২৮. কম্মনিদ্দেসৱণ্ণনা

১৯৯. ৱগ্গেন অধম্মকম্মঞ্চ সমগ্গেন অধম্মকম্মঞ্চ ৱগ্গেন ধম্মকম্মঞ্চ সমগ্গেন ধম্মকম্মঞ্চাতি চত্তাৰি কম্মানি হোন্তীতি সেসো. তত্থ ৱগ্গেন অধম্মকম্মন্তি ৱগ্গেন সঙ্ঘেন কৰণীযং অধম্মকম্মং. এস নযো সব্বত্থ. ৱগ্গোতি চ সমূহো ৱুচ্চতি, সো চ চতুৱগ্গাদিকৰণীযাদীসু যাৱতিকানং কম্মপ্পত্তানং অসম্মুখীভাৱেন, ছন্দাৰহানং ছন্দানাহৰণেন, সম্মুখীভূতানঞ্চ পটিক্কোসনেন, তেসু একেনাপি ৱা ইধ অধিপ্পেতো. অধম্মকম্মন্তি এত্থ পন ধম্মো নাম ‘‘উত্তিদুতিযে চে, ভিক্খৱে, কম্মে একায উত্তিযা কম্মং কৰোতি, ন চ কম্মৱাচং অনুস্সাৱেতি, অধম্মকম্ম’’ন্তিআদিনা (মহাৱ. ৩৮৭) একাযেৱ ঞত্তিযা, তথা দ্ৱীহি ঞত্তীহি একাযেৱ ৱা কম্মৱাচায, তথা দ্ৱীহি কম্মৱাচাহীতি আগতায চ তথা হাপনঅঞ্ঞথাকৰণভাৱেন ঞত্তিকম্মং ঠপেত্ৱা ঞত্তিচতুত্থে চ কম্মে আগতায চ অকম্মাৰহস্স তজ্জনীযপব্বাজনীযপটিসাৰণীযনিযস্সতিৱিধউক্খেপনীযানং সত্তন্নং কম্মানং কৰণৱসেন, কম্মাৰহস্স চ ৱিৰাধেত্ৱা কৰণৱসেন আগতায চ পাড়িযা ৱিপৰীতা চ পাড়ি, উপসম্পদাদিকম্মৱসেন আগতা চ পাড়ি, সম্মুখাৱিনযসতিৱিনযঅমূড়্হৱিনযপটিঞ্ঞাকৰণযেভুয্যসিকাতস্সপাপি- যসিকাতিণৱত্থাৰকসঙ্খাতানং সত্তন্নং কম্মানং যথালাভকৰণৱসেন আগতা চ পাড়ি, তেন কৰণীযং অপলোকনঞত্তিঞত্তিদুতিযঞত্তিচতুত্থসঙ্খাতং চতুব্বিধং কম্মং ধম্মকম্মং, তপ্পটিপক্খং অধম্মকম্মং. তব্বিপৰিযাযেন সমগ্গো ধম্মকম্মঞ্চ ৱেদিতব্বং. ধম্মো যথাৱুত্তা পাড়ি অস্স অত্থি, ধম্মেন কতং ৱাতি ধম্মিকং. তব্বিপৰীতং অধম্মিকং. চতুত্থংযেৱাতি তেসু চতূসু কম্মেসু চতুন্নং পূৰণং সমগ্গেন ধম্মিকং. সেসকম্মানং ভাৱেন ভিক্খুনা দুক্কটস্স ভৱনং লক্খীযতীতি সেসকম্মেসূতি ভাৱলক্খণে সত্তমী. দুক্কটন্তি কুপ্পানং অধম্মকম্মৱগ্গকম্মানং কতত্তা দুক্কটং.

২০০. ইদানি যদিদং সমগ্গেন ধম্মিকং নাম, তং যেহি সঙ্ঘেহি কাতব্বং, তেসং পভেদং দস্সেতুং ‘‘চতুৱগ্গো’’তিআদিমাহ. চত্ৱাদীনং সঙ্খ্যেযৱুত্তিত্তা চতুন্নং ৱগ্গোতিআদিনা ৱিগ্গহো. দসৱীসতিৱগ্গিকোতি দসন্নং ৱীসতিযা চ ৱগ্গভেদৱসেন দসৱীসতীনং ৱগ্গোতি ৱিগ্গহো, ণিকো সকত্থে. ৱীসতিযা ৱগ্গো, অতিৰেকেন সহিতো ৱীসতিৱগ্গোতি ৱিগ্গহো.

২০১-২. পঞ্চন্নং কম্মানং নিযমেতি ‘‘চতূ’’তিআদিনা. অব্ভানং উপসম্পদং পৱাৰণং ঠপেত্ৱা চতুৱগ্গো চাতিআদিনা যোজেত্ৱা সব্বকম্মেসু কম্মপ্পত্তোতি দীপিতোতি যোজেতব্বং. তত্থ তত্থ চ-সদ্দো চতুৱগ্গাদযো কম্মপত্তিকিৰিযাযং সমুচ্চিনোতি. ইধ পন সব্ব-সদ্দো অব্ভানাদীনং কেসঞ্চি ঠপিতত্তা পদেসসব্বে গয্হতি. কম্মপত্তোতি কম্মস্স পত্তো যুত্তো অনুৰূপো. ইতৰোতি ৱীসতিৱগ্গো অতিৰেকৱীসতিৱগ্গো. সব্বকম্মেসূতি এত্থ পন সব্ব-সদ্দো সব্বসব্বে. ননু চ ৱীসতিৱগ্গস্স কম্মপ্পত্তভাৱেসতি অতিৰেকৱীসতিৱগ্গস্স পগেৱাতি ৱিঞ্ঞাযতি. তথা সতি সো কস্মা ৱুত্তোতি? সচ্চং, তথাপি সো চতুৱগ্গাদিনা সঙ্ঘেন কত্তব্বকম্মং ঊনকতৰেন ন ৱট্টতি, অতিৰেকেন পন ৱট্টতীতি ঞাপনত্থং ৱুত্তো.

২০৩. ইদানি চতুৱগ্গাদিকেন ছন্দাহৰণেন পূৰেতব্বোতি দস্সেতি ‘‘চতূ’’তিআদিনা. পাৰাজিকাদিভাৱমনাপন্নত্তা পকতিযা সভাৱেনেৱ ঠিতো অত্তা যেসং, পকতো ৱা ততোযেৱ কম্মেসু অৱিগতো অত্তা যেসং তেতি পকতত্তকা, পাৰাজিকউক্খিত্তকলদ্ধিনানাসংৱাসকেহি অঞ্ঞে. পৰেতি একসীমট্ঠা তাদিসাযেৱ অঞ্ঞে. সেসেপীতি অৱসেসে পঞ্চৱগ্গাদিকৰণীযেপি.

২০৪. ইদানি ৱত্থুঞত্তিঅনুস্সাৱনসীমাদিৱিপত্তিতো, কম্মৱিপত্তীসু পৰিসতো চ পটিক্কোসতো চ কম্মস্স কুপ্পাকুপ্পভাৱং তত্থ চ আপত্তিআদিং দস্সেতুং ‘‘চতূ’’তিআদি মাহ. চতুৱগ্গাদিকত্তব্বং অসংৱাসগণপূৰং ৱা কম্মাৰহগণপূৰং ৱা কম্মঞ্চ গৰুকট্ঠগণপূৰং ৱা পৰিৱাসাদিকম্মঞ্চাতি যোজনা. এত্থ চ কম্মাৰহো গৰুকট্ঠতো অঞ্ঞো, নিক্খিত্তৱত্তো পন গৰুকট্ঠো গণপূৰকো হোতিযেৱ. কতন্তি চতুৱগ্গাদিনা কতং.

২০৫. ৱাৰেয্যাতি অন্তৰাযে অসতি অন্তমসো একোপি ৱাৰেয্যাতি অত্থো. অন্তৰাযেতি পাপেহি কৰিযমানে জীৱিতব্ৰহ্মচৰিযন্তৰাযে সতি. অনন্তৰাযিকা চে ন ৱাৰেন্তি, দুক্কটং. দিট্ঠাৱিন্তি অত্তনো অত্তনো দিট্ঠিং লদ্ধিং ‘‘অধম্মকম্মং ইদং, ন মেতং খমতী’’তি অঞ্ঞমঞ্ঞং আৱি কৰেয্যুন্তি সেসো. একোধিট্ঠানন্তি একো ভিক্খু ‘‘ন মেতং খমতী’’তি অধিট্ঠানং কৰেয্যাতি সেসো. ততোধিকাতি তীহি অধিকা. তে পন সঙ্ঘত্তা পহোন্তি অত্তনো কম্মং নিত্থৰিতুং.

২০৬. খিত্তচিত্তো নাম উম্মত্তকো. দুখট্টিতোতি ৱেদনট্টো. ন ৰূহতীতি গয্হত্তং ন ৰোহতীতি অত্থো.

২০৭. অন্তমসো অনন্তৰস্সাপি আৰোচেন্তস্স পকত…পে… ভিক্খুনোতি সম্বন্ধো. একসীমাযং তিট্ঠতীতি একসীমট্ঠো. সমো সংৱাসো অস্সাতি সমসংৱাসো. একসীমট্ঠো চ সো সমসংৱাসো চ, পকতত্তো চ সো একসীমট্ঠসমসংৱাসো চ, সো চাযং ভিক্খু চাতি সব্বত্থ কম্মধাৰযো, তস্স. এত্থ পন অৱিপন্নসীলো পকতত্তোতি অধিপ্পেতো. আৰোচেন্তস্সাতি অত্তনো লদ্ধিং পকাসেন্তস্স. ৰূহতীতি পটিক্খেপো ৰুহতি.

২০৮. ধম্মিকং কম্মন্তি ধম্মেন কত্তব্বং অপলোকনাদিকম্মং. পটিক্কোসেয্যাতি নিৱাৰেয্য. তিৰোক্খা কাযসামগ্গিং ৱা ছন্দং ৱাতি ৱা-সদ্দং নেত্ৱা অত্থো নেতব্বো. তিৰোক্খাতি পৰম্মুখা. সো সম্মুখা-সদ্দো ৱিয নিপাতো, অথ ৱা অক্খা ইন্দ্ৰিযৱিসযতো তিৰো বহীতি অত্থোতি.

কম্মনিদ্দেসৱণ্ণনা নিট্ঠিতা.