৩০. ৱত্তনিদ্দেসৱণ্ণনা

২১৩. সউপাহনো…পে… চীৱৰং সীসে কৰিত্ৱা ৱা আগন্তুকো আৰামং ন পৱিসেতি সম্বন্ধো. সছত্তোতি সীসে কতছত্তেন সছত্তো. ওগুণ্ঠিতোতি সসীসং পাৰুপিতো. ‘‘পৰিক্খিত্তস্স ৱিহাৰস্স পৰিক্খেপো, অপৰিক্খিত্তস্স পৰিক্খেপাৰহট্ঠান’’ন্তি ৱুত্তং উপচাৰসীমাসমীপং পত্ৱা উপাহনাওমুঞ্চনাদিসব্বং কত্ৱা আৰামো পৱিসিতব্বোতি অযমেত্থ ব্যতিৰেকলদ্ধো অত্থো.

২১৪. পানীযেন পাদে ন ধোৱেয্যাতি সম্বন্ধো. পটিক্কমনং পত্ৱা একমন্তে পত্তচীৱৰং নিক্খিপিত্ৱা পতিৰূপে নিসজ্জ পুচ্ছিত্ৱা পানীযং পাতব্বং, পৰিভোজনীযেন যথাৱুত্তং পাদা ধোৱিতব্বাতি অধিপ্পাযো. ৱুড্ঢতৰে আৱাসিকেপি চ অভিৱাদেয্যাতি ইমিনা ৱস্সং পুচ্ছিত্ৱা নৱকেন আৱাসিকেন অভিৱাদাপেতব্বন্তি দীপেতি. পুচ্ছেয্য সযনাসনন্তি ‘‘কতমং সেনাসনং পাপুণাতি, অজ্ঝাৱুত্থং অনজ্ঝাৱুত্থং ৱা’’তি সেনাসনং পুচ্ছেয্য. ইদঞ্চ পুচ্ছায লক্খণৱচনং. তস্মা আৱাসিকৱত্তে ৱুত্তমজ্ঝাৱুত্থাদিকঞ্চ পুচ্ছিতব্বং. সচে ‘‘অনজ্ঝাৱুত্থ’’ন্তি ৱদন্তি, কৱাটং আকোটেত্ৱা মুহুত্তং আগমেত্ৱা ঘটিকং উগ্ঘাটেত্ৱা কৱাটং পণামেত্ৱা বহি ঠিতেন উল্লোকেত্ৱা পৱিসিত্ৱা সব্বং সেনাসনৱত্তং কাতব্বং. আগন্তুকৱত্তং.

২১৫-৬. গমিকো পক্কমেয্যাতি সম্বন্ধো. ‘‘পটিসামেত্ৱা’’তিআদীনিমস্স পুব্বকিৰিযাপদানি. দাৰুমত্তিকভণ্ডকন্তি এত্থ মঞ্চপীঠাদিদাৰুভণ্ডং ৰজনভাজনাদিমত্তিকাভণ্ডং. পটিসামেত্ৱাতি অত্থি চে অনোৱস্সকে সণ্ঠপেত্ৱা. থকেত্ৱানাতি দ্ৱাৰৱাতপানেহি পিধায. সাধুকং সঙ্গোপেত্ৱানাতি চতূসু পাসাণেসু মঞ্চং পঞ্ঞপেত্ৱা মঞ্চে মঞ্চস্স, পীঠে পীঠস্স আৰোপনেন সেনাসনস্স উপৰূপৰি পুঞ্জকৰণেন সাধুকং সঙ্গোপনং কত্ৱা. ন চাতি নেৱ. গমিকৱত্তং.

২১৭-৮. আৱাসিকোতি ইদং ‘‘পঞ্ঞপেয্যা’’তিআদীনং কত্তুপদং. নৱকম্মকৰণাদিভাৰনিত্থৰণতায আৱাসো ৱিহাৰো অস্স অত্থীতি আৱাসিকো. যস্স পন কেৱলং ৱিহাৰে নিৱাসনমত্তং অত্থি, সো নেৱাসিকো. উভোপি তে ইধ আৱাসিক-সদ্দেন সঙ্গহিতা. পাদোদপ্পভুতিন্তি এত্থ পভুতি-সদ্দেন পাদপীঠপাদকথলিকানং গহণং. পচ্চুগ্গন্ত্ৱান পত্তচীৱৰং গণ্হেয্যাতি যোজনা. পঞ্ঞপে সযনাসনন্তি ‘‘এতং তুম্হাকং সেনাসনং পাপুণাতী’’তি এৱং সযনাসনং পঞ্ঞপেয্য, পকাসেয্যাতি ৱুত্তং হোতি.

২১৯. অজ্ঝাৱুত্থন্তি পুব্বে ভিক্খূহি নিৱুত্থং. গোচৰাগোচৰং ৱদেতি ‘‘ভিক্খাচাৰগামো দূৰো, আসন্নো’’তি ৱা, ‘‘কালস্সেৱ পিণ্ডায চৰিতব্বং, দিৱা ৱা’’তি এৱং গোচৰঞ্চ, ‘‘মিচ্ছাদিট্ঠিকানং ৱা গামো, পৰিচ্ছিন্নভিক্খো ৱা’’তিআদিনা অগোচৰঞ্চ ৱদেয্যাতি অত্থো. ৱচ্চপস্সাৱট্ঠানানীতিআদীনিপি ‘‘ৱদে’’তি ইমস্সেৱ কম্মৱচনানি. সেখসম্মুতিন্তি যস্স সদ্ধস্স কুলস্স সঙ্ঘো সেখসম্মুতিং দেতি, তং কুলঞ্চ.

২২০. পৱেসনিক্খমে কালন্তি ‘‘কেসুচি ঠানেসু ৱাড়মিগা ৱা অমনুস্সা ৱা হোন্তি, ইমং কালং পৱিসিতব্বং নিক্খমিতব্বঞ্চা’’তি এৱং পৱেসনিক্খমে চ কালং. এতং পন আসনপঞ্ঞপনাদিকং সব্বং ৱত্তং ৱুড্ঢতৰে আগতে চীৱৰকম্মাদিং ৱা নাতিগিলানস্স ভেসজ্জং ৱা ঠপেত্ৱাপি কাতব্বং. মহাগিলানস্স পন ভেসজ্জমেৱ কাতব্বং. চেতিযঙ্গণৱত্তং কৰোন্তেনাপি তস্স ৱত্তং কাতুং আৰভিতব্বং. পণ্ডিতো হি আগন্তুকো ‘‘কৰোহি তাৱ ভেসজ্জং, চেতিযঙ্গণং সম্মজ্জাহী’’তি চ ৱদেয্য. অপিচ বীজনেন বীজিতব্বো, পাদাপিস্স ধোৱিতব্বা, তেলেন মক্খিতব্বা. পিট্ঠি চে আগিলাযতি, সম্বাধেতব্বা. নৱকস্স পন আগন্তুকস্স ‘‘ইদমাসনং, এত্থ নিসীদা’’তিআদিনা আচিক্খিতব্বন্তি দস্সেন্তো ‘‘নিসিন্নোযেৱা’’তিআদিমাহ. নিসিন্নোযেৱাতি ইমিনা ‘‘ঠিতোযেৱা’’তিআদিং উপলক্খেতি. সমুদ্দিসেতি আদৰেন ৱদেয্য. আৱাসিকৱত্তং.

‘‘ৱত্ত’’ন্তি পন সামঞ্ঞেন নিদ্দিট্ঠত্তা ন থেৰে ভিক্খূ অতিঅল্লীযিত্ৱা নিসীদিতব্বং, মহাথেৰস্স নিসিন্নাসনতো একং দ্ৱে আসনানি ঠপেত্ৱা ‘‘নিসীদা’’তি ৱুত্তে নিসীদিতব্বং, ন নৱাপি ভিক্খূ আসনেন পটিবাহিতব্বা, ন সঙ্ঘাটিং ওত্থৰিত্ৱা নিসীদিতব্বং, সদ্দং অকত্ৱা উদককিচ্চং কাতব্বং, যথা সূপস্স ওকাসো হোতি, এৱমত্তায ওদনো গণ্হিতব্বো, থেৰেন ভিক্খুনা ‘‘ঠপেত্ৱা অপ্পকং ওদনাদিকং সব্বং সব্বেসং সমকং সম্পাদেহী’’তি ৱত্তব্বং, ন তাৱ থেৰেন ভুঞ্জিতব্বং, ভুত্তাৱিনা ন তাৱ উদকং পটিগ্গহেতব্বং, ভত্তগ্গতো নিৱত্তন্তেহি যথানুৰূপং নিক্খমিত্ৱা ৱিৰড়ায পাড়িযা গন্তব্বন্তি এৱমাদিকঞ্চ তদনুৰূপং সেখিযৱত্তঞ্চ সম্পাদেতব্বন্তি ইদং ভত্তগ্গৱত্তঞ্চ সাধুকং অতৰমানেন গামো পৱিসিতব্বো, ‘‘ইমিনা পৱিসিস্সামি, ইমিনা নিক্খমিস্সামী’’তি নিৱেসনং পৱিসন্তেন সল্লক্খেতব্বং, নাতিসহসা পৱিসিতব্বং, নাতিসহসা নিক্খমিতব্বং, নাতিদূৰে নচ্চাসন্নে ঠাতব্বং, নাতিচিৰং ঠাতব্বং, নাতিলহুকং নিৱত্তিতব্বং, দাতুকামতাকাৰং ঞত্ৱা ঠাতব্বং, যো পঠমং গামতো পটিক্কমতি, তেন আসনপঞ্ঞপনাদি সব্বং কাতব্বং, যো পচ্ছা, তেন আসনুদ্ধৰণাদি সব্বং কাতব্বন্তি এৱমাদিকঞ্চ তদনুৰূপং সেখিযৱত্তঞ্চ সম্পাদেতব্বন্তি ইদং পিণ্ডচাৰিকৱত্তঞ্চ কাতব্বং.

সেনাসনট্ঠানে সব্বং ৱত্তঞ্চ সম্পাদেত্ৱা ততো নিক্খমিত্ৱা সাধুকং নিৱাসেত্ৱা পাৰুপিত্ৱা চ অতৰমানেন গামো পৱিসিতব্বোতিআদি সব্বং পিণ্ডচাৰিকৱত্তং কাতব্বং. পানীযপৰিভোজনীযঅগ্গিঅৰণিসহিতকত্তৰদণ্ডা উপট্ঠপেতব্বা, নক্খত্তপদানি সকলানি ৱা একদেসানি ৱা উগ্গহেতব্বানি, দিসাকুসলেন ভৱিতব্বন্তি ইদং আৰঞ্ঞিকৱত্তঞ্চ উদ্দিট্ঠংযেৱ হোতীতি অৱগন্তব্বন্তি.

ৱত্তনিদ্দেসৱণ্ণনা নিট্ঠিতা.