১২. পাচিত্তিযনিদ্দেসৱণ্ণনা

১২১. ইদানি পাচিত্তিযানি দস্সেতুং ‘‘পাচিত্তী’’তি মাতিকাপদং উদ্ধৰিত্ৱা ‘‘মুসাৱাদোমসাৱাদে, পেসুঞ্ঞহৰণে’’তিআদি ৱুত্তং. তত্থ মুসাৱাদে চ ওমসৱাদে চ পেসুঞ্ঞহৰণে চ পাচিত্তি ৱুত্তাতি সম্বন্ধো. এৱং সেসেসুপি. এত্থ পন ‘‘অদিট্ঠং, অসুতং, অমুতং, অৱিঞ্ঞাতং, দিট্ঠং, সুতং, মুতং, ৱিঞ্ঞাত’’ন্তি (পাচি. ৩; পাচি. অট্ঠ. ৩) পুব্বেপি ‘‘মুসা ভণিস্সামী’’তি চেতেত্ৱা ৱচনক্খণেৱ ‘‘মুসা ভণামী’’তি জানিত্ৱা জানন্তস্সেৱ মুসাভণনে পাচিত্তি নাম আপত্তি হোতীতি অত্থো. যস্স ভণতি, সো তং ন সুণাতি, আপত্তি ন হোতি (কঙ্খা. অট্ঠ. মুসাৱাদসিক্খাপদৱণ্ণনা).

‘‘ওমসৱাদো নাম দসহি আকাৰেহি ওমসতি জাতিযাপি নামেনপি গোত্তেনপি কম্মেনপি সিপ্পেনপি আবাধেনপি লিঙ্গেনপি কিলেসেনপি আপত্তিযাপি অক্কোসেনপী’’তি (পাচি. ১৫) এৱং ৱুত্তেহি দসহি আকাৰেহি উপসম্পন্নং যো খুংসেতি ৱম্ভেতি, অযং ওমসতি নাম, তস্স পাচিত্তীতি অত্থো. পৰম্মুখা ভণন্তস্স দুক্কটং, তথা পাড়িযং অনাগতেহি ‘‘চোৰো’’তি ৱা ‘‘গণ্ঠিভেদকো’’তি ৱা আদীহি ভণন্তস্স. ‘‘সন্তি ইধেকচ্চে খত্তিযা ব্ৰাহ্মণা চণ্ডালা’’তিআদিনা পৰিযাযেন ভণন্তস্স চ অনুপসম্পন্নং ভণন্তস্স চ সব্বত্থপি দুক্কটমেৱ.

পিযকম্যতায ৱা ভেদাধিপ্পাযেন ৱা উপসম্পন্নং জাতিআদীহি ওমসন্তস্স উপসম্পন্নস্স ৱচনং সুত্ৱা তস্স উপসংহৰণং পেসুঞ্ঞহৰণং নাম. এত্থাপি পৰিযাযৱচনেন চ অনুপসম্পন্নস্স উপসংহৰণেন চ দুক্কটমেৱ.

পদসোধম্মোতি এত্থ ‘‘ধম্মো নাম বুদ্ধভাসিতো সাৱকভাসিতো ইসিভাসিতো দেৱতাভাসিতো অত্থূপসংহিতো ধম্মূপসংহিতো’’তি (পাচি. ৪৬) এৱং ৱুত্তং সঙ্গীতিত্তযমাৰুড়্হং তিপিটকধম্মং পদঅনুপদঅন্ৱক্খৰঅনুব্যঞ্জনৱসেন ভিক্খুঞ্চ ভিক্খুনিঞ্চ ঠপেত্ৱা অনুপসম্পন্নং একতো ৱাচেন্তস্স পাচিত্তি হোতীতি অত্থো.

সাগাৰেতি যং পন সব্বন্তিমেন পৰিযাযেন দিযড্ঢহত্থুব্বেধেন পাকাৰাদিনা পৰিক্খিত্তত্তা সব্বপৰিচ্ছিন্নঞ্চ যেন কেনচি ৱিতানাদিনা অন্তমসো ৱত্থেনপি ছন্নত্তা সব্বচ্ছন্নঞ্চ সেনাসনং, তথাৰূপে সেনাসনে একূপচাৰট্ঠানে অনুপসম্পন্নেন সহ ৱসন্তস্স চতুত্থদিৱসতো পট্ঠায নিপজ্জনগণনায চ অনুপসম্পন্নগণনায চ দেৱসিকং পাচিত্তি হোতীতি অত্থো.

উজ্ঝাপনকখিয্যনেতি এত্থ যো উপসম্পন্নং সঙ্ঘেন সম্মতং সেনাসনপঞ্ঞাপকং ৱা ভত্তুদ্দেসকং ৱা যাগুভাজকং ৱা ফলভাজকং ৱা খজ্জভাজকং ৱা অপ্পমত্তকৱিস্সজ্জকং ৱা মঙ্কুকত্তুকামো ছন্দেন ‘‘ইত্থন্নামো সেনাসনং পঞ্ঞাপেতি, ভত্তানি চ উদ্দিসতী’’তি ৱা ৱদন্তো অঞ্ঞং উপসম্পন্নং উজ্ঝাপেতি তেন অৱজানাপেতি, যো পন তথেৱ ৱদন্তো উপসম্পন্নস্স সন্তিকে তস্স অযসং পকাসেন্তো খীযতি, তস্মিং উজ্ঝাপনকে চ খীযনকে চ পাচিত্তিদ্ৱযন্তি ৱেদিতব্বং.

১২২. তলসত্তিঅনাদৰ-কুক্কুচ্চুপ্পাদনেসু চাতি এত্থ যো ভিক্খু উপসম্পন্নস্স পহৰণাকাৰং দস্সেন্তো কাযং ৱা কাযপ্পটিবদ্ধং ৱা উচ্চাৰেতি, তস্স পাচিত্তিযং. সচে ৱিৰদ্ধো পহাৰং দেতি, অপ্পহৰিতুকামতায দুক্কটং, তথা অনুপসম্পন্নেসুপি দুক্কটমেৱ.

উপসম্পন্নেন পঞ্ঞত্তেন ৱুচ্চমানো তং অসিক্খিতুকামতায ৱা তস্স ৱচনং অসোতুকামতায ৱা যো অনাদৰিযং কৰোতি, তস্স অনাদৰকৰণে পাচিত্তিযন্তি অত্থো. অপঞ্ঞত্তেন ৱুচ্চমানস্স চ অনুপসম্পন্নেন পঞ্ঞত্তেন ৱা অপঞ্ঞত্তেন ৱা ৱুচ্চমানস্স দুক্কটং.

উপসম্পন্নস্স ‘‘ঊনৱীসতিৱস্সো মঞ্ঞে ত্ৱং উপসম্পন্নো, ৱিকালে মঞ্ঞে তযা ভুত্ত’’ন্তিআদিনা নযেন সঞ্চিচ্চ কুক্কুচ্চং উপ্পাদেন্তস্স পাচিত্তিযং. অনুপসম্পন্নস্স উপ্পাদনে দুক্কটং.

গামপ্পৱেসনাপুচ্ছাতি এত্থ পন মজ্ঝন্হিকাতিক্কমনতো পট্ঠায যাৱ অৰুণুগ্গমনা ৱিকালো নাম, এত্থন্তৰে সচে সম্বহুলা কেনচি কম্মেন গামং পৱিসন্তি, ‘‘ৱিকালে গামপ্পৱেসনং আপুচ্ছামা’’তি সব্বেহিপি অঞ্ঞমঞ্ঞং আপুচ্ছিতব্বং. সচে অনাপুচ্ছা পৰিক্খিত্তস্স পৰিক্খেপং, অপৰিক্খিত্তস্স উপচাৰং অতিক্কমন্তি, পঠমপাদে দুক্কটং, দুতিযপাদুদ্ধাৰে পাচিত্তিযং. আপদাসু অনাপত্তি.

ভোজনে চ পৰম্পৰাতি পৰম্পৰভোজনে চ পাচিত্তিযন্তি অত্থো. এত্থ পন পঞ্চসু ভোজনেসু অঞ্ঞতৰং নামং গহেত্ৱা ‘‘ওদনেন ৱা সত্তুনা ৱা কুম্মাসেন ৱা মংসেন ৱা মচ্ছেন ৱা নিমন্তেমী’’তিআদিনা নযেন, যেন কেনচি ৱেৱচনেন ৱা অকপ্পিযনিমন্তনায নিমন্তিতস্স যেন যেন পঠমং নিমন্তিতো, তস্স তস্স ভোজনং ঠপেত্ৱা উপ্পটিপাটিযা, অৱিকপ্পেত্ৱা ৱা পঠমনিমন্তনং পৰস্স পৰস্স কুলস্স পঞ্চন্নং ভোজনানং অঞ্ঞতৰং পৰিভুঞ্জন্তস্স পৰম্পৰভোজনে পাচিত্তি হোতি. গিলানচীৱৰদানচীৱৰকালসমযেসু অনাপত্তি, তথা পঞ্চ ভোজনানি ঠপেত্ৱা সব্বত্থ.

১২৩. অনুদ্ধৰিত্ৱা গমনে সেয্যন্তি এত্থ দসৱিধা সেয্যা ভিসি চিমিলিকা উত্তৰত্থৰণং ভূমত্থৰণং তট্টিকা চম্মখণ্ডো নিসীদনং পচ্চত্থৰণং তিণসন্থাৰো পণ্ণসন্থাৰোতি. এতেসু যং কিঞ্চি সঙ্ঘিকে ৱিহাৰে গুত্তসেনাসনে অত্তনো ৱস্সগ্গেন গহিতং অত্তনা ৱা সন্থৰিত্ৱা, অনুপসম্পন্নেন ৱা সন্থৰাপেত্ৱা তং দিৱসং গমিকৱসেন পক্কমন্তো নেৱ সযং উদ্ধৰেয্য ন অঞ্ঞং উদ্ধৰাপেয্য, যথা উপচিকাদীহি ন খজ্জেয্য, এৱং ন ঠপেয্য, অঞ্ঞেন ৱা ন উদ্ধৰাপেয্য, পতিৰূপং ভিক্খুং ৱা সামণেৰং ৱা আৰামিকমেৱ ৱা অনাপুচ্ছা ৱা গচ্ছেয্য, তস্স পৰিক্খিত্তস্স ৱিহাৰস্স পৰিক্খেপং, অপৰিক্খিত্তস্স দ্ৱে লেড্ডুপাতে অতিক্কমন্তস্স পাচিত্তিযং. মণ্ডপৰুক্খমূলাদিঅগুত্তসেনাসনে সন্থৰিত্ৱা গচ্ছন্তস্স দুক্কটং, তথা মঞ্চপীঠভিসিকোচ্ছকেসু, গুত্তসেনাসনেপি দুক্কটমেৱ.

সেনাসনানি ৱাতি এত্থ অনুদ্ধৰিত্ৱা গমনেতি সম্বন্ধো. এত্থ পন মঞ্চো পীঠং ভিসি কোচ্ছকন্তি চতুব্বিধম্পি সেনাসনং ৱস্সানহেমন্তানং অট্ঠসু মাসেসু অজ্ঝোকাসে ৱা ওৱস্সকমণ্ডপে ৱা ৰুক্খমূলে ৱা সযং সন্থৰিত্ৱা ৱা অনুপসম্পন্নেন সন্থৰাপেত্ৱা ৱা তং অনুদ্ধৰিত্ৱা ৱা অনুদ্ধৰাপেত্ৱা ৱা তস্স সেনাসনস্স দ্ৱিন্নং লেড্ডুপাতানং অতিক্কমনে পাচিত্তিযং. সম্মুঞ্জনীযাদি সেসপৰিক্খাৰেসু দুক্কটং.

ইত্থিযাদ্ধানগমনেতি এত্থ মাতুগামেন ‘‘গচ্ছাম ভগিনি, গচ্ছাম অয্যা’’তি এৱং সংৱিদহিত্ৱা ‘‘অজ্জ ৱা স্ৱে ৱা পৰসুৱে ৱা’’তি নিযমিতকালং ৱিসঙ্কেতং অকত্ৱা দ্ৱাৰৱিসঙ্কেতং মগ্গৱিসঙ্কেতং কত্ৱাপি গচ্ছতো গামন্তৰে গামন্তৰে পাচিত্তিযং. অগামকে অৰঞ্ঞে অদ্ধযোজনে অদ্ধযোজনে আপত্তি.

একেকায নিসীদনেতি এত্থ একো একায ইত্থিযা নিসীদনেতি অত্থো.

১২৪. ভিংসাপনেতি এত্থ উপসম্পন্নো উপসম্পন্নং ভিংসাপেতুকামো চোৰকন্তাৰৱাড়কন্তাৰাদীনি আচিক্খতি, ভযানকং ৱা ৰূপসদ্দাদিং দস্সেতি, সো ভাযতু ৱা মা ৱা, তস্স পযোগে পযোগে পাচিত্তিযং. অনুপসম্পন্নে দুক্কটং.

আকোটনেতি পহাৰদানে. উপসম্পন্নো উপসম্পন্নস্স অনত্তমনো হুত্ৱা সচে উপ্পলপত্তেনপি পহাৰং দেতি, পাচিত্তিযং. অনুপসম্পন্নস্স গহট্ঠস্স ৱা পব্বজিতস্স ৱা ইত্থিযা ৱা পুৰিসস্স ৱা অন্তমসো তিৰচ্ছানগতস্সাপি পহাৰং দেতি, দুক্কটমেৱ.

অনাচাৰং আচৰিত্ৱা সঙ্ঘমজ্ঝে আপত্তিযা ৱা ৱত্থুনা ৱা অনুযুঞ্জিযমানো তং অকথেতুকামো ‘‘কো আপন্নো, কিং আপন্নো, কিস্মিং আপন্নো’’তিআদিনা নযেন অঞ্ঞেহি ৱচনেহি তং ৱচনং পটিচ্ছাদেন্তো সো অঞ্ঞং ৱদতি, অযং অঞ্ঞৱাদকো, তস্মিং অঞ্ঞৱাদকে চ কঞ্চি ৱীতিক্কমং দিস্ৱা ‘‘আৱুসো, ইদং নাম তযা কত’’ন্তি ৱুত্তে তং ন কথেতুকামো তুণ্হীভূতোৱ সঙ্ঘং ৱিহেসতীতি সঙ্ঘৱিহেসকো, তস্মিং ৱিহেসকে চ পাচিত্তি হোতীতি অত্থো. ইধ পন ঞত্তিদুতিযেন কম্মেন অঞ্ঞৱাদকে চ ৱিহেসকে চ আৰোপিতে পুন অঞ্ঞং ভণন্তস্স, ৱিহেসন্তস্স পাচিত্তি. অনাৰোপিতে দুক্কটন্তি ৱেদিতব্বং.

দুট্ঠুল্লপকাসছাদেতি এত্থ কিঞ্চাপি ‘‘দুট্ঠুল্লা নাম আপত্তি চত্তাৰি চ পাৰাজিকানি তেৰস চ সঙ্ঘাদিসেসা’’তি (পাচি. ৩৯৯) ৱুত্তা, তথাপি ইধ সঙ্ঘাদিসেসাৱ অধিপ্পেতা. তস্মা সঙ্ঘসম্মুতিং ৱিনা ভিক্খুস্স দুট্ঠুল্লং আপত্তিং ‘‘অযং অসুচিং মোচেত্ৱা সঙ্ঘাদিসেসং আপন্নো’’তিআদিনা নযেন ৱত্থুনা সদ্ধিং আপত্তিং ঘটেত্ৱা ভিক্খুঞ্চ ভিক্খুনিঞ্চ ঠপেত্ৱা যস্স কস্সচি অনুপসম্পন্নস্স আৰোচেন্তস্স পাচিত্তিযং. থুল্লচ্চযাদিঅদুট্ঠুল্লাৰোচনে দুক্কটং. দুট্ঠুল্লচ্ছাদনেপি সঙ্ঘাদিসেসোৱ অধিপ্পেতো. যো পন ভিক্খু ভিক্খুস্স দুট্ঠুল্লং আপত্তিং সযং ৱা জানিত্ৱা অঞ্ঞেসং ৱা সুত্ৱা ‘‘ইমং জানিত্ৱা চোদেস্সন্তি সাৰেস্সন্তি মঙ্কুং কৰিস্সন্তি, নাৰোচিস্সামী’’তি ধুৰং নিক্খিপতি, তস্স পাচিত্তিযং. ধুৰং নিক্খিপিত্ৱা পচ্ছা আৰোচিতেপি ন ৰক্খতি এৱ.

হাসোদকেতি অঙ্গুলিপতোদকেন হাসো চ উদকে হাসো চাতি এৱমত্থো ৱেদিতব্বো. উপসম্পন্নো উপসম্পন্নং হসাধিপ্পাযো কাযেন কাযং আমসতি, আপত্তি পাচিত্তিযস্স, কো পন ৱাদো উপকচ্ছকাদীসু ঘট্টনে. অনুপসম্পন্নে দুক্কটং, তথা ভিক্খুস্স কাযপ্পটিবদ্ধামসনে চ নিস্সগ্গিযেন কাযপ্পটিবদ্ধামসনে চ. এত্থ ভিক্খুনীপি অনুপসম্পন্নট্ঠানে ঠিতা. উদকে হসনধম্মো নাম উপৰিগোপ্ফকে উদকে কীড়াধিপ্পাযস্স নিম্মুজ্জনউম্মুজ্জনপ্লৱনাদিকং. ইধ হাসো নাম কীড়া ৱুচ্চতি.

নিচ্ছুভনে ৱিহাৰাতি সঙ্ঘিকা ৱিহাৰা নিক্কড্ঢনেতি অত্থো. এত্থ পন যো কুদ্ধো হুত্ৱা উপসম্পন্নং হত্থাদীসু গহেত্ৱা ৱা ‘‘নিক্খমা’’তি ৱত্ৱা ৱা যত্তকানি দ্ৱাৰানি একেন পযোগেন অতিক্কামেতি, তত্থ দ্ৱাৰগণনায আপত্তিং অগ্গহেত্ৱা পযোগস্স একত্তা একা এৱ গহেতব্বা. সচে নানাপযোগেহি অতিক্কামেতি, তত্থ দ্ৱাৰগণনায গহেতব্বং. তস্স পৰিক্খাৰনিক্কড্ঢনে দুক্কটং, তথা অনুপসম্পন্নে, তস্স পৰিক্খাৰনিক্কড্ঢনে চ. অলজ্জিআদীসু পন অনাপত্তি.

অনুপখজ্জ সযনেতি সঙ্ঘিকে ৱিহাৰে ‘‘ৱুড্ঢো’’তি ৱা ‘‘গিলানো’’তি ৱা ‘‘সঙ্ঘেন দিন্নো’’তি ৱা জানিত্ৱা মঞ্চস্স ৱা পীঠস্স ৱা পৱিসন্তস্স ৱা নিক্খমন্তস্স ৱা উপচাৰে সেয্যং সন্থৰিত্ৱা ৱা সন্থৰাপেত্ৱা ৱা ‘‘যস্স সম্বাধো ভৱিস্সতি, সো পক্কমিস্সতী’’তি অধিপ্পাযেন অভিনিসীদন্তস্স চ অভিনিপজ্জন্তস্স চ পযোগগণনায পাচিত্তিযং ৱেদিতব্বং. পাচিত্তিযৱিনিচ্ছযো.

পাচিত্তিযনিদ্দেসৱণ্ণনা নিট্ঠিতা.