৯. পটিগ্গাহনিদ্দেসৱণ্ণনা

১০৬. ইদানি ‘‘পটিগ্গাহো’’তি পদং ৱিত্থাৰেতুং ‘‘দাতুকামাভিহাৰো চা’’তিআদি আৰদ্ধং. তত্থ দাতুকামস্স অভিহাৰো দাতুকামাভিহাৰো. এতেন অঞ্ঞস্স পত্তে পক্খিপিতুং আলুলেন্তস্স ফুসিতানি উট্ঠহিত্ৱা অঞ্ঞস্স পত্তে সচে পতন্তি, পটিগ্গহণং ন ৰুহতীতি দীপিতং হোতি. এৰণক্খমন্তি থামমজ্ঝিমেন পুৰিসেন উক্খিপনক্খমং, ততো মহন্তে পটিগ্গহণং ন ৰুহতি. তিধা দেন্তেতি কাযকাযপ্পটিবদ্ধনিস্সগ্গিযানং ৱসেন তিধা দেন্তে. তস্স ভিক্খুনো কাযকাযপ্পটিবদ্ধেহি দ্ৱিধা গাহোতি অত্থো. পঞ্চঙ্গো এৱং পঞ্চঙ্গেৱং. দাতুকামাভিহাৰো একং, হত্থপাসো একং, এৰণক্খমতা একং, দেৱমনুস্সতিৰচ্ছানগতেসু একেন তিধা দানমেকং, দ্ৱিধা গাহো একন্তি এৱং পঞ্চঙ্গানি হোন্তি.

১০৭. ইদানি যেন কাযপ্পটিবদ্ধেন পটিগ্গহণং ন ৰুহতি, তং দস্সেতুং ‘‘অসংহাৰিযে’’তিআদিমাহ. খাণুকে (পাচি. অট্ঠ. ২৬৫) বন্ধিত্ৱা ঠপিতমঞ্চাদিম্হি ৱা ফলকে ৱা পাসাণে ৱা অসংহাৰিযে ন ৰুহতীতি অত্থো. তত্থজাতে পদুমিনিপণ্ণে ৱা কিংসুকপণ্ণাদিম্হি ৱা ন ৱট্টতি, সুখুমে চিঞ্চআদীনং পণ্ণে ৱা ন ৰুহতি, যঞ্চ মজ্ঝিমপুৰিসো সন্ধাৰেতুং ন সক্কোতি, তস্মিং অসয্হভাৰে চ পটিগ্গহো ন ৰুহতীতি অত্থো.

১০৮. ইদানি পটিগ্গহণৱিজহনং দস্সেতুং ‘‘সিক্খামৰণলিঙ্গেহী’’তিআদি আৰদ্ধং. তত্থাযং পিণ্ডত্থো – সিক্খাপচ্চক্খানেন চ মৰণেন চ লিঙ্গপৰিৱত্তনেন চ ‘‘ন তং দানি পৰিভুঞ্জিস্সামী’’তি ৱা ‘‘ন পুন পটিগ্গহেত্ৱা পৰিভুঞ্জিস্সামী’’তি ৱা এৱং অনপেক্খৱিস্সজ্জনেন চ চোৰাদীহি ৱা অচ্ছেদা চ অনুপসম্পন্নস্স দানা চ গাহো পটিগ্গাহো উপসম্মতি ৱিজহতীতি. ভিক্খুনিযা পন সিক্খাপচ্চক্খানস্স অভাৱা ৱিব্ভমনেন চ ৱিজহতীতি গহেতব্বং.

১০৯-১১০.

.ইদানি পটিগ্গহেত্ৱা পৰিভুঞ্জিতব্বং দস্সেতুং ‘‘অপ্পটিগ্গহিতং সব্ব’’ন্তিআদি ৱুত্তং. তস্সত্থো (কঙ্খা. অট্ঠ. দন্তপোনসিক্খাপদ) – চতুকালিকপৰিযাপন্নং অন্তমসো ৰজৰেণুম্পি অপ্পটিগ্গহেত্ৱা সব্বং পৰিভুঞ্জতো পাচিত্তি. ইদানি অপ্পটিগ্গহেত্ৱা পৰিভুঞ্জিতব্বং দস্সেতুং ‘‘সুদ্ধঞ্চ নাতিবহল’’ন্তিআদি ৱুত্তং. তত্থ সুদ্ধঞ্চাতি অঞ্ঞেসং ৰসেন অসম্মিস্সং. হিমোদকসমুদ্দোদকাদীসু পটিগ্গহণকিচ্চং নত্থি. লোণঞ্চ অস্সু চ লোণস্সু. এত্থ লোণং নাম সৰীৰে উট্ঠিতং. এতানি পন সব্বানি অৱিচ্ছিন্নানেৱ কপ্পন্তি, নেতৰানি.

১১১. ইদানি অনঙ্গলগ্গানিপি দস্সেতুং ‘‘গূথমত্তিকমুত্তানী’’তিআদিমাহ. তথাৱিধেতি তথাৱিধে কালে, সপ্পদট্ঠকালেতি অত্থো. অঞ্ঞেসং পন অপ্পটিগ্গহিতং অনঙ্গলগ্গং ন ৱট্টতি. কস্মা? ‘‘অনুজানামি, ভিক্খৱে, যং কৰোন্তো পটিগ্গণ্হাতি, স্ৱেৱ পটিগ্গহো কতো, ন পুন পটিগ্গহেতব্বো’’তি (মহাৱ. ২৬৮) ৱুত্তত্তা.

১১২. দুৰূপচিণ্ণেতি দুপ্পৰামট্ঠে ফলিকৰুক্খৱল্লিআদিং চালেন্তস্স ৱা আমিসভৰিতভাজনং অপ্পটিগ্গহিতং পৰামসন্তস্স ৱা দুৰূপচিণ্ণদুক্কটং হোতীতি অত্থো. ৰজোকিণ্ণেতি ভিক্খায চৰন্তস্স পত্তে পতিতৰজং অপ্পটিগ্গহেত্ৱা পুন ভিক্খং গণ্হতো ৱিনযদুক্কটং হোতীতি অত্থো. অথুগ্গহপ্পটিগ্গহেতি অথ উগ্গহপ্পটিগ্গহে, অত্তনা এৱ উগ্গহেত্ৱা গহিতেতি অত্থো. অকপ্পিযকুটিযং অন্তোৱুত্থে চ যত্থ কত্থচি ভিক্খুনা সযংপক্কে চ অত্তনা ৱা পৰেন ৱা অকপ্পিযকুটিযং অন্তোপক্কে চাতি সব্বত্থ দুক্কটন্তি অধিপ্পাযো. পটিগ্গাহৱিনিচ্ছযো.

পটিগ্গাহনিদ্দেসৱণ্ণনা নিট্ঠিতা.