২৭. অসংৱাসনিদ্দেসৱণ্ণনা

১৯৮. উক্খিত্তোতি কম্মনানাসংৱাসকসঙ্খাতো আপত্তিযা অদস্সনে, অপ্পটিকম্মে, পাপিকায দিট্ঠিযা অপ্পটিনিস্সগ্গে উক্খিত্তকো. অনুপসম্পন্নোতি সিক্খমানসামণেৰসামণেৰিসিক্খাপচ্চক্খাতসঙ্খাতো অনুপসম্পন্নো. ছিন্নমূলকোতি অন্তিমৱত্থুঅজ্ঝাপন্নো. উক্খিত্তকেসু ‘‘ধম্মৱাদিনো এতে’’তি উপ্পন্নায লদ্ধিযা নানাভূতো সংৱাসো এতস্সাতি নানাসংৱাসো, উক্খিত্তানুৱত্তকসঙ্খাতো লদ্ধিনানাসংৱাসকো. সীমতো নিগ্গতা নিস্সীমা, সীমন্তৰিকা বহিসীমা চ, তত্থ হত্থপাসে চেপি ঠিতো, সীমানানাসংৱাসকো নিস্সীমট্ঠিতো. ৱেহাযসে আকাসে ঠিতো ৱেহাযসণ্ঠিতো বিন্দাগমেন. তত্থ ‘‘নানাসংৱাসো চা’’তিআদিনা সমাহাৰদ্ৱন্দেপি ক্ৱচি নপুংসকলিঙ্গং ব্যভিচৰতীতি নপুংসকত্তাভাৱো যথা ‘‘মগ্গামগ্গো’’তি. এককম্মং একুদ্দেসো সমসিক্খতাতি অযং তিৱিধোপি সংৱাসো নাম. সো যেসং নত্থি, তে অসংৱাসা. এতে হত্থপাসতো বহিকৰণৱসেন ৱজ্জেতব্বা. এতেসু হি তিৱিধে উক্খিত্তকে সতি উপোসথাদিকং কম্মং কৰোন্তস্স পাচিত্তিযং, ইতৰেসু দুক্কটন্তি.

অসংৱাসনিদ্দেসৱণ্ণনা নিট্ঠিতা.