২৪. অঞ্জনীনিদ্দেসৱণ্ণনা

১৮২. ৱট্টা ৱা অট্ঠসোড়সংসা ৱা মট্ঠা অঞ্জনী ৱট্টতীতি যোজনা. অট্ঠ চ সোড়স চ অংসা কোণা যস্সা সাতি ৱিগ্গহো. সোড়সংসপদেসৱিভত্তায অট্ঠংসাসুতিযা অট্ঠংসপদেসৱিভত্তা চতুৰংসাপি সামত্থিযা গয্হতীতি ঞাতব্বং. ‘‘উজুকমেৱ পন চতুৰংসাৱা’’তি হি অট্ঠকথাযং (পাৰা. অট্ঠ. ১.৮৫) ৱুত্তং. অঞ্জনীতি অঞ্জননাড়ি. মূলে তিস্সোপি লেখা ৱট্টন্তীতি যোজনা. মূলেতি বুন্দে, হেট্ঠতোতি ৱুত্তং হোতি. লেখাতি ৱট্টলেখা. বন্ধিতুং গীৱাযং একা এৱ লেখা ৱট্টতীতি সম্বন্ধো. বন্ধিতুন্তি পিধানবন্ধনত্থং.

১৮৩. যং কিঞ্চি ৰূপন্তি ইত্থিৰূপাদি যং কিঞ্চি ৰূপং. মালাদিকম্মন্তি মালাকম্মং লতাকম্মং. অড্ঢচন্দাদীতি এত্থ আদি-সদ্দেন অগ্ঘিযাদিকং গহিতং. এত্থাতি অঞ্জনিযং.

১৮৪. থৱিকাতি অঞ্জনিথৱিকা. সিপাটীতি খুৰসিপাটিকা. সলাকাপি অচিত্তকা লব্ভাতি সম্বন্ধো. সলাকাতি অঞ্জনিসলাকা. নত্থি চিত্তমেতিস্সাতি অচিত্তকা. তাদিসং পন লভিত্ৱা উপাহনাযো ৱিয নাসেত্ৱা পৰিভুঞ্জিতব্বং.

১৮৫. অট্ঠি-সদ্দেন মনুস্সট্ঠিং ঠপেত্ৱা যং কিঞ্চি অট্ঠি গহিতং.

১৮৬. ধূমনেত্তাতি ধূমনাড়িকা, নিস্স আ-কাৰাদেসৱসেন ৱুত্তং. সত্থকদণ্ডানীতি সত্থদণ্ডা. নত্থুং দেন্তি এতাযাতি নত্থুদানা. অনিযমেন হি নদাদিতো ৱা ঈ. তেহি সঙ্খনাভিআদীহি নিব্বত্তা তম্মযা.

অঞ্জনীনিদ্দেসৱণ্ণনা নিট্ঠিতা.