২২. উপাহননিদ্দেসৱণ্ণনা

১৭৫. নৱা গুণঙ্গুণূপাহনা মজ্ঝদেসে ন কপ্পন্তীতি সম্বন্ধো. নৱাতি একৱাৰম্পি অপ্পটিমুক্কা. তত্থ গুণঙ্গুণূপাহনা চতুপটলতো পট্ঠায ৱুচ্চন্তি. সম্ভৱে ব্যভিচাৰে চ ৱিসেসনং সাত্থকং ভৱতীতি ‘‘মজ্ঝদেসে’’তি ৱিসেসনং অমজ্ঝদেসং ব্যভিচৰতীতি অমজ্ঝদেসে গুণঙ্গুণূপাহনা কপ্পন্তীতি ৱেদিতব্বং. তথা নৱাতি ইমিনা অনৱা মজ্ঝদেসেপি. ইমিনা পন ৱাক্যেন মজ্ঝদেসেপি একৱাৰম্পি পটিমুক্কা, অঞ্ঞত্থ তু সব্বাপি গুণঙ্গুণূপাহনা ৱট্টন্তি, ন সেসাতি আপন্নং, তথাপি ‘‘অনুজানামি, ভিক্খৱে, একপলাসিকং উপাহন’’ন্তি (মহাৱ. ২৪৫) ৱুত্তত্তা একপটলিকাপি ৱট্টতীতি ৱেদিতব্বং. সব্বস্সাতি মজ্ঝদেসে পচ্চন্তিমেপি গিলানাগিলানস্স সব্বস্স. ‘‘অনুজানামি, ভিক্খৱে, অজ্ঝাৰামে উপাহনং ধাৰেতু’’ন্তি (মহাৱ. ২৪৯) হি সামঞ্ঞেন অনুঞ্ঞাতং. সব্বত্থাতি গামে ৱা অৰঞ্ঞে ৱা আৰামতো অঞ্ঞত্ৰ. অকল্লকস্স চাতি গিলানস্সেৱ.

১৭৬-৯. সব্ব…পে… ৰত্তা চ উপাহনা সব্ব…পে… ৱিচ্ছিকাড়িকা চ…পে… দীপীনং চম্মেহি চ মজ্জাৰ…পে… চম্মেহি চ পৰিক্খটা চ উপাহনা সঙ্কমনীযা পাদুকা চ কোচি ধাৰেয্য, দুক্কটন্তি যোজনা. ওদাতায পাড়িযা অট্ঠকথায চ অভাৱেপি অনুলোমৱসেনেত্থ ৱুত্তং ৱিয দিস্সতি. নীলকো চ ওদাতো চাতিআদিনা দ্ৱন্দো. সব্বেৱ নীলক…পে… কণ্হকা যাসন্তি সমাসো. ‘‘মহাৰঙ্গা’’তিআদীসু অপ্পযুত্তেপি সব্ব-সদ্দে পকৰণৱসেন যোজেত্ৱা অত্থো ৱেদিতব্বো.

‘‘অত্থা পকৰণা লিঙ্গা, ওচিত্যা কালদেসতো;

সদ্দত্থা ৱিভজীযন্তি, ন সদ্দাযেৱ কেৱলা’’তি. –

হি ৱুত্তং. চিত্ৰাতি ৱিচিত্ৰা. নীলপীতাদী ৱদ্ধাযেৱ যাসন্তি সমাসো. আদি-সদ্দেন ওদাতাদীনং গহণং. তিত্তিৰপত্তসদিসো ৱিচিত্তো ৱণ্ণো তিত্তিৰপত্ত-সদ্দেন গহিতো. তমেতেসমত্থীতি তিত্তিৰপত্তিকা. মেণ্ডস্স চ অজস্স চ ৱিসাণসদিসা ৱদ্ধা যাসন্তি বাহিৰত্থো. তা পন কণ্ণিকট্ঠানে মেণ্ডকঅজৱিসাণসণ্ঠানে ৱদ্ধে যোজেত্ৱা কতা. এস নযো ৱিচ্ছিকাড়িকাদীসু. পণ্হিপিধানত্থং তলে খল্লং বদ্ধং যাসন্তি ৱিগ্গহো. জঙ্ঘতো সব্বপাদপ্পটিচ্ছাদনকং পুটং বদ্ধং যাসন্তি বহুব্বীহি. তূলং পিচু পুণ্ণং যাসন্তি অঞ্ঞপদত্থো. পলিগুণ্ঠেতীতি পলিগুণ্ঠো, উপৰিপাদতলমত্তপ্পটিচ্ছাদকবন্ধো, তেন যোজেত্ৱা কতা পালিগুণ্ঠিমা, ৱিচিত্ৰা হি তদ্ধিতৱুত্তি. ৱিচ্ছিকানং অড়সদিসং নঙ্গুট্ঠসদিসং বদ্ধমেতাসন্তি ৱিচ্ছিকাড়িকা. সীহব্যগ্ঘুদ্দাজিনদীপীনং চম্মেহি চাতি পকৰণতো অজিনা নাম মিগা. উলূকা পক্খিবিড়াৰা. সঙ্কমন্তি গচ্ছন্তি এতাহীতি সঙ্কমনীযা. তা পন তালপণ্ণাদীহি কতা সংহাৰিযা.

১৮০. সকলং একদেসং ৱা পুঞ্ছিত্ৱাৱাতি যোজনা. খল্লকাদিকন্তি আদি-সদ্দেন মেণ্ডৱিসাণৱদ্ধিকাদিকং সব্বং সঙ্গণ্হাতীতি.

উপাহননিদ্দেসৱণ্ণনা নিট্ঠিতা.