৪৬. সংৱৰনিদ্দেসৱণ্ণনা

৪৫৩. চক্খুসোতাদিভেদেহীতি (দী. নি. ১.২১৩, ৪৫৪; ম. নি. ১.৪১১; অ. নি. ৪.১৯৮; ধ. স. ১৩৫২-১৩৫৪; মহানি. ১৯৬) চক্খুসোতঘানজিৱ্হাকাযমনসঙ্খাতেহি ছহি ইন্দ্ৰিযেহীতি অত্থো. ৰূপসদ্দাদিগোচৰেতি ৰূপসদ্দগন্ধৰসফোট্ঠব্বধম্মসঙ্খাতেসু ছসু গোচৰেসূতি অত্থো. এত্থ পন হত্থপাদহসিতকথিতৱিলোকিতাদিভেদং সুভাকাৰং গহেত্ৱা অযোনিসো মনসি কৰোন্তস্স অভিজ্ঝা উপ্পজ্জতি. ‘‘অনত্থং মে অচৰি, চৰতি, চৰিস্সতী’’তিআদিনা (পৰি. অট্ঠ. ৩২৯) নযেন পটিঘনিমিত্তং গহেত্ৱা অযোনিসো মনসি কৰোন্তস্স ব্যাপাদো উপ্পজ্জতি. এত্থ পন ইত্থিপুৰিসনিমিত্তং ৱা সুভনিমিত্তাদিকং কিলেসৱত্থুভূতং নিমিত্তং অগ্গণ্হিত্ৱা দিট্ঠে দিট্ঠমত্তাদিনা পটিপজ্জিত্ৱা অসুভনিমিত্তে যোনিসো মনসিকাৰং বহুলীকৰোন্তস্স অভিজ্ঝায পহানং হোতি. ‘‘অনত্থং মে অচৰি, তং কুতেত্থ লব্ভা’’তিআদিনা ৱা মেত্তাভাৱনাদিৱসেন ৱা যোনিসো মনসি কৰোন্তস্স ব্যাপাদপ্পহানং হোতি. এৱমিদং সঙ্খেপতো ৰূপাদীসু কিলেসানুবন্ধনিমিত্তাদিগ্গাহপৰিৱজ্জনলক্খণং ইন্দ্ৰিযসংৱৰসীলন্তি ৱেদিতব্বং.

৪৫৪. নিগ্গণ্হেয্যাতি নিৱাৰেয্য;

‘‘যানি সোতানি লোকস্মিং; (অজিতাতি ভগৱা,)

সতি তেসং নিৱাৰণং;

সোতানং সংৱৰং ব্ৰূমি;

পঞ্ঞাযেতে পিধিয্যৰে’’তি –. (সু. নি. ১০৪১);

ৱুত্তত্তা ‘‘সতিমা সম্পজানো ৱা’’তি ৱুত্তং. এত্থ পন চতুব্বিধং সম্পজঞ্ঞং সাত্থকসপ্পাযগোচৰঅসম্মোহৱসেন. সংৱৰৱিনিচ্ছযো.

সংৱৰনিদ্দেসৱণ্ণনা নিট্ঠিতা.