৩৭. উগ্গহনিদ্দেসৱণ্ণনা

২৮১. পুগ্গল-সদ্দমত্তে পযুত্তে অত্তনোপি গহণসম্ভৱো সিযাতি ব্যভিচাৰত্থং অঞ্ঞ-সদ্দপ্পযোগো. সতি সম্ভৱে ব্যভিচাৰে ৱিসেসনং সাত্থকং হোতীতি. দসভেদম্পি ৰতনন্তি ‘‘মুত্তা মণি ৱেড়ুৰিযো সঙ্খো সিলা পৱাড়ং ৰজতং জাতৰূপং লোহিতঙ্কো মসাৰগল্ল’’ন্তি (পাচি. ৫০৬) এৱং ৱুত্তং দসভেদম্পি ৰতনং. উগ্গণ্হন্তস্সাতি গণ্হন্তস্স সম্পটিচ্ছন্তস্স.

২৮২-৩. তেসু অত্তত্থং উগ্গণ্হন্তস্স দ্ৱীসু নিস্সগ্গীতি সম্বন্ধো. তেসূতি তেসু দসসু মজ্ঝে. দ্ৱীসূতি ৰজতজাতৰূপসঙ্খাতেসু দ্ৱীসু নিস্সগ্গিযৱত্থূসু. অত্তত্থন্তি ইমিনা নৱকম্মাদীনং পঞ্চন্নং অত্থায দুক্কটন্তি দীপেতি. সেসেসু দুক্কটন্তি অৱসেসেসু অট্ঠসু সব্বেসম্পি অত্থায উগ্গণ্হন্তস্স দুক্কটন্তি অত্থো. গণঞ্চ সঙ্ঘঞ্চ পুগ্গলঞ্চ অনামসিত্ৱা ‘‘চেত্যস্স নৱকম্মস্স দম্মী’’তি ৱুত্তে চ ন পটিক্খিপেতি সম্বন্ধনীযং. ন পটিক্খিপেতি ইমিনা সঙ্ঘাদিং আমসিত্ৱা ৱুত্তে পটিক্খিপনং দীপেতি. পটিক্খিত্তে ‘‘কপ্পিযকাৰকানং ৱা হত্থে ভৱিস্সতি, মম পুৰিসানং ময্হমেৱ ৱা হত্থে ভৱিস্সতি, কেৱলং তুম্হে পচ্চযে পৰিভুঞ্জথা’’তি ৱদতি, ৱট্টতি. চতুপচ্চযত্থায চ দিন্নং যেন যেন অত্থো হোতি, তদত্থং উপনেতব্বং. তেসং চীৱৰত্থায দিন্নং চীৱৰেযেৱ উপনেতব্বং. সচে চীৱৰেন তাদিসো অত্থো নত্থি, পিণ্ডপাতাদীহি সঙ্ঘো কিলমতি, সঙ্ঘসুট্ঠুতায অপলোকেত্ৱা তদত্থাযপি উপনেতব্বং. এস নযো পিণ্ডপাতগিলানপচ্চযত্থায দিন্নেপি. সেনাসনত্থায দিন্নং পন গৰুভণ্ডত্তা তত্থেৱ উপনেতব্বং, সেনাসনেসু নস্সন্তেসু জগ্গনত্থং মূলচ্ছেজ্জং অকত্ৱা অৱিস্সজ্জেত্ৱা যাপনমত্তং পৰিভুঞ্জিতব্বং.

২৮৪. খেত্তাদীনং কেসঞ্চি দুক্কটৱত্থূনং সম্পটিচ্ছনূপাযং দস্সেতুং ‘‘খেত্ত’’ন্তিআদি ৱুত্তং. তত্থ খেত্তন্তি পুব্বণ্ণৱিৰুহনট্ঠানং. ৱত্থুন্তি অপৰণ্ণউচ্ছুফলাদীনং ৱিৰুহনট্ঠানং. দাসপস্ৱাদিকন্তি দাসপসুপুপ্ফাৰামফলাৰামাদিকং. পটিক্খিপিত্ৱা কপ্পিযেন কমেন চ গণ্হেয্যাতি সম্বন্ধো. কপ্পিযেন কমেন চাতি এত্থ কম-সদ্দো ৱোহাৰপ্পটিপাটিৱচনো, তস্মা পৰেসং অত্তনো চ কপ্পিযৱোহাৰক্কমেনেৱাতি অত্থো.

সো চ খেত্তৱত্থূসু তাৱ ‘‘চত্তাৰো পচ্চযে পৰিভুঞ্জথা’’তি ৱা ‘‘কপ্পিযকাৰকানং হত্থে ভৱিস্সতী’’তি ৱা ‘‘সঙ্ঘো কপ্পিযভণ্ডং ভুঞ্জতূ’’তি ৱা ‘‘সীমং দেমা’’তি ৱা পৰেহি ৱুত্তো, ‘‘সাধু, উপাসক মিগপক্খিনো এত্থ নিব্ভযা সুখেন জীৱিস্সন্তী’’তি অত্তনা ৱা তড়াকে যথাৱুত্তেনেৱ ‘‘উদকং পৰিভুঞ্জিস্সন্তি, ভণ্ডকং ধোৱিস্সন্তি, মিগপক্খিনো পিৱিস্সন্তী’’তি পৰেহি ৱা ‘‘সাধু, উপাসক, সঙ্ঘো পানীযং পিৱিস্সতী’’তিআদিনা অত্তনা ৱা দাসে ‘‘আৰামিকং দম্মি, ৱেয্যাৱচ্চকৰং দম্মি, কপ্পিযকাৰকং দম্মী’’তি ৱা পসূসু ‘‘পঞ্চগোৰসপৰিভোগত্থায দম্মী’’তি আৰামে ‘‘ৱনং দম্মী’’তি এৱমাদিনা ৱুত্তো ৱেদিতব্বো. সচে পন কোচি অব্যত্তো অকপ্পিযৱোহাৰেন খেত্তাদিং পটিগ্গণ্হাতি ৱা কাৰেতি ৱা, তং ভিক্খূহি ন পৰিভুঞ্জিতব্বং, তং নিস্সায লদ্ধং কপ্পিযভণ্ডম্পি অকপ্পিযমেৱ. অব্যত্তেন পন লজ্জীভিক্খুনা কাৰাপিতেসু কিঞ্চাপি পটিগ্গহণং কপ্পিযং, ভিক্খুস্স পযোগপচ্চযা উপ্পন্নেন মিস্সত্তা ৱিসগতপিণ্ডপাতো ৱিয, অকপ্পিযমংসভোজনং ৱিয চ দুব্বিনিব্ভোগং হোতি, সব্বেসং অকপ্পিযমেৱ.

২৮৫-৬. নৱ…পে… কিৰিযা চ অনৱে মত্তিকুদ্ধাৰণঞ্চ বন্ধো চ আড়িযা থিৰকাৰো চ অনৱে কেদাৰে অতিৰেকভাগগ্গহণঞ্চ নৱে চ অপৰিচ্ছিন্নভাগে সস্সে ‘‘এত্তকে দেথা’’তি কহাপণুট্ঠাপনঞ্চাতি সব্বেসম্পি অকপ্পিযন্তি সম্বন্ধো. মাতিকা চ কেদাৰো চ তড়াকো চাতি দ্ৱন্দো মাতিক…পে… তড়াকা. তেসং কিৰিযাতি সমাসো. অনৱেতি চতুপচ্চযৱসেন পটিগ্গহিতে পুৰাণতড়াকে. উদকৱসেন পটিগ্গহিতে পন সুদ্ধচিত্তানং ৱট্টতি. বন্ধোতি পাড়িযা বন্ধো. পোৰাণকেদাৰে নিযমিতপকতিভাগত্তা আহ ‘‘অনৱে’’তি. অপৰিচ্ছিন্নভাগেতি ‘‘এত্তকে ভূমিভাগে এত্তকো ভাগো দাতব্বো’’তি এৱং অপৰিচ্ছিন্নভাগে.

২৮৭-৯. ‘‘কস ৱপ্প’’ ইচ্চাদিং অৱত্ৱা চ ‘‘এত্তকায ভূমিযা এত্তকো ভাগো দেয্যো’’তি ভূমিং ৱা পতিট্ঠাপেতি, তস্সেৱেতমকপ্পিযন্তি সম্বন্ধো. চ-সদ্দো অৱধাৰণে. পতিট্ঠাপেতীতি যো ভিক্খু পতিট্ঠাপেতি. তস্সেৱাতি তস্স পতিট্ঠাপকভিক্খুস্সেৱ. এতন্তি পতিট্ঠাপিতভূমিতো লদ্ধধঞ্ঞং ‘‘এত্তকে ভূমিভাগে সস্সং কতং, এত্তকং গণ্হথা’’তি এৱং ৱদন্তে পমাণগণ্হনত্থং দণ্ডৰজ্জুভি মিননে ৱা খলে ঠত্ৱা ৰক্খণে ৱা তং নীহৰাপনে ৱা কোট্ঠাগাৰাদিপটিসামনে ৱা এতং তস্সেৱ অকপ্পিযন্তি সম্বন্ধনীযং. পতিট্ঠাপেতি চাতি সো ভিক্খু পতিট্ঠাপেতি চ. কতন্তি অম্হেহি কতং. ৱদন্তেৱন্তি এৱং কস্সকে ৱদন্তে. পমাণন্তি ভূমিপ্পমাণং. নীহৰাপনেতি খলতো গেহস্স নীহৰাপনে. এতন্তি মিতলদ্ধৰক্খিতাদিকং. তস্সেৱাতি মানকৰক্খকাদিনো এৱ. অপুব্বস্স অনুপ্পাদিতত্তা অঞ্ঞেসং কপ্পতীতি আহ ‘‘তস্সেৱেতমকপ্পিয’’ন্তি.

২৯০. পটিসামনপ্পসঙ্গেনাহ ‘‘পটিসামেয্যা’’তিআদি. পিতুসন্তকম্পি গিহিসন্তকং যং কিঞ্চীতি সম্বন্ধো. পিতুসন্তকন্তি পিতা চ মাতা চ পিতৰো, তেসং সন্তকং. গিহিসন্তকন্তি ইমিনা পঞ্চন্নং সহধম্মিকানং সন্তকং যং কিঞ্চি পৰিক্খাৰং পটিসামেতুং ৱট্টতীতি দীপেতি. যং কিঞ্চীতি কপ্পিযং অকপ্পিযং ৱা অন্তমসো মাতুকণ্ণপিড়ন্ধনতালপণ্ণম্পি. ভণ্ডাগাৰিকসীসেনাতি সীসঙ্গমিৱ পধানং যং কিঞ্চি ‘‘সীস’’ন্তি ইধ উপচাৰৱসেন ৱুচ্চতি, তথা ভণ্ডাগাৰিকসদ্দোপি ভাৱপ্পধানো, ভণ্ডাগাৰিকো ভণ্ডাগাৰিকত্তং সীসং পধানন্তি ৱিসেসনপৰপদে কম্মধাৰযো, তেন, ভণ্ডাগাৰিকত্তস্স পধানকৰণেনাতি অত্থো.

২৯১-২. অৱস্সং পটিসামিযন্তি অৱস্সং সঙ্গোপেতব্বং. ৱুত্তেপীতি মাতাপিতূহি ৱুত্তেপি.

২৯৩-৪. ৱড্ঢকিআদযো ৱা ৰাজৱল্লভা ৱা ‘‘সকং পৰিক্খাৰং ৱা সযনভণ্ডং ৱা পটিসামেত্ৱা দেহী’’তি যদি ৱদন্তি, ছন্দতোপি ভযাপি ন কৰেয্যাতি যোজনা. পৰিক্খাৰন্তি ৱাসিফৰসুআদিউপকৰণভণ্ডং. ছন্দতোপি ভযাপীতি ৱড্ঢকিআদীসু ছন্দেন, ৰাজৱল্লভেসু ভযেন.

২৯৫-৬. পটিসামিতুং ৱট্টতীতি যোজেতব্বং. সঙ্কন্তীতি যাদিসে পদেসে ‘‘ভিক্খূহি ৱা সামণেৰেহি ৱা গহিতং ভৱিস্সতী’’তি সঙ্কং উপ্পাদেন্তি, তাদিসে ৱিহাৰাৱসথস্সন্তোতি যোজনীযং. ৱিহাৰাৱসথস্সাতি ৱিহাৰস্স চ আৱসথস্স চ. ৰতনন্তি দসৱিধং ৰতনং. ৰত্নসম্মতন্তি ৱত্থাদিকং. নিক্খিপেয্যাতি সামিকে দিট্ঠে নিযমেত্ৱা দাতুং ‘‘এত্তকা কহাপণা’’তিআদিনানুৰূপেন মত্তিকলঞ্ছনাদিনিমিত্তেন ৱা সঞ্ঞাণং কত্ৱা নিক্খিপেয্য. গহেত্ৱানাতি তাদিসে অসতি অত্তনাৱ গহেত্ৱা. তাদিসেতি ৰতনে ৱা ৰতনসম্মতে ৱা সতি. সামিকানাগমং ঞত্ৱাতি যদি অত্তনি আসঙ্কন্তি, মগ্গা ওক্কম্ম নিসীদিয পচ্ছা সামিকানং অনাগমনং ৱিঞ্ঞায. পতিৰূপন্তি ৰতনসম্মতে পংসুকূলগ্গহণং ৰতনে নিৰুস্সুক্কগমনন্তি এৱৰূপং ভিক্খূনং অনুৰূপন্তি.

উগ্গহনিদ্দেসৱণ্ণনা নিট্ঠিতা.