৩৯. ৱস্সূপনাযিকনিদ্দেসৱণ্ণনা

৩০৯-৩১০. পুৰিমিকা পচ্ছিমিকা ইতি ৱস্সূপনাযিকা দুৱেতি সম্বন্ধো. আসাড়্হিপুণ্ণমায অনন্তৰে পাটিপদদিৱসে উপগন্তব্বা পচ্ছিমিকায পুৰে ভৱাতি পুৰিমা, সা এৱ পুৰিমিকা. ততো পচ্ছা ভৱা অপৰায পুণ্ণমায অনন্তৰে পাটিপদদিৱসে উপগন্তব্বা পচ্ছিমিকা. উপনযনং পাপুণনং উপগমনং উপনাযিকা, ৱস্সন্তি ৱুট্ঠি, ইধ পন ৱস্সকালং ‘‘ৱস্স’’ন্তি উপচাৰেন গহেত্ৱা তত্থ ৱাসো উপচাৰেনেৱ ‘‘ৱস্স’’ন্তি ৱুচ্চতি, ৱস্সস্স ৱস্সাৱাসস্স উপনাযিকা ৱচীভেদৱসেন ৱা আলযকৰণৱসেন ৱা উপগমনং ৱস্সূপনাযিকা. তত্থ আলযপৰিগ্গাহো চ ৱচীভেদো চাতি পুৰিমিকা ৱস্সূপনাযিকা দুৱে, আলযপৰিগ্গাহো চ ৱচীভেদো চাতি পচ্ছিমিকা ৱস্সূপনাযিকা দুৱেভি সম্বন্ধিতব্বং. তত্থাতি তাসু দ্ৱীসু. তদুভযং দস্সেতুং ‘‘এদিসো’’তিআদি ৱুত্তং. সো আলযপৰিগ্গাহো চ ৱচীভেদো চ ‘‘ইমস্মিং ৱিহাৰে ইমং তেমাসং ৱস্সং উপেমি, ইধ ৱস্সং উপেমী’’তি এদিসো, এতাদিসোতি অত্থো. এত্থ চ কমুপ্পত্তিঅনাদৰা ৱচীভেদো পঠমং ৱুত্তো. উভযথা ৱস্সং উপগন্তুং ৱট্টতি. তেনেৱ অট্ঠকথাযং (ৱি. সঙ্গ. অট্ঠ. ১৭৯; মহাৱ. অট্ঠ. ২০৭) ‘‘সচেপি ‘ইধ ৱস্সং ৱসিস্সামী’তি আলযো অত্থি, অসতিযা পন ৱস্সং ন উপেতি, গহিতসেনাসনং সুগ্গহিতং, ছিন্নৱস্সো ন হোতি, পৱাৰেতুং লভতিযেৱ, ৱিনাপি হি ৱচীভেদং আলযকৰণমত্তেনপি ৱস্সং উপগতমেৱ হোতী’’তি ৱুত্তং. নাৱাসত্থৱজেসু পন পৰিযেসিত্ৱা সেনাসনং অলভন্তেন আলযকৰণমত্তেনেৱ উপগন্তব্বং. উপগচ্ছন্তেন চ ৱিহাৰং পটিজগ্গিত্ৱা পানীযং পৰিভোজনীযং উপট্ঠাপেত্ৱা সব্বং চেতিযৱন্দনাদিসামীচিকম্মং নিট্ঠাপেত্ৱা উপগন্তব্বং. আলযপৰিগ্গহে আলযং দস্সেতুং ‘‘চিত্তুপ্পাদেত্থ আলযো’’তি আহ. এত্থাতি দ্ৱীসু.

৩১১. তদহূতি তস্মিং ৱস্সূপনাযিকদিৱসে. জানন্তি ‘‘অজ্জ ৱস্সূপনাযিকা’’তি জানন্তো, অনুপগচ্ছতোতিমস্স ৱিসেসনং.

৩১২. দুতিযন্তি পচ্ছিমিকং. অনুপগতোতি কেনচি অন্তৰাযেন পুৰিমিকং অনুপগতো. তেমাসন্তি পুৰিমং ৱা তেমাসং পচ্ছিমং ৱা তেমাসং. ৱস্সং উপগন্ত্ৱা পন অৰুণং অনুট্ঠাপেত্ৱাপি তদহেৱ সত্তাহকৰণীযেন পক্কমন্তস্সাপি অন্তোসত্তাহে নিৱত্তেন্তস্সাপি অনাপত্তি.

৩১৩-৫. মাতাপিতূনং পঞ্চন্নং সহধম্মিকানঞ্চ অত্থায গিলানতদুপট্ঠাকভত্তং ওসধঞ্চ এসিস্সং ৱা পুচ্ছিস্সামি ৱা উপট্ঠিস্সং ৱা গন্ত্ৱা অহং নাভিৰতং ৱূপকাসেস্সং ৱা কুক্কুচ্চং ৱিনোদনঞ্চ দিট্ঠিং ৱিৱেচনঞ্চ গৰুকাদিকং ৱুট্ঠানং ৱাপি উস্সুক্কং ৱাপি কৰিস্সং ৱাপি কাৰেস্সং ৱাপীতি এৱমাদিনা সত্তাহকিচ্চেন পহিতেপি ৱা অপহিতেপি ৱা গন্তুং লব্ভন্তি যোজনা.

এত্থ পন লব্ভমানকৱসেন যোজেত্ৱা ৱক্খমাননযেন অত্থো ৱেদিতব্বো. মাতাদিসুতিযা তেযেৱ গিলান-সদ্দেন গয্হন্তি, তেসং উপট্ঠাকা তদুপট্ঠাকা, গিলানা চ তদুপট্ঠাকা চ, তেসং ভত্তন্তি সমাসো. ওসধন্তি তেসংযেৱ গিলানানং ভেসজ্জং. এসিস্সন্তি পৰিযেসিস্সামি. পুচ্ছিস্সামীতি তেযেৱ সত্তজনে গিলানে পুচ্ছিস্সং. উপট্ঠিস্সন্তি তেযেৱ গিলানে উপট্ঠহিস্সামি. অভিৰমতীতি অভিৰতো, ৱিসভাগৰূপাদিদস্সনেন সাসনে ন অভিৰতো নাভিৰতো. অভিৰমণং ৱা অভিৰতং, নত্থি অভিৰতমস্সাতি নাভিৰতো, তং. সহধম্মিকেসু যো নাভিৰতো, তং ৱূপকাসেস্সং ৱিক্খেপহৰণত্থং অঞ্ঞত্থ নযিস্সামি. কুক্কুচ্চন্তি পঞ্চন্নংযেৱ উপ্পন্নং ৱিনযকুক্কুচ্চং. কিতকযোগে ৱিকপ্পেন দুতিযা. দিট্ঠিন্তি তেসংযেৱ মিচ্ছাদিট্ঠিযা. গৰুকমাদিকন্তি গৰুকং আদি যস্সাতি ৱিগ্গহো. আদি-সদ্দেন সামণেৰানং ৱস্সপুচ্ছনং, সিক্খাসমাদযিতুকামতা, তজ্জনীযাদিকম্মকৰণং সঙ্গহিতং. ৱুট্ঠানন্তি ভিক্খুনো গৰুকাপত্তিযা পৰিৱাসমানত্তদানাদীহি ৱুট্ঠানং. উস্সুক্কন্তি ৱস্সপুচ্ছনাদিউস্সুক্কং. এৱমাদিনাতি এত্থ আদি-সদ্দেন দিট্ঠিগতাদীনং ধম্মকথাকৰণাদিং সঙ্গণ্হাতি. গন্তুং লব্ভন্তি এত্থ গচ্ছন্তেন অন্তোউপচাৰসীমাযং ঠিতেনেৱ ‘‘অন্তোসত্তাহে আগচ্ছিস্সামী’’তি আভোগং কত্ৱা গন্তব্বং. সচে আভোগং অকত্ৱা উপচাৰসীমং অতিক্কমতি, ছিন্নৱস্সো হোতীতি ৱদন্তি. সত্তাহকিচ্চেনাতি সত্তাহস্স লব্ভমানকং ৱুত্তং ৱক্খমানঞ্চ সঙ্ঘকম্মাদি কিচ্চং সত্তাহকিচ্চং. সত্তমঅৰুণমত্তস্সেৱ ৱিহাৰে উট্ঠাপনীযত্তা সত্তাহস্স সাকল্লেন গহণং.

৩১৬. সঙ্ঘকম্মে ৱজেতি সঙ্ঘস্স কিচ্চে উপোসথাগাৰাদীসু সেনাসনেসু ৱা চেতিযছত্তৱেদিকাদীসু ৱা অন্তমসো পুগ্গলিকসেনাসনেসু ৱাপি কত্তব্বনিমিত্তে ৱজেয্যাতি অত্থো. ধম্মসৱনত্থং নিমন্তিতো ৱাপি ৱজে, গৰূহি পেসিতো ৱাপি ৱজে, গৰূনং পস্সিতুং ৱাপি ৱজেতি যোজেতব্বং. নিমন্তিতোতি এত্থ সচে পঠমংযেৱ কতিকা কতা হোতি, ‘‘অসুকদিৱসং নাম সন্নিপতিতব্ব’’ন্তি নিমন্তিতোযেৱ নাম হোতি. গৰূহীতি আচৰিযুপজ্ঝাযেহি. পহিতোতি ভণ্ডধোৱনাদিঅত্থায পেসিতো. পস্সিতুন্তি অগিলানেপি.

৩১৭. ভণ্ড…পে… দস্সনে ন ৱজেতি যোজনীযং. এত্থাপি নিমিত্তত্থে সত্তমী. ভণ্ডং নাম চীৱৰং. ঞাতী মাতাপিতূহি অঞ্ঞে. উপট্ঠাকা উপাসকা. ‘‘অজ্জেৱ আগমিস্স’’ন্তি অদূৰগো ন পাপুণেয্য, লব্ভন্তি সম্বন্ধো. লব্ভন্তি ইমস্স অপাপুণনং ৱুত্তকম্মং. অজ্জেৱাগমিস্সন্তি সামন্তৱিহাৰং গন্ত্ৱা পুন আগচ্ছন্তস্স অন্তৰামগ্গে সচে অৰুণুগ্গমনং হোতি, ৱস্সচ্ছেদোপি ন হোতি, ৰত্তিচ্ছেদদুক্কটঞ্চ নত্থীতি ৱদন্তি.

৩১৮. সেসঞাতীহীতি মাতাপিতূহি অৱসেসঞাতীহি. নিদ্দিসিত্ৱাৱাতি দানধম্মসৱনাদীনি. ‘‘পহিতে পেসিতে’’তি চেত্থ ‘‘লব্ভ’’ন্তি অনুৱত্তনীযং.

৩১৯. অত্তনো অন্তৰাযে সতীতি চোৰসৰীসপৱাড়জীৱিতব্ৰহ্মচৰিযন্তৰাযে, অন্তমসো ভেসজ্জালাভপতিৰূপউপট্ঠাকালাভেপি. ‘‘ৱস্সচ্ছেদকাৰণম্পি সত্তাহকৰণীযং সিযা’’তি কেচি পোৰাণা ৱদন্তি, তং যুত্তং ৱিয দিস্সতি, সব্বথা ৱস্সচ্ছেদেন বহি ৱাসায অনুঞ্ঞাতকাৰণং সত্তাহমত্তং বহি ৱীতিনামেত্ৱা অন্তোৱিহাৰেযেৱ ৱাসেন ৱস্সচ্ছেদাকাৰণং কথং নাম ন সিযাতি. ছিন্নৱস্সো নো পৱাৰযেতি সম্বন্ধো.

৩২০. ‘‘অসেনাসনিকেনা’’তি ইমিনাৱ ৱিঞ্ঞাযমানত্থত্তেপি ‘‘অজ্ঝোকাসে চা’’তি ৱচনং ‘‘অহং অব্ভোকাসিকো, কিং মে সেনাসনেনা’’তি ৱাসানিৱত্তনত্থং ৱুত্তং. ৰুক্খস্স সুসিৰেতি সুদ্ধে ৰুক্খসুসিৰে. মহন্তস্স পন সুসিৰস্স অন্তো পদৰচ্ছদনকুটিকং কত্ৱা পৱিসনদ্ৱাৰং যোজেত্ৱা উপগন্তুং ৱট্টতি. ‘‘ৱিটপেপি অট্টকং বন্ধিত্ৱা’’তিআদি ৱুত্তনযমেৱ. তথা ছত্তচাটীসুপি তদনুৰূপেন ৱেদিতব্বং. ছৱকুটি নাম টঙ্কিতমঞ্চাদিভেদা কুটি. তত্থ টঙ্কিতমঞ্চো নাম দীঘে মঞ্চপাদে মজ্ঝে ৱিজ্ঝিত্ৱা অটনিযো পৱেসেত্ৱা কতো, চতুন্নং পাসাণানং উপৰি পাসাণং অত্থৰিত্ৱা কতম্পি টঙ্কিতমঞ্চো.

৩২১. অসেনাসনিকেনাতি যস্স তিণপণ্ণইট্ঠকসিলাসুধাসঙ্খাতানং পঞ্চন্নং ছদনানং অঞ্ঞতৰেন ছন্নং যোজিতদ্ৱাৰবন্ধনং সেনাসনং নত্থি, তেন. ইদং পন ৱচীভেদং কত্ৱা অধিট্ঠানং সন্ধায ৱুত্তন্তি ৱদন্তি, তদযুত্তং, তথা চ সতি নাৱাদীসু ৱিয ৱিসুং ৱিধানেন ভৱিতব্বন্তি. নাৱাসত্থৱজূপগোতি ইমিনা অসেনাসনিকেন নাৱাদীসু ৱস্সং উপগন্তুং ৱট্টতীতি দীপেতি. তত্থ চ কুটিকং পৰিযেসিত্ৱা লভন্তেন তত্থ পৱিসিত্ৱা ৱিহাৰাভাৱতো ‘‘ৱিহাৰে’’তি অৱত্ৱা ‘‘ইধ ৱস্সং উপেমী’’তি তিক্খত্তুং ৱত্তব্বং, অলভন্তেন আলযো কাতব্বো. পৱাৰেতুঞ্চাতি চ-সদ্দেন ৱস্সচ্ছেদনিমিত্তায আপত্তিযা অভাৱং সম্পিণ্ডেতি. ‘‘ৱজে সত্থে নাৱাযন্তি তীসু ঠানেসু নত্থি ৱস্সচ্ছেদে আপত্তি, পৱাৰেতুঞ্চ লব্ভতী’’তি (মহাৱ. অট্ঠ. ২০৩) অট্ঠকথাযং ৱুত্তং. ৱস্সচ্ছেদেতি চ ‘‘অনুজানামি, ভিক্খৱে, যেন ৱজো তেন গন্তু’’ন্তি (মহাৱ. ২০৩) ৱুত্তত্তা, সত্থস্স নাৱায চ গমনসভাৱেনেৱ ঠিতত্তা চ ৱস্সূপগতট্ঠানে অৱসিত্ৱা অঞ্ঞত্থ গমনমত্তং সন্ধায ৱুত্তন্তি ৱেদিতব্বং.

ৱস্সূপনাযিকনিদ্দেসৱণ্ণনা নিট্ঠিতা.