনে ৱস্সানস্স পচ্ছিমমাসং ঠপেত্ৱা সেসে একাদসমাসে, অত্থতে কথিনে তঞ্চ মাসং হেমন্তিকে চত্তাৰো মাসে চ ঠপেত্ৱা সেসে সত্তমাসে উপ্পন্নং, কালেপি সঙ্ঘস্স ৱা ‘‘ইদং অকালচীৱৰ’’ন্তি একপুগ্গলস্স ৱা ‘‘ইদং তুয্হং দম্মী’’তি উদ্দিসিত্ৱা দিন্নং. ইতৰং পন কালচীৱৰং. মাসাতিক্কন্তন্তি অকালচীৱৰে উপ্পন্নে ঊনস্স পাৰিপূৰিযা সঙ্ঘগণাদিতো সতিযা পচ্চাসায মাসমেকং পৰিহাৰো লব্ভতি, তং মাসং অতিক্কন্তং.

(গ) পুৰাণচীৱৰন্তি যং অন্তমসো উস্সীসকং কত্ৱা নিপন্নো. চীৱৰং নাম ছন্নং অঞ্ঞতৰং ৱিকপ্পনূপগং. এসেৱ নযো সব্বেসু ৱক্খমানচীৱৰপ্পটিসংযুত্তসিক্খাপদেসু.

(ঘ) অঞ্ঞত্ৰ পাৰিৱত্তকাতি অন্তমসো হৰীতকীখণ্ডেনপি পাৰিৱত্তকং ৱিনা.

(ঙ) গহপতিকন্তি ভিক্খূসু অপব্বজিতকং. অঞ্ঞত্ৰ সমযাতি অচ্ছিন্নচীৱৰনট্ঠচীৱৰসমযং ৱিনা, অচ্ছিন্নচীৱৰেহি পন সাখাপলাসং অত্তনা ভঞ্জিত্ৱাপি ৱাকাদীনি গণ্হিত্ৱাপি নিৱাসেতুং ৱট্টতি, পগেৱ ৱিঞ্ঞত্তি. চীৱৰং ৱিঞ্ঞাপিতন্তি সম্বন্ধো. কন্তি আহ ‘‘অঞ্ঞাতক’’ন্তিআদি.

(চ) তদুত্তৰীতি ততো ৱুত্তপ্পমাণতো উত্তৰি, অচ্ছিন্নচীৱৰেন ভিক্খুনা কাযেন ৱা ৱাচায ৱা অভিহৰিত্ৱা পৱাৰিতচীৱৰতো তীসু নট্ঠেসু দ্ৱে সাদিতব্বানি, দ্ৱীসু নট্ঠেসু একং সাদিতব্বং. পকতিযা সন্তৰুত্তৰেন চৰন্তেন দ্ৱীসু নট্ঠেসু দ্ৱেযেৱ সাদিতব্বানি, একস্মিং নট্ঠে একংযেৱ সাদিতব্বং. যস্স একংযেৱ হোতি, তস্মিং নট্ঠে দ্ৱে সাদিতব্বানি.

(ছ) অপ্পৱাৰিতোতি গহপতিনা ৱা গহপতানিযা ৱা. ৱিকপ্পন্তি পঠমঅধিপ্পেততো মূলং ৱড্ঢাপেন্তো সুন্দৰকামতায ‘‘আযতং ৱা’’তিআদিনা ৱিসিট্ঠকপ্পং অধিকৱিধানং.

(জ) অঞ্ঞাতকে গহপতিকেতি বহূনং ৱসেন ৱুত্তমত্তমেৱ পুৰিমতো ৱিসেসো.

(ঝ) চোদনাযাতি ‘‘অত্থো মে, আৱুসো, চীৱৰেনা’’তি চোদনায. ঠানেনাতি কাযচোদনমাহ. ৰাজাদীহি পেসিতেন হি দূতেন ৱেয্যাৱচ্চকৰস্স হত্থে চীৱৰচেতাপন্নে নিক্খিত্তে তিস্সো চোদনা অনুঞ্ঞাতা, চোদনায দিগুণং ঠানং, তস্মা সচে চোদেতিযেৱ, ন তিট্ঠতি, ছ চোদনা লব্ভন্তি. সচে তিট্ঠতিযেৱ, ন চোদেতি, দ্ৱাদস ঠানানি লব্ভন্তি. সচে উভযং কৰোতি, একায চোদনায দ্ৱে ঠানানি হাপেতব্বানি.

(ট) সুদ্ধানি চ তানি কাড়কানি চ জাতিযা ৰজনেন ৱা.

(ঠ) তুলন্তি চতূহি তুলাহি কাৰেতুকামতং সন্ধায ৱুত্তং. অত্থতো পন যত্তকেহি এড়কলোমেহি কাতুকামো হোতি, তেসু দ্ৱে কোট্ঠাসা কাড়কানং, একো ওদাতানং, একো গোচৰিযানং গহেতব্বো. তুলা নাম পলসতং. গোচৰিযা নাম কপিলৱণ্ণা. ইদং মে সন্থতং কাৰাপিতন্তি যোজনা.

(ণ) তিযোজনপৰমন্তি গহিতট্ঠানতো তীণি যোজনানি পৰমো অস্স অতিক্কমনস্সাতি ভাৱনপুংসকৱসেন অত্থো ৱেদিতব্বো. অতিক্কামিতানীতি অন্তমসো সুত্তকেনপি ভণ্ডকতভণ্ডহৰণং ৱিনা অন্তমসো ৱাতাবাধপ্পটিকাৰত্থং কণ্ণচ্ছিদ্দে পক্খিত্তানি অতিক্কামিতানি.

৩৮৭-৯. নিস্সজ্জিত্ৱানাতি ৱুত্তনযেন ৱত্থূনি নিস্সজ্জিত্ৱা. অথাতি দেসিতানন্তৰং. ‘‘ইমং জানাহী’’তি গিহিং ৱদেতি যোজনা. সোতি আৰামিকাদিকো গিহী. ‘‘ইমিনা কিং আহৰামী’’তি ৱদেয্যাতি সম্বন্ধো. ৱদেয্যাতি যদি ৱদতি. ইমন্তি অৱত্ৱাতি ‘‘ইমং আহৰা’’তি অৱত্ৱা ভিক্খূনং কপ্পিযং তেলাদিন্তি ৱদেতি সম্বন্ধো. আদিন্তি সন্ধিৱসেন নিগ্গহিতং. তেন পৰিৱত্তেত্ৱান সো যং কপ্পিযং আহৰতীতি যোজনা. তেনাতি নিস্সগ্গিযৱত্থুনা. দ্ৱেপেতে ঠপেত্ৱাতি এতে ৰূপিযপ্পটিগ্গাহকৰূপিযসংৱোহাৰকে দ্ৱে ঠপেত্ৱা সেসেহি পৰিভুঞ্জিতুং লব্ভন্তি সম্বন্ধো. পৰিভুঞ্জিতুন্তি তং ভুঞ্জিতুং. ততোতি পৰিৱত্তিতকপ্পিযতো. অঞ্ঞেনাতি অন্তমসো আৰামিকেনাপি. তেসন্তি ৱুত্তানং দ্ৱিন্নং.

৩৯০. অন্তমসো তন্নিব্বত্তা ৰুক্খচ্ছাযাপীতি সম্বন্ধো. তন্নিব্বত্তাতি নিস্সট্ঠৱত্থুনা কিণিত্ৱা গহিতআৰামে ৰুক্খচ্ছাযা তন্নিব্বত্তা হোতীতি ততো নিব্বত্তাতি সমাসো. আদিতো সন্থতত্তযন্তি আদিম্হি কোসিযসুদ্ধকাড়কদ্ৱেভাগসন্থতত্তযং.

৩৯১. এৱং চে নো লভেথাতি এৱং পৰিৱত্তেত্ৱা কপ্পিযকাৰকো নো চে লভেয্য, সো গিহী ‘‘ইমং ছড্ডেহী’’তি সংসিযো ৱত্তব্বো, এৱং ৰূপিযছড্ডকো গিহী নো চে লভেয্য, সম্মতো ভিক্খু ছড্ডেয্যাতি সম্বন্ধো. সম্মতোতি ‘‘যো ছন্দাগতিং ন গচ্ছেয্যা’’তিআদিনা (পাৰা. ৫৮৪) ৱুত্তপঞ্চঙ্গসমন্নাগতো ৰূপিযছড্ডকসম্মুতিযা সম্মতো ভিক্খু.

৩৯২. এতানীতি পটিগ্গহিতৰূপিযানি. দুতিযং পত্তন্তি ঊনপঞ্চবন্ধনে সতি ৱিঞ্ঞাপিতপত্তং সঙ্ঘে ৱত্তুং লব্ভৰেতি পদসম্বন্ধো. ৱত্তুন্তি ‘‘অহং ভন্তে ৰূপিযং পটিগ্গহেসি’’ন্তিআদিনা ৱত্তুং. সেসানি অৱসেসনিস্সগ্গিযৱত্থূনি সঙ্ঘে একস্মিং গণে চ ৱত্তুং লব্ভৰেতি যোজনা. ভাসন্তৰেনপি ৱত্তুং লব্ভন্তি ন কেৱলং পাড়িভাসাযমেৱ, সীহড়াদিভাসাযপি নিস্সজ্জিতুং লব্ভতীতি অত্থো.

৩৯৩. (ক) নানপ্পকাৰন্তি চীৱৰাদীনং কপ্পিযভণ্ডানং ৱসেন অনেকৱিধং. কযো গহণং, ৱিক্কযো দানং. কযো চ ৱিক্কযো চ কযৱিক্কযং.

(গ) ঊনপঞ্চবন্ধনেনাতি ঊনানি পঞ্চ বন্ধনানি যস্স, তেন, ইত্থম্ভূতলক্খণে কৰণৱচনং. যথাকথঞ্চি পন পঞ্চবন্ধনো পত্তো, পঞ্চবন্ধনোকাসো ৱা, সো অপত্তো, অঞ্ঞং ৱিঞ্ঞাপেতুং ৱট্টতি.

৩৯৪. সম্মন্নিত্ৱানাতি পদভাজনীযে ৱুত্তঞত্তিদুতিযকম্মেন সম্মন্নিত্ৱা. সঙ্ঘস্স পত্তন্তন্তি অন্ত-সদ্দেন পত্তানং অন্তে ভৱো লামকো পত্তোযেৱ গহিতো, নিস্সট্ঠপত্তস্স ৱিজ্জমানগুণং ৱত্ৱা থেৰং, থেৰস্স পত্তং দুতিযত্থেৰং গাহাপেত্ৱা এতেনেৱ উপাযেন যাৱসঙ্ঘনৱকং গাহাপেত্ৱা যো তত্থ সন্নিপতিতসঙ্ঘস্স পত্তেসু পৰিযন্তো পত্তো, তং পত্তন্তি. তস্সাতি কতনিস্সজ্জনস্স ভিক্খুনো. দাপযেতি সম্মতেন পত্তগাহাপকেন দাপেয্য.

৩৯৫. (ক) ভেসজ্জন্তি ভেসজ্জকিচ্চং কৰোতু ৱা, মা ৱা, এৱং লদ্ধৱোহাৰং সপ্পিআদিকং সত্তাহকালিকং.

(খ) গিম্হানস্স পচ্ছিমমাসে পুৰিমো অদ্ধমাসো পৰিযেসনকৰণানং খেত্তং, পচ্ছিমদ্ধমাসো পৰিযেসনকৰণনিৱাসনানং খেত্তং, ৱস্সিকমাসা চত্তাৰোপি অধিট্ঠানেন সহ চতুন্নম্পি খেত্তং, ইমেযেৱ পঞ্চমাসা কুচ্ছিসমযো, ইতৰসত্তমাসা পিট্ঠিসমযো. পিট্ঠিসমযে পৰিযেসন্তস্স নিস্সগ্গিযং পাচিত্তিযং, কুচ্ছিসমযে চ অতিৰেকদ্ধমাসে কত্ৱা পৰিদহতো নিস্সগ্গিযং পাচিত্তিযং. তেন ৱুত্তং ‘‘অতিৰেকমাসে সেসে’’তি.

(গ) সামং দত্ৱাতি ৱেয্যাৱচ্চাদীনি পচ্চাসীসমানো সযমেৱ দত্ৱা. অচ্ছিন্নন্তি তং অকৰোন্তং দিস্ৱা সকসঞ্ঞায অচ্ছিন্নং. ভিক্খুনোপি চীৱৰং ঠপেত্ৱা অঞ্ঞং পৰিক্খাৰং, অনুপসম্পন্নস্স চ যং কিঞ্চি পৰিক্খাৰং অচ্ছিন্দতো দুক্কটং. পৰিচ্চজিত্ৱা দিন্নং সকসঞ্ঞং ৱিনা অচ্ছিন্দন্তো ভণ্ডগ্ঘেন কাৰেতব্বো.

(ঙ) ৱিকপ্পন্তি ‘‘আযতঞ্চ কৰোহি ৱিত্থতঞ্চা’’তিআদিকং অধিকৱিধানং.

(চ) অচ্চেকচীৱৰন্তি গমিকগিলানগব্ভিনিঅভিনৱুপ্পন্নসদ্ধানং অঞ্ঞতৰেন পৱাৰণমাসস্স জুণ্হপক্খপঞ্চমিতো পট্ঠায ‘‘ৱস্সাৱাসিকং দস্সামী’’তি দিন্নং অচ্চাযিকচীৱৰং. অচ্চেকচীৱৰস্স অনত্থতে কথিনে একাদসদিৱসাধিকো মাসো, অত্থতে কথিনে একাদসদিৱসাধিকা পঞ্চ মাসা চীৱৰকালসমযো, তং অতিক্কামেন্তস্স নিস্সগ্গিযং পাচিত্তিযং. তেন ৱুত্তং ‘‘চীৱৰকালসমযং অতিক্কামিত’’ন্তি. কালো চ সো সমযো চ চীৱৰস্স কালসমযো, তং.

(ছ) সপ্পটিভযে আৰঞ্ঞকসেনাসনে ৱস্সং উপগন্ত্ৱা ৱিহৰন্তেন ভিক্খুনা তিণ্ণং চীৱৰানং অঞ্ঞতৰং চীৱৰং পুৰিমিকায উপগন্ত্ৱা মহাপৱাৰণায পৱাৰিততা, কত্তিকমাসতা, পঞ্চধনুসতিকপচ্ছি মপ্পমাণযুত্তসেনাসনতা, সাসঙ্কসপ্পটিভযতাতি এৱং ৱুত্তচতুৰঙ্গসম্পত্তিযাঅন্তৰঘৰে নিক্খিপিত্ৱা সতি পচ্চযে ছাৰত্তপৰমং তেন চীৱৰেন ৱিপ্পৱসিতব্বং. ততো চে উত্তৰি ৱিপ্পৱসেয্য, নিস্সগ্গিযং পাচিত্তিযং. তেন ৱুত্তং ‘‘অতিৰেকছাৰত্ত’’ন্তিআদি.

(জ) জানন্তি জানন্তো.

৩৯৬. আদিম্হি ৱিযাতি পঠমনিস্সগ্গিযে ৱিয.

৩৯৭. (খ) অন্তৰঘৰং পৱিট্ঠায ভিক্খুনিযা হত্থতো খাদনীযাদিপ্পটিগ্গহণে চ ভিক্খূসু কুলেসু ভুঞ্জন্তেসু ‘‘ইধ পূৱং, সূপং দেথা’’তিআদিনা নযেন ৱোসাসমানায ভিক্খুনিযা অনপসাদনেন চ সেখসম্মতেসু কুলেসু পুব্বে অনিমন্তিতস্স খাদনীযাদীনং পটিগ্গহণে চ সপ্পটিভযে আৰঞ্ঞকসেনাসনে ৱিহৰন্তস্স পুব্বে অপ্পটিসংৱিদিতখাদনীযাদিপ্পটিগ্গহণে চ পাটিদেসনীযং নাম আপত্তিনিকাযো ৱুত্তো. তেন ৱুত্তং ‘‘গাৰয্হ’’ন্তিআদি.

৩৯৮. ‘‘অদেসনাগামিনিয’’ন্তিআদি ‘‘ন দেসযে’’তি এত্থ কম্মং. পাৰাজিকা সঙ্ঘাদিসেসা চ অদেসনাগামিনিযো নাম. ন আপত্তি অনাপত্তি, তং. কতদেসনং দেসিতং. নানাসংৱাসনিস্সীমট্ঠিতানং ন দেসযেতি সম্বন্ধো. এৱং চতুপঞ্চহি ন দেসযে, মনসা ন দেসযে, অপকতত্তানং ন দেসযে, নানা ‘‘একা’’তি ন দেসযেতি. মনসাতি কেৱলং চিত্তেনেৱ. নানাতি সম্বহুলা আপত্তিযো ‘‘একা’’তি ৱত্ৱা. একং পন আপত্তিং ‘‘সম্বহুলা’’তি দেসেতুং ৱট্টতীতি.

দেসনানিদ্দেসৱণ্ণনা নিট্ঠিতা.