৩১. ৱিকপ্পনানিদ্দেসৱণ্ণনা

২২১. সম্মুখা পৰম্মুখাতি সস্স মুখং, পৰস্স মুখন্তি ৱিগ্গহো, সম্মুখেন পৰম্মুখেনাতি অত্থো. সম্মুখাৱিকপ্পনা পৰম্মুখাৱিকপ্পনাতি ভেদা দুৱে ৱিকপ্পনা ৱুত্তাতি যোজনা. ভেদাতি ৱিসেসতো. অথ ৱা সস্স মুখং মুখসম্বন্ধিৱচনং অস্সা ৱিকপ্পনাযাতি সমাসো. তথা পৰম্মুখা. সম্মুখা চ পৰম্মুখা চ, তস্সা ভেদো, ততো. সম্মুখায সম্মুখৱিকপ্পনায. ব্যত্তস্সাতি ৱিকপ্পনৱিধানং পচ্চুদ্ধাৰৱিধানঞ্চ জানন্তস্স.

২২২. তেনাতি যস্স সন্তিকে ৱিকপ্পেতি, তেন ভিক্খুনা. পৰিভোগাদিকন্তি পৰিভোগং ৱিস্সজ্জনং অধিট্ঠানঞ্চ.

২২৪-৫. অপৰা সম্মুখাৱেকাতি এত্থ ৱা-সদ্দো পক্খন্তৰে, অথ ৱাতি অত্থো, অপি-সদ্দত্থো ৱা ৱা-সদ্দো, সো অপৰা-সদ্দতো পৰং দট্ঠব্বো, অপৰাপি একা সম্মুখাৱিকপ্পনা অত্থীতি অত্থো. কথন্তি আহ ‘‘ভিক্খুস্সা’’তিআদি. ‘‘পঞ্চন্নং সহধম্মীন’’ন্তি ৱুত্তত্তা ‘‘তিস্সস্স ভিক্খুনো’’তিআদীসু তিস্সায ভিক্খুনিযা তিস্সায সিক্খমানায তিস্সায সামণেৰিযা তিস্সস্স সামণেৰস্সাতিপি ৱিঞ্ঞাতব্বং.

২২৬. পৰম্মুখাৱিকপ্পনাতি পৰম্মুখেন ৱিকপ্পনেন, পৰম্মুখাৱিকপ্পনাতি ৱা গহেতব্বং, পৰম্মুখাৱিকপ্পনা কথন্তি অত্থো.

২২৭. মিত্তোতি দড়্হমিত্তো. সন্দিট্ঠোতি দিট্ঠমত্তমিত্তো. এত্থ পন দ্ৱিন্নং ৱিকপ্পনানং কিং নানাকৰণন্তি? সম্মুখাৱিকপ্পনায তাৱ সযং ৱিকপ্পেত্ৱা পৰেন পচ্চুদ্ধৰাপেতি, তেনেৱ সা সম্মুখাৱিকপ্পনা নাম জাতা. পৰম্মুখাৱিকপ্পনায পৰেনেৱ ৱিকপ্পাপেত্ৱা পৰেনেৱ পচ্চুদ্ধৰাপেতি, তেনেৱ সা পৰম্মুখাৱিকপ্পনা নাম জাতাতি ইদমেত্থ নানাকৰণন্তি.

২২৮. দূৰসন্তিকত্তেকত্তন্তি এত্থ আসন্নদূৰভাৱো অধিট্ঠানে ৱুত্তনযেনেৱ ৱেদিতব্বো.

২২৯. দসাহং…পে… পচ্চাসায সতি মাসকং নাধিট্ঠিতৱিকপ্পিতং নিস্সগ্গিং নুপ্পাদযতীতি সম্বন্ধো. দস অহানি সমাহটানি দসাহং. সব্বত্থ অচ্চন্তসংযোগে দুতিযা. তত্থ যং দিৱসং চীৱৰং উপ্পন্নং, তস্স যো অৰুণো, সো উপ্পন্নদিৱসনিস্সিতো, তস্মা চীৱৰুপ্পাদদিৱসেন সদ্ধিং একাদসে অৰুণুগ্গমনে নিস্সগ্গিযং হোতীতি আহ ‘‘দসাহ’’ন্তি. মাসমেকং ৱাতি ‘‘অনত্থতে কথিনে একং পচ্ছিমকত্তিকমাস’’ন্তি (পাৰা. ৬৪৯ অত্থতো সমানং) ৱুত্তত্তা কথিনত্থতে পঞ্চ মাসেতি লব্ভতি. কথিনং অত্থতং যস্মিং ৱিহাৰেতি সমাসো. পাৰিপূৰত্থন্তি পাৰিপূৰি অত্থো যস্সাতি ৱিগ্গহো. কিৰিযাৱিসেসনং, পাৰিপূৰিপ্পযোজনং কত্ৱাতি অত্থো. ঊনস্সাতি যত্তকেন কযিৰমানং অধিট্ঠানং চীৱৰং পহোতি, তত্তকতাভাৱতো ঊনস্স একাদসমাসসত্তমাসসঙ্খাতে পিট্ঠিসমযে উপ্পন্নস্স মূলচীৱৰস্স. পচ্চাসা সতীতি ‘‘সঙ্ঘাদিতো যতো কুতোচি লচ্ছামী’’তি এৱং সতিযা পচ্চাসাযাতি অত্থো. উভযম্পি য-কাৰলোপেন নিদ্দিট্ঠং. সতীতি ৱা নিপাতো, লিঙ্গৱিপল্লাসেন ৱাহ. এত্থ পন ব্যতিৰেকৱসেন দসাহাতিক্কমনাদীসু নিস্সগ্গিযং পাচিত্তিযং ৱেদিতব্বন্তি.

ৱিকপ্পনানিদ্দেসৱণ্ণনা নিট্ঠিতা.