২৯. মিচ্ছাজীৱৱিৱজ্জনানিদ্দেসৱণ্ণনা

২০৯. আগম্ম জীৱন্তি এতেনাতি আজীৱো, কো সো? পচ্চযপৰিযেসনৱাযামো. মিচ্ছায আজীৱো, তস্স ৱিৱজ্জনা মিচ্ছাজীৱৱিৱজ্জনা. সা পনাযং অত্থতো ‘‘ইধ ভিক্খু পাতিমোক্খসংৱৰসংৱুতো ৱিহৰতি আচাৰগোচৰসম্পন্নো’’তি (ৱিভ. ৫০৮) এৱং পাতিমোক্খসংৱৰসম্পত্তিযা পটিপত্তিদস্সনৱসেন আগতো আচাৰো চেৱ যথাক্কমেন পাৰাজিকসঙ্ঘাদিসেসথুল্লচ্চযপাচিত্তিযপাটিদেসনীযদুব্ভাসিতদুক্কটানং কাৰণভূতস্স আজীৱহেতুপঞ্ঞত্তানং অভূতাৰোচনসঞ্চৰিত্তঅঞ্ঞাপদেসভূতাৰোচনপণীতভোজনৱিঞ্ঞত্তি ভিক্খুনিভোজনৱিঞ্ঞত্তিসূপোদনৱিঞ্ঞত্তিসিক্খাপদানং ৱীতিক্কমস্স চ কুহনলপননেমিত্তিকতা নিপ্পেসিকতা লাভেন লাভং নিজিগীসনতাতি এৱমাদীনঞ্চ পাপধম্মানং ৱসেন পৱত্তং মিচ্ছাজীৱৱিৰতিসঙ্খাতং আজীৱপাৰিসুদ্ধিসীলঞ্চ. তস্সা পন কস্সচি ইধ দস্সনং যথা দস্সেতুমাৰদ্ধং পাতিমোক্খসংৱৰসঙ্খাতায অধিসীলসিক্খায, চতুৰাৰক্খৱিপস্সনাৱসেন আগতানং অধিচিত্তঅধিপঞ্ঞাসঙ্খাতানং দ্ৱিন্নং সিক্খানঞ্চ উপকাৰকধম্মপৰিদীপনত্থন্তি দট্ঠব্বং, এৱমীদিসং ৱিঞ্ঞেয্যং, তং দস্সেতি ‘‘দাৰু’’ন্তিআদিনা. তত্থ ‘‘দাৰু’’ন্তিআদীনি ‘‘দদে’’তি এতস্স পত্তিকম্মং. চুণ্ণং সিৰীসচুণ্ণাদিনহানিযচুণ্ণং. ন্হানমুখোদকন্তি ন্হানঞ্চ মুখঞ্চ, তস্স উদকন্তি সমাসো. আদি-সদ্দেন পণ্ণাদিং সঙ্গণ্হাতি. কুলসঙ্গহাতি কুলসঙ্গহকৰণেন.

২১০. পৰিভটতি পৰেসং দাৰকে পৰিহৰতীতি পৰিভটো, পৰিভটস্স কম্মং পাৰিভটকো, সকত্থে তমেৱ পাৰিভটকতা. অলঙ্কৰণাদিনা কুলদাৰকপৰিহৰণস্সেতং নামং. মুগ্গস্স সূপো মুগ্গসূপো, সোযেৱ মুগ্গসুপ্পো. যথা মুগ্গসূপে পচ্চমানে কোচিদেৱ মুগ্গো ন পচ্চতি, অৱসেসা পচ্চন্তি, এৱং যস্স পুগ্গলস্স ৱচনে কিঞ্চিদেৱ সচ্চং হোতি, সেসং অলিকং, অযং পুগ্গলো মুগ্গসূপসদিসতায উপচাৰেন ‘‘মুগ্গসুপ্পো’’তি ৱুচ্চতি, তস্স ভাৱো মুগ্গসুপ্পতা. সচ্চালিকেন জীৱিতকপ্পনস্সেতং অধিৱচনং. ঘৰৱত্থুআদিসম্বন্ধিনী ৱিজ্জা ৱত্থুৱিজ্জা. পাৰিভটকতা চাতিআদিনা দ্ৱন্দো নপুংসকত্তাভাৱে পাৰি…পে… ৱিজ্জা, তায. ৰস্সো পন গাথাবন্ধৱসেন, তথা দীঘো. পহিণানং তস্মিং তস্মিং কম্মে তেসং তেসং নিযুঞ্জনং পহেণং. আদৰেন দূতেন কাৰেতব্বং যং কিঞ্চি কম্মং দূতকম্মং. পিসনং পেসনং, জঙ্ঘায পাদেন পেসনং জঙ্ঘপেসনং, তমস্স অত্থীতি জঙ্ঘপেসনিযং. তেসং তেসং গিহীনং গামন্তৰদেসন্তৰাদীসু সাসনপটিসাসনহৰণস্সেতমধিৱচনং.

২১১. লাভাসায লঞ্জদানং অনুপ্পদানং. সম্বুদ্ধপ্পটিকুট্ঠেন বুদ্ধগৰহিতেন অঙ্গৱিজ্জানক্খত্তৱিজ্জাসুপিনৱিজ্জাভূতৱিজ্জাদিনা অঞ্ঞেন ৱা.

২১২. অঞ্ঞাতকানং অপ্পৱাৰিতানং ৱিঞ্ঞাপনং ৱিঞ্ঞত্তি, যাচনৱসেন পৱত্তো কাযৱচীপযোগো. বুদ্ধপ্পটিকুট্ঠেন মিচ্ছাজীৱেন পচ্চযপৰিযেসনা অনেসনা. অভূতস্স অত্তনি অৱিজ্জমানস্স উত্তৰিমনুস্সধম্মস্স উল্লপনং কথনং অভূতুল্লপনা. কুহনাদীহীতি কুহনালপনাদীহি. তত্থ লাভসক্কাৰসিলোকসন্নিস্সিতস্স পচ্চযপ্পটিসেৱনসামন্তজপ্পনইৰিযাপথসণ্ঠাপনৱসেন জনৱিম্হাপনা কুহনা. ৱিহাৰং আগতে মনুস্সে দিস্ৱা ‘‘কিমত্থায ভোন্তো আগতা, কিং ভিক্খূ নিমন্তেতু’’ন্তি ৱা ‘‘মযি ৰাজা পসন্নো, অসুকো চ অসুকো চ ৰাজমহামত্তো পসন্নো’’তি ৱা আদিনা নযেন আলপনা লপনা. খাদনীযং গহেত্ৱা গচ্ছন্তে দিস্ৱা ‘‘কিং খাদনীযং লভিত্থা’’তিআদিনা নযেন নিমিত্তকৰণাদি নেমিত্তকতা. ‘‘অস্সদ্ধো অপ্পসন্নো’’তিআদিনা নযেন গৰহণানি চ ‘‘এতং এত্থ কথেথা’’তিআদিনা নযেন ৱাচায উক্খিপনাদি চ নিপ্পেসিকতা. অপ্পেন লাভেন বহুকং ৱঞ্চেত্ৱা গহেতুং ইচ্ছনং লাভেন লাভং নিজিগীসনতা. কুলদূসাদীতি এত্থ আদি-সদ্দেন ৰূপিযপ্পটিগ্গহণৰূপিযসংৱোহাৰা সঙ্গয্হন্তীতি.

মিচ্ছাজীৱৱিৱজ্জনানিদ্দেসৱণ্ণনা নিট্ঠিতা.