১৪. ভূমিনিদ্দেসৱণ্ণনা

১৩৬. যাসু ৱুত্থং পক্কঞ্চ কপ্পতি, তা কপ্পিযা ভূমিযো সম্মুতি চ সম্মুতিকুটি চ…পে… গহপতি চ গহপতিকুটি চাতি ইমা চতস্সো হোন্তীতি যোজেত্ৱা অত্থো ৱেদিতব্বো. তত্থ ভেসজ্জক্খন্ধকে (মহাৱ. ২৯৫) ৱুত্তায উত্তিদুতিযকম্মৱাচায, অপলোকনকম্মৱসেন ৱা সাৱেত্ৱা সম্মা উত্তিসম্পন্নং কৰীযতীতি সম্মুতি, থম্ভানং ভিত্তিপাদানং ৱা উগ্গমনং উদ্ধং কত্ৱা ঠপনং, ‘‘কপ্পিযকুটিং কৰোমা’’তি ৱাচায সাৱনঞ্চ অন্তং যস্সা সা উস্সাৱনন্তা. তথা চ ৱুত্তং ‘‘থম্ভপ্পতিট্ঠানঞ্চ ৱচনপৰিযোসানঞ্চ সমকালং ৱট্টতী’’তি (মহাৱ. অট্ঠ. ২৯৫). নিসাদনং পৱিসনং সন্নিৱেসনং নিসাদো, গুন্নং ৱিয নিসাদো এতিস্সাতি গোনিসাদি. ভিক্খুং ঠপেত্ৱা সেসসহধম্মিকা সব্বে চ দেৱমনুস্সা ইধ গহপতীতি সামঞ্ঞেন অধিপ্পেতা. এত্থ পন গহপতিসম্বন্ধিনী কুটি দীঘেন গহপতী.

‘‘যং পন অকপ্পিযভূমিযং সহসেয্যপ্পহোনকে গেহে ৱুত্থ’’ন্তি (মহাৱ. অট্ঠ. ২৯৫) অট্ঠকথাৱচনতো যং সঙ্ঘো আকঙ্খতি ৱিহাৰং ৱা অড্ঢযোগং ৱা পাসাদং ৱা হম্মিযং ৱা গুহং ৱা লেণাদিং ৱা, তেসম্পি সামঞ্ঞৱচনং ৱিঞ্ঞাযতীতি তংতংলক্খণপ্পত্তা সহসেয্যপ্পহোনকা লেণাদযো চতূস্ৱেৱ কুটীসু অন্তোগধাতি ৱেদিতব্বং. ইমাসু চতূসু সহসেয্যপ্পহোনকে পদেসে যং সঙ্ঘিকং পুগ্গলিকং ৱা ভিক্খুসন্তকং একৰত্তম্পি অন্তোৱুত্থং অনুপসম্পন্নেন পক্কঞ্চ যাৱকালিকং যামকালিকঞ্চ অন্তোৱুত্থঅন্তোপক্কসঙ্খং ন গচ্ছতি, কো পন ৱাদো ইতৰদ্ৱযে. তং পন অকপ্পিযভূমিযম্পি ৱুত্থং পক্কঞ্চ ৱট্টতি. তেন ৱুত্তং ‘‘যাসু ৱুত্থং পক্কঞ্চ কপ্পতী’’তি.

১৩৭. ৱাসত্থায কতে সঙ্ঘিকে ৱা একসন্তকে ৱা সহসেয্যপ্পহোনকে গেহে কপ্পিযাকুটি লদ্ধব্বাতি সম্বন্ধো. তত্থ ৱাসত্থাযাতি ইমিনা অৱাসত্থায কতং নিৱত্তেতি. একসন্তকেতি একস্স ভিক্খুনো সন্তকে. কপ্পিযাকুটীতি ভাৱপ্পধানোযং নিদ্দেসো, ন হি গেহে গেহং লদ্ধুং যুজ্জতীতি কপ্পিযকুটিতাতি অত্থো. দীঘো পন গাথাৱসেন, কপ্পিযা কুটিতাতি ৱা ৱিসেসনৱসেন দট্ঠব্বং. সহসেয্যপ্পহোনকেতি এত্থ সহসেয্যপ্পহোনকং ৱাসাগাৰলক্খণে ৱুত্তলক্খণং সেনাসনং.

১৩৮. ইদানি তা কুটিযো কমেন দস্সেত্ৱা তত্থ পটিপজ্জিতব্বৱিধিং, তাসং সব্বথাপগমঞ্চ দস্সেতুং ‘‘গেহে’’তিআদিমাহ. তত্থ ‘‘কপ্পিযকুটিং কৰোম, কপ্পিযকুটিং কৰোমা’’তি এৱমীৰযন্তি সম্বন্ধো. ইট্ঠকা চ থম্ভা চ ‘‘ইট্ঠকাথম্ভা’’তি ৱত্তব্বে ৰস্সো. ইট্ঠকথম্ভা আদি যস্স ভিত্তিপাসাদস্সাতি বহুব্বীহি. পচ্ছা পঠমসদ্দেন কম্মধাৰযো. ‘‘ঠপেয্য চে, সা উস্সাৱনন্তিকা’’তি এৱং চে-সা-সদ্দে যোজেত্ৱা অত্থো ৱেদিতব্বো.

১৩৯. সকলো অপৰিক্খিত্তো আৰামোপি ৱাতি সম্বন্ধো. সেনাসনং পৰিক্খিত্তং ৱা হোতু, অপৰিক্খিত্তং ৱা, ন তং পমাণং.

১৪০. অঞ্ঞেহি কপ্পিযকুটিযা অত্থায দিন্নো ৱা তেসং সন্তকো ৱাতি যোজনা.

১৪১. অৱিৰোধভাৱেন কপ্পনীযা কপ্পা, কপ্প সামত্থিযমিচ্চেতস্মা ইত্থিযং আপচ্চযে ৰূপং, ন কপ্পা অকপ্পা, অকপ্পা চ সা কুটি চেতি অকপ্পকুটি, তায. সপ্পিআদীতি ইমিনা সত্তাহকালিকং যাৱজীৱিকঞ্চ গহিতং.

১৪২. তেহেৱাতি অকপ্পকুটিযং ৱুত্থসপ্পিআদীহি এৱ সদ্ধিং সত্তাহকালিকসংসট্ঠতায ‘‘সত্তাহং কপ্পতে’’তি ৱুত্তং. সামিসেতি আমিসসঙ্খাতেন পুৰিমদ্ৱযেন সহিতে. সামপাকতাতি সামং অত্তনা পাকো এতস্সাতি সামপাকং, সত্তাহকালিকেন সহ পক্কং সামিসং যাৱজীৱিকং, তস্স ভাৱো সামপাকতা. সযং পক্কং তং অত্তনা সংসট্ঠতায তম্পি আমিসং সামপাকগতিকং কৰোতীতি তস্স সামপাকতা হোতীতি অধিপ্পাযো.

১৪৩. অধিট্ঠিতাতি পতিট্ঠিতা. এৱ-সদ্দো তিট্ঠতিসদ্দস্স অন্তে দট্ঠব্বো.

১৪৪. সব্বেসূতি থম্ভাদীসু সকলেসু. জহিতং ৱত্থু কুটিভূমি যস্সা জহিতৱত্থুকা. পৰিক্খিত্তে জহিতৱত্থুকাতি সম্বন্ধো. সেসাতি ইতৰা দ্ৱে কুটিযো. ছদনৱিব্ভমাতি ছদনস্স ৱিনাসা. এত্থাপি ‘‘জহিতৱত্থুকা’’তি আনেতব্বন্তি.

ভূমিনিদ্দেসৱণ্ণনা নিট্ঠিতা.