৪০. অৱেভঙ্গিযনিদ্দেসৱণ্ণনা

৩২২-৫. আৰামা…পে… মত্তিকভণ্ডানীতি এতে পঞ্চ অৱিভাজিযাতি সম্বন্ধিতব্বং. পঞ্চাতি ‘‘আৰামাৰামৱত্থূনি এক’’ন্তিআদিনা ৰাসিৱসেন পঞ্চ, সৰূপৱসেন পনেতানি পণ্ণং তিণে পক্খিপিত্ৱা পঞ্চৱীসতিৱিধানি হোন্তি. তথা চাহ –

‘‘দ্ৱিসঙ্গহানি দ্ৱে হোন্তি, ততিযং চতুসঙ্গহং;

চতুত্থং নৱকোট্ঠাসং, পঞ্চমং অট্ঠভেদনং.

‘‘ইতি পঞ্চহি ৰাসীহি, পঞ্চনিম্মললোচনো;

পঞ্চৱীসৱিধং নাথো, গৰুভণ্ডং পকাসযী’’তি. (চূড়ৱ. অট্ঠ. ৩২১);

তত্থ আৰামো নাম পুপ্ফাৰামো ৱা ফলাৰামো ৱা. আৰামৱত্থু নাম তেসংযেৱ পতিট্ঠানোকাসো, ৱিনট্ঠেসু ৱা তেসু পোৰাণকভূমিভাগো. ৱিহাৰো নাম পাসাদাদি যং কিঞ্চি সেনাসনং. লোহকুম্ভী নাম কাড়লোহেন ৱা তম্বলোহেন ৱা কতকুম্ভী. কটাহাদীসুপি এসেৱ নযো. এত্থ ভাণকন্তি অৰঞ্জৰো ৱুচ্চতি. ৱাৰকোতি ঘটো. ৰাসিং অপেক্খিত্ৱা এতেতি পুল্লিঙ্গনিদ্দেসো. অৱিভাজিযাতি মূলচ্ছেজ্জৱসেন অৱেভঙ্গিযা. পৰিৱত্তনৱসেন পন পৰিভুঞ্জন্তস্স ৱিস্সজ্জেন্তস্স চ অনাপত্তি. অৱিস্সজ্জিযানি চাতি চ-সদ্দেন অৱেভঙ্গিযানি চাতি অৱুত্তং সম্পিণ্ডেতি.

৩২৬-৮. একন্তগৰুভণ্ডত্তা আদিতো তযো ৰাসী ঠপেত্ৱা চতুত্থৰাসিতো পট্ঠায গৰুভণ্ডাগৰুভণ্ডে ৱিভজিতুং ‘‘ৱল্লী’’তিআদি আৰদ্ধং. অড্ঢবাহুমত্তাপি ৱল্লি চ অট্ঠঙ্গুলাযতো ৱেড়ু চ মুট্ঠিমত্তম্পি তিণাদি চ একম্পি পণ্ণঞ্চ পাকতা ৱা পঞ্চৱণ্ণা ৱা তালপক্কপ্পমাণাপি মত্তিকা চ তালপক্কপ্পমাণাপি সুধা চ তালপক্কপ্পমাণাপি কঙ্গুট্ঠআদিকা চ দিন্না ৱা তত্থজাতকা ৱা সঙ্ঘিকা ৰক্খিতা অভাজিযা, ৰজ্জুযোত্তাদি চ দিন্না সঙ্ঘিকা অভাজিযাতি যোজনা. ৱেড়ু পৰিণাহতো পণ্ণসূচিদণ্ডমত্তো গহেতব্বো. তিণং মুঞ্জং পব্বজঞ্চ আদিসদ্দসঙ্গহিতং ঠপেত্ৱা অৱসেসং যং কিঞ্চি তিণং. পণ্ণো অট্ঠঙ্গুলপ্পমাণো ৰিত্তপোত্থকো গৰুভণ্ডমেৱ. পাকতাতি পকতিযা জাতা. পঞ্চৱণ্ণাতি ৰত্তসেতাদিপঞ্চৱণ্ণা. সুধাকঙ্গুট্ঠাদযো মত্তিকগ্গহণেন গহিতা. কঙ্গুট্ঠআদিকাতি আদি-সদ্দেন সজ্জুৰসজাতিহিঙ্গুলকাদীনং গহণং. দিন্নাতি সঙ্ঘস্স দিন্না. তত্থজাতাতি সঙ্ঘিকভূমিযং জাতা. ৰজ্জুযোত্তাদীতি সুত্তমকচিৱাকনাড়িকেৰহীৰচম্মমযা ৰজ্জু চ যোত্তাদি চ. আদি-সদ্দেন মকচিৱাকাদিকে ৱট্টেত্ৱা কতা একৱট্টা গহিতা. ব্যতিৰেকৱসেন পনেত্থ চতুত্থৰাসিম্হি ইতৰে ভাজিযাতি ৱেদিতব্বা. সঙ্ঘিকে কম্মে, চেতিযস্স ৱা কম্মে নিট্ঠিতে ভাজিযাতি যোজনীযং.

৩২৯. লোহভণ্ডেসু ভিক্খুসাৰুপ্পং পত্তাদি ৱা তথা ৱিপ্পকতাকতং লোহভণ্ডং তথা পাদগণ্হকং ৱাৰকং ভাজিযন্তি যোজনা. পত্তাদীতি অযোপত্তো অযথালকং তম্বলোহথালকং অঞ্জনিসলাকা কণ্ণমলহৰণী সূচি পণ্ণসূচি খুদ্দকো পিপ্ফলকো খুদ্দকং আৰকণ্ডকং কুঞ্চিকা তাড়াদি. ৱিপ্পকতন্তি অপৰিনিট্ঠিতং. অকতন্তি সব্বসো অকতং. পাদগণ্হকন্তি সীহড়দীপে পাদগণ্হনকং. পাদো নাম চতুত্থংসো, মগধনাড়িযা পঞ্চনাড়িমত্তা. মগধনাড়ি চ নামেসা ঊনপঞ্চপসতা ৱেদিতব্বা. তথা ঘটকো তেলভাজনঞ্চ. যায ৱাসিযা ঠপেত্ৱা দন্তকট্ঠচ্ছেদনং ৱা উচ্ছুতচ্ছনং ৱা অঞ্ঞং মহাকম্মং কাতুং ন সক্কা, অযং ভাজিযা. সম্মুঞ্জনিদণ্ডখণনকং পন অদণ্ডকং ফলমত্তমেৱ, যং সক্কা সিপাটিকায পক্খিপিত্ৱা পৰিহৰিতুং, অযং ভাজনীযা. তিপুকোট্টকউপকৰণেসু তিপুচ্ছেদনকসত্থকং সুৱণ্ণকাৰূপকৰণেসু সুৱণ্ণচ্ছেদনকসত্থকং চম্মকাৰউপকৰণেসু চম্মছিন্দনকং খুদ্দকসত্থং নহাপিততুণ্ণকাৰউপকৰণেসু ঠপেত্ৱা মহাকত্তৰিং মহাসণ্ডাসঞ্চ মহাপিপ্ফলকঞ্চ সব্বানি ভাজনীযভণ্ডানি. তথা কুঞ্চিকা. ৱুত্তৱিপল্লাসেন পন লোহভণ্ডে অভাজিযাতি ৱেদিতব্বা.

৩৩০. ‘‘ৱেড়ুম্হী’’তিআদিনা দাৰুভণ্ডানি দস্সেতি. দাৰুভণ্ডেন পন সঙ্গহেত্ৱা সব্বাপি দাৰুৱেড়ুচম্মুপাহনাদিৱিকতি ৱেদিতব্বা. ছত্তদণ্ডো চ সলাকা চাতি দ্ৱন্দো. উপাহনায দণ্ডকো উপাহনদণ্ডকো.

৩৩১. অনুঞ্ঞাতৱাসিদণ্ডোতি অনুঞ্ঞাতৱাসিযা দণ্ডো. অৰণঞ্জনিসিঙ্গাদীতি আদি-সদ্দেন অঞ্জনিসলাকা ছত্তং মুট্ঠিপণ্ণং উপাহনা ধম্মকৰণো পাদগণ্হনকতো অনতিৰিত্তং আমলকতুম্বং আমলকঘটো লাবুকতুম্বং লাবুকঘটো ৱিসাণতুম্বন্তি ইদং সঙ্গণ্হাতি.

৩৩২. যথাৱুত্ততো অঞ্ঞং দাৰুভণ্ডেসু গৰুভণ্ডং. মত্তিকামযো পাদঘটকো ভাজিযোতি যোজনা. পাদঘটকোতি পাদস্স পহোনকো ঘটকো. ইমিনা মত্তিকাভণ্ডং উপলক্খেতি, তস্মা পত্তো থালকং কুণ্ডিকাতি ইমানি ভাজনীযানি, ৱুত্তাৱসেসা অভাজিযা.

৩৩৩-৪. গৰুনা গৰুভণ্ডঞ্চ থাৱৰঞ্চ পৰিৱত্তেয্য, থাৱৰেন চ থাৱৰম্পি পৰিৱত্তেয্যাতি যোজেতব্বং. গৰুনা মঞ্চপীঠাদিনা. থাৱৰন্তি আৰামাদি পঠমৰাসিদ্ৱযং. তথা কত্ৱা চ ভুঞ্জিতুন্তি এৱঞ্চ পৰিৱত্তেত্ৱা ততো আভতং কপ্পিযভণ্ডং পৰিভুঞ্জেয্যাতি অত্থো, ৱিধিম্হি অযং তুংপচ্চযো. ফাতিকম্মেন ৱল্লাদিং গণ্হেতি সম্বন্ধনীযং. ফাতিকম্মং নাম সমকং ৱা অতিৰেকং ৱা তদগ্ঘনকং ৱা ৱড্ঢিকম্মং. সেসন্তি পঠমৰাসিত্তিকন্তি.

অৱেভঙ্গিযনিদ্দেসৱণ্ণনা নিট্ঠিতা.