১১. নিস্সগ্গিযনিদ্দেসৱণ্ণনা

১১৬-৭. ইদানি অচ্চোড়াৰিকানং ৱসেন দস্সেতুং ‘‘অৰূপিয’’ন্তিআদি আৰদ্ধং. অঞ্ঞথাপি যুত্তি পৰিযেসিতব্বা. তত্থাযং সঙ্খেপত্থো (পাৰা. ৫৯১; পাৰা. অট্ঠ. ২.৫৮৯; কঙ্খা. অট্ঠ. জাতৰুপসিক্খাপদৱণ্ণনা) – যো ৰূপিযেন অৰূপিযঞ্চ পৰিৱত্তেয্য, যো চ ইতৰেন চ অৰূপিযেন ৰূপিযং পৰিৱত্তেয্য, তস্স নিস্সগ্গিযং হোতীতি.

ইদানি ৰূপিযঞ্চ অৰূপিযঞ্চ দস্সেতুং ‘‘ইধ ৰূপিয’’ন্তিআদি আৰদ্ধং. এত্থ (পাৰা. ৫৮৯; কঙ্খা. অট্ঠ. জাতৰুপসিক্খাপদৱণ্ণনা) সজ্ঝু সিঙ্গীতি সজ্ঝূতি ৰজতং. সিঙ্গীতি সুৱণ্ণং. তম্বলোহাদীহি ৱা দাৰূহি ৱা পণ্ণেহি ৱা লাখায ৱা ৰূপং সমুট্ঠাপেত্ৱা ৱা অসমুট্ঠাপেত্ৱা ৱা কতং চম্মবীজমযম্পিযং যং দেসে ৱোহাৰং গচ্ছতি, ইদং ৱোহাৰূপগমাসকং নাম. ইদমিধ ৰূপিযন্তি অধিপ্পেতং. ৱত্থাদি চ মুত্তাদি চ ৱত্থমুত্তাদি. ইতৰন্তি অৰূপিযং কপ্পিযৱত্থুঞ্চ দুক্কটৱত্থুঞ্চ. কিং ৱুত্তং হোতি? ৱত্থং সুত্তং ফালো পটকো কপ্পাসো অনেকপ্পকাৰং অপৰণ্ণং সপ্পি নৱনীতং তেলং মধু ফাণিতাদিভেসজ্জঞ্চাতি ইদং কপ্পিযৱত্থু নাম. মুত্তা মণি ৱেড়ুৰিযো সঙ্খোসিলা পৱাড়ং লোহিতঙ্গো মসাৰগল্লং সত্ত ধঞ্ঞানি দাসী দাসো খেত্তং ৱত্থু পুপ্ফাৰামফলাৰামাদযোতি ইদং দুক্কটৱত্থু নাম, তদুভযং অৰূপিযং নামাতি ৱুত্তং হোতি.

১১৮. এত্তাৱতা ৰূপিযসংৱোহাৰং দস্সেত্ৱা ইদানি কযৱিক্কযং দস্সেতুং ‘‘ইমং গহেত্ৱা’’তিআদিমাহ. তত্থ ইমন্তি তণ্ডুলাদিকং কপ্পিযভণ্ডং গহেত্ৱা ৱা ওদনাদিং ভুত্ৱা ৱা ‘‘ইমং ৱত্থাদিকং কপ্পিযভণ্ডং দেহি, ইমং ৰজনপচনাদিকং কৰ, ৰজনকট্ঠাদিমা নয, ইমং ৱা তৱ দেমি, ত্ৱং পন ইমঞ্চ ইমঞ্চ আহৰ, কৰ, দেহী’’তি এৱং কযৱিক্কযে সমাপন্নে নিস্সগ্গীতি সম্বন্ধো.

১১৯. ইদানি পৰিণামৱসেন আপত্তিভেদং দস্সেতুং ‘‘অত্তনো’’তিআদি আৰদ্ধং. তত্ৰাযং পিণ্ডত্থো (পাৰা. ৬৫৯; পাৰা. অট্ঠ. ২.৬৫৮; কঙ্খা. অট্ঠ. পৰিণতসিক্খাপদৱণ্ণনা) – সঙ্ঘস্স ৱা অঞ্ঞস্স ৱা নতং পৰিণতং লাভং লভিতব্বং চীৱৰাদিপচ্চযং অত্তনো ৱা অঞ্ঞস্স ৱা পৰিণামেয্য, নিস্সগ্গিযআদীনি হোন্তীতি. কথং? যো পন মাতুসন্তকম্পি সঙ্ঘস্স পৰিণতং অত্তনো পৰিণামেতি, নিস্সগ্গিযং. অঞ্ঞস্স পুগ্গলস্স পৰিণামেতি, সুদ্ধিকপাচিত্তিযং. অঞ্ঞস্স সঙ্ঘস্স ৱা চেতিযস্স ৱা পৰিণামেতি, দুক্কটং. যো পন অঞ্ঞপুগ্গলস্স ৱা চেতিযস্স ৱা পৰিণতং অত্তনো ৱা অঞ্ঞপুগ্গলস্স ৱা সঙ্ঘস্স ৱা অঞ্ঞচেতিযস্স ৱা পৰিণামেতি, তস্সাপি দুক্কটমেৱাতি.

১২০. যো পন নিস্সগ্গিং নিস্সজ্জিতব্বং অনিস্সজ্জিত্ৱা ৱিনযকম্মং অকত্ৱা পৰিভুঞ্জেয্য, তস্স দুক্কটং. যো ৱা পৰেন ৱিনযকম্মত্থায নিস্সট্ঠং সকসঞ্ঞায ন দদেয্য, তস্সাপি দুক্কটং. অঞ্ঞথেতৰন্তি এত্থ অঞ্ঞথাতি থেয্যসঞ্ঞায সচে ন দদেয্য, ইতৰং তস্স অগ্ঘৱসেন পাৰাজিকঞ্চ থুল্লচ্চযঞ্চ দুক্কটঞ্চ হোতীতি অত্থো. নিস্সগ্গিযৱিনিচ্ছযো.

নিস্সগ্গিযনিদ্দেসৱণ্ণনা নিট্ঠিতা.