১০. অকপ্পিযমংসনিদ্দেসৱণ্ণনা

১১৩. ইদানি মংসেসু পটিপজ্জিতব্বাকাৰং দস্সেতুং ‘‘মংসেসু চ অকপ্পিয’’ন্তি উদ্ধটং. অকপ্পিযমংসম্হি দস্সিতে কপ্পিযমংসং দস্সিতমেৱ হোতি পাৰিসেসনযেন. উৰগস্স চাতি এত্থ সব্বোপি উৰগো ন কপ্পতি.

১১৪. এত্তাৱতা জাতিৱসেন দসৱিধম্পি অকপ্পিযমংসং দস্সেত্ৱা ইদানি কপ্পিযমংসেসুপি অকপ্পিযৱিধিং দস্সেতুং ‘‘উদ্দিস্সকতমংসঞ্চ, যঞ্চ অপ্পটিৱেক্খিত’’ন্তি ৱুত্তং. তত্থ পঞ্চসু সহধম্মিকেসু যস্স কস্সচি যং কিঞ্চি উদ্দিস্স কতং উদ্দিস্সকতং নাম, তং পন জানিত্ৱা পৰিভুঞ্জিতুং সব্বেসম্পি ন ৱট্টতি, অজানন্তানং অনাপত্তি. মচ্ছেসুপি এসেৱ নযো. অপ্পটিৱেক্খিতন্তি অনুপপৰিক্খিতং, অনাপুচ্ছিতন্তি অত্থো. ‘‘ন ভিক্খৱে অপ্পটিৱেক্খিত্ৱা মংসং পৰিভুঞ্জিতব্বং, যো পৰিভুঞ্জেয্য, আপত্তি দুক্কটস্সা’’তি (মহাৱ. ২৮১) ৱুত্তং. মচ্ছেসু পন আপুচ্ছনকিচ্চং নত্থি অকপ্পিযমচ্ছানং নত্থিতাযাতি ৱদন্তি. ইদানি এতেসু আপত্তিভেদং দস্সেতুং ‘‘থুল্লচ্চয’’ন্তিআদিমাহ. তং সব্বং (কঙ্খা. অট্ঠ. সন্নিধিকাৰকসিক্খাপদৱণ্ণনা) উত্তানমেৱ.

১১৫. ইদানি ন কেৱলং ইমেসং মনুস্সাদীনং মংসমেৱ অকপ্পিযং, অট্ঠিআদীনিপি অকপ্পিযানীতি দস্সেতুং ‘‘অট্ঠীপী’’তিআদি ৱুত্তং. তত্থ (মহাৱ. অট্ঠ ২৮১) লোমম্পেসন্তি লোমম্পি এসং অকপ্পিযমংসৱত্থূনন্তি অত্থো. সচিত্তকং ৱাতি এতেসু পন উদ্দিস্সকতমেৱ সচিত্তকং, সেসা অচিত্তকাতি. অকপ্পিযমংসৱিনিচ্ছযো.

অকপ্পিযমংসনিদ্দেসৱণ্ণনা নিট্ঠিতা.