১৬. ৱচ্চপস্সাৱট্ঠানিকনিদ্দেসৱণ্ণনা

১৫৬. ৱচ্চপস্সাৱট্ঠানিকন্তি ঠানম্হি ঠানে ৱা ভৱং ৱচ্চপস্সাৱট্ঠানিকং. যথাৱুড্ঢং ৱচ্চং ন কৰেয্যাতি সম্বন্ধো. যে যে ৱুড্ঢা যথাৱুড্ঢং, আগতপ্পটিপাটিং হিত্ৱা ৱুড্ঢপ্পটিপাটিযাতি অত্থো. ৱচ্চন্তি উপলক্খণমত্তং, পস্সাৱঞ্চ নহানঞ্চ ন কৰেয্যাতি অধিপ্পাযো. তদেৱ সমত্থেতি ‘‘যাতানুপুব্বিযা’’তিআদিনা. যাতানুপুব্বিযাতি যাতানং গতানং অনুপুব্বি অনুক্কমো যাতানুপুব্বি, তায. ৱচ্চ…পে… তিত্থঞ্চাতি এতং তযং লব্ভতীতি অত্থো, ভিক্খুনাতি ৱিঞ্ঞাযতি.

১৫৭. উব্ভজিত্ৱা চ সহসা চ নো পৱিসেয্যাতি সম্বন্ধো. উব্ভজিত্ৱাতি চীৱৰং দূৰতোৱ উক্খিপিত্ৱা. সহসাতি সীঘং. উক্কাসিত্ৱা পৱিসেয্যাতি যোজনা.

১৫৮. ৱচ্চপস্সাৱদোণীনং বহীতি সম্বন্ধো. উভযন্তি ৱচ্চম্পি পস্সাৱম্পি.

১৫৯. কূপেতি ৱচ্চাৱাটে. কট্ঠন্তি অৱলেখনকট্ঠং. ফৰুসেনাতি খৰেন অৱলেখনকট্ঠেন. উহতঞ্চাপীতি অত্তনা ৱা পৰেন ৱা উহতঞ্চাপি ৱচ্চমক্খিতঞ্চাপীতি অত্থো. ধোৱযেতি সতি উদকে, উদকে অসতি কট্ঠেনপি সোধেয্য.

১৬০. ন নিক্খমেতি ন নিক্খমেয্য. চপু চপূতি অনুকৰণং, ৱিচ্ছাযং দ্ৱিত্তে চপু চপু কত্ৱাতি কিৰিযাৱিসেসনং. নাচমেয্যাতি ন ধোৱেয্য. সতি পন উদকে আচমিতব্বং, অসতি যেন কেনচি পুঞ্ছিত্ৱা গন্তব্বং, সব্বসাধাৰণট্ঠানে চ আচমনকুম্ভিযা উদকং ন সেসেতব্বং. উক্লাপন্তি কচৱৰং. ৱিসোধযেতি ৱিহাৰসোধনে ৱিয ৱচ্চপস্সাৱকুটিযো, পৰিৱেণকোট্ঠকে চ সম্মজ্জেয্য. সব্বত্থেৱ চ পন ৱত্তভেদে দুক্কটং.

ৱচ্চপস্সাৱট্ঠানিকনিদ্দেসৱণ্ণনা নিট্ঠিতা.