৪৭. সুদ্ধিনিদ্দেসৱণ্ণনা

৪৫৫. দেসনা সংৱৰো এট্ঠি, পচ্চৱেক্খণ ভেদতোতি (পাৰা. অট্ঠ. ২.৫৮৫; ৱিসুদ্ধি. ১.১৯) দেসনাসুদ্ধি সংৱৰসুদ্ধি পৰিযেট্ঠিসুদ্ধি পচ্চৱেক্খণসুদ্ধীতি এৱং চতুব্বিধা সুদ্ধীতি অত্থো. ইদানি তাহি সুদ্ধীহি ৱিসুজ্ঝনকে দস্সেতুং ‘‘পাতিমোক্খসংৱৰসম্মত’’ন্তিআদিমাহ.

৪৫৬. ‘‘পুন এৱং ন কৰিস্স’’ন্তি চিত্তাধিট্ঠানসংৱৰা যস্মা সুজ্ঝতি ইন্দ্ৰিযসংৱৰো, তস্মা ইন্দ্ৰিযসংৱৰো ‘‘সংৱৰসুদ্ধী’’তি ৱুত্তোতি সম্বন্ধো.

৪৫৭. পহাযানেসনন্তি অনেসনং পহায ধম্মেন উপ্পাদেন্তস্স পচ্চযেতি পাঠসেসো.

৪৫৮. ‘‘পটিসঙ্খা যোনিসো চীৱৰং পটিসেৱামি…পে… উপ্পন্নানং ৱেয্যাবাধিকানং…পে… পৰমতাযা’’তি (ম. নি. ১.২৩; অ. নি. ৬.৫৮) চ এৱং চতূসুপি পচ্চযেসু যথাৱুত্তপচ্চৱেক্খণসুজ্ঝনাতি অত্থো. এত্থ পন দুৱিধং পচ্চৱেক্খণং পটিলাভকালে চ পৰিভোগকালে চ. পটিলাভকালে হি ধাতুৱসেন ৱা পটিক্কূলৱসেন ৱা পচ্চৱেক্খিত্ৱা ঠপিতচীৱৰাদীনি ততো উত্তৰি পৰিভুঞ্জন্তস্স অনৱজ্জোৱ পৰিভোগো, পৰিভোগকালেপি. সুদ্ধিৱিনিচ্ছযো.

সুদ্ধিনিদ্দেসৱণ্ণনা নিট্ঠিতা.