৩৬. ভেসজ্জনিদ্দেসৱণ্ণনা

২৭৪-৫. জনস্স ভেসজ্জং কাতুং দাতুং ৱত্তুঞ্চ ন লব্ভতীতি সম্বন্ধিযং. লব্ভতীতি এত্থ ‘‘ভিক্খুনা’’তি কত্তা ‘‘ভেসজ্জ’’ন্তি ৱুত্তকম্মং. ননু চ কাতুন্তি ভাৱসাধনত্তা তস্স অৱুত্তকম্মেনাপি ভৱিতব্বং ভাৱে ৱিহিতকিতকপ্পচ্চযানং পযোগে কম্মকাৰকস্সাপি ইচ্ছিতব্বত্তাতি? সচ্চং, তথাপি পধানভূতকম্মসত্তিযা অভিধানে সতি অপ্পধানকিতককিৰিযাভিসম্বন্ধেন গুণীভূতা কম্মসত্তি অভিহিতা ৱিয ৱিঞ্ঞাযতি. তথা চ ৱুত্তং অম্হেহি যোগৱিনিচ্ছযে ‘‘পধানানুযাযিতায জনৱোহাৰায পধানসত্যাভিধানে গুণসত্তি অভিহিতা ৱিয পকাসতী’’তি. জনস্সাতি আগতাগতজনস্স. সহধম্মীনঞ্চ পিতূনঞ্চ তদুপট্ঠাকভিক্খুনিস্সিতভণ্ডূনঞ্চ ৱেয্যাৱচ্চকৰস্স চ ভিক্খাচৰিযৱিঞ্ঞত্তিসকেহি ভেসজ্জকৰণং লব্ভন্তি সম্বন্ধো. তত্থ সহধম্মিনন্তি সহ চৰিতব্বো ধম্মো সীলসদ্ধাপঞ্ঞাসঙ্খাতো সহধম্মো, সো এতেসমত্থীতি সহধম্মিনো, ভিক্খু ভিক্খুনী সিক্খমানা সামণেৰো সামণেৰীতি পঞ্চ, তেসং. পিতা চ মাতা চ পিতৰো একসেসনযেন, উভিন্নং সামঞ্ঞনিদ্দেসো ৱা, তেসং. ভিক্খুনিস্সিতো নাম যো ৱিহাৰে সব্বকম্মানি কৰোন্তো ভিক্খুং নিস্সায ৱসতি. ভণ্ডু নাম যো পব্বজ্জাপেক্খো যাৱ পত্তচীৱৰং পটিযাদিযতি, তাৱ ৱিহাৰে ৱসতি, সো পণ্ডুপলাসো. ৱেয্যাৱচ্চকৰস্সাতি অত্তনো উপট্ঠাকস্স. এতেসু পন মাতাপিতৰো সচে ৰজ্জেপি ঠিতা পচ্চাসীসন্তি, অকাতুং ন ৱট্টতি. মাতৰং অনামসন্তেন সব্বং পৰিকম্মং কাতব্বং. পিতা পন সহত্থেন নহাপনসম্বাহনাদীনি কত্ৱা উপট্ঠাতব্বো.

২৭৬. পিতা চ মাতা চ ভাতা চ ভগিনী চাতি দ্ৱন্দো পিতা…পে… ভগিনিযো. মহন্তো চ চূড়ো চ, মহাচূড়া চ তে পিতা…পে… ভগিনিযো চাতি কম্মধাৰযো. তা আদি যেসন্তেতি অঞ্ঞপদত্থো. মহাচূড়-সদ্দা পিতাদি-সদ্দেহি পচ্চেকং যোজেতব্বা ‘‘মহাপিতুনো চূড়পিতুনো’’তিআদিনা. আদি-সদ্দেন পনেত্থ পিতুচ্ছা মাতুলো, তেসং দসন্নম্পি যাৱ সত্তমা কুলপৰিৱট্টা পুত্তপৰম্পৰঞ্চ সঙ্গণ্হাতি. তেসং সকে ভেসজ্জকৰণং লব্ভন্তি যোজনা. তেসং মহাপিতাদীনং সন্তকে সতি তেন ভেসজ্জকৰণং লব্ভতীতি অত্থো. নাতি নত্থি চে. অত্তনিযেতি ভিক্খুনো অত্তনো সন্তকে সতীতি অত্থো. দাতব্বং তাৱকালিকন্তি তাৱকালিকং কত্ৱা দাতব্বন্তি অত্থো. তে পন সচে পটিদেন্তি, গহেতব্বং, নো চে দেন্তি, ন চোদেতব্বা. যাৱ তস্স দানং, তাৱ কালো অস্সাতি তাৱকালিকং. ণিকো সমাসন্তে.

২৭৭. ভেসজ্জকৰণাদীতি আদি-সদ্দেন অনামট্ঠপিণ্ডদানাদীনং গহণং, হি-সদ্দো হেতুম্হি, হি যস্মা এতেসু কুলদূসনাদযো ন ৰুহন্তি, তস্মা তেসং ভেসজ্জকৰণং লব্ভং, অত্তনিযে চ সতি দাতব্বন্তি এৱমেত্থ অত্থো দট্ঠব্বো. ন ৰূহতীতি ন ৰোহতি নপ্পৱত্ততি ন হোতি, আপত্তিং ন জনেতীতি অধিপ্পাযো. তেসং অত্থায ঞাতিসামণেৰেহি ৱা ভেসজ্জং আহৰাপেতব্বং, অত্তনো অত্থায ৱা আহৰাপেত্ৱা দাতব্বং. তেহিপি ‘‘উপজ্ঝাযাদীনং আহৰিস্সামা’’তি ৱত্তসীসেন আহৰিতব্বং. সচে অঞ্ঞেপি যে গিলানা হুত্ৱা ৱিহাৰং পৱিসন্তি, তেসং সব্বেসম্পি অপচ্চাসীসন্তেন ভেসজ্জং কাতব্বং. সদ্ধং কুলং হোতি ভিক্খুসঙ্ঘস্স মাতাপিতুট্ঠানীযং, তত্ৰ চে কোচি গিলানো হোতি, তস্সত্থায ‘‘ভন্তে, ইত্থন্নামস্স ৰোগস্স কিং ভেসজ্জং কৰোন্তী’’তি কপ্পিযং কত্ৱা পুচ্ছন্তি, ইদঞ্চিদঞ্চ গহেত্ৱা কৰোন্তীতি ৱট্টতি, ভিক্খূহি অঞ্ঞমঞ্ঞং ৱা কথা কাতব্বা.

২৭৮. ছন্নং মাতাদীনঞ্চ দামৰিকচোৰস্স ইস্সৰিযস্স অনামট্ঠো পিণ্ডপাতো দাতুং অৱাৰিতোতি যোজেতব্বং. ছন্নন্তি মাতাদীনং ছন্নং মজ্ঝে. মাতাদীনন্তি ভিক্খুনিস্সিতং ঠপেত্ৱা অৱসেসানং পঞ্চন্নং মাতাদীনং. ‘‘ছন্ন’’ন্তি পন যোজনায অট্ঠকথায ৱিৰুজ্ঝতি. তত্থ হি ‘‘মাতাপিতূন’’ন্তিআদিনা ভিক্খুনিস্সিতং ওহায সত্তেৱ ৱুত্তা. আচৰিযবুদ্ধদত্তত্থেৰেন চ তথেৱ ৱুত্তং –

‘‘অনামট্ঠোপি দাতব্বো, পিণ্ডপাতো ৱিজানতা;

দ্ৱিন্নং মাতাপিতূনম্পি, তদুপট্ঠাযকস্স চ.

‘‘ইস্সৰস্সাপি দাতব্বো, চোৰদামৰিকস্স চ;

ভণ্ডুকস্সত্তনো চেৱ, ৱেয্যাৱচ্চকৰস্সপী’’তি. (ৱিনয ৱি. ৪৯৩-৪৯৫);

দামৰিকচোৰস্সাতি ৰজ্জং পত্থযমানস্স পাকটচোৰস্স. অনামট্ঠোতি অপব্বজিতস্স হত্থতো লদ্ধা অত্তনা অঞ্ঞেন ৱা পব্বজিতেন অগ্গহিতঅগ্গো, অযং অনামট্ঠপিণ্ডপাতো. পটিসন্থাৰো ‘‘ৱিহাৰপ্পত্তং আগন্তুকং ৱা দলিদ্দাদিং ৱা দিস্ৱা ‘পানীযং পিৱা’তি দাতব্বং, পাদমক্খনতেলং দাতব্বং, কালে আগতস্স যাগুভত্তং, ৱিকালে আগতস্স সচে তণ্ডুলা অত্থি, তণ্ডুলা দাতব্বা, সযনট্ঠানং দাতব্বং, চোৰানং পন সঙ্ঘিকম্পিদাতব্ব’’ন্তি ৱুত্তো. অৱসেসপটিসন্থাৰো পন অপচ্চাসীসন্তেন কাতব্বো. তথা ধম্মপটিসন্থাৰোপি যস্স কস্সচি দাতব্বোৱ.

২৭৯. তেসন্তি অঞ্ঞাতকাদীনং গিহীনং. কযিৰাতি ‘‘ভণথা’’তি ৱুত্তে কৰেয্য. ‘‘ন কৰোমা’’তি ৱুত্তে সচে ৱিপ্পটিসাৰিনো ভৱিস্সন্তি, কাতব্বং. নত্তনোতি অত্তনো সুত্তোদকেহি ন কযিৰাতি যোজনীযং. এৱং সামঞ্ঞেন পৰিত্তে পটিপজ্জনৱিধিং দস্সেত্ৱা ইদানি আটানাটিযপৰিত্তে পটিপজ্জিতব্বৱিধিং দস্সেতুং ‘‘ভণিতব্ব’’ন্তিআদিমাহ. ভণাপেন্তেতি ‘‘ভণথা’’তি অজ্ঝেসনপুব্বকং পযোজেন্তে. পৰিত্তং সাসনোগধন্তি পঠমমেৱ আটানাটিযসুত্তং অভণিত্ৱা সাসনপৰিযাপন্নং মেত্তসুত্তং ধজগ্গসুত্তং ৰতনসুত্তন্তি ইমানি সুত্তানি সত্তাহং ভণিত্ৱা যথাপৰিকম্মং পৰিত্তং আটানাটিযপৰিত্তং ভণিতব্বন্তি যোজনা.

২৮০. ‘‘আগন্ত্ৱা সীলং দেতু, ধম্মং পৰিত্তঞ্চ ভাসতূ’’তি কেনচি পেসিতো গন্ত্ৱা সীলং ৱা দাতুং ধম্মং পৰিত্তং ৱা ৱত্তুং লব্ভতীতি সম্বন্ধো.

ভেসজ্জনিদ্দেসৱণ্ণনা নিট্ঠিতা.