৩৫. পৰিক্খাৰনিদ্দেসৱণ্ণনা

২৫৯-৬০. ছত্তে অন্তো বহি চ পঞ্চৱণ্ণেহি সুত্তেহি সিব্বিতুঞ্চ পণ্ণে গিৰিকূটঅড্ঢচন্দাদিং ছিন্দিতুঞ্চ ন ৱট্টতীতি সম্বন্ধো. ছত্তেতি তালপণ্ণে ছত্তে. গিৰিকূটং নাম মকৰদন্তকং, আদি-সদ্দেন তাদিসং অঞ্ঞং ৱিকাৰৰূপং সঙ্গহিতং. ঘটকন্তি গেহত্থম্ভেসু ৱিয কযিৰমানং ঘটকং. দণ্ডেতি ছত্তদণ্ডে. লেখাতি তহিং তহিং দিন্না লেখা. সাদিসন্তি দীঘেন নিদ্দিট্ঠং. বুন্দম্হি মূলে.

২৬১. থিৰত্থং ছত্তে একৱণ্ণেন সিব্বিতুং ৱা পঞ্জৰং ৱিনন্ধিতুং ৱা ৱট্টতীতি সম্বন্ধো. সিব্বিতুন্তি অন্তো বহি চ সিব্বিতুং. একৱণ্ণেনাতি নীলাদিনা একৱণ্ণেন. পঞ্জৰন্তি ছত্তদণ্ডগাহকসলাকপঞ্জৰং. থিৰত্থন্তি ইমিনা ন ৱণ্ণমট্ঠত্থাযাতি দস্সেতি. বন্ধিতুং দণ্ডে লেখা ৱট্টতীতি সম্বন্ধো. বন্ধিতুন্তি ৱাতপ্পহাৰেন অচলনত্থং ছত্তমণ্ডলিকং ৰজ্জুকেহি গহেত্ৱা বন্ধনত্থায. লেখাৱাতি ৱলযমিৱ উক্কিৰিত্ৱা কতা লেখা এৱ. ৱট্টতীতি যদিপি ন বন্ধতি, ৰজ্জুকেহি বন্ধিতুং যুত্তট্ঠানত্তা ৱট্টতি.

২৬২. চীৱৰে অন্তে ৱাপি পট্টমুখে ৱাপি ৱেণিপি ৱা সঙ্খলিকাপি ৱা অঞ্ঞং সূচিৱিকাৰং ৱা পাড়িকণ্ণিকআদিকং কপ্পবিন্দুৱিকাৰম্পি ৱা ন চ কপ্পতীতি সম্বন্ধো. অন্তেতি চীৱৰপৰিযন্তে, অনুৱাতেতি ৱুত্তং হোতি. পট্টমুখেতি পট্টকোটিযং, দ্ৱিন্নং পট্টানং সঙ্ঘটিতট্ঠানং সন্ধাযেতং ৱুত্তং. ৱেণীতি ৱৰকসীসাকাৰেন সিব্বনং. সঙ্খলিকাতি বিড়ালবন্ধনাকাৰেন সিব্বনং. অঞ্ঞং সূচিৱিকাৰং ৱাতি চীৱৰমণ্ডনত্থায কযিৰমানং অঞ্ঞং যং কিঞ্চি সূচিকম্মৱিকাৰং ৱা. টীকাযং পন ‘‘সতপদিসদিসং অঞ্ঞং ৱা সূচিৱিকাৰং ন কপ্পতী’’তি সামঞ্ঞেন ৱুত্তং. ‘‘চীৱৰমণ্ডনত্থায নানাসুত্তকেহি সতপদিসদিসং সিব্বন্তা আগন্তুকপট্টং ঠপেন্তি, অঞ্ঞম্পি যং কিঞ্চি সূচিকম্মৱিকাৰং কৰোন্তি, সব্বং ন ৱট্টতী’’তি অট্ঠকথাযং ৱুত্তত্তা পন নানাৱণ্ণেহি ৱা হোতু, একৱণ্ণেন ৱা হোতু, চীৱৰমণ্ডনত্থায সংসিব্বন্তানং সূচিকম্মৱিকাৰং সন্ধায ৱুত্তন্তি চীৱৰেসু ফালিতট্ঠানস্স থিৰভাৱত্থং সতপদিসদিসম্পি সিব্বিতুং ৱট্টতীতি অম্হাকং খন্তি. পাড়ি-সদ্দেন, কণ্ণিক-সদ্দেন চ কপ্প-সদ্দলোপেন ৱা উপচাৰেন ৱা পাড়িকপ্পাদযোৱ গহিতা. পাড়ি চ কণ্ণিকা চ পাড়িকণ্ণিকাযো, তা আদি যস্স অঞ্ঞস্স তাদিসস্সাতি ৱিগ্গহো. তত্থ নীলাৱড়িআদিসণ্ঠানায বিন্দুপন্তিযা যথা সোভতি, তথা কযিৰমানো পাড়িকপ্পো. তথেৱ বিন্দুসমূহে কত্থচি দস্সেত্ৱা কযিৰমানো কণ্ণিককপ্পো.

২৬৩. গণ্ঠিপাসকপট্টাতি গণ্ঠিনো চ পাসকস্স চ পতিট্ঠানট্ঠানে ঠপেতব্বা পট্টা. ৱট্টতীতি এত্থ ‘‘গণ্ঠিপাসকা’’তি কত্ৱা ‘‘চতুকোণাৱ ৱট্টন্তী’’তি অত্থতো ৱচনং ৱিপল্লাসেত্ৱা যোজেতব্বং. অগ্ঘিযন্তি চেতিযসণ্ঠানেন সিব্বনং. মূলে চ অগ্গে চ একসদিসং কত্ৱা মুগ্গৰাকাৰেন সিব্বনং মুগ্গৰো. ৱিকাৰন্তি ৱিকাৰো, লিঙ্গৱিপল্লাসেন ৱুত্তং. এত্থাতি গণ্ঠিপাসকপট্টেসু.

২৬৪. কোণসুত্তাতি নপুংসকনিদ্দেসো, গণ্ঠিপাসকপট্টানং কোণেহি নীহটসুত্তকোটিযো. পীড়কাতি তানিযেৱ নিৱত্তেত্ৱা পীড়কাকাৰেন কতানি. দুৱিঞ্ঞেয্যাৱাতি তেসং অন্তেসু একৱাৰং গণ্ঠিকৰণেন ৱা পুন নিৱত্তেত্ৱা সিব্বনেন ৱা দুৱিঞ্ঞেয্যা এৱ. গন্ধং তেলং ৱাতি গন্ধং ৱা তেলং ৱা. কঞ্চিকপিট্ঠখলিকআদীনিপি ৱট্টন্তি.

২৬৫. মণিনাতি মসাৰগল্লাদিপাসাণেন. ন চ ঘট্টেয্যাতি নেৱ ঘট্টেয্য. অঞ্ঞেন ৱাতি মুগ্গৰমুসলাদিনা. অংসবদ্ধককাযবন্ধনানি পন তথা কাতুং ৱট্টতি. দোণিযং কত্ৱা ন চ ঘংসেয্যাতি পক্কৰজনাকিৰণদোণিযং ঠপেত্ৱা ভূমিযং জণ্ণুকানি নিহন্ত্ৱা ইতো চিতো চ আৱিজ্ঝিত্ৱা নেৱ ঘংসেয্যাতি অত্থো.

২৬৬-৭. কণ্ণকোণকসুত্তানীতি চীৱৰৰজনকালে লগ্গনত্থায অনুৱাতে চতূসু কোণেসু চ পাসকং কত্ৱা বন্ধিতানি সুত্তানি, যানি ‘‘অনুজানামি, ভিক্খৱে, কণ্ণসুত্তক’’ন্তি (মহাৱ. ৩৪৪) এৱং অনুঞ্ঞাতানি. কণ্ণসঙ্খাতা কোণা কণ্ণকোণকা, তেসু সুত্তানি. গণ্ঠিকপাসকপট্টেসু পন কণ্ণকোণকসুত্তানং দুৱিঞ্ঞেয্যানমেৱ কপ্পিযতা হেট্ঠা ৱুত্তাতি চীৱৰে ৰত্তেযেৱ তেসং ছিন্দিতব্বতা নত্থি, কণ্ণকোণকসুত্তানং ছিন্দিতব্বতায ৱুত্তত্তা অনুৱাতেহি নিক্খমিতসুত্তানিপি ছিন্দিতব্বানীতি ৱেদিতব্বং. ধম্মকৰণে ছত্তৱট্টিযং লেখং ঠপেত্ৱা লেখা ন ৱট্টতীতি যোজনা. ছত্তৱট্টিযন্তি ছত্তস্স মুখৱট্টিযং. লেখাতি উপৰি ৱা হেট্ঠা ৱা কুচ্ছিযং ৱা অঞ্ঞা লেখা. কুঞ্চিকায চ পিপ্ফলে চ মণিকা চ পীড়কা চ ন ৱট্টন্তীতি সম্বন্ধো. মণিকাতি একা ৱট্টমণি. পীড়কাতি সাসপমত্তিকা মুত্তৰাজিসদিসা বহুৱট্টলেখা. দণ্ডম্হীতি পিপ্ফলদণ্ডকে.

২৬৮-৯. অৰণিযং মালাদি চ পত্তমণ্ডলে ভিত্তিকম্মঞ্চ ন ৱট্টতীতি সম্বন্ধিতব্বং. অৰণিযন্তি উত্তৰাৰণি অধৰাৰণি অৰণিধনুকঞ্চ সামঞ্ঞেন গহিতং. পত্তমণ্ডলেতি তিপুসীসাদিমযে পত্তমণ্ডলে. এত্থ পন মকৰদণ্ডকং ৱট্টতি. হেট্ঠাতি কত্তৰযট্ঠিযা হেট্ঠা. উদ্ধন্তি তস্সাযেৱ উপৰি.

২৭০-৩. সম্মুঞ্জনিম্হীতি সম্মুঞ্জনিযা লিঙ্গৱিপল্লাসো. অৱাৰিতন্তি ইত্থিৰূপং পন ৱাৰিতং. সোৱণ্ণমযম্পীতি সুৱণ্ণমযম্পি. ৱিসাণনাড়ি নাম ৱিসাণমযা নাড়ি. এত্থ পন অৱুত্তানিপি যানি কানিচি আৰকণ্ডকদন্তকট্ঠছেদনপানীযঘটপানীযউড়ুঙ্কচুণ্ণভাজনাদীনি ৱুত্তানং অনুলোমানীতি ৱেদিতব্বানি. যো পনেত্থ ৱিনযঞ্ঞূ তাদিসং পৰিক্খাৰং দিস্ৱা ছিন্দেয্য ৱা ছিন্দাপেয্য ৱা, অনুপৱজ্জো সোতি ৱেদিতব্বন্তি.

পৰিক্খাৰনিদ্দেসৱণ্ণনা নিট্ঠিতা.